Sibonelelo sekukhubateka

Ngesi

Yini lekumele uyente

Sikhatsi semsebenti

Ngabe kubita malini

Emafomu lagcwaliswako

Ngubani longamutsintsa

Ngesibonelelo sekukhubateka

Uma ngabe unekukhubateka ngemtimba nobe ngengcondvo lokukwenta kwekutsi ungakhoni kusebenta, sikhatsi lesingetulu kwetinyanga letisitfupha, ungafaka sicelo sesibonelelo sekukhubateka.

Utfola sibonelelo sekukhubateka uma ngabe kukhubateka kwakho kutawuchubeka ngetulu kwemnyaka kantsi utfola sibonelelo sekukhubateka kwesikhashane uma ngabe kukhubateka kwakho kutawuchubeka sikhatsi lesichubekako lesingekho ngaphasi kwetinyanga letisitfupha kodvwa hhayi ngetulu kwetinyanga letilishumi nakubili. Sibonelelo sekukhubateka kwalomphelo asisho kwekutsi utawutfola sibonelelo imphilo yakho yonkhe, kodvwa kutsi sitawuchubeka ngetulu kwekundlula tinyanga letingu-12.

Ngabe wati njani kutsi uyafaneleka?

Kute ufaneleka, kumele:

• ube sakhamuti saseNingizimu Afrika nobe umhlali walomphelo nobe umkhoseli futsi lohlala eNingizimu Afrika ngesikhatsi sesicelo
• ube ngaphakatsi kweminyaka lengu-18 na-59.
• ube unganakekelwa esikhungweni sembuso
• ube nemculu wamatisi lonemagabelo, langamadijithi langu-13
• ungaholi ngetulu kwa R86 280 uma ungakashadi nobe R172 560 uma ushadile.
• Timphahla takho kumele tingabiti ngetulu kwa R1 227 600 uma ungashadi nobe R2 455 200 uma ushadile
• wente luhlolo lwetekwelashwa lapho utawuhlolwa khona ngudokotela lokhetfwe ngumbuso, asho lizinga lekukhubateka kwakho
• uletse nobe nguwaphi emarekhodi kanye nemibiko yetekwelashwa yangaphambilini, ngalesikhatsi wenta sicelo futsi nangalesikhatsi kwentiwa luhlolo.

Dokotela utawugcwalisa umbiko wetekwelashwa kantsi utawundlulisela lombiko ku-Ejensi yekuCinisekiswa kweTenhlalakahle eNingizimu Afrika (SASSA).

Umbiko utawusebenta tinyanga letintsatfu kusukela ngelusuku lwekuhlolwa kwakho.

Khumbula: Uma ungaphasi kweminyaka lengu-18 kantsi udzinga kunakekelwa kwalomphelo ngenca yekukhubateka kwakho, umnakekeli wakho lobukene nawe angafaka sicelo Sesibonelelo Sekunakekelwa. Uma ngabe ute i-ID, utawudzingwa kwekutsi ugcwalise i-afidavithi futsi unikete bufakazi bekutsi usifakile sicelo samatisi kuLitiko Letasekhaya. Uma ngabe ungakafaki sicelo samatisi, utawudzingwa kwekutsi ufake sicelo neLitiko Letasekhaya ngekhatsi kwetinyanga letintsatfu tesicelo sesibonelelo.

Utawutfola malini?

Sibonelelo lesisetulu  ngu- R2 180 ngenyanga.

Utawukhokhelwa njani?

Sibonelelo sitawubhadalwa ngayinye kuletindlela letilandzelako:

• ngakheshi endzaweni letsite yekubhadala ngelilanga lelitsite
• kufaka nge-elektroniki ku-akhawundi yasebhangi yakho, kufaka ekhatsi libhangi laseposini (libhangi lingabhadalisa ngalolusito)
• kusikhungo lesingasekelwa ngetimali nguHulumende – sib. likhaya lebantfu labanekukhubateka.

Ngabe sibonelelo sakho singamiswa nini?
    
