Tshitatamennde kha Muṱangano wa Khabinethe we wa farwa nga Ḽavhuraru, 12 Luhuhi ngei Tuynhuys Ḓoroboni ya Kapa
A. Mafhungo a zwino kha Shango
1. Mulaedza wa Lushaka (SoNA)
1.1. Khabinethe yo ṱanganedza SoNA ya 2020 yo ṋetshedzwaho nga Muphuresidennde Vho Cyril Ramaphosa kha dzulo ḽo Ṱanganelaho ḽa nnḓu mbili Phalamenndeni, Ḓoroboni ya Kapa nga Ḽavhuṋa ḽa 13 Luhuhi 2020. Mulaedza wo ṋetshedzwa nga murahu ha anivesari ya vhu30 ya u vhofhololwa ha Khotsi wa Lushaka, Tata Madiba, vhe vha vhofhololwa ngei Dzhele ya Victor Voster nga ḽa 11 Luhuhi 1990.
1.2. SoNa ya 2020 ya Muphuresidennde Vho Ramaphosa yo ṋetshedza ṱhalutshedzo ya Mbekanyamushumo ya Mishumo (PoA) ya muvhuso ine ya ḓo ṱoḓa u alusa ikonomi ya shango ine ya khou lepalepa nga u lugisa mitheo ya zwa ikonomi.
1.3. Miṅwedzi i si gathi i khou ḓaho hu ḓo thomiwa u shumiswa maga ane a ḓo shandukisa tshoṱhe gondo ḽa mveledzo na thengo ya fulufulu shangoni.
1.4. Muphuresidennde vho sumbedzisa pulane dza u engedza mveledzo yapo ine ya ḓo manḓafhadza mabindu maṱuku, a vhukati na mahulwane (dziSMME). Zwibveledzwa zwi bveledzwaho fhano hayani zwi fhiraho 1 000 zwi ḓo wanala nga dziSMME idzi. Vhurangeli uhu hu ḓo vhumba tshipiḓa tsha nḓila dza vhutumbuli dza u tikedza vhoramabindu vha vhaswa na vhuḓishumi.
1.5. Magudedzi a Pfunzo ya Thekheniki na Mishumo ya Zwanḓa na Vhupfumbudzi (TVET) maswa ane a ḓo fhaṱiwa ṅwaha uno a ḓo thusa u vala gake vhukati ha vhushayamushumo ha vhaswa na zwikili. Tshumelo ya Mishumo ya Vhaswa, khathihi na magudedzi a TVET na sekhithara ya phuraivethe, a ḓo khwaṱhisedza uri vhagudi vhanzhi vha wane tshenzhemo ya u tou shuma mishumoni sa tshipiḓa tsha vhupfumbudzi havho.
1.6. Khabinethe i dovha ya ṱanganedza nḓivhadzo ya u dzudzanya puḽatifomo ya SheTradesZA ine lwa ḓo thusa mabindu a o farwaho nga vhafumakadzi na u dzhenela kha engedza ndeme kha ḽifhasi na mimakete.
1.7. Modele wa Mveledziso ya Tshiṱiriki we wa lingwa ṅwaha wo fhiraho kha iṅwe ya ḓorobo khulwane na mimasipala ya tshiṱiriki ṅwaha uno u ḓo thomiwa kha zwiṱiriki zwoṱhe na dziḓorobo khulwane. Hezwi zwi ita uri modele wa nḓisedzo ya tshumelo yoṱhe wo angaredzaho u shume une wa kutela pulane nthihi yo tikedzwaho nga madavhi mararu oṱhe a muvhuso.
1.8. Mulaedza wa Muphuresidennde wo ṱuṱuwedza vhathu vhoṱhe uri vha vhumbane na u bvela phanḓa u ya kha u kunda khaedu dzashu na u fhaṱa dimokirasi ya Afrika Tshipembe i khou bvelelaho. Khabinethe i ramba sekhithara dzoṱhe dza tshitshavha u farisana na muvhuso kha u shumisa PoA dza muvhuso.
1.9. Nga tshifhinga tsha khanedzano Phalamenndeni vhege ino, miraḓo ya Khorotshitumbe i ḓo dovha ya ṱalutshedza PoA ine ya ḓo thomiwa kha ṅwaha wa muvhalelano unu na u ya phanḓa.
