Isibonelelo sokutlhogomela okhubazekileko

Okuphathelene 

Okufanele ukwenze

Isikhathi esibekiweko 

Kubiza malini

Amaforomo ekufanele uwazalise

Ungathintana nobani

Malungana nesibonelelo sokutlhogomela okhubazekileko

Thola isibonelelo sokutlhogomela umntwana okhubazeke okudluleleko kangangokuthi kufanele ahlale atlhogonyelwe ngendlela ekhethekileko soke isikhathi.

Isibonelelo sokutlhogonyelwa kokhubazekileko sinikelwa abentwana abakhubazekileko kusukela ekubelethweni kwabo bebayokuhlanganisa iminyaka eli-18.

Wazi Njani Ukuthi Ukulungele Ukuthola Isibonelelo Na?

Kufanele: 

• Ube mbelethi, ube mtlhogomeli namkha ube mumuntu okhulisela umbelethi umntwanakhe/mkhuliseli okhethwe yikhotho;
• Ube sisakhamuzi seSewula Afrika namkha ube mumuntu ohlalele safuthi eSewula Afrika;
• Imali oyirholako ngomnyaka ingadluli ee-R223 200 nayibe umumuntu ongakathathi/ongakendi. Umrholo wenu sewuhlanganisiwe ungadluli ee-R446 400 ngomnyaka nayibe uthethe namkha wendile.

Tjheja:  Lesisilinganiso somrholo ekukhulunywa ngaso lapha asisebenzi ebabelethini abakhulisela ababelethi abanye abantwababo. 

Umntwana kufanele:

• Abe ngaphasi kweminyaka yobudala eli-18;
• Angabi mntwana ohlalele futhi esijamisweni sombuso sokutlhogomela abentwana;
• Abe mntwana okhubazeke okudluleleko kangangokuthi kufanele ahlale atlhogonyelwe ngendlela ekhethekileko soke isikhathi.

Nobabili, wena nomntwana, kufanele nibe babantu abahlala lapha eSewula Afrika.

Tjheja:  Ngaphambi kobana umntwana anikelwe isibonelelo sokumtlhogomela, kufanele athome ngokuhlolwa siphathimandla sezamaphilo sombuso.

Yimalini Ozayithola?

Uzakuthola i-R2 180 ngenyanga.

Uzakubhadelwa Njani Isibonelelo Sakho?

I-Ejensi yeeMbonelelo zeSondlo noMhlalaphasi kaRhulumende yeSewula Afrika  (i-SASSA) izakubhadela isibonelelo sakho sokukhubazeka ngenye yaleziindlela ezilandelako:  

• Uzakuthola imalakho yesibonelelo endaweni ethileko eliziko lemali, ngelanga elithileko;
• Izakufakela imali e-akhawundini yakho yebhanga namkha ye-Postbank (ibhanga ingahle ikubhadelisele umsebenzi ekusiza ngawo wokwamukela imalakho evela kwa-SASSA).   
• Ngokudlulisela isibonelelo sakho esijamisweni esithileko esisebenza njengomlawuli wesibonelelo (isb.  iinhlangano zezehlalakuhle).

Tjheja:  Nakufumaniseka ukuthi awukghoni ukuyozithathela imali mathupha, ungazikhethela isiphathimandla sezeemali e-ofisini yakwa-SASSA ukuthi sikurholele, namkha unikele omunye umuntu amandla wokukurholela isibonelelo sakho.

Singabuyekezwa Nini Isibonelelo Somrholo Somntwana?

I-SASSA ingathatha isiqunto sokuthi isibonelelo sakho somrholo siyabuyekezwa namkha njani na. Ingeniso yakho yemali oyibikileko nawenza isibawo sesibonelelo ngiyo ezakulawula ukuthi isibonelelo sakho sibuyekezwa njani. Uzakwaziswa kusasele iinyanga ezintathu ukuthi isibonelelo sakho sizakubuyekezwa nini, namkha waziswe ngelanga lokugcina lokuveza ubufakazi bokuthi usaphila. Nayibe uthola imalakho yesibonelelo ebhanga, ezikweni leemali namkha ngomjameli, kufanele uzalise isitifikethi sobufakazi bokuphila ema-ofisini we-SASSA qobe mnyaka.

