Sitatimende Semhlangano weKhabhinethi wangaLesitsatfu Lobewubanjwe Nge-intanethi, Mhla ti-10 Inhlaba 2020
1. Takamuva mayelana neligciwane le-Corona (i-COVID-19)
1.1. Emhlanganwenimavidiyo lebewubanjwe ngaLesitsatfu, mhla ti-10 Inhlaba 2020, Ikhabhinethi itfole umbiko wakamuva lovela kuMkhandlu waVelonkhe Lokhomuza Teligciwane Le-Corona (i-NCCC). I-NCCC yetfule tincomo letinyenti ngebungoti lobutse kuba nemandla kakhudlwana mayelana neSigaba seKucaphelisa seSitsatfu lesilungisiwe sekumiswa-nsi kwemisebenti, iminyakato nekuhlala ekhaya kwavelonkhe.
Letincomo timiselwe kutetfulo letentiwe yimikhakha leminyenti leyehlukene netinkhulumiswano letentiwe Tekusebenta Ngekubambisana taVelonkhe neLuhlaka lweTebunhloli
1.2. Nanoma kunjalo, Ikhabhinethi yancuma kubeka eceleni kwesikhashana kuvunywa kwato kusemelwe umbiko lophelele weluhlolo lwetemphilo lobewusentiwa Likomidi Letemphilo Letekweluleka leTindvuna lomayelana ne-COVID-19. I-NCCC ilindzeleke kutsi itfole setfulo lesiphelele ekusukeni kwalelivi lelitako.
1.3. Ikhabhinethi iyaphindza futsi iyacela futsi incenga bonkhe bantfu baseNingizimu Afrika kutsi bagcine baphindze futsi balandzele ngekutivumela kwabo tinyatselo letibekiwe tekulwa ne-COVID-19. Letinyatselo tifaka ekhatsi kugeza tandla njalo-nje, kukhweshelana nekugcoka tifonyo uma isendzaweni yemmango.
2. Inkampani Yavelonkhe Yemafutsa
2.1. Ikhabhinethi yatisiwe ngemsebenti lochubekako wekuhlela kabusha tonkhe tinkampani temafutsa (i-oyili negesi) tenkampani yahulumende yetamandla lahlukahlukene, i-Central Energy Fund.
2.2. Lokuhlela kabusha kutawenta kutsi letinkampani letincane letintsatfu (i-PetroSA, i-Strategic Fuel Fund kanye ne-iGas) tihlanganiswe tibe yiNkampani yaVelonkhe yaPhethiloli yinye. Loku kunika emandla simemetelo lesentiwa nguMengameli Cyril Ramaphosa eNkhulumeni yakhe yeBunjalo beLive layetfula mhla ti-13 Indlovana 2020, kunika inhloso lensha nekuhlela kabusha tinkampani tahulumende letinyentana kute kutsi kwesekelwe kukhula nekutfutfuka.
2.3. Ikhabhinethi isivumile siphakamiso sekucashwa kwenkampani leyingcweti kutekuhlela kabusha lesebenta ngalokukhetsekile ngekuhlanganisa kutsi itewuphenya ngemodeli letawusebenta kahle yaleNkampani yaVelonkhe yaPhethiloli leyinye.
3. Luhlakamsebenti lweNchubomgomo yeteBudlova Lobucondziswe kuBulili Lobutsite (i-GBV) kuTinchubo teteMfundvo Lephakeme neKucecesha
3.1. Ikhabhinethi iluvumile Luhlakamsebenti lweNchubomgomo yeteBudlova Lobucondziswe kuBulili Lobutsite kuTinchubo teteMfundvo Lephakeme neKucecesha. Loluhlakamsebenti lwenchubomgomo luhlose kuphendvula kulamanani lakhulako emacala laphatselene ne-GBV etikhungweni tetemfundvo lephakeme.
3.2. Loluhlakamsebenti lwenchubomgomo luniketa inkhombandlela mayelana netimiso, tindlela kanye netinchubo tikhungo tetemfundvo lephakeme letifanele kutsi tibe nato tekuvikela tehlakalo te-BGV emakhempasini ato. Kwengeta lokwenta timiso tekwengamela iphindze futsi iphocelela leto tikhungo kutsi tente ticapheliso kutinchubomgomo tato te-GBV.
4. Umbiko weLucwaningo lweKukhoneka mayelana neMsamo weMbutfo weteMzabalazo neNkhululeko (i-RLMM)
4.1. Ikhabhinethi iwuvumile Umbiko weLucwaningo lweKukhoneka mayelana nekusungulwa kwe-RLMM. Lomsamo utawufaka ligalelo ekulondvoloteni umlandvo wetemzabalazo nekulwela inkhululeko lapha eNingizimu Afrika.
