1. Ku tirhisiwa ka tiphurogiremenkulu ta mfumo
1.1. Khabinete yi amukela Mbulavulo wa Mpimanyeto wa 2016 lowu nga endliwa hi Holobye wa Timali Pravin Gordhan hi ti 24 Nyenyenyani 2016. Mpimanyeto lowu wu kombisa ku tiyelela, ku tinyiketela na ku tirha hi ku hetiseka loko hi famba eka nkarhi wa ikhonomi leyi nga ri ki kahle loko hi langute matimu.
Mpimanyeto wu hlamula eka leswi tiko ri swi lavaka no tumbuluxa vutitshembhi eka ikhonomi hi ku veka tiko eka ndlela ya nkulo wa ikhonomi leyi tshembhekeke, ya nkarhi wo leha no koteka.
Khabinete yi ya emahlweni yi amukela matshalatshala ya xiboho xo hunguta tihakelo no tinyiketela ku tirha swinwe eka tisekithara hinkwato eku hoxeni ka xandla eka ntirho wa nhlengelo wa rixaka wo tirhisa matirhelo lawa ya nga vekiwa hi mpimanyeto.
1.2. Khabinete yi amukela ku simekiwa ka Ntlawa wa Mahungu wa Phuresidente (PPC) hi Phuresidente Jacob Zuma. PPC yi ta va na vahleri va tipolitiki, vateki va mahungu va tipolitiki, vaviki va tipolitiki na van’wamahungu va swa ikhonomi lava nga tiyisisiwa ku angarhela Hofisi ya Phuresidente eka nkarhi hinkwawo kumbe eka nkarhi lowu ya ka emahlweni.
Xikongomelo xa PPC i ku nyika mfikelelo lowu antswisiweke eka mahungu hi swihangalasamahungu eka Phuresidente na Hofisi ya Phuresidente, ku kota ku tiyisisa leswaku vateki va mahungu va kuma mahungu ya masungulo na tiphurosese ku ndlandlamuxa ku twisisa no vika ka vona. Swirho swo tiya swa mahungu swi ta kuma mimbhurisano ku suka eka Xandla xa Phuresidente na Holobye un’wana ni un’wana loyi Phuresidente yi n’wi rhambaka ku ta avelana hi tiphurogireme leti nga ta nkoka eka rixaka.
1.3. Khabinete yi kombisile ku amukela eka ku hoxa xandla loku Afrika-Dzonga ri nga ku endla eku vuyiseleni ka ku rhula eBurundi, hi ku fambisana na vutinyiketeri bya pholisi ya hina ya matikomambe ku tiyisisa tikonkulu ro rhula no tshamiseka.
Yi yi le emahlweni yi amukela mimbuyelo ya nkatsakanyo wa N’wangulano wa Burundi lowu a wu khomiwile hi nkarhi wa ku endza ka varhumiwa va xiyimo xa le henhla va Varhangeri va Matiko va Nhlangano wa Afrika (AU) na Mfumo eBujumbura eBurundi, lowu a wu rhangeriwe hi Phuresidente Zuma.
1.4. Khabinete yi amukerile ku thoriwa ka Phuresidente Zuma hi Matsalana-Angarhelo wa Nhlangano wa Tinxaka (UN) Ban Ki-moon, ku fambisa swin’we Khomixini ya Xiyimo xa le Henhla eka Mitirho ya Rihanyo na Nkulo wa Ikhonomi na Phuresidente François Hollande wa Rhiphabuliki ra France. A hi nkarhi wo sungula laha Phuresidente Zuma a nga thoriwa hi nhlangano wa misava ku teka ntirho eka xiyimo xa misava hinkwayo. Ku thoriwa loku ku fambisana no tekeriwa enhlokweni ka vurhangeri bya xiyimo xa le henhla lebyi kombisiwaka hi Phuresidente wa hina endhawini ya misava hinkwayo.
Khomixini yi ta kondletela ku tumbuluxiwa ka swivandla swintshwa swa mitirho eka sekithara ya swa rihanyo ematikweni hinkwawo, ngopfungopfu eka matiko lawa ya ha tumbulukaka. Leswi swi tiyisa ku tirhisiwa ka Ajenda ya Nhluvukiso wa Nkarhi wo Leha ya 2030, leyi nga pfuna nkarhi wo leha eku ololoxeni ka swiphiqo swinharhu swa mitirho, vusweti na pfumaleko wa ndzingano.