Kukunini Lapho Isibonelelo Somrholo Womntwana Singajanyiswa Khona?

Lokhu okulandelako kungenza ukuthi isibonelelo sigcine sijanyisiwe;

• Lokhuya ubujamo bomntwana nabutjhugulukako;    
• Umphumela wokubuyekezwa kwesibonelelo;             
• Nayibe awusebenzisani kuhle neemphathimandla nakubuyekezwa isibonelelo somrholo womntwana;
• Nawukhwabanisako namkha nawudunga namkha wethula imitlolo engasiqiniso malungana nomntwana onikelwa isibonelelo;
• Nayibe kukhona lapho kwaba nomtjhapho khona nakuphasiswa isibawo sesibonelelo somrholo.

Sivalwa Nini Isibonelelo Somrholwakho?  

Isibonelelo somrholo sivalwa lokhuya:    

• Umntwana nakabhubhako;
• Umntwana nakayokuhlaliswa esijamisweni sombuso;
• Umuntu otlhogomela umntwana nakudlula iinyanga ezintathu ngokulandelana angamrholeli umntwana loyo;
• Umntwana nakangekho eSewula Afrika;
• Umntwana nakahlanganisa iminyaka yobudala eli-18.

Ofanele ukwenze

1. Khamba uye e-ofisini yakwa-SASSA yangekhenu namkha eseduze nalapho uhlala khona, uphathe nakhu okulandelako:
   • UMazisi (i-ID) wakho oneenomboro ezili-13 ne-bar-code kunye nesitifikethi sokubelethwa. Nayibe awuna-ID namkha isitifikethi sokubelethwa:
     • Zalisa i-afidavithi eforomeni lakwa-SASSA elijayelekileko phambi komFungisi ongasisiphathiswa sakwa-SASSA.
     • Iza nesitatimende esifungelweko esitlikitlwe mumuntu othembekileko (njengekhansela, ikosi, isisebenzi sezehlalakuhle, umfundisi namkha uphrinsipali wesikolo) ongakghona ukufakazela ibizo lakho neminyakakho yobudala.
     • Isiphathimandla sakwa-SASSA sizakugadangisa imino bese sikuthumela emNyangweni wezangeKhaya kobanyana uyokwenza isibawo sikamazisi/se-ID, nawusalindele isibawo sakho esisasetjenzwako kwa-SASSA. Nayibe awuyitholi i-ID, isibonelelo sakho sizakujanyiswa.
     • Ubufakazi bokuthi wenze isibawo sokuthola i-ID/namkha isitifikethi sokubelethwa emNyangweni wezangeKhaya;
     • I-ID yesikhatjhana ekhutjhwe mNyango wezangeKhaya (nayibe unayo);
     • Isitifikethi sokubhabhadiswa, nayibe unaso;
     • Ikarada lemtholapilo nayibe unalo;
     • Iripoti yesikolo, nayibe unayo.
   •  Umbiko kadorhodere/wezepilo ofakazela ukukhubazeka komntwana;
   • Ubufakazi bokuthi uthethe/wendile namkha awukathathi/awukendi;
   • Isitlankana sakho somrholo, iintatimende zebhanga zeenyanga ezintathu ezidlulileko namkha iintlankana zepentjheni nobunye ubufakazi bengeniso. (Tjheja: Lokhu akusebenzi ebabelethini abamaphandle abakhulisela ababelethi abantwana babo namkha abakhulisa abantwana abamaphandle).
   • Nayibe:    
     • Awusimbelethi womntwana, kufuneka ubufakazi bokuthi umtlhogomeli womntwana ngencwadi efungelweko (i-afidavithi ) ebuya emapholiseni, umbiko wesisebenzi sezehlalakuhle, i-afidavithi yombelethi wemvelo namkha incwadi ebuya kuphrinsipali wesikolo lapho umntwana afunda/afunde khona;
     • Umbelethi wemvelo womntwana nomtlhogomeli okukuphela kwakhe, ubufakazi bokuthi ukhe walinga ukwenza ukuthi umuntu obelethe naye umntwana ondle umntwana;
     • Awusebenzi, kufuneka ubufakazi besiKhwama seTjhorensi yabaPhelelwe mSebenzi (i-UIF), namkha incwadi ebuya lapho bewusebenza khona efakazela ukuthi uphelelwe msebenzi; 
     • Umbelethi omphalali oliphandle okhulisela omunye umntwana, kufuneka imvumo yokuhlaliswa eSewula Afrika njengomphalali oliphandle kunye ne-ID yabaphalali abamaphandle;    
     • Umbelethi okhulisela omunye umntwana, kufuneka umlayelo wekhotho obeka umntwana loyo ezandleni zakho ukuthi umtlhogomele;
     • Sikhombela utjheje lokhu: Nayibe sewuluphele khulu namkha ugula khulu ukuthi ungakghona ukuyozifikela e-ofisini, ungathumela elinye ilunga lomndeni namkha umngani ukuthi akufakele isibawo. Umuntu oyokufakela isibawo kufuze akhambe nencwadi ebuya kuwe kunye/namkha ebuya kudorhodere ehlathululako ukuthi kubayini ungakghoni ukuyokufika e-ofisini.
2. Umntwana owenzelwa isibawo sesibonelelo, i-SASSA izamthumela kudorhodere wombuso ayomhlola ngaphambi kobana isibawo singenziwa.
3. Zalisa iforomu lesibawo phambi kwesiphathimandla se-SASSA (tjheja ukuthi nguwe kwaphela umfakisibawo namkha isiphathimandla se-SASSA abazalisa iforomu lesibawo).
4. Bazakunikela isitlankana. Silonde, ngoba sibufakazi bokuthi ufake isibawo.

