Ka ga

Seo o swanetšego go se dira

Lebaka

E dira tshenyagelo ya bokae

Diforomo tšeo di swanetšwego go tlatšwa

Dintlha tša boikopanyo

Mabapi le thušo ya ditšhelete tša leago ya ngwana yo a golofetšego

Hwetša thušo ya ditšhelete tša leago ya go hlokokomela ngwana yo a nago le bogolofadi bjo bogolo gomme a hloka tlhokomelo ye e tseneletšego kudu le ye e kgethegilego.

Thušo ya ditšhelete tša leago ya ngwana yo a golofetšego kudu e thuša bana bao ba golofetšego go tloga ge ba se na go belegwa go fihla ge ba na le mengwaga ye 18.

Naa o tseba bjang gore o na le maswanedi?

O swanetše:

• go ba motswadi wa ngwana, mohlokomedi wa ngwana wa ka mehla goba motswadi yo a tšerego legato la motswadi wa madi yo a thwetšwego ke kgorotsheko
• go ba modudi wa Afrika Borwa goba modudi wa sa ruri wa ka nageng
• o se hwetše letseno leo le fetago R223 200 ka ngwaga ge e le gore ga se wa nyalwa. Letseno la lena leo le kopantšwego ga se la swanela go feta R446 400  ka ngwaga ge e le gore le nyalane.

Hlokomela: Mollwane wo wa letseno ga o šome go batswadi bao ba tšerego legato la motswadi wa madi.

Ngwana o swanetše:

• go ba le mengwaga ya ka fase ga ye 18
• a se be a hlokomelwa sa ruri ka sehlongweng sa mmušo
• a be le bogolofadi bjo bogolo gomme a hloka tlhokomelo ya dinako ka moka le ye e kgethegilego.

Bobedi wena le ngwana le swanetše go dula ka Afrika Borwa.

Hlokomela: Mohlankedi wa tša maphelo wa mmušo o swanetše go sekaseka ngwana pele ga ge tšhelete ya thušo ya leago e ka dumelelwa.

Naa o tla hwetša bokae?

O tla hwetša R2 310 ka kgwedi.

Naa o tla lefelwa bjang?

Setheo sa Tšhireletšo ya Leago sa Afrika Borwa (SASSA) se tla go lefa tšhelete ye ya leago ka o mongwe wa mekgwa ye e latelago:

• ka kheše ka lefelong le itšego ka letšatši le itšego
• ka go teposita tšhelete yeo ka mokgwa wa elektroniki ka akhaonteng ya gago ya panka goba ka akhaonteng ya Panka ya poso (panka e ka go lefiša tirelo ye)
• go sehlongwa seo se šomago bjalo ka molaodi wa tšhelete ye ya leago (go fa mohlala, mekgatlo ya bobotlana).

Hlokomela: Ge e le gore ga o kgone go amogela tšhelete ka bowena, o ka thwala ramolao ka kantorong ya SASSA goba wa fa motho yo mongwe maatla a ramolao a gore a amogele tšhelete yeo legatong la gago.

Naa tšhelete ye ya leago e tla lekodišišwa leswa neng?

SASSA e ka tšea sephetho sa ge eba tšhelete ya gago ya leago e swanetše go lekodišišwa leswa. Letseno la gago le le tsebagaditšwego nakong ya ge o dira kgopelo ya tšhelete ya thušo ya leago e tla ba lona motheo wa sephetho se. O tla tsebišwa dikgwedi tše tharo pele ga nako gore tekodišišo ye e tla dirwa neng goba letšatšikgwedi leo ka lona setifikeiti sa bophelo (sengwalwa sa go hlatsela gore o sa phela) se swanetšego go tlišwa. Ge e le gore o amogela tšhelete ya gago pankeng, sehlongweng goba go ramolao, o kgopelwa go tlatša setifikeiti sa bophelo ka dikantorong tša SASSA ngwaga o mongwe le o mongwe.

Naa tšhelete ya thušo ya leago ya ngwana e ka fegwa neng?

Dilo tše di latelago di ka feletša ka go fegwa ga tšhelete ya thušo ya leago:

• ge maemo a ngwana a fetoga
• ge go dirwa dipoelo tša tekodišišo
• ge o sa dirišana gabotse le tshepetšo ya go lekodišišwa leswa ga tšhelete ya thušo ya leago ya ngwana
• ge o dira bomenetša goba o bolela maaka ka ga ngwana
• ge e le gore go bile le phošo ge thušo ya leago ya ngwana e dumelelwa.

Naa tšhelete ya thušo ya leago ya gago e tla felelwa ke nako neng?

Tšhelete ya thušo ya leago e tla felelwa ke nako ge:

• ngwana a hlokofala
• ngwana a hlokometšwe ke sehlongwa sa mmušo
• moholegi yo a lego mohlokomedi a sa amogele tšhelete ya thušo ya leago mo dikgweding tše tharo tša go latelana
• ngwana a se gona ka nageng
• ngwana a eba le mengwaga ye 18.