2. Samithi ya Vhuthihi ha Afrika (AU)
2.1. Khabinethe i fhululedza Muphuresidennde Vho Ramaphosa kha u dzhia vhuimo ha u vha Mudzulatshidulo wa AU vho imela Afrika Tshipembe. Muphuresidennde vha ḓo shumisa vhuimo havho u bveledza mulalo na vhudziki, vhuvhusi havhuḓi, ndinganyiso ya mbeu na u manḓafhadza vhafumakadzi u alusa ikonomi ya Afrika. Nga murahu kha ṅwaha wonoyu Thendelano ya Vhupo ha Mbambadzo ha Mahala ha Dzhango ḽa Afrika (AfCFTA) i ḓo thoma u shuma.
2.2. Thendelano dzi ṱangana dza vha makete muthihi u mona na mashango a 54 a re na vhathu vha ṱoḓaho u swika 1,2 biḽioni vha na zwibveledzwaguṱe zwapo zwo ṱanganelaho zwi fhiraho US$3 thiriḽioni. Sa Mudzulatshidulo, Afrika Tshipembe ḽi ḓo vha ṋemuḓi wa samithi u khunyeledza phurotokholo ya AfCFTA ya mathomo a mushumo.
2.3. Afrika Tshipembe ḽi ḓo dovha ḽa shuma u bveledza Afrika ḽa mulalo na vhudziki nga fhasi ha thero: U fhumudza Zwigidi: U Sika Nyimele dzi Konadzeaho dza Mveledziso ya Afrika”.
2.4. Khabinethe yo dovha ya ṱanganedza u vusuludzwa ha Adzhenda ya Khasekano ya Afrika. Saizi ya Khasekano ya Afrika, na zwikili na zwiko zwine ḽa vha nazwo, zwo ita uri hu vhe na nḓila dza nyambedzano dzi shumaho u langa khonadzeo iyi ya u bveledzisa mveledziso ya dzhango iḽi.
3. Madalo a Tshiofisi a Germany
3.1. Khabinethe i ṱanganedza mvelelo dza Madalo a Tshiofisi nga Mukhantseḽara wa Germany Vho Angela Merkel, zwine zwa khwaṱhisa vhushaka vhu re hone vhukati ha mashango mavhili. Mukhantseḽara Vho Merkel vho dalela Afrika Tshipembe nga vhanga ḽa thambo ye vha i wana u bva kha Muphuresidennde Vho Ramaphosa u bva nga ḽa 5 u swika 7 Luhuhi 2020.
3.2. Afrika Tshipembe ḽo shumisa tshikhala itshi u kovhelana zwikhala zwa vhubindudzi zwinzhi zwi re hone kha shango. Hezwi zwo itwa nga tshifhinga tsha Foramu ya Mabindu yo vhumbwaho nga vharangaphanḓa vha Afrika Tshipembe na vhurumelwa ha mabindu ho fhelekedzaho Mukhantseḽara Vho Merkel. Sa ḽiṅwe ḽa vhabindudzi vhahulwane vhukuma kha Afrika Tshipembe, Germany ḽi na khamphani dzi fhiraho 600 kha shango ḽashu.
4. Buthano ḽa Thendelano ya Tshumisano nga ha Vhuthihi ha Matshilisano na U fhaṱa Lushaka
4.1. Khabinethe i ṱanganela na Muphuresidennde Vho Ramaphosa kha u ṱanganedza mvelelo dza Buthano ḽa Thendelano ya Tshumisano nga ha Vhuthihi ha Matshilisano na U fhaṱa Lushaka ḽe ḽa farwa nga fhasi ha thero: Miṅwaha ya Fumi ya Vhuthihi na Mvusuludzo: U ya kha Thendelano ya Tshumisano ya Vhuthihi ha Matshilisano na U fhaṱa Lushaka.”
4.2. Nga fhasi ha vhurangaphanḓa ha Muhasho wa Mitambo, Vhutsila na Mvelele – khathihi na ofisi ya Muphuresidennde na vhathu vha kwameaho vhahulwane – mabindu, muvhuso, vhashumi na tshitshavha tsha vhadzulapo vho tendelana u shumisana u fhaṱa tshitshavha tsho faranaho na mbofholowo yo bvelelaho, mulalo na tsireledzo khathihi na ṱhonifho ya pfanelo dza vhathu vhoṱhe.
