A. Merero ye Bohlokwa Seemong sa Bjale
1. Kopanokakaretšo ya Ditšhabakopano (UNGA)
1.1. Kabinete e amogetše polelo ka Mopresidente Cyril Ramaphosa yeo a e filego kopanong ya bo 78 ya UNGA yeo e bego e swaretšwe New York ka United States of America go tloga ka la 18 go fihla ka la 26 Lewedi 2023.
1.2. Polelo ye ya Mopresidente yeo e amogetšwego ka bontšhi e gateletše ka leswa maemo a Afrika Borwa ka tabeng ya go thekga ka maatla dikgahlegelo, le kgathotema yeo e lekalekanago ebile e kwagalago ya kontinete ya Afrika mmogo le dinaga tšeo di hlabologago ka kakaretšo go UN le diforamong tše dingwe tša mebušo ya dinaga.
1.3. Polelo ye e ile ya gatelela gape le boematia bja Afrika Borwa ka hlohleletšong ya thekgo bakeng sa:
(a) boikgafo bjo bo mpshafaditšwego go dikamano tša mebušo ya dinaga, bjoo bo itheilego go melao yeo e hlakilego ebile bo thekgilwe ke ditheo tšeo di phethagetšego.
(b) phetošo ya Lekgotla la Thireletšo la UN (UNSC) go dira gore kokwane ya tekatekano ya boipušo e kwagale, gape le go kgontšha UNSC go arabela dinnete tša seabe sa tikologo go dipolotiki ka moo go phethagetšego.
(c) ditšhaba tšeo di humilego gore di oketše thekgo ya mašeleng go phethagatšeng Lenaneo la Tlhabollo yeo e Swarelelago la 2023 le go fihlelela dinepo tša phetogo ya klaemete ka mokgwa woo o nago le dintlha ka moka ebile e kopantšwego, go balwa le tlhokego ya go tsenya tirišong Sekhwama sa Tobo le Tshenyo bakeng sa dinaga tšeo di sa bolokegago tšeo di amilwego gampe ke masetlapelo a klaemete, bjalo ka ge go dumelelanwe Sešeneng ya bo 27 ya Khonferense ya Dinaga le Mekgatlo yeo e bego e swaretšwe go la Egypt ka Dibatsela 2022.
1.4. Mopresidente Ramaphosa o gateletše leswa boikgafo bja Afrika Borwa bja go tšwela pele go šogana le taba ya phetogo ya klaemete le go aga maemong a go ba moetapele ka go enetši ya go tšweletšwa ka dilo tša tlhago, haetrotšene ya go hlolwa ka go aroganywa ga meetse le oksetšene, le phetolelaindasetering yeo e swarelelago.
1.5. Mopresidente Ramaphosa o file polelo gape le Samiting ya Kaonafatšo ya Thibelo, Boitokišetšo le Karabelo go Mauba, a le maemong a gagwe bjalo ka Molwedi wa Yunione ya Afrika ge go etla Karabelong ya Bolwetši bja Kokwanahloko ya Khorona (COVID-19)
2. Lenaneo la Afrika Borwa la Tšhomišano ya Mebušo ya Dinaga leo le Bego le Sweratšwe ka Thoko Nakong ya UNGA ya bo 78
2.1. Ka thokwana go UNGA ya bo 78, Mopresidente Ramaphosa o ile a eta pele kemedi ya mmušo yeo e ilego ya swara dikopano tša go fapafapana tša ditšhomišano tša mebušo ya dinaga tšeo di bego di nepile go matlafatšeng dikamano tša togamaano, sepolotiki le kgwebišano.
2.2. Mopresidente o ile a kopana le mong-ka-yena wa Ukraine, Mopresidente Volodymyr Zelensky go ahlaahla tšwelopele yeo e šetšego e le gona go magato a go aga boitshepo a Lesolo leo le Etilwego Pele ke Afrika, mmogo le ditšwelopele tše dingwe.