1.5. Khabinete yi amukela ku simekiwa ka Ndzavisiso wa Miganga ya Rixaka wa 2016 eMamelodi, ePretoria hi Holobye eka Hofisi ya Phuresidente Jeff Radebe na N’watihlayohlayo-Angarhelo Pali Lehohla. Ndzavisiso wa lembe leri wu le ku endliweni ehansi ka nhlokomhaka: “Afrika-Dzonga leri ndzi ri tivaka, kaya leri ndzi ri twisisaka” naswona ri kongomanile na makaya ya 1,5 miliyoni – hi lowukulu ku fika sweswi loko ku fananisiwa na lowu nga endliwa tlhanu wa malembe lawa ya nga hundza lowu a wu gavile 300 000 wa mindyangu. Ndzavisiso wu ta sunguriwa hi Dzivamisoko naswona mimbuyelo yi ta va kona hi ku hela ka Khotavuxika 2016.
1.6. Khabinete yi lemuke hi xivilelo xiviko lexi nga vikiwa hi Nhlangano wa Rihanyo wa Misava na Nhlangano wa Ntirhisano wa swa Ikhonomi na Nhluvukiso eka Ndzavisiso wa Makete ya Rihanyo lowu rhangeriweke hi Justice Sandile Ngcobo. Swiviko swi kombisa leswaku Afrika-Dzonga ri nyika vukorhokeri byo durha swinene bya swa vutshunguri loko ku fananisiwa na matiko yan’wana. Khabinete yi ta yimela ku gimetiwa ka ndzavisiso yi nga se tivisa mhaka leyi.
2. Swibohonkulu swa Khabinete
2.1. Khabinete yi amukerile ku humesiwa ka Mpfapfarhuto wa Kungu wo ololoxa Nthyakiso wa Moya eMigangeni ya Afrika-Dzonga yo Manyana ya Miholo ya le Hansi leswaku vanhu va ta angula eka wona. Kungu ri langutane no nyika endlelo ro kongoma no tinyiketela ku tirhana na nthyakiso wa xiyimo xa le henhla emigangeni yin’wana leyi nga manyana ya miholo ya le hansi.
Wu nyika endlelo ro fambisa eka matshalatshala ya matirhiselo ku hunguta ku pfurhisiwa ka fuwele ya le makaya. Nghenelelo i ku tiyisisa leswaku tindhawu leti ti fambisana na Swiyimo swa Nkoka wa Ntshamiseko wa Moya wa Rixaka. Kungu leri ro kongoma ri ta seketela kungu ra rixaka leri nga kona ku ololoxa nthyakiso wa moya laha tikweni.
2.2. Khabinete yi amukerile ku khomisana ka Khomferense ya vu 21 ya Misava hinkwayo ya AIDS (AIDS 2016) exikarhi ka mfumo na Nhlangano wa Misava hinkwayo wa AIDS eSenthareni ya Tinhlengeletano ta Misava hinkwayo (ICC) eDurban ku sukela hi ti 18 ku fikela hi ti 22 Mawuwani 2016. Ku khoma khomferense swi ta ndlandlamuxa ku tihlamulela ka tiko ra hina eka HIV na rifuva loko hi le tlhelo ku ri karhi ku tirhaniwa na wun’we wa mintlhotlho ya nkoka eAfrika-Dzonga, xifundzha na misava hinkwayo.
Khomferense leyi yi ta nyika pulatifomo eka valavisisi ku suka emisaveni hinkwayo ku avelana swikumiwa swa sweswinyana swa xisayense eka ntirho, ku dyondza eka vutokoti bya vona vinyi na ku tumbuluxa makungu yo hetisisa matlhelo hinkwawo ya matshalatshala ya hina yo hlengeletana ku tshungula no sivela HIV.
3. Nawumbisi
3.1. Khabinete yi amukerile ku yisiwa ka Nawumbisi Ndzhundzhuluko wa Swifambo swo famba eMisaveni swa Rixaka wa 2015 ePalamende, lowu hundzuluxaka Nawu wa Swifambo leswi fambaka eMisaveni, 2009 (Nawu wa vu 5 wa 2009). Mindzhundzhuluko leyi eka Nawu wa Swifambo leswi fambaka eMisaveni wa 2009 yi ta ya emahlweni yi hetisisa phurosese yo cinca no aka hi vuntshwa sisiteme ya rixaka ya swifambo swo famba emisaveni. Leswi swi ta hoxa xandla eka vukorhokeri bya swifambo swa vanhu leswi hlayisekeke, ku fikeleleka, ku tshembheka no tirha hi ku hetiseka.
