Kgopelmosomo ka go lefapha la mmuso

Dikgoba tša mešomo dikgorong tša bosetšhaba le tša diprofense di tlatšwa ka go thwala batho bao ba šomelago goba ka go mema batho bao ba sa šomelego mmušo go dira dikgopelo. Dikgoba tša maemo a godimo, ke go re ditirelo tša bolaodi bja godimo, di swanetše go kwalakwatšwa naga ka bophara moo go kago thwalwa batho bao ba šetšego ba šomela mmušo goba bao ba sa šomelego mmušo.

Bjalo ka ge e le molao, dikgoba tša mešomo di kwalakwatšwa ka Sekhulareng ya Dikgoba tša Mešomo ya Mmušo yeo e beakanywago le go ntšhwa beke ka beke ke Kgoro ya Titirelo le Taolo ya Setšhaba (DPSA).

Sekhulara ya Dikgoba tša Mešomo ya Mmušo e tsebiša bašomi ba mmušo ka ga dikgoba tšeo di lego gona ka Mmušong. Batho bao e sego bašomi ba mmušo eupša ba ena le kgahlego sekgobeng seo se kwalakwaditšwego ba swanetše go thoma ka go kwa go tšwa go kgoro yeo e kwalakwaditšego gore ba ka dira dikgopelo naa. Dintlha tša go ikgokaganya le kgoro yeo e kwalakwaditšego di gona ka Sekhulareng.

ikgoro tše dingwe go swana le ya Tšhireletšo di ka go kgopela go dira diteko tša maphelo pele di lebelela kgopelo ya gago.

Seo o swanetšego go se dira

1. Hwanyolla Foromo ya Z83 gomme o e tlatše (Foromo ya Kgopelo ya Mošomo). O ka hwetša foromo ye kgorong ye nngwe le ye nngwe ya naga goba ya profense.
2. Kgomaganye lengwalo la gago la mošomo (CV). Kgoro e ka go kgopela le gore o kgomaganye le dikhophi tšeo di netefaditšwego tša mangwalo a gago a dithuto, tokomane ya boitsebišo le ditokomane tše dingwe tša gago. Hle bala kwalakwatšo ka hlokomelo go bona gore o swanetše go kgomaganya eng.
3. Romela foromo ya gago ya Z83, yeo o e tladitšego le dinyakwa ka moka atereseng yeo e tšwelelago kwalakawatšong.
4. Go ya le ka tsela yeo e šomišwago ke kgoro yeo, o ka amogela lengwalo la go laetša gore kgopelo ya gago e fihlile.

E tšea nako ye kaakang

Tshepetšo ya go thwala le go kgetha e fapafapana go ya le ka dikgoro, eupša maikemišetšo ke go fetša tshepetšo ka nako ye nnyane ka moo go kgonegago.