2.3. Mopresidente Ramaphosa o ile a kopana gape le:
2.3.1. Mopresidente Recep Tayyip Erdoğan wa Türkiye mabapi le go matlafatša dikamano magareng ga Afrika Borwa le Turkey, gape le go hlalosetšana ka masolo a khutšo mabapi le ntwa ya magareng ga Russia le Ukraine.
2.3.2. Mopresidente Bola Tinubu wa Ripaboliki ya Federale ya Nigeria mabapi le go matlafatša dikamano magareng ga Afrika Borwa Le Nigeria. O ile a fiwa gape le pego ya gabjale ya lesolo leo le etilwego pele la Economic Community of West African States la mabapi le go menola mmušo ka Niger mmogo le maitekelokakaretšo a go buša pušo ya demokrasi ka Sahel.
2.3.3. Mopresidente Emmerson Mnangagwa wa Ripaboliki ya Zimbabwe mabapi le masolo ka mmušo wa Zimbabwe a go kopantšha go agwa leswa ga naga yeo morago ga dikgetho tšeo di sa tšwago feta tša khutšo.
2.4. Mopresidente Ramaphosa o kgathile tema gape le ka go Kopano ya Kgwebo Kgwebišano ya Afrika le Dipeeletšo ya United States (US) le Afrika Borwa, yeo e bego e akaretša baetapele ba kgwebo ba ka Afrika Borwa le ba ka Amerika. Ka dikhamphani tša go feta tše 600 tšeo di šomelago ka Afrika Borwa, therišano ye e bile bohlokwa kudu go matlafatšo yeo e tšwelago pele ya dikamano magareng ga Afrika Borwa le US.
2.5. Nakong ya kopano, tsebišo ya semmušo e ile ya dirwa ya gore Foramo ya Kgwebišano le Ekonomi ya US le Afrika ya ka Sub-Sahara (Foramo ya AGOA) ya bo 20 e tlo swarelwa Johannesburg go tloga ka la 2 go fihla ka la 4 Dibatsela 2023. Foramo ye e tlo akaretša gape le pontšho ya ‘Made in Africa’ yeo e tlo bontšhago tšweletšo le tšhomišo ya didirišwa tša selete mo kontinenteng.
2.6. Mopresidente Ramaphosa o ile bona le tsebišo ya tšhomišano magareng ga Novo Nordisk le Aspen. Tšhomišano ye e tlo bona tšweletšo ya insulini mafelong a Aspen a ka Gqeberha ka Kapa Leboa. Tšhomišano ye e nepile go aba marothi a go feta dimilione tše 16 a insulini ka 2024, ao a tlo oketšwago pele ngwaga wa 2026 o fela. Se se tlo matlafatša kudu phihlelelo ya kalafo ya insulini, e sego ka Afrika Borwa fela, eupša le go phatlalala le kontinente.
3. Mohlagase
3.1. Kabinete e amogetše go fiwa ga dilaesense tša thomelontle le thomelokagare ya kgwebišano ka National Energy Regulator of South Africa tšeo di kgopetšwego go National Transmission Company of South Africa, e lego seo se tlo bulelago go rekwa ga mohlagase go phatlalala le selete.
3.2. Go šoma gape ga Yuniti ya 4 ya Setiši sa Mohlagase sa Kusile go tšwa go tlhokomelo yeo e beakantšwego go bušitše dimekawate tše 800 tša mohlagase mararankodingmagolo a mohlagase. Phihlelelo ye e bohlokwa ge go etla kaonafatšong ya bokgoni bja tšweletšo bakeng sa mararankodimagolo le go šogana le go diragala ga kgaotšo ya mohlagase.
3.3. Kabinete e ile ya begelwa gape ka tšwelopele ya go bušetša Diyuniti 1, 2 le 3 tša Setiši sa Mohlagase sa Kusile gore di šome gape pele ga nako yeo e beilwego.
