Pegelo ya Kopano ya Kabinete e e Neng e Tshwerwe ka go Dirisa Mafaratlhatlha a Thekenoloji a Ditlhaeletsano e e tshwerweng ka Labone, 4 Seetebosigo 2020
1. Katlholo ya Kgotlatshekelokgolo ya North Gauteng ya Labobedi, 2 Seetebosigo 2020
1.1. Kopano e e kgethegileng ya Kabinete e e neng e tshwerwe ka go dirisa mafaratlhatlha a thekenoloji a ditlhaeletsano e ne e tshwerwe gompieno, Labone, 4 Seetebosigo 2020, go buisana ka tswelopele ya maiteko a Aforika Borwa go boloka le go sireletsa matshelo mo nakong ya leroborobo la mogare wa COVID-19. Jaaka e le karolo ya dintlha tse go buisanweng ka tsona, Kabinete e sekasekile katlholo ya Kgotlatshekelokgolo ya North Gauteng e e rebotsweng ke Moatlhodi Norman Davis ka Labobedi, 2 Seetebosigo 2020, eo e kaileng fa melaokiletso ya go sekega nakwana ga ditiro tsa ka fa nageng mabapi le COVID-19 mo kgatong ya boraro le ya bone di sa latele molaotheo ebile di se mo molaong.
1.1.1 Morago ga go bona kgakololo ya molao le go reetsa ditshwaelo di le dintsi tse di dirilweng ke maloko a karolo ya molao fa ba tsibogela katlholo eno, Kabinete e nagana gore kgotlatshekelo e nngwe e ka tla ka tshweetso e e farologaneng le ya ga jaana.
1.2. Kabinete ka jalo e sweditse go dira boikuelo ka ga tshweetso ya Kgotlatshekelokgolo ya North Gauteng.
1.3. Puso e tla kopa gore boikuelo jwa yona bo reediwe ka bonako gore e tle e bone netefaletso ka ga melaokiletso eno. Tona ya Pusotshwaraganelo le Merero ya Setso, Ngaka Nkosazana Dlamini Zuma, mo boikuelong jono o tla bo a patilwe ke Moporesitente Cyril Ramaphosa le Tona ya Boitekanelo, Ngaka Zweli Mkhize.
1.4. Kabinete e eletsa go netefaletsa setšhaba gore ditsenogare tsotlhe tse di dirilweng, e sale Moporesitente Ramaphosa a itsise Maemo a Naga a Matlhotlhapelo ka Mopitlwe 2020, maikaelelo a tsona ke go boloka matshelo a batho.
1.5. Mo go tsenngwengtirisong ga ditsenogare tseno, puso e ntse ka gale e buisana le maphata otlhe a setšhaba, jaaka ntwa kgatlhanong le COVID-19 e le maiteko a naga ao a batlang tiro e e kopanetsweng magareng ga puso le maAforika Borwa.
1.6. Le fa e le gore puso e dira boikuelo jwa katlholo ya kgotlatshekelo, ditaolo tse dileng teng ga jaana di nna di le tirisong, mme re ikuela le go kopa batho botlhe go obamela ditsamaiso tsa boitekanelo tsotlhe tseo di leng teng, go tsenyeletsa go tlhapa diatla ka gale, go katoga batho ba bangwe, go apara dimaseke tsa go hema fa o le fa gare ga batho gammogo le go dirwa ditlhatlhobo le go romelwa go ya go dira diteko, fa go le botlhokwa.
2. Go Oketsa Paka ya Maemo a Naga a Matlhotlhapelo
2.1. Kabinete e atlenegisitse dikgato tsa go Oketsa Paka ya Maemo a Naga a Matlhotlhapelo ka kgwedi e nngwe gape go tloga ka la bo 15 Seetebosigo go ya go la bo 15 Phukwi 2020. Molao o letla Maemo a Naga a Matlhotlhapelo go ka tsenngwatirisong sebaka sa matsatsi a le 90.
3. Ditshwaetso tsa COVID-19 mo Kapa Bophirima
3.1. Kabinete e santse e tshwenyegile ka ga bogolo le koketsego ya ditshwaetso tsa COVID-19 mo Kapa Bophirima. Ka ntlha ya seno Moporesitente Ramaphosa o tla etela porofense ka Labotlhano, 5 Seetebosigo 2020, go buisana le Tonakgolo Alan Winde le khuduthamaga ya porofense, mmogop le go tlhatlhoba maemo a ipaakanyo a porofense tebang le taolo e e tsweletseng ya leroborobo.
3.2. Moporesitente Ramaphosa o tla bo a felegeditswe ke le Tona ya Boitekanelo Zweli Mkhize; Tona ya Tshireletso le Bagale ba Sesole Nosiviwe Mapisa-Nqakula; Tona ya Thuto ya Motheo Angie Motshekga; Tona ya Sepodisi Bheki Cele; Tona ya Matlo, Metsi le Kgelelo ya Leswe Lindiwe Sisulu le Tona ya Ditiro tsa Puso le Mafaratlhatlha a Setšhaba Patricia de Lille.
4. Beke ya Tshireletso ya Bana
4.1. Kabinete e gakolola botlhe gore Beke eno ke Beke ya Tshireletso ya Bana, eo e simolotseng ka Latshipi, 31 Motsheganong mme e tla khutla ka Latshipi, 07 Seetebosigo 2020. Maitlhomo a Beke ya Tshireletso ya Bana ke go tlotlomatsa dintlha tsa Tshireletso ya Bana ngwaga otlhe. Setlhogo sa monongwaga ke: “A Rotlhe Re Sireletseng Bana, Ka Nako ya COVID-19 le go ya go Ile fa e Setse e Fetile”.
5. Tlhaelo ya metsi
5.1. Kabinete e etse tlhoko go fokotsega ga metsi kwa matamong go go diragetseng e seng kgale, bogolosego kwa porofenseng ya Kapa Bophirima. Re le naga e e senang metsi, go fokotsega ga metsi kwa matamong go na le seabe se se sa itumediseng mo ditlhokong tsa rona tsa metsi. Ka jalo Kabinete e ikuela go rona rotlhe go somarela metsi.
Dipotso: Mme Phumla Williams – Sebueledi sa Kabinete
Selulafouno: 083 501 0139
