Sibonelelomali sekondla umntfwana

Ngesi
Yini lekumele uyente
Sikhatsi semsebenti
Ngabe kubita malini
Emafomu lagcwaliswako
Ngubani longamutsintsa

 

 

Mayelana nesibonelelomali sekondla umntfwana

Nangabe uyeswela, ungasitfola sibonelelomali sekukusita ekondleni lomntfwana lomkhulisako.

Ungati kanjani kutsi uyafaneleka?

Kufanele kutsi:

  • Ube ngumbhasobhi losisekelo walomntfwana (sib. umtali, gogo nome mkhulu nome umntfwana longetulu kweminyaka le-16 budzala loyinhloko yalowo mndeni). Caphela: nangabe awusuye umtali walomntfwana, kufanele kutsi ukhombise bufakazi bekutsi ungumbhasobhi losisekelo walomntfwana ngekutsi uletse i-afidavithi lebuya emaphoyiseni, embikweni wesisebenti setenhlalakahle, i-afidavithi lebuya kumtali lotala lomntfwana nome incwadzi lebuya kuthishelanhloko wesikolo lapho afundza khona lomntfwana.
  • Ube sakhamuti saseNingizimu Afrika nome umhlali wesiphelane walelive.
  • Ungaholi ngetulu kwe-R52 800 ngemnyaka nangabe awukashadi. Nangabe ushadile, imalingena yenu naseyihlanganisiwe kufanele kutsi ingabi ngetulu kwe-R105 600 ngemnyaka.

Lomntfwana yena kufanele kutsi:

  • abe ngephasi kweminyaka le-18 budzala
  • anganakekelwa esikhungweni sembuso
  • ahlale kanye nembhasobhi losisekelo longakhokhelwa kutsi abhasobhe lomntfwana

Nine nobabili nalomntfwana kufanele kutsi nihlale eNingizimu Afrika.

Caphela: Ngeke usitfole lesibonelelomali  sebantfwana labangetulu kwalabasitfupha labangesibo bantfwabakho lobatalako nome bantfwana lobafake esiswini.

Utawutfola malini?
       
Utawutfola-R500 ngenyanga yemntfwana munye. (Top-up R500 + R250)

Utawukhokhelwa kanjani?

I-Ejensi yaseNingizimu Afrika Yesibonelelomali Setenhlalo (i-SASSA) itawukhokhela wena lesibonelelomali ngekusebentisa yinye yaletindlela letilandzelako:

  • ngekukunika kheshi endzaweni letsite yekuholela ngelusuku lolutsite
  • ngekudiphozitha ngekwe-elekthroniki ebhange lakho nome ku-akhawunti yasePostbank (libhange lingakukhokhisa ngekukusita kuloko)
  • ngesikhungo lesisebenta kalawula leso sibonelelomali

Caphela: Nangabe awukhoni kutilandzela wena ngekwakho lemali, ungakhetsa longakwentela loko losehhovisi laka-SASSA, nome unike lomunye emandla/ligunya  ekutsi akulandzele lesibonelelomali esikhundleni sakho.  

Sibonelelomali salomntfwana singabuketwa nini?

I-SASSA ingancuma kutsi lesibonelelomali singabuketwa yini. Imalingena yakho loyishito ngesikhatsi ufaka lesicelo salesibonelelomali itawuba sisekelo sekutsatsa leso sincumo. Utakwatiswa kusasele tinyanga letintsatfu ngelusuku lokutawukwentiwa ngalo lokubuketa nome lusuku lokutawufuneka ngalo sitifiketi lesisho kutsi usaphila (emadokhumenti lafakazela kutsi solo usaphila). Nangabe utfola imali yakho ebhange, ngekusebentisa sikhungo nome umlawuli, kudzingeka kutsi ugcwalise minyaka yonkhe sitifiketi lesisho kutsi usaphila lesitfolakala emahhovisi aka-SASSA.

Lesibonelomali salomntfwana singamiswa nini?

Loku lokulandzelako kungaholela ekutseni sibonelomali simiswe:

  • nangabe timo tekuphila takho tigucuka
  • umphumela wekubuketa
  • nangabe wehluleka kukhombisa kubambisana ngesikhatsi kubuketwa lesibonelelomali salomntfwana
  • nangabe wenta inkhohlakalo nome ungammeli ngalokungiko lomntfwana
  • nangabe kube neliphutsa ngesikhatsi kuvunywa lesibonelelomali salomntfwana
  • Nangabe lomntfwana akasabhasojwa nguwe.