Kwenzekani-ke Nakufumaniseka Ukuthi Isibawo Sakho Saliwe?                                                                                                                                                                       

Nayibe isibawo sakho saliwe, u-SASSA ukutlolela incwadi akutjele ukuthi kwenziwe yini singakaphumeleli.

Nayibe awuvumelani nesiqunto sebakwa-SASSA, ungadlulisela isililo kuNgqongqotjhe wezokuThuthukiswa komPhakathi e-ofisini yelizweloke yomNyango wezokuThuthukiswa komPhakathi, uhlathulule ukuthi kubayini ungavumelani nesiqunto sakhe sokwala isibawo sakho.  Kufanele udlulise isililo sakho kungakapheli amalanga ama-90 ukusukela ngelanga owaziswe ngalo ukuthi isibawo sakho azange sibe yipumelelo.

Kuthatha isikhathi esingangani

• Kungathatha isikhathi esingabe sifike eenyangeni ezintathu ukusebenza isibawo sakho;
• Nayibe isibawo sakho sokuthola isibonelelo somrholo siyaphumelela, uzakubhadelwa ukusukela ngelanga ofake ngalo isibawo.

Kubiza malini

Wenzelwa simahla lomsebenzi wokufaka isibawo.

Amaforomu ofanele uwazalise

Awakho ku-inthanethi amaforomu wokwenza isibawo, kodwana ungawathola e-ofisini yebakwa-SASSA yangekhenu namkha eseduze nalapho uhlala khona. 

Uthintana nobani

Uthintana ne-Ejensi yeeMbonelelo zeSondlo noMhlalaphasi kaRhulumende yeSewula Afrika (i-SASSA)