A. Xiyimo xa Khabinete eka Timhakakulu
1. Siku ro Lwisana na Vukungundzwana ra Matiko ya Misava
1.1. Afrika-Dzonga yi tikatsa na misava hinkwayo ku tsundzuka Siku ro Lwisana na Vukungundzwana ra Matiko ya Misava hi Ravumune 9 2021 ehansi ka nkongomelo wa “Vumundzuku byo pfumala vukungundzwana byi sungula namuntlha, byi sungula hi mina”. Nkongomelo wa Nhlangano wa Tinxaka wa Siku ro Lwisana na Vukungundzwana ra Matiko ya Misava ra 2021 i: “Mfanelo ya wena, xiphemu xa wena: Vula u ku e-e eka vukungundzwana”.
1.2. Vukungundzwana, hambi byi tele kumbe byi ri byitsongo, bya ha ri yin’wana ya mitlhontlho leyikulu leyi tiko ri nga langutana na yona naswona byi yimisa ku kula ka ikhonomi na nhluvukiso wa vaaki.
1.3. Khabinete ya ha ri na ku hlohloteleka ka leswaku sisiteme ya vululami yi ya emahlweni no teka magoza ya nkoka yo endla leswaku lava nga kumeka va khumbeka eka swendlo swa vukungundzwana va va na vutihlamuleri. Khomixini ya Ndzavisiso wa Swihehlo swa ku Teka Matimba ya Vulawuri bya Mfumo, Vukungundzwana na Vumbabva eka Sekitara ya Mfumo, ku katsa Swiyenge swa Mfumo, yi lulamiseriwile ku yisa xiviko xa yona xo hetelela eka Phuresidente Cyril Ramaphosa hi Mugqivela, 1 Sunguti 2022.
1.4. Khabinete yi langutela leswaku eka ku engeteriwa eka ku paluxa vaendli va vukungundzwana, xiviko lexi xi ta tlhela xi hi nyika swiringanyeto swo tiyisa tisisteme ta hina ku sivela vukungundzwana.
1.5. Tanihi xiphemu xa hina xo ya emahlweni no lwisana na vukungundzwana, Yuniti ya Vulavisisi byo Hlawuleka (SIU) yi yisile milandzu yo hlaya eKhotokulu na le ka Huvo yo Hlawuleka naswona milandzu leyi landzelaka ya ha yimele ku tengiwa kusukela hi 31 Nyenyankulu 2021:
- Milandzu ya 56 eKhotokulu, leyi khumbaka tikontiraka ta ntsengo wo ringana R62 wa tibiliyoni;
- Milandzu ya 64 eka Huvo yo Hlawuleka, leyi khumbaka tikontiraka ta ntsengo wo ringana R6.99 wa tibiliyoni. Mitsengo kumbe mikoka leyi i mitsengo ya tikontiraka leti ti nga nyikiwa hi mavandla ya mfumo hi ndlela yo ka yi nga landzelelangi maendlelo no ka yi nga ri enawini naswona yi wela eka leyi nga ta nghenisiwa eka vumangalelani hi SIU.
- Eka lembeximali ra 2021/22, SIU se yi yimisile tihakelo ta mivuyelo ya phenxeni ya khale ka vatirhelamfumo, tiakhawunti ta le bangi na tinhundzu ta vanhu na mabindzu leti fikaka eka ntsengo wo tlula R43 wa tibiliyoni.
- Phuresidente u sayinile ntsengo wa 9 wa Swihlambanyo swa SIU eka lembeximali leri nga ehansi ka nkambisiso.
1.6. Khabinete yi vule yi vuyelela leswaku ku humelela ka hina eka ku lwisana na vukungundzwana swi ta fikeleleka loko ku katsiwa vanhu hinkwavo lava nga kona laha Afrika-Dzonga.; Loko u vona swo karhi, vula swo karhi; vika vukungundzwana hi ku fonela Nomboro ya Riqingho ra Xilamulelamhangu ro Lwisana na Vukungundzwana ya Rixaka eka 0800 701 701.
1.7. Khabinete yi tiyisise ku tiyimisela ka yona ku sirhelela valumandleve, naswona yi ndhundhuzele xivindzi xa vatirhelamfumo lavo tshembeka lava nga humesela erivaleni vumbabva na vukungundzwana, va ri karhi va veka tindlela ta vona to tihanyisa na rihanyo ra vona eka nxungeto.