Ngabe lesibonelelomali sitawuphelelwa nini sikhatsi?

Lesibonelelomali sitawuphelelwa sikhatsi nangabe:

  •  lomntfwana andlula emhlabeni
  • lomntfwana amukelwa esikhungweni sembuso
  • nangabe umbhasobhi angasitsatsi lesibonelelomali kute kube tinyanga letintsatfu letilandzelanako
  •  lomntfwana angekho kulelive
  • ekupheleni kwaleyo nyanga lomntfwana utawube aneminyaka le-18 budzala

Yini lekufanele kutsi ukwente

  1. Hamba uye emahhovisi e-Ejensi yaseNingizimu Afrika Yesibonelelomali Setenhlalakahle (i-SASSA) lasedvute nalapho uhlala khona ute uphetse loku lokulandzelako:
    • matisi wakho lonebhakhodi yemadijithi la-13 (i-ID) kanye nesitifiketi sekutalwa. Nangbe ute matisi nome sitifiketi sekutalwa:
    • Gcwalisa lifomu le-afidavithi laka-SASSA embikwaKhomishina Wekufungisa longasiso siphatsimandla saka-SASSA.
    • Letsa:
      • sitatimende lesifungelwe lesisayinwe ngumuntfu lowatiwako (njengelikhansela, umholi wendzabuko, sisebenti setenhlalakahle, umholi wetenkholo nome thishelanhloko) lowati wena lofaka lesicelo kanye nalomntfwana Utawunikwa siliphi. Sigcine njengebufakazi bekutsi ufake sicelo.
      • Bufakazi bekutsi usifakile sicelo samatisi kanye/nome sitifiketi sekutalwa kuLitiko Letasekhaya.
      • Matisi wesikhashana lokhishwe Litiko Letasekhaya (nangabe akhona).
      • Sitifiketi sekubhabhadiswa nangabe sikhona.
      • Likhadi lekuya emtfolamphilo nalikhona.
      • Umbiko wemphumela wesikolo nalikhona.
    • Bufakazi banome ngabe ngusiphi sondlo salomntfwana lositfolako
    • Bufakazi bekutsi kukhona umholo lowutfolako
    • Sitifiketi semshado (nangabe sikhona).
    • Nangabe udivosile, umyalo wenkantolo lotsi nguwe logcina lomntfwana.
    • Nangabe munye nome bobabili batali abatiwa nome sebashona, sitifiketi semuyi nome bufakazi bekutsi lomtali wanyamalala akatiwa, sib. umbiko wemaphoyisa lochaza kutsi lowo muntfu wanyamalala.
  2. Gcwalisa lifomu lesicelo embikwesisebenti saka-SASSA (caphela kutsi nguwe kuphela njengalofaka sicelo nome siphatsimandla saka-SASSA lesingagcwalisa lelo fomu).
  3. Utawunikwa siliphi. Sigcine njengebufakazi bekutsi ufake sicelo.

Kwentekani nangabe sicelo sakho asivunywa?

Nangabe sicelo sakho asivunywa, i-SASSA itakwatisa ngekukubhalela incwadzi ikuchazele kutsi kungani singakaphumeleli sicelo sakho.

Nangabe ungavumelani nalesincumo, ungafaka sicelosikhalo eNdvuneni Yetekutfutfukiswa Kwetenhlalakahle ehhovisi lavelonkhe leLitiko Letekutfutfukiswa Kwetenhlalakahle, uchaze kutsi kungani ungavumelani. Sicelosikhalo sakho kufanele kutsi usente kungakapheli tinsuku letinge-90 watisiwe kutsi sicelo sakho asikaphumeleli.

Kutsatsa sikhatsi lesingakanani

  • Kungatsatsa tinyanga letintsatfu kusebenta sicelo sakho.
  • Nangabe sibonelelomali sakho sivunyiwe, utawukhokhelwa ngelusuku lowafaka ngalo sicelo sakho.

Kubita malini

Kumahhala.

Emafomu lekumele kutsi agcwaliswe

Lifomu lekufaka lesicelo alitfolakali ku-inthanethi, kodvwa ungalitfola ehhovisi laka(SASSA) lelisedvute.

Ungatsintsa bani

I-Ejensi yaseNingizimu Afrika Yesibonelelomali Setenhlalakahle (i-SASSA)

 

SASSA Toll free: 0800 60 10 11
Email: GrantEnquiries@sassa.gov.za  

Published Date

Share this page