Ukuthoma kwentando yenengi etja engabandlululi ngokobutjhaba nangokobulili eSewula Afrika kwenza kwaqakatheka ukubuyekezwa ngokuhlolisiswa kwaboNongorwana beliZweloke. Irherho elidlulileko lalibunjwa mhlobo munye womKghabiso kanye naboNongorwana abane labo ibunjo lobukghwari babo belijamele umbuso wesikhathi esidlulileko.
Ngokufuna ukusuka esikhathini esadlulako, ngoMrhayili womNyaka we-1998, umKhandlu omutjha oYelelisa uMengameli ngaboNongorwana beliZweloke wanikelwa umsebenzi nesibopho sokubuyekeza irherho laboNongorwana besiTjhaba neminye imihlobo yabonongorwana. Njengendlela yokuphumelelisa umsebenzi lo, ikomiti yesiqhema sezazi yahlonywa neyathoma ngerhubhululo elingeneleleko nelifaka woke umuntu ngekambiso yokubonisana nomphakathi, ukukhulumisana nababambindima ezingeni lelizweloke, kwabanjwa imikhulumiswano neenqhema ngomnqopho wokuqala khulu amanye amarherho angatjhejwa, ukuvunyelwa kwerhubhululo lezomlando kanye nokubuthelelwa kwegolide kanye nabatlami bamamedali ukwenzela bona babumbe amamedali amatjha ngokuya kwemilayo yokutlama.
Njengehlangothi lekambiso le, umNyango wezobuKghwari, amaSiko, iSayensi neThekhnoloji wangesikhatheso ngokubambisana neZiko likaRhulumende lezokuThintana nokuNikela ngeLwazi (i-GCIS) waphenya ukuya phambili amatshwayo nokunikelwa kwehlathululo yamatshwayo ngomnqopho wokulinga ukufumana ukuqakatheka kobuhle obutjha obuzakuveza ummoya omutjha welizwe elitjha. Isiqhema somsebenzi seemfundiswa nezazi esazi khulu ngamatshwayo wendabuko nokunikelwa kwehlathululo yamatshwayo sakhonjelwa bona sifanise izinto eziqakathekileko kanye nezinto ezijamele ibumbano nomlando ofaka woke umuntu kanye nelemuko le-Afrika ngeSewula Afrika njengengcenye ekulu ezakuqalwa. Umphumela webumbano nokusebenzisana kilekambiso waba kuvunyelwa nokutlanywa okungikho kwaboNongorwana beliZweloke.
Ubujamo
ISewula Afrika ithethe igadango elikhulu lokusuka esikhathini esadlulako lapha abantu bebabandlululwa ngokobulili, ngokombala kanye nangokwekolelo. Ilizwe solo liragela phambili linqophe ukufikelela ubujamo bokwakha kabutjha nokubuyisa isithunzi sobuntu bethu. Ngalelikhambo elitjhinga ebuntwini bethu, isiko elitjha lamalungelo wobuntu kanye nokuhlonitjhwa kwesithunzi sommoya womuntu kube sisekelo seSewula Afrika.
Enye yeenkhathi zamatshwayomlando wokuphuma esikhathini esidlulileko kwaba kuphakanyiswa kokuthoma kweflarha etja ngomnyaka we-1994. Isikhathesi, ngokufaneleko saqinisa ukuzikhakhazisa nesithunzi selizwe elitjha kanye nokugidingwa kobuntu obunikelwe isithunzi esitja. Okhunye kwaba kuvezwa kweTshwayo lomBuso elitjha mhlana ama-27 kuSihlabantakana 2000 elaveza ukwamukela ukuqakatheka kwebumbano lezomlando labantu belizwe lekhethu. Ngokwenza njalo, ubuhle obutjha obutjheja i-Afrika namatshwayo wayo baba yingcenye yesiko elitjha elibumba ukubelethwa kabutjha kweSewula Afrika.
AboNongorwana beliZweloke abatjha basungulwa bebahlonywa ngaphasi kommoya wokubelethwa kabutjha kwelizwe.