4.3. Thendelano ya tshumisano i isa phanḓa Pulane ya Mveledziso ya Lushaka, zwine zwa eletshedza ṱhoḓea ya vhushumisani kha u alusa Afrika Tshipembe, ho sedzwa khethekanyo dza ḓivhazwakale ya matshilisano u mona na tshitshavha, na maanḓa kha khethululo nga zwa muvhala, zwine zwa kha ḓi bvela phanḓa na zwino.
5. Coronavirus
5.1. Khabinethe yo dovha ya khwaṱhisedza uri zwiimiswa zwa mutakalo zwoṱhe zwa shango zwo dzula zwo ita ngoma mudzula wo vhamba u ḓo kona u lwa na u dzhena ha Coronavirus kha shango. A hu na mivhigo kana zwiwo zwa u humbulela u vha hone ha vairasi kha shango nahone Khabinethe yo dovholola mulaedza wa Minista wa Mutakalo, Vho Dokotela Zweli Mkhize, uri maga oṱhe o dzudzanywa u thivhela vhulwadze kha shango.
5.2. Vhuimazwikepe hashu hoṱhe ho dzula ho ita ngoma mudzula wo vhamba na vhashumeli vha mutakalo vha khou ṱola thempheretsha ya vhaendi vha dzitshaka vhoṱhe. U engedza kha izwi, Afrika Tshipembe ḽo ṋetshedza na u kovhela nyendedzi dza dzilafho na zwitandadi zwa u ṱola uri muthu u na vhulwadze kha madokotela na manese kha sekhithara dzoṱhe dza muvhuso na dza phuraivethe.
5.3. Mavundu oṱhe o dzula o dzudzanya thimu dzine dza ḓo sedzana na tshiwo tsha dwadze, nahone vho dzula vho ita ngoma mudzula wo vhamba u kona u topola na u langa nyimele dzine dzi nga sokou bvelela shangoni. Zwibadela zwo vhalaho zwo topolwa u mona na shango sa senthara dza u valela na u ilafha muthu muṅwe na muṅwe ane a nga vha o kavhiwa nga Coronavirus.
5.4. Nga kha Embasi yashu ngei China ri khou vhea iṱo vhukuma tshiimo nahone ri na fulufhelo ḽa uri ro ḓiimisela u phulusa matshudeni na vhaṅwe vhadzulapo vha Afrika Tshipembe vhane zwa zwino vha kha ḽa Wuhan ngei China arali ha nga vha na ṱhoḓea ya u ita ngauralo.
B. Tsheo dza Khabinethe
6. Mulangano wa Tshumisano na Vhukonani ngei Vhubvaḓuvha ha Tshipembe ha Asia (TAC)
6.1. Khabinethe yo tendela u wana vhuimo ha Afrika Tshipembe kha TAC ine ya ḓo rumelwa Phalamenndeni u wana thendelo ya fomaḽa ya mulangano. Dzangano ḽa Tshaka dza Vhubvaḓuvha ha Tshipembe ha Asia (ASEAN) ḽo vhumbwa nga ḽiṅwe ya madzingu a mafulufulu ane a khou aluwa nga u ṱavhanyedza ḽifhasini. U wana vhuimo kha TAC zwi ḓo thusa mabindu a Afrika Tshipembe u swikela zwikhala wa u dzhena kha dzingu ḽeneḽo, na mashango a ASEAN u dzhena Afrika na mimakete ya madzingu a Tshitshavha tsha Mveledziso ya Tshipembe ha Afrika.
7. Khoniferentsi ya Vhurathi ya Vhushumisani ha Dzitshaka ha Mashango Mbumbano (UN) ha Thekhinoḽodzhi kha Simphoziamu ya U ita uri hu vhe na Mulalo
7.1. Khabinethe yo tendela Afrika Tshipembe uri ḽi vhe ṋemuḓi wa Khoniferentsi ya Vhurathi ya Vhushumisani ha Dzitshaka ha Mashango Mbumbano (UN) ha Thekhinoḽodzhi kha Simphoziamu ya U ita uri hu vhe na Mulalo, u bva nga ḽa 23 u swika 26 Fulwi 2020, ine ya vha ya u tou thoma kha ḽa Afrika.