3.4. Kabinete e amogetše tekolo yeo e sa fetogego ya Eskom ka Moody’s Investors Service, yeo e tlo kaonafatšago boleng bja sekoloto bja khamphani ye ya mohlagase le go e kgontšha gore e itokiše e sa le nako ge go etla phethagatšong ya tlhokomelo yeo e beakantšwego go ditlabela tša yona tša tšweletšo.
4. Tšhireletšo ya Meetse
4.1. Kabinete e ile ya begelwa ka maitekelo a go šogana le ditlhohlo tša meetse tšeo di amago mafelo a mantšhi ka nageng. Tona ya Meetse le Kelelatšhila, Morena Senzo Mchunu mmogo le bommeyaraphethiši ba ye mengwe ya mebasepala ya ka Gauteng ba tla tla ka pego ya dikimollo tšeo di tšwelago pele go dira gore kabo ya meetse e se šitišege ka profenseng.
4.2. Kabinete e rata go gopotša bohle gore Afrika Borwa ke naga yeo e hlaelago meetse. MaAfrika Borwa ka moka mmogo le batho bohle ka mo nageng ba swanetše ba boloke le go babalela meetse.
5. Ditaba tša Kgwebišano
5.1. Kopano ya Magoro a Ditona a Khomišene ya Dinaga tše Pedi tša Afrika Borwa le Lesotho (BNC)
5.1.1. Kopano ya Magoro a Ditona a Khomišene ya Dinaga tše Pedi tša Afrika Borwa le Lesotho yeo e bego e swerwe go tloga ka la 25 go fihla ka la 28 Lewedi 2023 e beile šedi go tšhomišano ya ekonomi, mathata a ka mellwaneng ya dinaga tše, le go sepela ka go lokologa ga batho, dithoto le ditirelo magareng ga dinaga tše tše pedi.
5.1.2. Mopresidente Ramaphosa le Tonakgolo Samuel Ntsokoane Matekane ba tla ba badulasetulo mmogo ba Sešene ya Mathomo ya BNC magareng ga Afrika Borwa le Lesotho ka Labone la 28 Lewedi 2023. BNC e tla akaretša dikamano tša botseta, sešole le tšhireletšo, meetse, dinamelwa, mohlagase le kgwebišano.
5.2. Nyakišišo ya Mebaraka go Polatefomo ya Namolo ya Inthanenteng
5.2.1. Kabinete e amogetše pego go tšwa go Khomišene ya Phenkgišano ya mabapi le dihwetšwa mmogo le magato a kimollo go Nyakišišo ya Mebaraka go Polatefomo ya Namolo ya Inthanenteng. Kabinete e retile mošomo wa khomišene wa go šogana le dingongorego tša taolo ka botlalo ka dipolatefomong namolo tša ditšithale, go balwa le go reka le go rekiša inthaneteng, ditheo tša go rulaganya maeto tša inthaneteng, phihlišo ya dijo tša mabenkele, mabenkele a inthaneteng a di-app, baabi ba dipapatšo tše nnyane tša go bewa ka magoro le mananeo a go nyaka tshedimošo inthaneteng.
5.2.2. Kabinete e laetše Ditona tša dikgoro tša mmušo tša maleba go tšwela pele go sekaseka ditigelo bakeng sa kaonafatšo, go ela hloko ditlamorago tša dipholisi gape le go tla ka diphetošo tšeo di hlokegago tša dipholisi tšeo di tlo nolofatšago kgathotema ya go kwagala mmogo le dikgwebo tše nnyane le tša magareng go kgwebo ya intaneteng yeo e golago.
6. Mokhohlane wa Dinonyana
6.1. Kabinete e lemogile go phulega ga mokhohlane o šoro kudu (HPAI) wa H5 le H7 ka indasetering ya dikgogo ka Afrika Borwa. Profense ya Kapa Bodikela le ya KwaZulu-Natal di itemogetše go phulega ga HPAI H5, mola HPAI H7 yona e begilwe ka diprofenseng tša Gauteng, Limpopo, Mpumalanga le Leboa Bodikela. Magato a go laola go phatlalala ga bolwetši a gare a tšewa gomme balemi ba hlohleletšwa go latela magato a tšhireletšo ao a beilwego.