Se o swanetšego go se dira

1. Eya kantorong ya Setheo sa Tšhireletšo ya Leago sa Afrika Borwa (SASSA) ya kgauswi le fao o dulago gona o tle le dilo tše di latelago:
   • pukwana ya gago ya boitsebišo (ID) ya pakhoute ya dinomoro tše 13 le setifikeiti sa matswalo. Ge e le gore ga o na le pukwana ya boitsebišo goba setifikeiti sa matswalo:
     • Tlatša abitabiti go ya ka fomete ye e tlwaelegilego ya SASSA mo go nago le Mokhomišenare wa tša Boikano yo e sego mohlankedi wa SASSA.
     • Etla le setatamente sa boikano seo se saennwego ke motho wa seriti (wa go swana le mokhanselara, moetapele wa setšo, modirelaleago, moruti goba hlogo ya sekolo) yo a ka kgonago go tiišetša leina le mengwaga ya gago.
     • Mohlankedi wa SASSA o tla tšea dikgatišo tša menwana ya gago gomme a go romela go Kgoro ya Merero ya Selegae gore o dire kgopelo ya pukwana ya boitsebišo ge kgopelo ya gago e dutše e šongwa. Ge o sa hwetše pukwana ya boitsebišo, tšhelete ya gago ya thušo ya leago e tla fegwa.
     • Bohlatse bja gore o dirile kgopelo ya pukwana ya boitsebišo le/goba ya setifikeiti sa matswalo Kgorong ya Merero ya Selegae
     • Pukwana ya boitsebišo ya lebakanyana ye e abilwego ke Kgoro ya Merero ya Selegae (ge e le gona).
     • Setifikeiti sa kolobetšo ge se le gona.
     • Karata ya go hlabela ngwana ya kliniking ge e le gona.
     • Rephote ya sekolong ge e le gona.
   • Pego ya tša kalafo/tshekatsheko yeo e tiišetšago bogolofadi bja ngwana.
   • Bohlatse bja maemo a gago a lenyalo.
   • Selipi sa gago sa moputso, ditatamente tša panka tša dikgwedi tše tharo tše di fetilego, goba dilipi tša phenšene, le bohlatse bjo bongwe bja letseno. (Hlokomela: se ga se šome go batswadi bao e sego ba madi bao e lego bafaladi.)
   • Ge e le gore:
     • ga se wena motswadi wa ngwana, bohlatse bja gore o mohlokomedi wa ngwana wa ka mehla ka go ngwala abitabiti ye e saennwego ke mohlankedi wa maphodisa, pego ya modirelaleago, abitabiti go tšwa go motswadi wa madi goba lengwalo leo le tšwago go hlogo ya sekolo seo ngwana a tsenago go sona
     • o motswadi wa ngwana wa madi le mofepi a nnoši le mohlokomedi, bohlatse bja gore o lekile go hwetša motswadi yo mongwe gore a lefe tlhokomelo ya ngwana
     • ga o šome, bohlatse bjo bo tšwago go Sekhwama sa bao ba Lahlegetšwego ke Mešomo (UIF) goba setifikeiti sa go go lebogiša modiro go tšwa go mongmošomo wa peleng
     • o motswadi yo a tšerego legato la motswadi wa madi wa mofaladi, phemiti ya maemo a bofaladi le pukwana ya boitsebišo ya mofaladi
     • o motswadi yo a filwego maatla ke molao go tšea legato la motswadi wa madi, taelo ya kgorotsheko yeo e beago ngwana ka fase ga tlhokomelo ya gago.
     • Hlokomela: Ge e le gore o tšofetše kudu goba o a babja fao o palelwago ke go ya kantorong go dira kgopelo, wa leloko la lapa goba mogwera a ka dira kgopelo legatong la gago. Motho yoo o swanetše go tšea lengwalo go wena le/goba lengwalo la ngaka leo le bolelago gore ke ka lebaka la eng o ka se kgone go etela fao kantorong.
2. SASSA e tla romela ngwana go yo sekasekwa ke mohlankedi wa kalafo wa mmušo pele ga ge kgopelo e dirwa.
3. Tlatša fomo ya kgopelo go na le mohlankedi wa SASSA (hlokomela gore ke wena fela bjalo ka mokgopedi goba mohlankedi wa SASSA yo a ka tlatšago fomo ya kgopelo).
4. O tla fiwa selipi. Se beye bjalo ka bohlatse bja gore o dirile kgopelo.

Naa bjale ge kgopelo ya gago e ka se dumelelwe?

Ge kgopelo ya gago e ka se dumelelwe, SASSA e tla go tsebiša ka go go ngwalela gore ke ka lebaka la eng e se ya atlega.

Ge o sa dumelelane le sephetho se, o ka dira boipelaetšo go Tona ya Kgoro ya Tlhabollo ya Leago ka kantorong ya bosetšhaba ya Kgoro ya Tlhabollo ya Leago, o hlaloša gore ke ka lebaka la eng o sa dumelelane le sephetho se. O swanetše go dira boipelaetšo mo matšatšing a 90 ka morago ga ge o tsebišitšwe gore sephetho sa gago ga se sa atlega.

Go tšea lebaka le lekaakang

• Go ka tšea go fihla go dikgwedi tše tharo go šoma ka kgopelo ya gago.
• Ge tšhelete ya thušo ya leago ya gago e dumeletšwe, o tla lefša go thoma ka letšatšikgwedi leo o dirilego kgopelo ka lona.

Go bitša bokae

Tirelo ye ga e lefelwe.

Difomo tše o swanelago go di tlatša

Fomo ya kgopelo ga e hwetšagale inthaneteng, eupša o ka e hwetša kantorong ya kgauswi le wena ya SASSA.

O ka ikopantšha le mang

Setheo sa Tšhireletšo ya Leago sa Afrika Borwa (SASSA)