2. Ku tlakuka hi xihatla ka mitluletavuvabyi ya Vuvabyi bya Khoronavhayirasi (COVID-19)
2.1. Khabinete yi lemuke ku tlakuka hi xihatla ka mitluletavuvabyi ya COVID-19 eka swiphemu swo hlaya swa Afrika-Dzonga kutani yi hlohlotele vanhu hinkwavo laha tikweni ku teka goza ro tiya ro lwisana na vuvabyi lebyi na mixaka ya byona. Mitluletavuvabyi ya hina ya COVID-19 leyi rhekodiweke eka tiawara ta 24 leti nga hundza yi yime eka 19 842, leswi vulaka leswaku ku na 26.8% ta mpimo wa lava nga na yona. Hi tlhele hi lahlekeriwa hi vanhu va 36 hikwalaho ka mipfilungano leyi fambelanaka na COVID-19 eka tiawara ta 24 leti nga hundza.
2.2. Nsawutiso a wu hi pfuni ntsena ku lwisana na ntungukulu lowa khombo hi ku sivela ku vabya ko tika, ku amukeriwa exibedhlele na rifu, kambe wu tlhela wu hunguta mixungeto ya rihanyo leyi nga vangiwaka hi mixaka leyi nga vaka kona eka nkarhi lowu taka.
2.3. Hi boheka ku ya emahlweni hi landzelela matshalatshala yo sivela lama nga tirhisiki mirhi ma ku ambala masiki leyi funengetaka nomo na nhompfu ya hina; ku siya mpfhuka exikarhi ka hina na vanhu van’wana, na ku tshamela ku hlamba mavoko ya hina hi xisibi na mati kumbe ku tirhisa sanithayizara ya mavoko leyi nga na xihoko xa 70%.
2.4. Hi nga tlhela hi sivela ku hangalaka ka xitsongwatsongwana lexi hi ku papalata swiendleko leswi hangalasaka hi matimba ku fana na tifesithivhali na tiphati. Hi ri swin’we hi nga lwisana na yona hi ku va na vutihlamuleri na ku tikhoma hi ndlela ya kahle yo sirhelela rihanyo ra vanhu lava hi va rhandzaka na rixaka ra ka hina eka COVID-19.
2.5. Khabinete yi tikatse na Phuresidente Ramaphosa eka ku bela van’watisayense va ka hina mavoko loko va lemukisile misava hi mayelana na muxaka wa Omicron lowu a wu ri eku hangalakeni emisaveni hinkwayo. Khabinete yi ya emhlweni yi seketela swikombelo leswi koxaka ku yimisiwa hi xihatla ka ku aleriwa ku fambafamba leswi nga riki kahle leswi rhwexiweke Afrika-Dzonga.
3. Vooma Vaccination Week
3.1. Hi nyikile mipimamurhi ya swisawutisi ya ntsengo wo fika 26, 781, 642 ku fikela sweswi. Hi nkarhi lowu engeteleriweke wa pfhumba ra Vooma Vaccination Week kusukela 3 kufikela 10 N’wendzamhala 2021, magidigidi ya vanhu va le ku sawutisiweni eka tindhawu ta nsawutiso to hlaya leti nga pfula etikweni hinkwaro. Khabinete yi hlohloterile vanhu va malembe ya 12 ku ya ehenhla ku sawutisiwa handle ko heta nkarhi.
3.2. Tshama u hlayisekile wena na varhandziwa va wena eka nguva leyi ya makhisimusi hi ku ya eka ndhawu ya nsawutiso ya le kusuhi, hambiloko u nga bukangi nkarhi wo ya hawona, ku ya tsarisiwa no sawutisiwa mahala.
3.3. Mivuyelo ya rihanyo yo sawutisiwa yi katsa ku hunguteka lokukulu ka nxungeto wo amukeriwa exibedhlele endzhaku ko tluleriwa hi COVID-19. Khabinete yi hlohlotela vanhu hinkwavo lava nga eAfrika-Dzonga ku angula eka xirhambo lexi nga erivaleni no tlhlela xi twala hi ku hetiseka xo sawutisiwa hikuva tinhlayonhlayo ti komba leswaku vunyingi bya vanhu lava amukeriwaka eswibedhlele a va sawutisiwangi.