6.2. Go phulega mo go bea tšhireletšo ya dijo kotsing, gomme magato a kgwebišano ka mokgwa wa diromelwakagare go kgontšha go ba gona ga mae a go thwathwaša ditsuana, ao a lewago mmogo le nama ya kgogo a ka phethagatšwa. Kgoro ya Temo, Peakanyoleswa ya Naga le Tlhabollo ya Dinagamagae, Setheotaolo sa Ditsweletšwa tša Maphelo sa Afrika Borwa le indaseteri di mekamekana le dikgopelo tša go ngwadišwa ga meento yeo e ka nyakegago, ka magato a tatelomolao ao a amanago le polokego, go phethagala mmogo le boleng ao a lego bohlokwa bakeng sa go ngwadišwa ga meento e bjalo.
7. Ntwammogo kgahlanong le bosenyi
7.1. Kabinete e amogetše pego ya mabapi le ntwa kgahlanong le bosenyi, yeo e aletšwego setšhaba ke Tona ya Maphodisa, Mogenerale Bheki Cele, le Setheo sa Bosetšhaba sa Tšhomišanommogo le tša Bohlodi.
7.2. Lesolo le la go ba le ditheo tša go fapafapana leo le lebaganego le tša meepo yeo e sego molaong le bofaladi bjoo bo sego molaong ka Kapa Leboa le dirile gore batho ba 867 ba swarwe, gomme bontšhi bja bona ba tšwa Lesotho, Zimbabwe, Mozambique, mmogo le MaAfrika Borwa a mangwe. Kabinete e ile ya boeletša polelo ka makala a phethagatšo ya molao ya gore MaAfrika Borwa ao a šireletšago basenyi bao ba dirago tša meepo yeo e sego molaong ba tla lebagana le letsogo la molao.
8. Boso bja go Befa
8.1. Mekgwa ya boso bja go befa bja ka mo nageng e laetša seabe seo phetogo ya klaemete e nago le sona maphelong a rena, mmogo le tlhokego ya magato ao a swarelelago a go fediša khapone ka ikonoming ya rena mola re le gare re lwela go ba le tlhabollo yeo e swarelelago.
8.2. Kabinete a gare a e tsebišwa ka masetlapelo ao a hlotšwego ke dipula tša matlakadibe le mafula ka Kapa Bohlabela, Kapa Bodikela le ka Gauteng, ka taetšo ya gore go na le kgonagalo ya gore se se ka fetela le ka diprofenseng tše dingwe.
8.3. Kabinete e ipiletša go ditšhaba gore di dule di ntšhitše mahlo dinameng bakeng sa ditemošo tša boso bja go befa tšeo di ka bago gona, tšeo di ka tlišago masetlapelo le go feta go phatlalala le naga.
8.4. Mmušo o tšwela pele go thekga ditirelo tša tšhoganyetšo le disenthara tša taolo ya masetlapelo bakeng sa mošomo wa go hlakodiša gape le go fana ka thekgo ya setho.
9. Winnie Mandela Avenue
9.1. Kabinete e lemogile go rewa leswa ga Mmilamogolo wa William Nicol ka Sandton go ba Winnie Mandela Avenue bjalo ka kgato e bohlokwa ya go ngwala histori ya Afrika Borwa leswa go bonagatša seabe sa bao ba lwetšego tokologo ya rena.
9.2. Tiragalo ye e ile ya lebana le letšatši la matswalo la Winnie Madikizela-Mandela fao nkabego a swere mengwaga ye 87 ka la 26 Lewedi 2023.