Loku lokulandzelako kungaholela ekuhlehlisweni kwesibonelelo:

• uma timeko takho tigucuka
• umphumela wesibuyeketo
• uma wehluleka kutfobela ngalesikhatsi kubuyeketwa sibonelelo
• uma ukhwabanisa nobe utiphatse kabi
• uma kube khona liphutsa ngalesikhatsi kwemukelwa sibonelelo sakho.

Ngabe sibonelelo sakho singacedvwa nini?
    
Sibonelelo sitawucedvwa uma wena:

• ushona
• ufakwa esikhungweni sembuso
• ungasitsatsi tinyanga letintsatfu letilandzelanako
• uma wena ungekho eveni.

Uma lona lozuzako umukelwa kusakhiwo lesinenkhontileka nahulumende kute simnakekele bese sigcina loyo muntfu, lolusekelo mali lutawuncishiswa liye ku-25% (R285) kulemali laniketwa yona kusukela kulenyanga yesine ngemuva kwekumukelwa kwaloyo lozuzako kuleso sakhiwo. Lolusekelo mali lutawubuyiselwa kusuka ngalolusuku lona lozuzako akhishwa kulesakhiwo.

Ngesibonelelo sekukhubateka

Yini lekumele uyente

• Gcwalisa lifomu lesicelo sesibonelo ehhovisi lelisedvute nawe le-Ejensi yekuCinisekiswa kweteNhlalakahle eNingizimu Afrika (SASSA) phambi kwesisebenti se-SASSA
• Faka loku lokulandzelako:
  • Umculu wamatisi (i-ID) wakho lonemagabelo lanemadijithi langu-13. Uma ungenayo i-ID:
    • kumele ugcwalise i-afidavithi ngelifomu le-SASSA leletayelekile phambi kweMfungisi longesiso sisebenti se-SASSA
    • kumele uletse sitatimende lesifungelwe lesisayinwe ngumuntfu lohloniphekile (njengekhansela, umholi wendzabuko, sisebenti setenhlalakahle, umfundisi welisontfo nobe thishelanhloko) longafakazela ligama lakho nebudzala
    • sisebenti se-SASSA sitawutsatsa iminwe yakho. Utawutfunyelwa kuLitiko Letasekhaya kuyewufaka sicelo se-ID nanobe kusasetjentwa sicelo sakho. Uma ungatfoli i-ID, sibonelelo sitawumiswa.
  • umbiko wetekwelashwa kanye nembiko weluhlolo lolusebentako locinisekisa kukhubateka kwakho
  • bufakazi besimo semshado (uma bukhona)
  • bufakazi bendzawo yekuhlala
  • bufakazi bemholo, bemadividenti (uma bukhona)
  • bufakazi betimphahla, kufaka ekhatsi linani lamasipala lemphahla yakho
  • bufakazi bemphesheni yangasese (uma bukhona)
  • titatimende tasebhangi tetinyanga letintsatfu takho
  • iphemithi yesimo sebukhoseli kanye ne-ID yebhakhoseli yemadijithi langu-13
  • sikhwama seMshuwalensi wekuPhelelwa nguMsebenti (UIF) ('blue book') nobe sitifiketi sekukhishwa emsebentini lesikhishwa ngumcwashi wangaphambilini uma ngabe bewusebenta
  • ikhophi yencwadzi yemafa kanye kanye nencwadzi yekutsengiswa kwetimphahla yekucala nekugcina kanye nema-akhawundi ekwaba, uma umlingani ashone eminyakeni lesihlanu lendlulile
  • Emva kwekufaka sicelo sakho utawuniketa irisithi kutsi uyigcine njengebufakazi besicelo.

Kwentekani uma sicelo sakho singemukelwa?

Lihhovisi lekucinisekiswa kwetenhlalakahle litakwatisa ngekubhala kutsi ngabe sicelo sakho semukelekile nobe cha. Uma sibonelelo singemukelwa, lihhovisi lekucinisekiswa kwetenhlalakahle litawusho tizatfu tekutsi kungani sicelo sakho singakabi yimphumelelo futsi ungafaka sikhalo kuNdvuna Yekutfutfukisa Kwetenhlalakahle ngekubhala, uchaze kutsi kungani ungavumi.

Faka sikhalo ngekhatsi kwemalanga langu-90 ekutfola satiso ngemphumela wesicelo sakho.