4.2. Lolucwaningo lolwavunywa yiKhabhinethi nga-2015, kwatsiwa aluchutjwe ngekhatsi kwengcikitsi yeMklamo weNdlela yeMagugumafa eMzabalazo neNkhululeko (i-RLHR). Le-RLHR ifaka ligalelo ekutfutfukeni nasekugucukeni kwebunjalo betemagugumafa aseNingizimu Afrika.
4.3. Uma sewuphelile, lomsamo utawulondvolota luchungechunge lwetintfo temagugumafa (letibonakalako naletingabonakali) uphindze futsi unikete tindzaba letetayelekile, tinkhumbulo kanye naloko lokwahlangabetwana nako mayelana netemzabalazo walapha eNingizimu Afrika.
5. Indlela yaVelonkhe yeteMagugumafa emaKhoi nemaSan
5.1. Ikhabhinethi ikuvumile kufezekiswa kweNdlela yaVelonkhe yetemagugumafa emaKhoi nemaSan, lekungumklamo wavelonkhe wemshiyalifa. Lendlela itawutfola, ingcamise, ilondvolote iphindze futsi ikhutsate emagugumafa emaKhoi, emaNama, emaGriekwa, emaKhorana kanye nemaSan. Lomklamo lona ufaka ligalelo ekunakeni umlandvo waseNingizimu Afrika lebewunganakwa phambilini.
5.2. Uphindze futsi unika emandla Umtsetfo weBuholi beNdzabuko wemaKhoi-San, 2019 (Umtsetfo we-3 wanga-2019), lowenta kutsi baholi bendzabuko bemaKhoi nemaSan banakwe.
6. Imidvwebo yanga-2021 neyanga-2022 yetinhlavumali tesikhumbuto
6.1. Ikhabhinethi iyivumile imidvwebo yanga-2021 neyanga-2022 yetinhlavumali tesikhumbuto letijikeletako lekhishwa Libhangesilulu laseNingizimu Afrika (i-SARB) kanye neNkampani yaseNingizimu Afrika Lekhicita Tinhlavumali.
6.2. Luhlavumali lwa-R5 lwesikhumbuto na-R5 lolisiliva lelicwebile, luhlavumali loluligolide lwebagcogci lutawukhishwa nga-2021 kugubha umkhosi weMinyakalikhulu we-SARB. Luchungechunge lweTinhlavumali lwesine lwaseNingizimu Afrika, lolutawukhishwa nga-2022 lutawufaka ekhatsi luhlavu lwemasenti la-10, lange-20, lange-50, lwa-R1, lwa-R2 nelwa-R5.
Imitsetfosivivinyo
1. Umtsetfosivivinyo weKuchibela Imitsetfo yeMkhakha weTimali 2020
1.1. Ikhabhinethi ikuvumile kwetfulwa ePhalamende kweMtsetfosivivinyo weKuchibela Umkhakha weteTimali wanga-2020. LoMtsetfosivivinyo uphakamisa kubekwa kwe-SARB njengeSikhungo seSisombululo, uphindze futsi wenta kancono emathulusi e-SARB ekulawula wekusebentisa emandla ayo ekucinisekisa lutinto enchubeni yetetimali.
1.2. LoMtsetfosivivinyo uneluhlakamsebenti lolusha lwekusombulula tikhungo tetimali, ikakhulu emabhange, uma ahlangabetana netikhatsi letimatima tetimali. Uphindze futsi ungenisa sikimu saseNingizimu Afrika sekucala lesikhulu sekudiphozitha imali lesitawucinisekisa kutsi bafakimali bakhokhelwa timali tabo uma emabhange ehluleka.
1.3. Lesikimu sitawuvikela bafakimali labasengotini siphindze futsi sicinisekise kutsi kuba nekutsikameteka lokuncane enchubeni yetetimali nasemnotfweni lobanti uma leto tikhungo tihlangabetana nesikhatsi lesimatima setetimali.
Kubekwa etikhundleni
- Mk. Sekgothadi Kabelo ubekwe wabaNgumcondzisi Longasiye weSigungu Lesiphetse weBhodi yeteKulawula Ematibuko yaseLwandle yaseNingizimu Afrika.
Imibuto ingacondziswa:
kuMk. Phumla Williams – loKhulumela Ikhabhinethi
Makhalekhikhini: 083 501 0139