4. Nkambisiso wa Vatirhi wa Kotara hi Kotara (QLFS)
4.1. Mfumo wa ha tiyimiserile ku ololoxa mhaka ya ku pfumaleka ka mitirho tanihi wun’wana wa mitlhotlho leyikulu leyi tiko ri nga langutana na yona. Mivuyelo ya QLFS leya ha ku humesiwaka hi nhlangano wa Tinhlayohlayo wa Afrika-Dzonga leyi nga komba 0,5 wa tiphesente ta ku tlakuka ka mpimo wa ku pfumaleka ka mitirho kusuka eka 34,4% eka kotara ya vumbirhi kuya eka 34,9% eka kotara ya vunharhu ya 2021 ya vilerisa.
4.2. Mfumo wu ya emahlweni na ntirho wa wona lowu lawuriwaka hi mpakaniso wo vuyelerisa ku tshemba eka mabindzu hi ku ololoxa swikamanyeto leswi nga na xivumbeko eka ku kula ka ikhonomi, ku tumbuluxiwa ka mitirho na ku herisa vusweti. Hi ku tirhisa miphalalo yo kongoma yo fana na vuvekisi bya le henhla eka swimakiwakulu, wu le ku tirheni ku seketela ku cinca loku nga na xivumbeko, ku kula ka ikhonomi na ku tumbuluxiwa ka mitirho.
4.3. Hi ku tirhisa Ndzawulo ya Mabindzu, Vumaki na Mphikizano, mfumo wu ya emahlweni wu seketela swikumiwa swa laha kaya, ku katsa ku pfuxetiwa ka indasitiri ya vumaki ya Afrika-Dzonga. Khomferense ya vuvekisi ya Afrika-Dzonga ya lembe na lembe (SAIC) yi ya emahlweni yi koka rinoko ra lava nga kotaka ku tisa vuvekisi. Kusukela loko ku vile na khomferense ya yona yo sungula hi 2018, kufikela sweswi SAIC yi kumile kutlula R770 wa tibiliyoni eka vutiboheleri bya vuvekisi kusuka eka tisekitara ta ikhonomi to hambanahambana.
4.4. Khabinete ya ha tiyimiserile ku tirhisana na tisekitara hinkwato ku ololoxa mitlhontlho leyinharhu ya ku pfumaleka ka mitirho, vusweti na ku pfumaleka ka ku ringana. Mfumo wu ta endla hinkwaswo leswi kotekaka ku tumbuluxa mbangu lowu nga ta tisa vuvekisi laha tikweni. Wu ta tlhela wu susumeta ku cinca ka ikhonomi loku nga ta tisa swivandlanene leswikulu swa ikhonomi eka mitlawa leyi a yi nga vuyeriwi eka nkarhi lowu nga hundza.
5. Rendzo ra Phuresidente ro ya eka Matiko ya Mune ya le Vupeladyambu bya Afrika
5.1. Phuresidente Ramaphosa wa ha ku rhangela vurhumiwa bya Vaholobye na varhangeri va mabindzu hi xikongomelo xo kurisa vuxaka bya ikhonomi na ku vulavurisana tanihi vanhu exikarhi ka Afrika-Dzonga na Nigeria, Côte d’Ivoire, Ghana na Senegal.
5.2. Rendzo lera matiko ya mune kusukela 30 Hukuri ku fikela 7 N’wendzamhala 2021 ri tiyisisile vuxaka bya Afrika-Dzonga byo vuyerisa matlhelo hamambirhi ku tiyisa swinakulobye leswi kongomisiweke eka nhluvukiso wa Afrika na ku tirhisana eka tiforamu to vuyerisa matlhelonyingi.
5.3. Afrika-Dzonga na matiko lama ri nga na xinakulobye na wona ma lavile tindlela to tirhisa swivandlanene leswi tisiweke hi Ndhawu ya Mabindzu ya Nkaswipimelo ya Tikonkulu ra Afrika ku vuyerisa hinkwavo, na nseketelo lowukulu eka mabindzu lama endlaka bindzu na vuvekisi exikarhi ka matiko ya Afrika.
