Mudende wa lava dingaka nhlayiso wa nkarhi hinkwawo

Mudende wa lava dingaka nhlayiso wa nkarhi hinkwawo
Leswi u faneleke ku swi endla
Leswi u faneleke ku swi endla
Xana swi durha mali muni
Tifomo leti tatiwaka
Vuxokoxoko bya vutihlanganisi

 

 

 

Hi mayelana na mudende wa lava dinagka nhlayiso wa nkarhi hinkwawo

Kuma mudende wo hlayisa n’wana loyi a nga na vutsoniwa byo tika naswona a ri loyi a dingaka nhlayiso wa nkarhi hinkwawo na ku va wo hlawuleka.

Mudende wa lava dingaka nhlayiso wa nkarhi hinkwawo wu sirhelela vana lava tsoniweke kusuka eku velekiweni kufika loko va khoma 18.

Xana u swi tiva njhani loko u fikelela?

U fanele:

  • ku va mutswari, muhlayisinkulu kumbe muwundli loyi a thoriweke hi khoto
  • ku va muakatiko wa Afrika-Dzonga kumbe mutshami wa nkarhi hinkwawo
  • ku va u nga holi kutlula R223 200 hi lembe loko u nga ri na vukati. Malinghena ya n’wina leyi katsanisiweke a yi fanelangi ku va ehenhla ka R446 400  hi lembe loko u tekile/u tekiwile.

Tekela enhlokweni: Mpimo lowu wa malinghena a wu tirhi eka vatswari vo wundla.

N’wana u fanele:

  • a ri ehansi ka 18 wa malembe
  • a nga hlayisiwi hindlela ya nkarhi hinkwawo eka nhlangano wa mfumo
  • a ri na vutsoniwa byo tika naswona a dinga nhlayiso wa nkarhi hinkwawo na ku va wo hlawuleka

Havumbirhi bya wena na n’wana loyi mi fanele ku va mi tshama eAfrika-Dzonga.

Tekela Enhlokweni: Muofisiri wa swa vutshunguri wa mfumo u fanele ku kambela n’wana loyi mudende wu nga si pasisiwa.

Xana u ta kuma mali muni?

U ta kuma R2 080 hi n’hweti.

Xana u ta hakeriwa njhani?

Ejensi ya Mali ya Nhlayiso wa Vaaki ya Afrika-Dzonga (SASSA) yi ta ku hakela mudende lowu hi ku tirhisa yin’we ya tindlela leti landzelaka:

  • mali yinene eka ndhawu yo holela yo karhi hi siku ro karhi
  • dipoziti ya xielekitironiki eka akhawunti ya wena ya bangi kumbe ya Postbank (bangi yi nga ha ku hakerisa hakelo ya vukorhokeri)
  • nhlangano lowu tirhaka tanihi mulawuri wa mudende (xik. mihlangano ya ku hanya kahle ka vaaki)

Tekela enhlokweni: Loko u nga koti ku kuma mali ya wena hi wexe, u nga thola muyimeri ehofisini ya SASSA, kumbe u nyika munhu un’wana matimba ya muyimeri wa swa nawu ku teka mudende hi ku yimela wena.

Xana i rini mudende wa n’wana loyi wu nga ha kambisisiwaka?

SASSA yi nga teka xiboho loko mudende wa wena wu fanele ku kambisisiwa. Malinghena ya wena tanihilaha yi tivisiweke hakona loko u endla xikombelo xa mudende yi ta vumba xivangelo xa xiboho lexi. U ta tivisiwa ka ha sale tin’hweti tinharhu hi siku leri nkambisiso wu nga ta endliwa harona kumbe siku leri xitifikheti xa vutomi (dokhumente leyi yi tiyisisaka leswaku wa ha hanya) xi lavekaka harona. Loko u kuma mali ya wena hi ku tirhisa bangi, nhlangano kumbe muyimeri, u nga ha laveka ku tatisa xitifikheti xa vutomi etihofisini ta SASSA lembe rin’wana na rin’wana.   

Xana i rini mudende wa n’wana loyi wu nga ha yimisiwaka nkarhinyana?

Leswi landzelaka swi nga ha vanga ku yimisiwa nkarhinyana ka mudende lowu:

  • loko swiyimo swa n’wana loyi swi cinca
  • mbuyelo wa nkambisiso
  • loko u hluleka ku tirhisana loko mudende wa n’wana loyi wu kambisisiwa
  • loko u endla vumbabva kumbe u hembela n’wana loyi
  • loko ku vile na xihoxo loko mudende wa n’wana wena wu pasisiwa.

Xana i rini mudende wa wena wu nga ta hundzeriwa hi nkarhi?

Mudende lowu wu ta hundzeriwa hi nkarhi loko:

  • n’wana loyi a lova
  • n’wana loyi a amukeriwa eka nhlangano wa mfumo
  • muvuyeriwa loyi a nga muhlayisi a nga koxi mudende ku ringana tin’hweti tinharhu hi ku landzelelana
  • n’wana a nga ha ri kona etikweni
  • a  khoma 18.