7.2. Simphoziamu i shela mulenzhe kha u khwinisa dzhango kha sia ḽa thivhelo ya khuḓano, u ita uri hu vhe na mulalo, tsireledzo na mveledziso na u fhaṱa nga huswa nga murahu ha khuḓano. Ndivho ya ṅwaha uno hu ḓo vha u wana thandululo nga u ṱuṱuwedza kushumisele kwa thekhinoḽodzhi dza tshizwinozwino na khontsephuti kha mishumo yo rangwaho phanḓa nga UN.
Nga tshifhinga tsha Simphoziamu iyi, Afrika Tshipembe ḽi ḓo kona u ṱuṱuwedza zwibveledzwa zwa thekhinoḽodzhi yo bveledzwaho fhano hayani khathihi na u khwaṱhisa vhukoni ha nḓowetshumo ya vhupileli ha fhano hayani.
C. Milayotibe
8. Mulayotibe wa Thengo nga Muvhuso
8.1. Khabinethe yo ṱanganedza khanḓiso ya Mulayotibe wa Thengo nga Muvhuso u itela u wana mahumbulwa nga tshitshavha. Wa vhuya wa phasiswa wa vha mulayo, Mulayotibe u ḓo fhelisa Mulayo wa Muhanga wa Mbekanyamaitele ya Thengo u Takalelwaho, 2000 (Mulayo wa 5 wa 2000) na u khwinisa miṅwe milayo i elanaho na thengo.
8.2. Mulayotibe u dzinginya muhanga muthihi wa u langa thengo nga muvhuso. U thoma maanḓalanga a thengo u itela u langa na u ṱuṱuwedza Khethekanyo ya 217 ya Mulayotewa wa Riphabuḽiki ya Afrika Tshipembe wa 1996 u mona na muvhuso. U ḓivhadza mulayo u leluwaho wa zwiṱirathedzhi zwa u renga zwi takalelwaho u tshi khou tikedza zwipikwa zwa muvhuso zwa ikonomi na matshilisano.
9. Mulayotibe wa Khwiniso wa Ndinganyiselo ya U thola wa 2020
9.1. Khabinethe yo tendela u swikiswa ha Mulayotibe wa Khwiniso wa Ndinganyiselo ya U thola, 2020, ngei Phalamenndeni. Khwiniso dzi ḓo manḓafhadza Minista wa zwa Mushumo na Vhashumi vha tshi khou kwamana na vhathu vha kwameaho vha sekhithara, u ḓivhadza mbetshelwa dzi konaho u itela u dzudzanya zwipikwa zwa u vha na vhuimeli ho katela vhoṱhe kha Ndinganyiselo ya U thola kha sekhithara yo tiwaho. U ḓo dovha wa fhungudza muhwalo wa u langa kha vhatholi vhaṱuku. Mulayotibe u ṱuṱuwedza zwikhala zwi linganaho na kufarele ku linganaho kha u thola nga u fhelisa khethululo i si yavhuḓi.
10. Mulayotibe wa Khwiniso wa U khwiniswa ha Pfanelo dza Mavu a Vhudzulo
10.1. Khabinethe yo tendela khanḓiso ya Mulayotibe wa Khwiniso wa U khwiniswa ha Pfanelo dza Mavu a Vhudzulo, u itela u wana mahumbulwa nga tshitshavha.. Mulayotibe u itela maitele a tendelwaho u ya nga ndayotewa a u wana pfanelo dza vhuṋe na vhudzulo kha mavu u itela u khakhulula u sa shuma u ya nga ndayotewa ha khethekanyo mbili dza Mulayo wa U khwiniswa ha Pfanelo dza Mavu a Vhudzulo, 1991, (Mulayo wa 112 wa 1991). Nzudzanyo ya zwino i khethulula vhafumakadzi kha tshandukiso ya pfanelo dza mavu a vhudzulo u ya kha vhuṋe.
10.2. Mulayotibe u dovha wa khwaṱhisedza tshumiso yawo kha shango ḽoṱhe, na he kale Mulayo wa vha u sa shumi kha “mivhuso ya vhuḓilangi” ya Bophuthatswana, Ciskei, Transkei na Venda.