B. Diphetho tša Kabinete
1. Leano leo le Mpshafaditšwego la Nama ya Diphoofolo tša Naga Bakeng sa Afrika Borwa
1.1. Kabinete e dumeletše go phethagatšwa ga Leano leo le Mpshafaditšwego la Nama ya Diphoofolo tša Naga bakeng sa Afrika Borwa, leo le nyakago go bea molaong mmogo le go fetoša indaseteri ya nama ya diphoofolo tša naga.
1.2. Leano le le nepile go matlafatša lekala la nama ya diphoofolo tša naga bjalo ka moabi wa polokego ya dijo le lekala leo le golago la ekonomi leo le ka thušago go hlola mešomo.
1.3. Afrika Borwa e maemong a pele kontinenteng ya Afrika ka tšweletšo ya nama ya diphoofolo tša naga. Leano le le nyaka go netefatša gore go hlolwa mešomo ye 202 666 yeo e swarelelago ka indasetering ya nama ya diphoofolo tša naga pele ngwaga wa 2023 o feta.
1.4. Leano le le tlo phatlalatšwa wepsaeteng ya Kgoro ya Dithokgwa, Boreahlapi le Tikologo: www.dffe.gov.za.
2. Leanolegolo la Lekala la Boeti
2.1. Kabinete e dumeletše go beakanywa ga Leano la Tsošološo ya Lekala la Boeti go ba Leanolegolo le leswa la Boeti.
2.2. Karolo e bohlokwa ya Leanolegolo le ke go fokotša diabe tšeo leuba la COVID-19 le bilego le tšona go lekala la boeti. Le tšwela pele go tla le ka leano la tsošološo ka botlalo ya boeti ka mo nageng. Le ge e le gore Leano la Tsošološo ya Lekala la Boeti le hlametšwe go nolofatša tsošološo ya lekala le, go lota mešomo le go šireletša lephelo, Leanolegolo le le tla tšea mošomo wo la o hlatlošetša maemong a godimo gape le go nolofatša menyetla ye meswa ka lekaleng.
2.3. Leano le le šišinya maanokimollo a šupa go netefatša gore lekala la boeti le boela sekeng, gape le gore le ba modu wa tlholo ya mešomo le boipereki.
2.4. Indaseteri ya boeti ke mokgathatema yo bohlokwa ka ekonoming gomme le be le thekga mešomo ye 725 000 pele ga go phulega ga leuba la COVID-19.
C. Melaokakanywa
1. Molaokakanywa wa Lekgotlakgašo la Afrika Borwa (SABC) wa 2023
1.1. Kabinete e dumeletše go išwa ga Molaokakanywa wa SABC wa 2023 Palamenteng.
1.2. Ge o se no fetišwa go ba Molao, Molaokakanywa wo o tla phumola Molao wa Kgašo woo o šomago gabjale wa 1999 (Molao wa bo 4 wa 1999). Diphetošo di tla matlafatša phethagalo ya mešomo ya kgašo ya setšhaba.
1.3. Molaokakanywa wo o tšwela pele go šišinya diphetogo ka seakong sa thekgo ya mašeleng sa SABC mmogo le mokgwa wa go bea dilaesense tša dithelebišene.
2. Molaokakanywaphetošwa woo o sa Thadilwego wa Ditirelo tša Meetse
2.1. Kabinete e dumeletše go phatlalatšwa ga Molaokakanywaphetošwa wa Ditirelo tša Meetse gore setšhaba se fane ka ditshwayatshwayo go wona.
2.2. Dinepokgolo tša Molaokakanywa wo ke go matlafatša go rwala maikarabelo bakeng sa baabi ba ditirelo tša meetse gape le go tsebagatša taba ya go šoma phatlalatša.
2.3. Diphetošo tša Molao wa Ditirelo tša Meetse wa 1997, (Molao wa bo 108 wa 1997) di tla netefatša gore baabi ba ditirelo tša meetse ba aba meetse a boleng bja godimo bjalo ka karolo ya dipeelano tša dilaesense tša bona.