Leswi u faneleke ku swi endla

  1. Yana ehofisini ya Ejensi ya Mali ya Nhlayiso wa Vaaki ya Afrika-Dzonga (SASSA) ya le kusuhi na laha u tshamaka kona naswona u ta na leswi landzelaka:
    • pasi (ID) ra wena leri nga na bakhodi ya tidijiti ta 13 na xitifikheti xa ku velekiwa. Loko u ri hava ID kumbe xitifikheti xa ku velekiwa:
      • Tatisa afidavhiti eka fomo leyi tirhisiwaka ya SASSA emahlweni ka Muhlambanyisi loyi a nga riki ofixiyali ya SASSA.
      • Tana na xitatimente lexi hlambanyiweke lexi sayiniweke hi munhu loyi a tivekaka (wo tanihi khanselara, murhangeri wa ndhavuko, soxaliweka, mufundhisi kumbe nhloko ya xikolo) loyi a nga tiyisisaka vito ra wena na vukhale hi malembe.
      • Ofixiyali ya SASSA yi ta teka mugandlu wa tintiho ta wena kutani yi ku kongomisa eka Ndzawulo ya Timhaka ta Xikaya ku endla ya endla xikombelo xa ID loko xikombelo xa wena xa ha ri eku tirhiweni. Loko u nga yi kumi ID, mudende wa wena wu ta yimisiwa nkarhinyana.
      • Vumbhoni bya leswaku u endlile xikombelo xa ID na/kumbe xitifikheti xa ku velekiwa eka Ndzawulo ya Timhaka ta Xikaya
      • ID ya nkarhinyana leyi nyikiwaka hi Ndzawulo ya Timhaka ta Xikaya (loko yi kumeka).
      • Xitifikheti xa nkhuvulo loko xi ri kona.
      • Khadi ra tliliniki ra Road to Health.
      • Rhipoto ya xikolo loko yi ri kona.
    • Xiviko a vutshunguri/nkambelo lexi tiyisisaka vutsoniwa bya n’wana loyi.
    • Vumbhhoni bya xiyimo xa wena xa vukati.
    • Xilipi xa wena xa muholo, switatimente swa bangi swa tin’hweti tinharhu leti nga hundza, kumbe swilipi swa phenceni, na vumbhoni byin’wana byihi kumbe byihi bya malinghena. (Tekela enhlokweni: leswi a swi tirhi eka eka vatswari vo wundla lava nga vabaleki.)
    • Loko u:
      • nga ri mutswari wa n’wana loyi, vumbhoni bya leswaku u muhlayisinkulu wa n’wana loyi hi ku tirhisa afidavhiti yo huma emaphoriseni, xiviko xa soxaliweka, afidavhiti yo huma eka mutswari wa ngati kumbe papila ro huma eka nhloko ya xikolo kusuka eka xikolo lexi n’wana loyi a nghena eka xona.
      • ri mutswari wa ngati wa n’wana loyi na mutswariyexe na muhlayisi, vumbhoni bya leswaku u ringetile ku kuma mutswari lon’wana ku hakela mali ya sapota.
      • nga thoriwangi, vumbhoni byo huma eka Nkwama wa Ndzindzakhombo wa lava nga Tirhiki (UIF) kumbe xitifikheti xa ku hlongoriwa kusuka eka muthori wa nkarhi lowu nga hundza
      • mutswari wo wundla wa mubaleki, phemiti ya xiyimo xa mubaleki na pasi ra mubaleki 
      • mutswari wo wundla wa n’wana loyi, xileriso xa khoto lexi vekaka n’wana loyi eka nhlayiso wa wena.
      • Hi kombela u tekela enhlokweni: Loko u dyuharile kumbe u vabya kutlula mpimo ku teka rendzo ku ya ehofisini ku ya endla xikombelo, xirho xa ndyangu kumbe munghana a nga endla xikombelo hi ku yimela wena. Munhu u fanele ku teka papila eka wena na/kumbe papila ra ka dokodela leri vulaka leswaku hikwalahokayini u nga koti ku ya ehofisini.
  2. SASSA yi ta kongomisa n’wana loyi ku ya kamberiwa hi muofisi wa vutshunguri wa mfumo xikombelo xi nga si endliwa.
  3. Tatisa fomo ya xikombelo emahlweni ka muofirsiri wa SASSA (tekela enhlokweni leswaku ko va wena ntsena tanihi muendlaxikombelo kumbe muofisiri wa SASSA a nga tatisaka fomo ya xikombelo).
  4. U ta nyikiwa rhasiti. Ri hlayise tanihi vumbhoni bya leswaku u endlile xikombelo.

Xana ku ta humelela yini loko xikombelo xa wena xi nga pasisiwi?

Loko xikombelo xa wena xi nga pasisiwi, SASSA yi ta ku tivisa hi ku tsala leswaku hikwalahokayini xi nga humelelangi.

Loko u kanetana na xiboho lexi, u nga aphila eka Holobye wa Nhluvukiso wa Vanhu ehofisini ya rixaka ya Ndzawulo ya Nhluvukiso wa Vanhu, u hlamusela leswaku hikwalahokayini u kanetana na xona. U fanele ku aphila ku nga si hela 90 wa masiku ya ku tivisiwa leswaku xikombelo xa wena a xi humelelangi.

Xana swi teka nkarhi wo leha kufika kwihi

  • Swi nga ha teka kufika eka tin’hweti tinharhu ku tirha xikombelo xa wena.
  • Loko mudende wa wena wu pasisiwile, u ta hakeriwa kusuka eka siku leri u endleke xikombelo harona.

Xana swi durha mali muni

Vukorhokeri lebyi i mahala.

Tifomo leti faneleke ku tatisiwa

Fomo leya xikombelo a yi kumeki eka Inthanete, kambe u nga yi kuma ehofisini ya le kusuhi na wena (SASSA).

Loyi u faneleke ku tihlanganisa na yena

Ejensi ya Timali ta Nhlayiso wa Vaaki ya Afrika-Dzonga (SASSA)

 

SASSA Toll free: 0800 60 10 11
Email: GrantEnquiries@sassa.gov.za

 

Share this page