Nawumbisi wu ta nyika switumbuluxiwa leswintshwa eka sekithara ya swifambo swa vanhu. Nawumbisi wu ta nyika xiletelo eka, exikarhi ka swin’wana, swifambo leswi nga ri ki swa movha; vukorhokeri bya swo famba swo odariwa hi xitironiki no tsariwa ka swifambo swa vanhu. Wu ya emahlweni wu nyika nhlamuselo ya vulawuri eka eka matimba na milawu leyi nga rhumeriwa hi ku landzela ku nyikiwa ka tilayisense to tirha hi tona eka swifambo swa vanhu.
Nawumbisi lowu wu ta kotisa ku sunguriwa ka Tinetiweke ta Swifambo swa Vanhu leswi hlanganisiweke naswona wu ta vumba xiphemu xa Kungu ra Switirhisiwa swa Rixaka na Kungu ro Hlanganisiwa ra Phurojeke 7, leyi kongomaneke no tirhisa nhluvukiso wo fambisiwa ka madoroba na tinetiweke ta swifambo leti hlanganisiweke ku tumbuluxa madorobankulu tanihi tinjhini ta nkulo.
4. Mitlangu leyi ta ka
4.1. Phuresidente Zuma u ta teka Rendzo ra Mfumo ku ya eRhiphabuliki ra Xifederali ra Nigeria ku sukela hi ti 8 ku fikela ti 9 Nyenyankulu 2016. Rendzo ra Mfumo ri ta ndlandlamuxa vuxaka bya hi kambirhi lebyi nga kona no kurisa ku ya emahlweni mabindzu ya le ka swifundzha.
4.2. Nhweti ya Timfaneo ta Ximunhu hi Nyenyankulu 2016 yi ta tlangeriwa ehansi la nhlokomhaka: “Afika-Dzonga ri hlangana ku lwa na xihlawulambala.” Ndzawulo ya Vutshila na Ndhavuko hi vekile phurogireme leyi nga leha ku ringana nhweti leyi katsaka min’wangulano yo hlaya yo tirha swin’we ku aka vaakatiko, lava pfumalaka xihlawulambala, xihlawularimbewu, ku ringana no va na xidemokirasi.
Khabinete yi rhamba vaaki va Afrika-Dzonga ku vula xo karhi eka Kungu ra Xiendlo ra Rixaka ro lwa na Xihlawulambala, ku Tsan’wiwa ku ya hi Rimbewu, Xihlawuhlawu eka Vahlapfa na leswi Yelanaka na Ntsandzeko wo Tiyiselana (2016-2021) ku nga si fika ti 30 Khotavuxika 2016. Kungu ri nyika tshaku ra Pholisi ya mfumo loko ku fananisiwa na ku tsan’wiwa hi ku ya hi muvala leswi nga ta pfuna eka ku sungurisa swiboho swa hina swa timfanelo ta ximunhu ta misava hinkwayo.
4.3. N’wangulano wa Russia-Africa wo Lwa na Swidzidziharisi eICC eDurban ku sukela hi ti 8 ku fikela ti 9 Nyenyankulu 2016 wu nyika pulatifomo yo ndlandlamuxa Kungunkulu ra Rixaka ra Swidzidziharisi (2013-2017).
Nyimpi yo lwa na swidzidziharisi leswi nga ri ki enawini yi xaxametiwe na Kungu ra Nhluvukiso wa Rixaka naswona n’wangulano wu le hansi ka vulawuri bya AU hi ku fambisa swiboho hi ku ya hi Mintwanano ya UN ya Swidzidziharisi na Vugevenga bya Mihlangano ya Misava Hinkwayo, Kungu ra Xiendlo ra AU eka ku lawula Swidzidziharisi (2013-2017) na swintshuxo swa BRICS (Brazil, Russia, India, China na Afrika-Dzonga).
Khomferense i sexini yo landzela ya N’wangulano wo Lwa na Swidzidziharisi wa Russia-Africa, leyi kongomeke eka ku kombisa xiyimo lexi hlanganisiweke xa leswi varhangeri va misava va nga tiyimisela ku ololoxa xiphiqo xa swidzidziharisi hi kona. Leswi swi ta andlariwa eka Sexini yo Hlawuleka ya Nhlengeletano yo Angarhela ya UN hi Dzivamisoko 2016.