2.4. Diphetošo tše di tlo šogana gape le mafokodi ao a hlathilwego ka lekaleng la ditirelo tša meetse.
2.5. Molaokakanywa wo o bea melawana ya motheo bakeng sa baabi ba ditirelo tša meetse, yeo e swanetšego e phethagatšwe ke ditheotaolo tša Ditirelo tša Meetse.
3. Molaokakanywaphetošwa wa Meetse wa Bosetšhaba woo o sa Thadilwego
3.1. Kabinete e dumeletše phatlalatšo ya Molaokakanywaphetošwa wa Meetse wa Bosetšhaba woo o sa Thadilwego gore setšhaba se fane ka ditshwayatshwayo go wona. Molaokakanywa wo o fetoša Molao wa Bosetšhaba wa Meetse wa 1998 (Molao wa bo 36 wa 1998).
3.2. Diphetošo tše di tlo kaonafatša melawana gomme ebile di tlo netefatša gore methopo ya meetse ya ka nageng e laolwa gabotse, e a šireletšwa ebile e a lotwa.
3.3. Molaokakanywa wo o dira gape le ditšhišinyo tša go fediša go se lekalekane ga nako yeo e fetilego goo go amanago le kabo ya meetse, gomme o kgontšha mekgwa yeo e phethagetšego ebile ya ka pela ya tharollo ya mathata a ka gare ga ditheo ka moka.
D. Go Thwalwa
Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.
1. Morena Kuberndran Moodley bjalo ka Molaodipharephare: Tšweletšontši le Boentšenere go la Government Printing Works.
2. Morena Sihle Ngubane bjalo ka Molaodipharephare: Taolo ya Mešomo go la Government Printing Works.
3. Mme Mmolaeng Mooki bjalo ka Molaodipharephare: Ditirelo tša Khoporeiti go la Government Printing Works.
4. Go Thwalwa ga Balaodi bao e sego ba Phethišo go Boto ya Mokgatlo wa Diinšorense wa Dikotsi tše Ikgethilego wa Afrika Borwa
4.1. Mme Deshnie Subbiah; le
4.2. Morena Jannie Venter.
5. Go Thwalwa ga Balaodi bao e sego ba Phethišo go Boto ya Panka ya Tlhabollo ya Afrika Borwa
5.1. Morena Bongani Nqwabana (thwaloleswa);
5.2. Morena Petrus Matji (thwaloleswa);
5.3. Mme Pinkie Nqeto (thwaloleswa);
5.4. Morena Jonathan Muthige;
5.5. Mme Chantal Naidoo;
5.6. Mme Disebo Moephuli;
5.7. Morena Barry Hore;
5.8. Morena Joel Netshitenzhe;
5.9. Profesa Edgar Pieterse; le
5.10. Mme Zodwa Mbele.
E. Ditiragalo tšeo di sa Tlago
1. Kgwedi ya Dinamelwa
1.1. Kgwedi ya Dinamelwa ya ngwaga wo e tla ketekwa ka tlase ga moeno wo: “Siyakha – Re aga mananeokgoparara a makaone go godiša Afrika Borwa”.
1.2. Kgwedi ya Dinamelwa ya 2023 e tla bea šedi go dipeeletšo tše kgolo ka mananeongkgoparara a dinamelwa, gape le go go ipiletša go batho gore ba šireletše mananeokgoparara a dinamelwa kgahlanong le bohodu le go senya.
2. Letšatši la Lefase la Barutiši
2.1. Afrika Borwa e tla keteka le lefase ka bophara Letšatši la Lefase la Barutiši ka Labone la 5 Diphalane 2023, ka tlase ga moeno wa: “Barutiši bao re ba hlokago bakeng sa thuto yeo re e nyakago: Maikemišetšo a lefase a go fokotša tlhaelelo ya barutiši”. Letšatši le le nepile go tliša temošo, kwešišo le tebogo ya kgathotema e bohlokwa yeo barutiši ba e dirago ka thutong le tlhabollong go phatlalala le lefase.