6. Masiku ya 16 ya Vugingirikeli bya ku Pfumaleka ka Madzolonga ehenhla ka Vavasati na Vana
6.1. Loko pfhumba ra Masiku ya 16 ya Vugingirikeli bya ku Pfumaleka ka Madzolonga ehenhla ka Vavasati na Vana ma ya eku heleni, swa ha ri ntiyiso wo vava leswaku ka ha laveka ku endla swo tala ku herisa madzolonga ya swa rimbewu na ku dlayeteriwa ka vaxisati (GBVF) eka rixaka ra ka hina.
6.2. Switori leswi fambelanaka na GBVF swo tala swo chavisa, ku katsa na ku lahlekeriwa hi vutomi, swi vikiwile hi nkarhi lowu na le ka nkarhi hinkwawo lowu engeteleriweke wa pfhumba ra Masiku ya 365 ya Vugingirikeli.
6.3. Hi le ku hlulekeni tanihi rixaka loko swirilo swa vanhu lava nga sirhelelekangiki eka rixaka ra ka hina swi nga twiwi kumbe swi honisiwa. Mitolovelo ya le rixakeni yo pfumala vutihlamuleri leyi pfumelelaka mahanyelo yo biha ya vavanuna na ntolovelo wo twisa vavasati lava nga miyeliki ku vava swi fanele ku yima.
6.4. Khabinete yi kombele munhu un’wana na un’wana, ngopfu vavanuna, ku yima na ku tlanga xiphemu lexi vonakaka eka ku herisa mpingu wa madzolonga ehenhla ka vavasati na vana. Vavanuna va fanele ku rhanga emahlweni hi ku vulavula va alelana na GBVF na ku yi mangala eka tiejente ta nsindziso wa nawu. Va boheka ku tlhela va endla swilemukiso, na ku nghenelela eka ku dyondzisa tintangha na matshalatshala yo sivela GBVF.
6.5. Ku endlela ku kota ku antswisa ku angula ka hina eka milandzu ya swa masangu na madzolonga yo ya hi rimbewu, mfumo wu na 106 wa Tikhoto ta Milandzu ya swa Masangu naswona sweswi wu lava ku sungula Tikhoto ta Milandzu yo Endla swa Masangu na Vana Lavatsongo.
6.6. Hi Nyenyenyana 2020, xiyenge xa 55A xa Nawu wo Cinca Nawu wa Vugevenga (Milandzu ya swa Masangu na Timhaka leti Fambelanaka na tona) wu sayiniwile ku va wu sungula ku tirha, leswi vulaka leswaku rosungula Tikhoto ta Milandzu ya swa Masangu ti ta va kona hi ku landza nawu. Xiyenge xa 55A xa Nawu lowu xi nyika Holobye wa Vululami na Vukorhokeri bya Makhotso matimba yo hlawula, ku nga ri tikhoto ta xifundza leti hlawuriweke ntsena, kambe na Xiavo xihi kumbe xihi xa Khotokulu tanihi Khoto ya Milandzu ya swa Masangu.
6.7. Khabinete yi hlohloterile swiyenge hinkwaswo swa vaaki ku tirhisana na mfumo ku tumbuluxa miganga leyi hlayisekeke na ku sirhelela vaxanisiwa va ku twisiwa ku vava. Swi ta cinca ntsena loko hi endla xa nchumu, naswona nkarhi wo endla xa chumu hi sweswi!
B. Swiboho swa Khabinete
1. Ku Engeteleriwa ka Xiyimo xa Rixaka xa Mhangu
1.1. Khabinete yi pfumelele xibumabumelo xa Huvo yo Lawula Khoronavhayirasi ya Rixaka xo engetela Xiyimo xa Rixaka xa Mhangu kuya eka 15 Sunguti 2022, ku ya hi Xiyenge xa 27 (5) (c) xa Nawu wa Malawulelo ya Timhangu, 2002 (Nawu wa 57 wa 2002).
1.2. Xiyimo xa Rixaka xa Mhangu xi kongomisiwile eka ku hlamula swiyimo swo hlawuleka leswi vangiweke hi ntungukulu lowa COVID-19
2. Vuhlayiseki bya Mikarhi ya Makhisimusi
2.1. Loko vo tala va hina hi ta ya eku wiseni loku faneleke hi nkarhi wa makhisimusi, hi boheka ku tsundzuka leswaku COVID-19 a yi yi eka holideyi. Nkarhi wa holideyi yo hlayiseka eka wena na varhandziwa va wena wu nga tiyisisiwa hi ku tlhaveriwa eka ndhawu ya nsawutiso ya le kusuhi.