11. Mulayotibe wa Vhuendedzi ha Lwanzheni 2020
11.1. Khabinethe yo ṱanganedza khanḓiso ya Mulayotibe wa Vhuendedzi ha Lwanzheni u wana mahumbulwa nga tshitshavha. Mulayotibe u ṱoḓa u bveledza bono ḽa muvhuso ḽa u vusuludza sekhithara ya zwa vhuendedzi ha lwanzheni, na u khwaṱhisa u shela mulenzhe hayo kha nyaluwo na tshanduko i sa shaedzi tshithu ya ikonomi. U tshimbilelana na mbetshelwa dza vhuendedzi ha lwanzheni ha Mbekanyamaitele a Vhuendi ha Lwanzheni yo Katelaho zwoṱhe ye ya tendelwa nga Khabinethe nga 2017. Wa vhuya wa ṱanganedzwa sa mulayo, Mulayotibe u ḓo fhelisa tshivhalo tsha milayo ya zwi elanaho na zwa vhuendi ha lwanzheni.
12. Mulayotibe wa Vhutsireledzi ha Raḽiwei, 2020
12.1. Khabinethe yo tendela u rumelwa ha Mulayotibe wa Vhutsireledzi ha Raḽiwei, 2020 Phalamenndeni. Mulayotibe u ṱoḓa u khwaṱhisa vhutsireledzi kha raḽiwei dzashu na u khwaṱhisedza uri zwidimela zwi vha maitele a kungaho a vhuendi zwa dovha zwa kona u shela mulenzhe nga nḓila yavhuḓi kha ikonomi.
12.2. Mulayotibe wo tendelwa lwa u tou thoma nga Luhuhi 2018 wa iswa kha vhukwamani na tshitshavhani kha mavundu oṱhe nga Ṱhafamuhwe 2018. Mulayotibe wo tendiwaho une wa ḓo rumelwa Phalamenndeni wo dzhiela nṱha mahumbulwa o waniwaho nga tshifhinga tsha vhukwamani na tshitshavha. Maitele a Phalamennde a ḓo dovha a kunakisa Mulayotibe phanḓa ha musi u tshi phasiswa wa mulayo.
13. Mulayotibe wa Khwiniso ya Khorokhaṱhuli ya Vhuendi wa 2018
13.1. Khabinethe yo tendela u rumelwa ha Mulayotibe wa Khwiniso ya Khorokhaṱhuli ya Vhuendi wa 2018 Phalamenndeni. Mulayotibe u khwinisa Mulayo wa Khorokhaṱhuli ya Vhuendi wa 1998 (Mulayo 39 wa 1998) une wa sedzana na dziaphiḽi dzi elanaho na khumbelo dza phemithi dza u endedza badani (zwa zwino i vhidzwa u pfi dziḽaisentsi dza u shuma). Khwiniso i dzhiela nṱha tshanduko dza mbekanyamaitele, mveledziso na mulayo muswa u bva 1998.
13.2. Mulayotibe u tshimbidza zwavhuḓi na u khwinisa kuitele kwa aphiḽi, zwine zwa vhulunga masheleni na tshifhinga, na u konisa vhareili vha vhuendi ha badani ha fhano hayani na nga nnḓa ha mikano yashu u tshimbidza vhanameli nga nḓila yavhuḓi khathihi na u ḓiitela masheleni avho.
D. Milaedza
14. U fhululedza
14.1. Khabinethe i fhululedza:
- Thimu ya vhagudi vha Gireidi 11 vha Afrika Tshipembe: Sureshka Naidoo; Caitlin Schwarer; Nondumiso Ntshangase; Nosipho Dube; Mihlali Precious Stofile; Ondele Bede; Okhela Sigwela na Lizalise Dlomo, vhe vha wina Muṱaṱisano wa Vhuṱanu wa International School Moot Court ngei Poland.
- Mubambeli wa Afrika Tshipembe Natalie du Toit nga u voutelwa u dzhena kha makhaulatshele a vhabambeli vhaṱanu vha Laureus Sporting Moment Award kha miṅwaha ya 20 yo fhiraho (2000-2020).
15. Ndiliso
15.1. Khabinethe i rumela ndiliso kha:
- muṱa na khonani dza Phurofesa Vho Joseph Shabalala, muimbi wa kale na mutumbuli wa tshigwada tsho winaho Grammy Award Ladysmith Black Mambazo. Muzika wavho wo ṱuṱuwedza vhathu vhanzhi vhukuma u mona na ḽifhasi na u ṱanganya MaAfrika Tshipembe. Muphuresidennde Vho Ramaphosa vho ḓivhadza uri Phurofesa Vho Joseph Tshabalala vha ḓo ṱhonifhiwa nga u ṋewa Mbulungo ya Tshiofisi yo Khetheaho ya Khethekanyo ya Vhuvhili (2).