4.4. Mfumo – hi xinakulobye na Matsalana wa Commonwealth, Yunivhesiti ya Afrika-Dzonga (UNISA) na Ejensi ya Rixaka ya Nhluvukiso wa Vantshwa – swi ta khoma Khomferense ya Vumbirhi ya Commonwealth eka Mitirho ya Vantshwa ekhamphasini ya UNISA ePretoria ku sukela hi ti 8 ku fikela hi ti 10 Nyenyankulu 2016. Khomferense yi ta endliwa ehansi ka nhlokomhaka: “Ku Nghenelerisa Vantshwa eka ku Akiwa ka Rixaka: Ntirho wa Vatirhi va Vantshwa” naswona yi ta kambisisa nakambe ntirho wa vatirhi va vantshwa na swidyondzeki eku ngheneleriseni ka vantshwa eka ku hluvukisa matiko ya vona.
5. Xiyimo xa Khabinete eka timhaka ta nkoka embangwini
5.1. Khabinete yi tiyisisa mahungu hi Phuresidente Zuma eka xilaveko xo xixima mihlangano na tiphurosese leswi nga endliwa hi ku ya hi Vumbiwa ra Rhiphabuliki ra Afrika-Dzopnga ra 1996 na nawu. Phuresidente Zuma u tirhana na mhaka ya Khomixinara wa Vukorhokeri bya Xibalo bya Afrika-Dzonga na Holobye wa Timali hi tindlela to lulama to tirhisa milawu.
Phuresidente u le ku vekeni ka matshalatshala yo ololoxa timhaka hi ndlela ya vutihlamuleri no rhula ku vuyerisa vanhu hinkwavo. Khabinete yi kombela mavandla hinkwawo lawa ya tsakelaka ku dzika no lawuleka, no pfumelela timhaka leswaku ti ololoxiwa hi ku tirhisa tindlela leti lulameke.
5.2. Khabinete yi kombela vaaki va Afrika-Dzonga hinkwavo ku titsarisela eka Mihlawulo ya Mfumo ya Miganga ya 2016 hi ti 5 na ti 6 Nyenyankulu 2016. Ku hambana na mihlawulo ya rixaka, mihlawulo ya mfumo wa miganga yi lava leswaku u tsarisa ewadini leyi u tshamaka eka yona.
Swi na nkoka ku va na Papila ra Vutitivisi (ID) – ID ya rihlaza leyi nga na bakhodi kumbe Khadi ro Tlhariha ra ID haswimbirhi swi ta amukeriwa– no languta xiyimo xa wena xa ntsariso, nomboro ya wadi na ndhawu ya xitichi xo vhotela. Tihofisi hinkwato ta Timhaka ta Xikaya ti ta pfula ku sukela hi 08:00 ku fikela hi 17:00 hi ti 5 na ti 6 Nyenyankulu 2016, leswi fambisanaku na mikarhi yo tirha hi yona ya Khomixini yo Tiyimela yoxe ya Nhlawulo eka masiku mambirhi.
Khabinete yi kombela vantshwa hinkwavo na lava nga ta vhota ro sungula ku titsarisela ku vhota. Hi ku vhota ka wena u tekile goza eku endleni leswaku rito ra wena ri twiwa eka swiboho leswi ku khumbhaka na muganga wa wena. Mfumo wa muganga wu le mavokweni ya wena!
5.3. Khabinete yi sola ku kombisa ku vilela hi swichudeni ka madzolonga, loku nga kanganyisa tidyondzo etiyunivhesiti tin’wana naswona leswi nga fikelela eka ku onhiwa ka nhundzu. Mikombiso leyi yo vilela yi tsona vadyondzi lava nga fanela nkarhi wo yisa tidyondzo ta vona emahlweni no khumba mfanelo ya vona eka dyondzo ya le hendla.
Mfumo wu pfurile tindlela hinkwato ta mbhurisano na swirho hinkwaswo swa dyondzo ya le henhla ku burisana na min’wangulano. Leswi swi fikelerise eka ku pfuxetiwa hi vuntshwa ka ntshamiseko na ku ndlandlamuxiwa ka ku hlangana ka vanhu eka tiyunivhesiti ta hina leswi lavaka ku kuma swintshuxo eka mintlhotlho ya nkarhi wa le xikarhi na ya nkarhi wo leha leyi nga katsiwa eka sekithara ya cinco leyi nga hlamuseriwa eka swiboho swa Samiti yo Cinca Dyondzo ya le Henhla ya 2015.