2.2. Letšatši le le goeleditšwe mmogo ke ba Mokgatlo wa Boditšhabatšhaba wa Bašomi mmogo le Mokgatlo wa Thuto, Saense le Setšo wa Ditšhabakopano go keteka mošomo wo bohlokwa woo barutiši ba rena ba o dirago.
F. Melaetša
1. Ditebogišo
Kabinete e rometše ditebogišo le go akela mahlatse le mahlogonolo go:
- Mogenerale Bheki Cele, Tona ya Maphodisa, yoo o a filwego Metale wa Great Wall Commemorative go tšwa People’s Republic of China bakeng sa kgathotema ya Tirelo ya Maphodisa a Afrika Borwa ge go etla tšhomišanong ya phethagatšo ya molao yeo e nabilego magareng ga dinaga tše tše pedi.
- Mme Angie Motshekga, Tona ya Thuto ya Motheo, ge a kgethilwe ke Mongwaledipharephare wa UN, Morena Antonio Guterres go ba karolo ya Phanele ya Global High-Level ya go mo eletša ka fao dinaga di ka fetošago mananeo a tšona a thuto. Go kgethwa ga Tona Motshekga go ba karolo ya phanele ya maemo a godimo go bonagatša maemo a gagwe a botsebi ka lekaleng la thuto, gape ebile ke taetšo ya boitshepo go tsela ya thuto ya Afrika Borwa.
Phanele ye e akaretša baemedi go tšwa Mokgatlong wa Boditšhabatšhaba wa Bašomi, Sehlophatšhomo sa Barutiši sa Mokgatlo wa Thuto, Saense le Setšo wa Ditšhabakopano, Mekgatlo ya Barutiši ya Lefase, le ditona tše tharo tša thuto. Badulasetulo ba phanele ye e bile dipresidente tše pedi tša maloba.
- Di-studio tša Difilimi tša Cape Town, baraloki ba selegae le badiragatši ba go tsaroga, ka mošomo wa bona lenaneong la Netflix la One Piece leo le bilego maemong a pele lefaseng ka bophara mo polatefomong ye ya go bogela ditiragatšo le difilimi inthaneteng.
- Lefelo la Botitiedi la Van Ryn ge le filwe sefoka sa Porenti ye Kaonakaone lefaseng bakeng sa porenti ya bona ya mengwaga ye 12 Phadišanong ya Boditšhabatšhaba ya Digalagala go la London.
2. Matshidišo
Kabinete e rometše matshidišo go ba malapa le bagwera ba:
- Morena Aziz Goolam Hoosein Pahad (82), molwelatokologo yoo a bilego Motlatšatona wa mathomo wa Merero ya Dinagadišele go tloga ka 1994 go fihla ka 2008.
- Lieutenant Commander Gillian Elizabeth Hector, Master Warrant Officer William Masela Mathipa, le Warrant Officer Class One Mmokwapa Lucas Mojela, bao ba hlokofetšego ba le mošomong ba le ka gare ga sapomarini ya SAS Manthatisi ka ntle ga Kommetjie ka Kapa Bodikela.
- Bašomi ba moepo ba 22 go tšwa Moepong wa Ditaemane wa Venetia ka Limpopo, bao ba hlokofetšego kotsing ya tsela ka Musina (ka Seleteng sa Vhembe).
- Mme Zoleka Mandela (43), mongwadi le molweladitokelo, gape e le setlogolo sa bagale ba go lwela tokologo, Nelson Mandela le Winnie Madikizela-Mandela.
- Batho ba lesometee bao ba lobilego maphelo a bona ka maemong a boso a mabe ao a hlasetšego dikarolo tša go fapafapana ka nageng mo bekeng yeo e fetilego.
Dipotšišo: Mme Nomonde Mnukwa – Seboleledi sa Mmušo sa Motšwaoswere
Mogala: 083 653 7485
