Isibonelelo Sesondlo Somntwana

Okuphathelene

Okufanele ukwenze

Isikhathi esibekiweko 

Kubiza malini

Amaforomo ekufanele uwazalise

Ungathintana nobani

Malungana nesibonelelo sesondlo somntwana

Nawudingileko, ungathola isibonelelo sombuso esizakusiza ukukhulisa umntwana omtlhogomelako/omkhulisako.

Wazi Njani Ukuthi Ukulungele Ukuthola Isibonelelo Sesondlo?

Kufanele:

• Ube mtlhogomeli womntwana okhuliswako (isb. umbelethi, ugogo/ubamkhulu namkha ube mntwana weminyaka yobudala engaphezulu keli-16 oqale umuzi. Tjheja:  Nayibe awusimbelethi wemvelo womntwana otlhogonyelwako/okhuliswako, kufuze uveze ubufakazi bokuthi umtlhogomeli womntwana loyo  ngencwadi efungelweko (i-afidavithi) ebuya emapholiseni, ngombiko wesisebenzi sezehlalakuhle, nge-afidavithi yombelethi wemvelo namkha ngencwadi ebuya kuphrinsipali wesikolo lapho umntwana afunda namkha afunde khona.
• Ube sisakhamuzi seSewula Afrika namkha ube mumuntu ohlalele safuthi eSewula Afrika.
• Umrholwakho/imali oyingenisako ingadluli ema-R52 800 ngomnyaka nayibe awukathathi/awukendi. Nayibe uthethe/wendile, umrholwenu nobabili sewuhlangene akukafaneli udlule ama-R105 600 ngomnyaka.

Umntwana kufanele:

• abe ngaphasi kweminyaka eli-18 ubudala
• angabi mntwana otlhogonyelwa esijamisweni sombuso
• ahlale nomtlhogomeli wakhe ongabhadelelwa ukumtlhogomela.

Nobabili ninomntwana lowo kumele bonyana nihlala eSewula Afrika.

Tjheja:  Awukwazi ukuthola lesisibonelelo somrholo ngabantwana abangaphezulu kabathandathu abangasibakho ngokwemvelo namkha abangasibantwana bokutholwa babe ngabakho ngomthetho namkha bokumbelekelwa.

Uzakuthola malini?

Uzakuthola i-R530 ngenyanga umntwana ngamunye. (Top-up R530 + R260)

Uzakubhadalwa njani?

I-Ejensi yeeMbonelelo zeSondlo noMhlalaphasi kaRhulumende yeSewula Afrika  (i-SASSA) izakubhadela isibonelelo sakho sesondlo somntwana ngenye yaleziindlela ezilandelako:

• uzakuthola imalakho yesibonelelo endaweni ethileko eliziko lemali, ngelanga elithileko
• izakufaka imali e-akhawundini yakho yebhanga namkha ye-Postbank (ibhanga ingahle ikubhadelisele umsebenzi ekusiza ngawo wokwamukela imalakho evela kwa-SASSA)
• Ngokudlulisela isibonelelo sakho esijamisweni esithileko esisebenza njengomlawuli wesibonelelo

Tjheja: Nakufumaniseka ukuthi awukghoni ukuyozithathela imali mathupha, ungazikhethela isiphathimandla sezeemali e-ofisini yakwa-SASSA ukuthi sikurholele, namkha unikele omunye umuntu amandla wokukurholela isibonelelo sakho.

Singabuyekezwa nini isibonelelo somrholo womntwana?

I-SASSA ingathatha isiqunto sokuthi isibonelelo sakho somrholo siyabuyekezwa namkha njani na. Ingeniso yakho yemali oyibikileko nawenza isibawo sesibonelelo ngiyo ezakulawula ukuthi isibonelelo sakho sibuyekezwa njani. Uzakwaziswa kusasele iinyanga ezintathu ukuthi isibonelelo sakho sizakubuyekezwa nini, namkha waziswe ngelanga lokugcina lokuveza ubufakazi bokuthi usaphila. Nayibe ufumana imalakho yesibonelelo ebhanga, ezikweni leemali namkha ngomjameli, kufanele uzalise isitifikethi sobufakazi bokuphila ema-ofisini we-SASSA qobe mnyaka.

Kukunini lapho isibonelelo somrholo womntwana singajanyiswa khona?

Lokhu okulandelako kungenza ukuthi isibonelelo sigcine sijanyisiwe:

• lokhuya ubujamo bakho nabutjhugulukako
• umphumela wokubuyekezwa kwesibonelelo
• nayibe awusebenzisani kuhle neemphathimandla nakubuyekezwa isibonelelo somrholo womntwana
• nawukhwabanisako namkha nawudunga namkha wethula imitlolo engasiliqiniso malungana nomntwana onikelwa isibonelelo
• nayibe kukhona lapho kwaba nomtjhapho khona nakuphasiswa isibawo sesibonelelo somrholo
• nayibe umntwana awusahlali naye/awusamtlhogomeli

Sivalwa Nini Isibonelelo Sesondlo Somntwana?