Khabinete yi seketela matshalatshala ya tiejensi to hlayisa nawu ku tiyisisa leswaku ndhavuko wa dyondzo wa pfuxetiwa hi vuntshwa, naswona nhundzu na timfanelo ta vanhu swa sirheleriwa. Ku fuma ka nawu ku le henhla naswona ku fanele ku hlayisiwa hi mikarhi hinkwayo. Ntshamiseko no rhula swi fanele ku vuya etiyunivhesiti ta hina leswaku tiphurogireme ta dyondzo ti ya emahlweni loko mintlhotlho ya nkarhi wa le xikarhi ku ya eka nkarhi wo leha yi ri karhi yi ololoxiwa.
Khabinete yi hoyozerile swichudeni leswi nga hlangana tanihi hi nyandza yin’we ku lwa na xihlawulambala na ku lwa na xihlawularimbewu, leswi tirhaka tanihi xikombiso xa leswaku hi nga tirha hinkwerhu swin’we ku aka eka ku humelela na mimbuyelo leyi nga endliwa eka sekithara ya dyondzo ya le thexiyari eku lunghiseleni ka lembe dyondzo leri. Hi fanele ku sirhelela ku humelela koko no pfumelela ku tshamiseka ku vuyiseriwa no hlayisiwa eka tiyunivhesiti ta hina.
Khabinete yi kombela swirho hinkwaswo ku tirha swin’we leswaku tiyunivhesiti ta hina ti hundzuka varhangeri va nghenelelo na ku cinca hi nkatsakanyo.
5.4. Khabinete yi lemuka ku hlangana loku nga bumabumeriwa hi mihlangano ya swa mabodlhela yinharhu eka Khamphani ya Coca Cola eAfrika-Dzonga. Khabinete yi lemuka mhaka leyi na leswaku yi ta twiwa eka Huvo ya Mphikizano. Khabinete yi boxa xivilelo xa yona eka ku lahleka ka mitirho loku nga bumabumeriwa no hungutiwa ka mitirho loko ku hlangaana ku humelela. Hi ku languta swiyimo swa le henhla swa mitirho, Khabinete yi kombela tikhamphani ku tiyisisa leswaku mitirho a yi lahleki na mpimo wa mitirho wu tshama wu nga cinci.
5.5. Khabinete yi hoyozela Murhumiwa wa Afrika-Dzonga eka Nhlangano wa Mabindzu ya Misava (WTO), Tatana Xavier Carim, loyi a nga hlawuriwa ku fambisa Nhlangano wo Ololoxa Swiphiqo wa Khansele yo Angarhela ya WTO. Khansele yo Angarhela i nhlangano wa le henhla lowu endlaka swiboho wa WTO exikarhi ka Khomferense ya Vaholobye. Ku thoriwa ka Murhumiwa Carim i xiphemu xo tekela enhlokweni xa ntirho wa nkoka lowu Afrika-Dzonga ri wu tirhaka eka WTO naswona i xiphemu xa vumbhoni bya hanyelo ra Murhumiwa Carim.
5.6. Khabinete yi lemukile xitiviso xa Barclays PLC xa xikongomelo xo hunguta 62.3% ya yona ya nkhomo wa minkavelo eka Ntlawa wa Barclays Africa (BAGL) eka malembe mambirhi ku ya eka manharhu lawa ya ta ka. Barclays PLC, ngopfungopfu CEO, u tinghenisile eka Timali ta Rixaka na Bangikulu ya Tiko haswimbirhi eka n’wangulano wo pfuleka, naswona hi amukela ku tinyiketela ka khamphani ku tirhisa kungu ra yona lerintshwa hi ndlela leyi nga ta hunguta ntshikelelo wa tiikhonomi laha BAGL yi tirhaka kona. Banginkulu ya tiko yi ta tirha na Barclays PLC na BAGL ku tiyisisa leswaku leswaku mixungeto leyi nga va ka kona eka ntirhisano ya ahluriwa naswona tindlela leti nga fanela ti ta tekiwa ku fambisa mafambele ya timali leti nga ta suka eka ntirhisano.
5.7. Khabinete yi losa lava nga fikelela emakumu na vawini eka Masagwadi ya Vudyondzisi bya Rixaka lawa ya nga va kona hi ti 27 Nyenyenyani 2016. Vadyondzisi lava tinyiketeleke va yisa tiko ra hina emahlweni hi ku tiyisisa leswaku tikamara to dyondzela ti humesa vadyondzi lava tiyisisiweke lava nga ta hoxa xandla eku hluvukiseni ka Afrika-Dzonga.
