Bjalo ka Tona ya Kgoro ya Dikgokagano, ke swanela go bolela se e lego nnete mabapi le mabarebare ao a phatlalatšwago kgafetšakgafetša ao a rego DA e boletše gantši bjalo ka potšišo ya palamente ngwaga wo mongwe le wo mongwe mo mengwageng ye meraro ya go feta. Se se amana le ditshenyagalelo tša mmušo tša dikwalakwatšo ka Kgoro ya Dikgokagano. DA e bolela mabarebare a gore Mmušo o leboga “bobegaditaba bjo bo thekgago mmušo”. Ka Labone la 29 Pherekgong, morago ga ge ke lokolotše karoganyo ya ditshenyagalelo tša mmušo tša dikwalakwatšo ka Kgoro ya Dikgokagano, mabarebare a a sa boa gape, a kopišitšwe le go pharwa ka fase ga mothalo wa hlogotaba ye e ngwadilwego ke Gavin Davis.
Go molaleng gore Mohlomphegi Davis , Leloko la Palamente (MP) o na le kwešišo ye nnyane ya dikgokagano tša dikwalakwatšo tše kaone ebile ga a tshepege maitekong a gagwe a go fokola kgahlanong le bobegaditaba bja ka fase ga taolo ya bathobaso ge a bolela ngangišano ye e fošagetšego go tšwetša pele leano la gagwe. Tsebo ye nnyane ya phatlalatšo ya dikgatišo, dipalopalo tša babadi le diteng tša borulaganyi di be di tla thibela diphošo tše di lego molaleng tšeo di dirilwego ke leloko le le hlomphegago.
Nnete ke gore, The New Age e kgauswi kudu le Business Day ka tekatekanyong ya tšona ya borulaganyi ye e theilwego godimo ga peakanyo ya bophatlalatši. Nyakišišo ye e dirilwego ke khamphani ya go hlomphegago maemong a boditšhabatšhaba, ya Media Tenor e tšweleditše pego ye e sekasekago pego ye botse ka ga Mopreseidente Zuma ya lebaka la Mosegamanye 2014 go fihla ka Pherekgong 2015. Pego ye e laetša gore 10% ya diathikele tša New Age di bega botse ka Mopresidente Zuma, gomme 9% ya pego ya Business Day le yona e begago diteng tše di botse tša go swana ka ga Mopresidente. Naa re swanela go phetha ka gore Business Day ke sefala sa khuetšompe goba e thekga Mopresidente Zuma?
Go tšea diphetho ka tikolong ya bobegaditaba ye e fetogago, sehlopha sa ka gare ga Kgoro sa go reka sekgoba sa kwalakwatšo ya ditaba sa Kgoro ya Dikgokagano se eta pele thekgo ya sekgoba sa kwalakwatšo ya ditaba ya bobegaditaba bja mmušo ka go šomiša sehlopha sa lefase ka bophara sa ditirelo le softewere ya dikwalakwatšo tša bobegaditaba se e lego ketapele ya Telmar Media bakeng sa phihlelelo, palo ya tiragalo le tšhomišo ka botlalo. Badiriši ba Telmar ba 10,000 go kgabanya dinaga tše 85 ba akaretša bontši bja dietšentshi tša dikwalakwatšo tša ketapele lefaseng, baphalalatši ba dititšithale le ba dikgatišo, bagaši le bakwalakwatši. Bašomi ba go reka sekgoba sa kwalakwatšo ya ditaba ba ka gare ga Kgoro ba tsenela tlhahlo ye e dumeletšwego ya SAARF le ya Telmar kgafetšakgafetša, gomme ke maleloko a Mokgatlo wa Afrika Borwa wa Dikwalakwatšo tša Bobegaditaba.
New Age – bjalo ka kuranta ye e nago le kgatišo ye e phatlalatšwa nageng ka bophara e bapetšwa ka phošo le dikuranta tša ditoropong tše kgolo (tša go swana le The Herald – ya Nelson Mandela Bay, The Mercury – ya Durban, Pretoria News – ya Pretoria) tše di phadišanago ka mebarakeng ye e hlaotšwego ya selete. Ge re latetše taba ya Mohlomphegi Davis, mmušo o tla swanela go kwalakwatša ka palong ya godimo ya dikuranteng tša ditoropong tše kgolo – ka diprofenseng ka moka go gata ka kgato e tee le New Age, ka ditshenyagalelo tša godimo go feta tša go kwalakwatša ka gare ga New Age. Go bolela nnete, New Age e phatlalatšwa ka diprofenseng ka moka tše senyane, e na le dikgatišo tše tshela tša selete.
Kgatišo ye nngwe le ye nngwe ya New Age ya tšatši ka tšatši e na le letlakala le le nepišitšwego go profense ye itšeng la go tšweletša ditaba tša selegae go tlaleletša kakaretšo ya yona ya ditaba tša bosetšhaba le tša lefase ka bophara.
Mmušo o šomiša kgokagano ya bontši go phethagatša thomo ya ona ya go boledišana le bontši bja MaAfrika Borwa ka mo go kgonegago. Ka noši ge a amogela, Mohlomphegi Davis o dumela gore mmušo o šomiša dikuranta tše 248 go sedimoša setšhaba ka mananeo a ona, eupša o tlogela taba ya gore mmušo ke mothekgi wo mogologolo wa bobegaditaba bja go fapana bja kgatišo ka kwalakwatšo ya wona. Ga go kwešišege gore moleloko yo a hlomphegago o tšwela pele go tšweletša mabarebare mabapi le bogolo bja palo ya babadi ba New Age. Babadi ba yona ba 153 000 ga ba akaretše babogedi ba tlaleletšo ba 621 000 ba ba badilwego ke AMPS ka Dikopano le ba ditaba tša yona tša TNA – tiragalo ye e gašwago thwii yeo e akaretšago go boledišana le bakgathatema, babadi ba yona ba dikgatišo le bobegaditaba bja setšhaba bo latela kakaretšo ya bosetšhaba ya kgašo ya thelebišene.
Ke laletša Mohlomphegi Davis (MP) go etela Tshedimosetso House; e lego lentšu la Setswana le le šupago gore tsebo, go ithuta, tshedimošo, goba tsebokgolo (a ka no se kwešiše kgegeo ya leina) go rutwa ke bašomi ba ba nago le botsebi bao ba thwetšwego ke tirelo ya borekedi bja kgašo ya Kgoro ya Dikgokagano. Mohlomongwe se se ka alafa mokgwa wa gagwe wa go bona borukhuhli fao bo sego gona.
Dipotšišo di ka romelwa go:
Ayanda Hollow
Sellathekeng: 061 488 0634