- muvhuso na vhathu vha Kenya kha u lovha ha Muphuresidennde wa Kenya wa kale Muhulisei Vho Daniel Toroitich Arap Moi, vhe vha shuma sa Muphuresidennde wa Kenya wa vhuvhili nga murahu ha u wana mbofholowo.
- muṱa na khonani dza Mukaputeni Thabiso Collins Tolo (49), Muofisiri wa U thoma Tebogo Caroline Lekalakala (33) na Muṱoli wa Bupo Gugu Comfort Mnguni (36), vhe eropuleni yavho ya wela kha vhupo ha dzithavha tsini na Mossel Bay ngei Kapa Vhukovhela nga 23 Phando 2020. Nga tshifhinga tsha u lovha havho vho vha vha khou shuma kha Maanḓalanga a Vhuḓivhavhufhufhi a Afrika Tshipembe.
- muṱa na khonani dza Vho Marcelino dos Santos, muṅwe wa vhatumbuli vha Mozambique Liberation Front (FRELIMO), vhe vha lovha vha na miṅwaha ya 90. Murangaphanḓa wa kale vho vha muṅwe wa tshiga tsha vhulwelahaya ha Afrika. Vho vha vhe mulwelambofholowo wa kale wa Mozambique, na u dovha u vha rapolotiki na murendi vhe vha saina maṅwalo avho na madzina a khole khole a Lilinho Micaia and Kalungano.
E. U tholwa
U tholwa hoṱhe ho fhira kha khwaṱhisedzo ya ndalukano na thendelo yo teaho.
16. Vho Busani Ngcaweni na Ṱhoho kha Tshikolo tsha Lushaka tsha Muvhuso
17. Vho Yoliswa Makhasi sa Mulanguli Dzhenerala wa Muhasho wa Tshumelo ya Tshitshavha na Ndaulo.
18. Vho Ayanda Kanana sa Muofisiri Muhulwane (CEO) na Mulangi Muhulwane wa Bannga ya Mveledziso ya zwa Vhulimi na Mavu
19. Vho Basil Bryan Ford sa Muṱhogomeli Muhulwane na Maanḓalanga a Muvhalelano kha Zhendedzi ḽa Tswikelo na Tshumelo yo Angaredzaho ḽa Afrika Tshipembe.
20. Vho Luvuyo Keyise sa Muṱhogomeli Muhulwane na Maanḓalanga a Muvhalelano a Dzhendedzi ḽa Thekhinoḽodzhi ya Mafhungo a Muvhuso.
21. Miraḓo ya Bodo ya Phaka dza Lushaka dza Afrika Tshipembe:
a. Vho Zola Luxolo Fihlani;
b. Vho Gertrude Buyelwa Koyana;
c. Vho Faizal Docrat;
d. Vho Jeoffrey Mashele.
22. Miraḓo ya Bodo ya Tshiimiswa tsha Bayodaivesithi ya Afrika Tshipembe.:
a. Vho Phuthanang Cenea Motsielwa;
b. Vho Pamela Bulelwa Yako; and
c. Dokotela Vho Kowiyou Yessoufou.
23. Miraḓo ya Bodo ya Maanḓalanga ya Isimangaliso Wetland Park:
a. Phurofesa Vho Antonia Thandi Nzama (Mudzulatshidulo);
b. Vho Nomagcisa Cawe;
c. Phurofesa Vho Christopher Peter Small;
d. Vho Leon Langalibalele;
e. Vho Letlhogonolo Noge-Tungamirai;
f. Vho Gonasagren Ganesh Nair; and
g. Inkosi Tembe Mabhudu Israel;
h. Muimeli wa Maanḓalanga a Vhuendelamashango ha KwaZulu-Natal:
i. CEO;
j. Muimeli wa Muhasho wa Mupo, Maḓaka na Vhureakhovhe.
Yo vhudziswa:
Vho Phumla Williams – Muambeli wa Khabinethe o tou farelaho
Sele: 083 501 0139
