Tšhelete ya thušo ya leago ya tlhokomelo ya ngwana

Ka ga

Seo o swanetšego go se dira

Lebaka

E dira tshenyagelo ya bokae

Diforomo tšeo di swanetšwego go tlatšwa

Dintlha tša boikopanyo

Mabapi le tšhelete ya thušo ya leago ya tlhokomelo ya ngwana

Ge e le gore o a hloka, o ka hwetša tšhelete ya thušo ya leago ya go go thuša go godiša ngwana yo o mo hlokometšego.

Naa o tseba bjang gore o na le maswanedi?

O swanetše:

• Go ba mohlokomedi wa ngwana wa ka mehla (go fa mohlala, makgolo wa ngwana goba o le ngwana wa mengwaga ya ka godimo ga ye 16 yo e lego hlogo ya lapa). Hlokomela: Ge e le gore ga se wena motswadi wa ngwana, o swanetše go fa bohlatse bja gore o mohlokomedi wa ngwana wa ka mehla ka abitabiti ye e saennwego ke mohlankedi wa maphodisa, pego ya modirelaleago, abitabiti go tšwa go motswadi wa madi goba lengwalo leo le tšwago go hlogo ya sekolo seo ngwana a tsenago go sona.
• O be modudi wa Afrika Borwa goba modudi wa sa ruri ka nageng.
• O se hwetše moputso wo o fetago R52 800 ka ngwaga ge e le gore ga se wa nyalwa. Ge e le gore le nyalane, letseno la lena ge le kopantšwe ga se la swanela go feta R105 600 ka ngwaga.

Ngwana o swanetše:

• go ba le mengwaga ya ka fase ga ye 18
• a se be a hlokomelwa sa ruri ka sehlongweng sa mmušo
• a be a dula le mohlokomedi wa dinako ka moka yo a sa lefšego go hlokomela ngwana.

Bobedi wena le ngwana le swanetše go dula ka Afrika Borwa.

Hlokomela: O ka se hwetše tšhelete ye ya thušo ya leago go bana bao ba fetago ba tshela bao ba sego ba gago ba madi goba go bao ba godišwago ka semolao.

Naa o tla hwetša bokae?
       
O tla hwetša R560 ka kgwedi ka ngwana. (Top-up R560 + R280)

Naa o tla lefša bjang?

Setheo sa Tšhireletšo ya Leago sa Afrika Borwa (SASSA) se tla go lefa tšhelete ye ya leago ka o mongwe wa mekgwa ye e latelago:

• ka kheše ka lefelong le itšego ka letšatši le itšego
• ka go teposita tšhelete yeo ka elektroniki ka akhaonteng ya gago ya panka goba ka akhaonteng ya Panka ya poso (panka e ka go lefiša tirelo ye)
• go sehlongwa seo se šomago bjalo ka molaodi wa tšhelete ye ya leago.

Hlokomela: Ge e le gore ga o kgone go amogela tšhelete ka bowena, o ka thwala ramolao ka kantorong ya SASSA goba wa fa motho yo mongwe maatla a ramolao a gore a amogele tšhelete yeo legatong la gago.

Naa tšhelete ye ya leago e tla lekodišišwa leswa neng?

SASSA e ka tšea sephetho sa ge eba tšhelete ya gago ya leago e swanetše go lekodišišwa leswa. Letseno la gago bjale ka ge le tsebagaditšwe nakong ya ge o dira kgopelo ya tšhelete ya thušo ya leago le tla bopa motheo wa sephetho se. O tla tsebišwa dikgwedi tše tharo pele ga nako gore tekodišišo ye e tla dirwa neng goba letšatšikgwedi leo ka lona setifikeiti sa bophelo (sengwalwa sa go hlatsela gore o sa phela) se swanetšego go tlišwa. Ge e le gore o amogela tšhelete ya gago pankeng, sehlongweng goba go ramolao, o kgopelwa go tlatša setifikeiti sa bophelo ka dikantorong tša SASSA ngwaga o mongwe le o mongwe.

Naa tšhelete ya thušo ya leago ya ngwana e ka fegwa neng?

Dilo tše di latelago di ka feletša ka go fegwa ga tšhelete ya thušo ya leago:

• ge maemo a ngwana a fetoga
• dipoelo tša tekodišišo
• ge o palelwa ke go dirišana ge tšhelete ya thušo ya leago ya ngwana e lekodišišwa leswa
• ge o dira bomenetša goba o bolela maaka ka ga ngwana
• ge e le gore go bile le phošo ge thušo ya leago ya ngwana e dumelelwa.
• Ge e le gore ngwana ga a sa le ka fase ga tlhokomelo ya gago.

