Xana u endla njhani xikombelo xa ntirho eka Tindzawulo ta Mfumo
Swivandla eka tindzawulo ta rixaka kumbe ta tiphurovhinsi swi tatiwa hikuva ku rhambisa vatirhela mfumo kumbe hikuva ku rhambiwa swikombelo swa vatirhi lava va nga tirheki eka mfumo. Swivandla eka swiyimo swa le henhla ku fana na vukorhokeri bya vurhangeri bya le henhla, swi fanele swi navetisiwa erixakeni hinkwaro ku rhamba lava tirhaka eka mfumo na ku suka eka lava va nga tirheki eka mfumo.
Hi ku landza nawu, swivandla swi navetisiwa eka Sekhula ya Mintirho ya Tindzawulo ta Mfumo leyi yi hlanganisiwaka no hangalasiwa vhiki na vhiki hi Ndzawulo ya Vatirhelamfumo na Vulawuri (DPSA).
Sekhula ya Mintirho ya Tindzawulo ta Mfumo yi tivisa vatirhi hi swivandla swa mintirho eka Tindzawulo ta Mfumo. Vanhu lava va nga ri ki vatirhela mfumo kambe va ri ni ku tsakela eka swiyimo leswi swi navetisiwake va fanele va vutisa ndzawulo leyi yi navetiseke loko swi fanerile ku va nga endla xikombelo xa ntirho. Vuxokoxoko bya laha va nga ti hlanganisaka na tindzawulo leti ti navetiseke bya kumeka eka Sekhula.
Tindzawulo tin’wana ku fana na ya Vusirheleri yi nga ku kombela leswaku u rhanga u endla xikambelo xa swa rihanyu bya wena yi nga se tekela enhlokweni xikombelo xa wena.
U fanele u endla yini
- Kuma no tata Fomo ya Z83 eka inthanete (Xikombelo xa ku Thoriwa). U nga tlhela u kuma fomo ku suka eka ndzawulo yin’wana na yin’wana ya rixaka kumbe ya phurovhinsi.
- Fomo ya wena a yi heleketiwi hi maphepha ya vutitivisi (CV). Ndzawulo yi nga tlhela yi ku kombela ku va u rhumela tikhopi leti ti setisifayiweke ta tidyondzo ta wena, pasi, na yin’wana maphepha lawa ya faneleke. U komberiwa ku hlaya xinavetiso hi ku hetiseka ku endlela leswaku u tiva leswi u faneleke u swi rhumela.
- Rhumela fomo ya wena leyi hetisekeke ya Z83 na maphepha hinkwawo lawa ya lavekaka eka kherefu leyi yi nga eka xinavetiso.
- U nga kuma papila ro amukela xikombelo xa wena, leswi swi ya hi maendlelo ya tindzawulo.
Swi teka nkarhi wo tani hi kwihi
Ku rhamba na ku hlawula lava va faneleke swi hambana hi ku ya hi tindzawulo, kambe xikongomelo i ku endla leswaku mhaka hinkwayo yi hatla yi hetiseka.