Isibonelelo sesondlo somntwana sivalwa: 

• lokhuya umntwana nakabhubhako
• lokhuya umntwana nakayokuhlala esijamisweni sombuso (iziko elitlhogomela iintandani)
• nayibe umtlhogomeli uhlala iinyanga ezintathu ngokulandelana angamrholeli isibonelelo sakhe umntwana
• nayibe umntwana akakho eSewula Afrikapha
• ekupheleni kwenyanga umntwana lo ahlanganisa ngayo iminyaka yobudala eli-18.
   

Ekufuze ukwenze

1. Khamba uye e-ofisini le-SASSA langekhenu/eliseduze nalapho uhlala khona, uphathe nakhu okulandelako:
   • uMazisi (i-ID) yakho eneenomboro ezili-13 ne-bar-code kunye nesitifikethi sokubelethwa komntwana. Nayibe awunayo i-ID namkha isitifikethi sokubelethwa komntwana

• Zalisa i-afidavithi eforomeni lakwa-SASSA elijayelekileko phambi komFungisi ongasisiphathiswa se-SASSA.
• Iza neencwadi nemitlolo elandelako nasi: 
  • isitatimende esifungelweko esitlikitlwe mumuntu othembekileko ( njengekhansela, ikosi, isisebenzi sezehlalakuhle, umfundisi namkha uphrinsipali wesikolo) owazi umfakisibawo nomntwana
  • ubufakazi bokuthi wenze isibawo sokuthola i-ID/namkha isitifikethi sokubelethwa emNyangweni wezangeKhaya
  • i-ID yesikhatjhana ekhutjhwe mNyango wezangeKhaya (nayibe unayo)
  • isitifikethi sokubhabhadiswa, nayibe unaso
  • ikarada lemtholapilo nayibe unalo
  • iripoti yesikolo, nayibe unayo.
• Ubufakazi obutjengisa ukuthi kunesondlo somntwana ositholako.
• Ubufakazi bengeniso yakho ( imali oyirholako/oyingenisako).
• Isitifikethi sakho somtjhado (nayibe unaso).
• Nayibe nihlukene ninomkakho, iza nencwadi yekhotho ethi umntwana unikelwe wena ukuthi uhlale naye.
• Nayibe omunye umbelethi akasekho emhlabeni namkha nayibe akaziwa lapho akhona, iza nesitifikethi sokubhubha kwakhe namkha ubufakazi bokuthi akaziwa lapho akhona, isb: umbiko wabalahlekileko obuya emapholiseni.

2. Zalisa iforomu lesibawo phambi kwesiphathimandla se-SASSA (tjheja ukuthi nguwe kwaphela umfakisibawo namkha isiphathimandla se-SASSA abangazalisa iforomu lesibawo).
3. Uzakunikelwa isitlankana. Silonde, ngoba sibufakazi bokuthi ufake isibawo.

Kwezekani-ke nakufumaniseka ukuthi isibawo sakho saliwe?

Nayibe isibawo sakho saliwe, u-SASSA ukutlolela incwadi akutjele ukuthi kwenziwe yini singakaphumeleli isibawo.

Nayibe awuvumelani nesiqunto se-SASSA, ungadlulisela isililo kuNgqongqotjhe wezokuThuthukiswa komPhakathi e-Ofisini yeliZweloke yomNyango wezokuThuthukiswa komPhakathi, uhlathulule ukuthi kubayini ungavumelani nesiqunto sayo sokwala isibawo sakho.  Kufuze udlulise isililo sakho kungakapheli amalanga ama-90 ukusukela ngelanga owaziswe ngalo ukuthi isibawo sakho azange sibe yipumelelo.

Kuthatha isikhathi esingangani

• Kungathatha isikhathi esingabe sifike eenyangeni ezintathu ukusebenza isibawo sakho.
• Nakube isibawo sakho sokuthola isibonelelo sesondlo siyaphumelela, uzakubhadalwa ukusukela ngelanga ofake ngalo isibawo.

Kubiza malini

Wenzelwa simahla lomsebenzi wokufaka isibawo.

Amaforomu ekufuze agcwaliswe

Awakho ku-inthanethi amaforomu wokwenza isibawo, kodwana ungawathola e-ofisini ye-SASSA yangekhenu/eseduze nalapho uhlala khona.

Uthintana nobani

Uthintana ne-South African Social Security Agency (SASSA)