Vha tea u ṅwalisa bindu ḽavho u itela Muthelo Nyengedzedzwa kha Zwirengwa (VAT) arali ndeme ya thundu kana tshumelo yavho i tshi fhira miḽioni nthihi kha tshifhinga tsha miṅwedzi ya 12, kana i tshi khou lavhelelwa u fhira afho.
Bindu ḽi nga ḓiṅwalisa nga u tou funa arali ḽo vha ḽi tshi khou wana mbuelo i fhiraho R50 000 kha tshifhinga tsha miṅwedzi yo fhiraho ya 12.
VAT ndi muthelo u sa ḓi thwii kha tshumelo na thundu yo shumiswaho kha ikonomi.
Kha vha ṋetshedze fomo ya u ḓiṅwalisa kha davhi ḽapo ḽa SARS hu saathu fhela maḓuvha a 21 u bva nga datumu ye vha fhirisa miḽioni nthihi.
VAT i tshadzhiwa nga tshikalo tshi linganaho tsha 15% kha nḓisedzo ya tshumelo kana thundu nga vha vhambadzi vho ḓiṅwalisaho. Hu na tshikalo tsha tshumelo na thundu tshine ha sa tshadzwiwe tshithu kana zwine a zwo ngo tewa u tshadzhiwa VAT.
Vha nga ita khumbelo ya u ḓiṅwalisela zwa u phumula Muthelo Nyengedzedzwa kha Zwirengwa (VAT) arali zwine vha khou bindudza zwi fhasi ha miḽioni nthihi, kana bindu ḽi si tsha shuma.
U ḓiṅwalisela havho VAT zwi ḓo phumulwa fhedzi arali Mukhomishinari vho fushea uri zwine vha khou bindudza zwine zwa tea u badelelwa muthelo a zwi fhiri miḽioni nthihi kana bindu ḽavho a ḽi tsha shuma.
Vha tea u ḓivhadza kha Tshumelo ya Muthelo wa Mbuelo ya Afurika Tshipembe (SARS) hu saathu fhela maḓuvha a 21 tshe bindu ḽavho ḽa ima u shuma.
Bindu ḽavho ḽi ḓo vha ḽi tshi kha ḓi vha ḽo hwala mulandu wo salaho wa VAT arali ḽo vha ḽi tshi kha ḓi koloda musi ḽi tshe ḽo ṅwaliswa sa ḽa mbambadzo.
Kha vha wane zwinzhi nga ha u ḓiṅwalisela VAT kana u phumulisa u ḓiṅwalisa kana vha kwame SARS.