Naa tšhelete ya thušo ya leago ya ngwana e tla felelwa ke nako neng?

Tšhelete ya thušo ya leago e tla felelwa ke nako ge:

• ngwana a hlokofala
• ngwana a amogetšwe sehlongweng sa mmušo
• mohlokomedi a sa amogele tšhelete ya thušo ya leago mo dikgweding tše tharo tša go latelana
• ngwana a se gona ka nageng
• mafelelong a kgwedi a ge ngwana a eba le mengwaga ye 18.

Se o swanetšego go se dira

1. Eya kantorong ya Setheo sa Tšhireletšo ya Leago sa Afrika Borwa (SASSA) ya kgauswi le fao o dulago gona o tle le dilo tše di latelago:
   • pukwana ya gago ya boitsebišo (ID) ya pakhoute ya dinomoro tše 13 le setifikeiti sa matswalo. Ge e le gore ga o na le pukwana ya boitsebišo goba setifikeiti sa matswalo:
     • o swanetše go tlatša abitabiti go fomete ye e tlwaelegilego ya SASSA go na le Mokhomišenare wa tša Boikano yo e sego mohlankedi wa SASSA.
     • Etla le dingwalwa tše di latelago:
       • setatamente sa boikano seo se saennwego ke motho wa seriti (go fa mohlala, mokhanselara, moetapele wa setšo, modirelaleago, moruti) yo a tsebago mokgopedi le ngwana
       • bohlatse bja gore o dirile kgopelo ya pukwana ya boitsebišo le/goba ya setifikeiti sa matswalo Kgorong ya Merero ya Selegae
       • pukwana ya boitsebišo ya lebakanyana ye e abilwego ke Kgoro ya merero ya Selegae (ge e le gona)
       • setifikeiti sa kolobetšo ge se le gona
       • karata ya go hlabela ngwana kliniking ya Road to health ge e le gona
       • Rephote ya sekolong ge e le gona.
   • Bohlatse bja tlhokomelo efe goba efe ya ngwana yeo o e hweditšego.
   • Bohlatse bja letseno la gago.
   • Setifikeiti sa gago s alenyalo (ge se le gona).
   • Ge e le gore o hladile, taelo ya kgorotsheko ye e bolelago gore o dula le ngwana.
   • Ge e le gore motswadi o tee goba batswadi ka bobedi ba hlokofetše goba ba timetše, setifikeiti sa lehu sa mohu goba bohlatse bja gore motswadi o timetše, go fa mohlala, pego ya motho yo a timetšego go tšwa go maphodisa.
2. Tlatša fomo ya kgopelo go na le mohlankedi wa SASSA (hlokomela gore ke wena fela bjalo ka mokgopedi goba mohlankedi wa SASSA yo a ka tlatšago fomo ya kgopelo).
3. O tla fiwa selipi. Se beye bjalo ka bohlatse bja gore o dirile kgopelo.

Naa bjale ge kgopelo ya gago e ka se dumelelwe?

Ge kgopelo ya gago e ka se dumelelwe, SASSA e tla go tsebiša ka lengwalo gore ke ka lebaka la eng e se ya atlega.

Ge o sa dumelelane le sephetho se, o ka dira boipelaetšo go Tona ya Kgoro ya Tlhabollo ya Leago ka kantorong ya bosetšhaba ya Kgoro ya Tlhabollo ya Leago, o hlaloša gore ke ka lebaka la eng o sa dumelelane le sephetho se. O swanetše go dira boipelaetšo mo matšatšing a 90 ka morago ga ge o tsebišitšwe gore sephetho sa gago ga se sa atlega.

Go tšea lebaka le lekaakang

• Go ka tšea go fihla go dikgwedi tše tharo go šoma kgopelo ya gago.
• Ge tšhelete ya thušo ya leago ya gago e dumeletšwe, o tla lefša go thoma ka letšatšikgwedi leo o dirilego kgopelo ka lona.

Go bitša bokae

Tirelo ye ga e lefelwe.

Difomo tše o ka di tlatšago

Fomo ya kgopelo ga e hwetšagale inthaneteng, eupša o ka e hwetša kantorong ya kgauswi le wena ya SASSA.

O ka ikgokaganya le mang

Setheo sa Tšhireletšo ya Leago sa Afrika Borwa (SASSA)