2.2. Khabinete yi kombela munhu wun’wana na wun’wana ku ya emahlweni no tshama a pfule mahlo na ku papalata ku hlangana ka vanhu vo tala. Hi ri swin’we hi nga endla leswaku nguva ya makhisimusi yi tsakisa no hlayiseka eka munhu wun’wana na wun’wana hi ku ka hi nga nwi hi tlhela hi chayela. Hi boheka ku landzelela milawu hinkwayo ya le mapatwini, ku katsa no chayela hi ku landzelela mipimo ya rivilo leyi nga enawini. Hinkwerhu ka hina a hi endleni matshalatshala ya Arrive Alive.
2.3. Khabinete yi kombele vatswari hinkwavo na vahlayisi ku tshama va pfule mahlo eka vana lava nga ehansi ka vuhlayisi bya vona, ngopfu etiphulwini, etibuweni kumbe ekusuhi na mati. Ku tiyisisa ku va na mikarhi ya makhisimusi leyi hlayisekeke, va na na vuxiyaxiya hi mikarhi hinkwayo loko u ri eka holideyi kumbe hi mikarhi yo hungasa. Mangala nghingiriko wa vugevenga lowu ehleketelerisaka wihi kumbe wihi hi xihatla emaphoriseni eka 10111 kumbe u tivisa vatirhi va swa vusirheleri lava nga ekusuhi.
C. Mahungu
1. Vuhoyozeri
Khabinete yi hoyozela na ku navelela leswinene eka:
- Phuresidente Ramaphosa ku va a havaxerisiwile doctorate Honoris Causa kusuka eka Yunivhesiti ya Cheikh Anta Diop eDakar, Senegal, leyi tekiwaka tanihi yin’wana ya Tiyunivhesiti ta ndhuma eAfrika na le misaveni hinkwayo. Makumembirhikaye wa malembe lama nga hundza, Khale ka Presidente Nelson Mandela u nyikiwile digiri ya vudokodela leyi fanaka hi nkarhi lowu rixaka ra ka hina a ri nga se kuma ntshunxeko. Swi fanerile ku va Phuresidente Ramaphosa a nyikiwile ku xiximiwa loku ka xiyimo xa le henhla eka lembe leri hi tsundzukaka lembe ra vu25 ra anivhesari ya Vumbiwa ra hina ku va ri sayiniwile ku va nawu.
- TiBlitzboks eka ku hlula kambirhi eka mahelo ya vhiki mambirhi hi nkarhi lowu wa xiyimo xa le henhla wa mphikizano wa rhagabi wa Dubai Sevens.
2. Michavelelo
Khabinete yi chavelela ndyangu na vanghana va:
- Tatana Ebrahim Ismail Ebrahim (84), khale ka Xandla xa Holobye wa Vuxaka bya Matiko ya le Handle na Ntirhisano. Ebie, tanihilaha a tiveka hakona eka vanghana na makhomuredi ya yena, u nyiketele vutomi bya yena eka ku lwela xidemokirasi na ntshunxeko, naswona u tirhile hi ku tiyimisela ku aka Afrika-Dzonga yo antswa ya vanhu hinkwavo.
- Amb Lindiwe Mabuza (83), muyimeri ematikweni ya le handle wa khale, mutsari wa switlhokovetselo, mulweri wa ndzingano wa rimbewu na munhu loyi a yimelaka Vulwelantshunxeko loyi a nga tirha eka swiyimo swotala swa vuyimeri bya le matikweni ya le handle. Hi 2014 u amukerile Risiva ra Ikhamanga hi Silivhere “hikwalaho ko hoxa xandla ka yena eka ku hlohlotela ku tirhisa vutshila na ku tirhisa vutumbuluxi eka xidemokirasi – ku kombisa leswaku migingiriko ya mfuwo yi hoxile xandla xa nkoka eka ku fikelela xidemokirasi”.
D. Ku thoriwa
Ku thoriwa hinkwako ku ta ya hi ku tiyisisiwa ka mithwaso na mbhasiso lowu faneleke.
