Pego ya Kopano ya Kabinete ye swerwego ka Dikgokagano tša Bidio ka Labone, 4 Phupu 2020
1. Sephetho sa Kgorotsheko ya Godimo ya Leboa la Gauteng sa Labobedi, 2 Phupu 2020
1.1. Kopano ya moswananoši ya Kabinete ya dikgokagano tša bidio e swerwe lehono, ka Labone 4 Phupu 2020, go rerišana ka dikgatelopele tša maitekelo a Afrika Borwa a go phološa maphelo le go šireletša mekgwa ya batho ya go iphediša nakong ye ya leuba la COVID-19. Bjalo ka karolo ya ditherišano tše, Kabinete e fetlekile sephetho sa Kgorotsheko ya Godimo ya Leboa la Gauteng seo se filwego ke Moahlodi Norman Davis ka Labobedi, 2 Phupu 2020, seo se tsebagaditšego melao ya COVID-19 ya go tswalelwa ga naga Maemong a Boraro le a Bone gore ga se tsamaišane le Molaotheo ebile ga se amogelege.
1.1.1 Morago ga go hwetša dikeletšo tša semolao le go theeletša ditšhišinyo tše mmalwa tše dirilwego ke maloko a legoro la semolao morago ga go kwa sephetho seo, Kabinete e dumela gore kgorotsheko ye nngwe e ka tšea sephetho sa go fapana le sa kgorotseko ye.
1.2. Ka gona Kabinete e tšeere sephetho sa go ipelaetša sephethong sa Kgorotsheko ya Godimo ya Leboa la Gauteng.
1.3. Mmušo o tla kgopela gore boipelaetšo ba ona bo theeletšwe ka lepotlapotla gore o kgone go hwetša bonnete ka melao ya go tswalelwa ga naga. Tona ya Tirišano ya Makala a Mmušo le Merero ya Setšo Ngaka Nkosazana Dlamini Zuma, o tla kopanela matsogo boipelaetšong bjo le Mopresidente Cyril Ramaphosa le Tona ya Maphelo, Ngaka Zweli Mkhize.
1.4. Kabinete e rata go netefaletša batho ka moka setšhabeng gore magato ka moka ao a tsebagaditšwego go tloga mola Mopresidente Ramaphosa a fago kgoeletšo ya Seemo sa Masetlapelo a Bosetšhaba ka Hlakola 2020, a be a nepile kudu go phološa maphelo.
1.5. Ka gona go phethagatša magato a, nako le nako mmušo o be o rerišana le mafapha ohle a setšhaba, ka gobane phenkgišano kgahlanong le COVID-19 ke matsapa a bosetšhaba ao a nyakago kopano ya magato magareng ga mmušo le maAfrika Borwa ka moka.
1.6. Ge mmušo o le gare o ipelaetša sephethong sa kgorotsheko, melao ya bjale e santše e šoma, ebile re dira boipiletšo le go hlohleletša batho ba gaborena ka moka go latela ditshepedišo ka moka tša maphelo tšeo di hlomilwego, go akaretšwa le go hlapa matsogo kgafetšakgafetša, go katoga batho ba bangwe, go apara dimaseke bathong le gape go lekolwa le go fetišetšwa ditekong, fao go lego maleba.
2. Go oketšwa ga Seemo sa Masetlapelo a Bosetšhaba
2.1. Kabinete e dumeletše go oketšwa ga Seemo sa Masetlapelo a Bosetšhaba ka kgwedi ye nngwe go tloga ka la 15 Phupu go fihla ka la 15 Mosegamanye 2020. Molao wa naga o dumelela Seemo sa Masetlapelo a Bosetšhaba go tšea tekano ya matšatši a 90.
3. Diphetelo tša COVID-19 tša kua Kapa Bodikela
3.1. Kabinete e santše e hlobaetšwa ke boipušeletšo le tlhatlogo ya diphetelo tša COVID-19 kua Kapa Bodikela. Ka baka la se, Mopresidente Ramaphosa o tla tšea leeto goya profenseng ye ka Labohlano, 5 Phupu 2020 go rerišana ka seemo se le Tonakgolo Alan Winde gotee le Lekgotlaphethiši la Profense, le gape go lekola boitukišo bja profense ye taolong ya goyagoile ya leuba le.
3.2. Mopresidente Ramaphosa o tla felegetšwa ke Tona ya Maphelo Zweli Mkhize; Tona ya Tšhireletšo le ya Bagale ba Sešole Nosiviwe Mapisa-Nqakula; Tona ya Thuto ya Motheo Angie Motshekga; Tona ya Maphodisa Bheki Cele; Tona ya Bodulo bja Batho, Meetse le Kelelatšhila Lindiwe Sisulu le Tona ya Mešomo ya Setšhaba le Mananeokgoparara Patricia de Lille.
4. Beke ya Tšhireletšo ya Bana
4.1. Kabinete e gopotša batho ka moka gore ye ke Beke ya Tšhireletšo ya Bana, yeo e thomilego ka Sontaga, 31 Mopitlo go fihla ka Sontaga 7 Phupu 2020. Beke ya Tšhireletšo ya Bana e šetšane le go phagamiša merero ye mabapi le go šireletšwa ga bana go ralala ngwaga ka moka. Morero wa ngwaga ke wo: ‘‘Ka moka ga rena A re šireletšeng Bana, mo nakong ye ya COVID-19 le go Fetela Pele”.
5. Tlhaelelo ya meetse
5.1. Kabinete e lemogile go theogela fase ga maemo a meetse ka matamong, kudukudu kua Kapa Bodikela. Bjalo ka naga ya go hlaelelwa ke meetse, maemo a matamo a nale ditlamorago tše mpe dinyakweng tša rena tša meetse. Ka gona, Kabinete e dira boipiletšo go rena ka moka go šomiša meetse gabotse.
Dipotšišo: Mohumagadi Phumla Williams – Seboleledi sa Kabinete
Mogala: 083 501 0139