5.8. Khabinete yi hoyozela Market Thiyeta eJoni ku va yi tlangela 40 wa malembe yi ri karhi yi hanya. Hi nkarhi wa xihlawihlawu thiyeta yi hundzuke xikombiso xa Nyimpi hi ku vula xitori xa ntiyiso xa Afrika-Dzonga.
5.9. Khabinete yi khensisa mudyondzisi wa vuyimbeleri, Tatana Chad Hendricks, ku suka eRetreat eTifuleteni ta le Kapa ku va winile Mphikizano Vafambisi wa xiyimo xa le henhla wa Len van Zyl eKapa. Sagwadi ra yena ri katsa sikolaxipi xa tinhweti tinharhu eUnited States laha Tatana Hendricks a nga ta dyondza ePhiladelphia Orchestra naswona a nga ta leteriwa hi Phurofesa wa ndhuma Victor Yampolsky eChicago.
5.10. Khabinete yi hoyozele muhumelerisi wa tifilimi Tatana Anant Singh, ku va a kumile ndhawu xiyimo xa vunharhu ku va a tlangile eka ka filimi ya Shepherds and Butchers eka Sagwadi ra Panorama Audience eka Filimi leyi nga ri ki ya Ntiyiso eka Fesithivhali ya Tifilimi ta Misava hinkwayo ya Berlin. Loku i ku humelela lokukulu tanihileswi filimi a yi phikizana na 51 wa tifilimi to leha ku suka eka matiko ya 33.
6. Ku thoriwa
Vuthori hinkwabyo byi ta endliwa endzhaku ka ku tiyisisiwa ka tidyondzo na mbhasiso lowu faneleke.
6.1. Ku engeteriwa ka kondiraka ya Tatana Lionel October tanihi Mulawuri-Angarhelo (DG) eka Ndzawulo ya Mabindzu na Vumaki, eka nkarhi wa ntlhanu wa malembe.
6.2. Ku thoriwa ka Dokodela Mantlhake J Maboya tanihi Xandla xa DG (DDG): Pholisi ya Kharikhulamu na Nkambisiso eka Ndzawulo ya Dyondzo ya Masungulo.
6.3. Ku thoriwa ka Manana Shamilla Chettiar tanihi DDG: Pholisi na Vukorhokeri bya Vutivi eka Ndzawulo ya Vupfhumba.
6.4. Ku thoriwa ka Tatana Mbulelo Tshangana tanihi DG eka Ndzawulo ya Vutshamo bya Vanhu.
6.5. Ku thoriwa nakambe ka Tatana Kutoane Obed Kutoane tanihi Muofisirinkulu wa swa Timali eka Nhlangano Afrika-Dzonga SOC wa Ndzindzakhombo ya Swikweleti swa Nhundzu leyi Yisiwaka eka Matikomambe.
6.6. Ku thoriwa ka Tatana Vuyo Mafata tanihi Khomixinara wa Ndziriso: Nkwama wa Ndziriso eka wa Ndzawulo ya Mintirho ya Mfumo.
6.7. Ku thoriwa nakambe ka Phanele ya Vulawuri byo Teka hi ku hetiseka nkarhi wa tlhanu wa malembe:
a) Manana Neo Phakama Dongwana (Mutshamaxitulu);
b) Phurofesa Stephanie Marie Luiz (Xandla xa Mutshamaxitulu);
c) Phurofesa Shirley Zinn (xirho xa phanele);
d) Adivhokheti Rory Voller (xirho xo hlawuriwa);
e) Manana Wendy Ndlovu (xirho xo hlawuriwa);
f) Manana Annalie de Bruyn (xirho xo hlawuriwa); na
g) Tatana Nano Abram Matlala (xirho xa phanele).
6.8. Ku thoriwa eka Bodo ya Nhlangano wa Eneji ya Nyutliliya ya Afrika-Dzonga eka nkarhi wa malembe ya nharhu:
a) Tatana Nqaba Ngcobo;
b) Dokodela Namane Magau;
c) Dokodela Xolani Mkhwanazi;
d) Dokodela Alex Smanga Tsela;
e) Manana Rosemary Mosia;
f) Dokodela Kelvin Kemm (Mutshamaxitulu);
g) Tatana Zibusise Comfort Ngidi;
h) Manana Pamela Bosman; and
i) Hosana Kennedy Tshivhase.
Swivutiso: Manana Phumla Williams (Muvulavuleri wa Khabinete wo Khomela)
Selulafoni: 083 501 0139
