Ungasifaka njani sicelo semsebenti kumaTiko waHulumende
Tikhala temisebenti kumatiko avelonkhe kanye newetifundza tigcwaliswa ngekutsi kufunwe tisebenti letisebentako nome kumenywe labo labangakacashwa kumaTiko waHulumende kutsi bafake ticelo temsebenti. Tikhala temisebenti etikhundleni letisetulu, k.k. umsebenti wekulawula etikhundleni letisetulu, kufanele kutsi tikhangiswe kuvelonkhe kute kufunwe ngekhatsi kanye nangephandle kwemaTiko waHulumende.
Njengekusho kwemtsetfo tikhala temisebenti tikhangiswa kuSekhula Yetikhala Temisebenti YaHulumende lehlanganiswa iphindze ikhishwe ngeliviki Litiko Letemisebenti Yahulumende Nekuphatsa (DPSA).
LeSekhula Yetikhala Temisebenti YaHulumende yatisa tisebenti tahulumende mayelana netikhala temisebenti letikhona kumaTiko waHulumende. Bantfu labangasito tisebenti kumaTiko waHulumende kepha labanenshisekelo kuletikhala temisebenti letikhangisiwe kufanele kutsi batfole siciniseko kulelo tiko lelikhiphe letikhangiso kutsi bangatifaka yini nabo ticelo tabo temsebenti. Imininingwane yekutsintsa ematiko lakhiphe tikhangiso ifakwe kuleSekhula.
Lamanye ematiko lafanana neLetekuvikela angakucela kutsi wente luhlolo lwetemphilo ngembi kwekutsi sicelo sakho sisetjentwe.
Lokufanele ukwente
- Dvonsa ugcwalise Lifomu i-Z83 (Lifomu Lesicelo seMsebenti). Lelifomu ungalitfola futsi kunome ngabe nguliphi litiko lesifundza nome lavelonkhe.
- Namatselisa umlandvomphilo wakho (i-CV). Litiko lingaphindza futsi likucele kutsi ufake emakhophi eticu takho temfundvo leticinisekisiwe, ikhophi yamatisi kanye nalamanye emadokhumenti akho. Ucelwa kutsi usifundze ngekucophelela lesikhangiso kute ubone kutsi yini lekumele ukufake.
- Ngenisa lifomu lakho i-Z83 leligcwalisiwe kanye nawo onkhe emadokhumenti ladzingekako kulelikheli lelibhalwe kulesikhangiso.
- Kungenteka, kuya ngenchubo lelandzelwa ngulelo tiko, utfole incwadzi lesho kutsi basitfolile sicelo sakho.
Kutsatsa sikhatsi lesingakanani?
Inchubo yekufuna nekukhetsa iyehlukahluka kulelo nakulelo tiko, kepha injongo kutsi lenchubo yentiwe icedvwe ngesikhatsi lesifishane kakhulu nakwenteka.