1. Dkd Sean Douglas Philips – Mulawurinkulu (DG) wa Ndzawulo ya Mati na Nkululo.
2. Gqweta Alison Gay Bengtson – Xandla xa Mulawurinkulu (DDG) Nseketelo wa Pholisi ya Kharikhulamu na ku Veka Tihlo eka Ndzawulo ya Dyondzo ya Masungulo.
3. Mnn Busisiwe Iris Letompa – DDG: Matirhelo ya Swifundzankulu eka Ndzawulo ya Vurimi, Mpfuxeto wa Misava na Nhluvukiso wa Tindhawu ta le Makaya.
4. Ku engeteriwa ka swirho swa Khansele ya Tinhlayohlayo eAfrika-Dzonga:
a. Phurof David Everatt (Mutshamaxitulu);
b. Ttn Ian Assam (Xandla xa Mutshamaxitulu);
c. Ttn Faldie Esau
d. Mnn Reshoketswe Mokobane;
e. Mnn Blanche Motsosi;
f. Dkd Jacky Galpin;
g. Dkd Ariane Neethling;
h. Dkd Thabi Leoka;
i. Ttn Ettiene le Roux;
j. Ttn Wandile Sihlobo;
k. Mnn Nompumelelo Nzimande;
l. Mnn Vuyelwa Mantyi (Muyimeri wa Kapa-Vuhumadyambu);
m. Mnn Zeenat Ishamial (Muyimeri wa Kapa-Vupeladyabu);
n. Ttn Kuberin Packirisamy (Muyimeri wa Kapa-N’walungu);
o. Tatana Thulani Bhengu (Muyimeri wa KwaZulu-Natal);
p. Phurof Andries Monyeki (Muyimeri wa North West);
q. Dkd Nomusa Mlondo (Muyimeri wa Mpumalanga); na
r. Dkd Modjadji Malahlela (Muyimeri wa Limpopo).
5. Swirho swa Bodo ya Vandla ra Nhluvukiso wa Eneji ra Afrika-Dzonga ra Rixaka:
a. Ttn Sicelo Goodwill Xulu (Mutshamaxitulu);
b. Mnn Lungile Mtiya (Xandla xa Mutshamaxitulu);
c. Mnn Abegail Boikhutso;
d. Mnn Mary Tumelo Mashabela;
e. Ttn Jongikhaya Witi (Xirhonkulu xo suka eka Ndzawulo ya Swihlahla, Tinhlampfi na Mbangu (DFFE));
f. Mnn Olga Chauke (Xirho xo cincana – DFFE);
g. Mnn Lize Baron (Xirhonkulu xo suka eka Ndzawulo ya Mabindzu, Vumaki na Mphikzano (dtic));
h. Ttn Gerhard Fourie (Xirho xo cincana – dtic);
i. Ttn Mthokozisi Mpofu (Xirhonkulu xo suka eka Ndzawulo ya Swipfuno swa Swicelwa na Eneji (DMRE); na
j. Mnn Nomawethu Qase (Xirho xo cincana – DMRE).
6. Bangi ya Misava
(a) Mnn Khensani Mukhari – Mufambisinkulu wa Bangi wa Misava.
Bodo ya Valawurinkulu va Bangi ya Misava lava nga riki Swirho swa Vurhangerinkulu:
(b) Mnn Nyane Rethabile Nkosi (Mutshamaxitulu);
(c) Ttn Lehlogonolo Andrew Makenete (Xandla xa Mutshamaxitulu);
(d) Mathane Makgatho;
(e) Mnn Dineo Maithufi;
(f) Dkd Johann Frederick Kirsten;
(g) Mnn Thulisile Njapa Mashanda;
(h) Mnn Nonthuthuzelo Pinkie Motshegoa;
(i) Mnn Egashnee Pillay;
(j) Dkd Monde Mbovu Tom; na
(k) Ttn Dimitri Wilhem van der Westhuizen;
7. Bodo ya Sentech ya Nkarhinyana
a. Mnn Sedzani Faith Mudau (Mutshamaxitulu);
b. Mnn Veronica Mmakoma Motloutsi;
c. Mnn Mapuleng Moropa;
d. Mnn Tshavhuyo Sesani;
e. Ttn Themba Phiri;
f. Gqweta Nkhumeleni Anderson Mudunungu; na
g. Ttn Metusa Mbasa.
Swivutiso: Mnn Phumla Williams – Muvulavuleri wa Khabinete
Selifoni: 083 501 0139
