Phethagatšo ya mananeo a bohlokwa a mmušo
1.1 Kabinete e bušeletša boipiletšo bja Mopresidente Jacob Zuma bja gore mafapha ka moka a setšhaba a šome mmogo go thekga ekonomi le go boloka mešomo ka seemong sa bjale se boima sa ekonomi.
Kwano magareng ga mmušo, difeme tša meepo le mekgatlo ya bašomi e laetša gore mafapha ka moka a ikgafile go boloka mešomo le go fokotša seabe sa tahlegelo ya mešomo.
Kbinete e ipiletša go maAfrika Borwa go thekga phethagatšo ya tumelelano ye. Tumelelano ye e šoma bjalo ka leano la mafapha ka moka ao a lebanego le mathata a go boloka mešomo.
1.2 Kabinete e amogetše Dipego tša Dipoelo tša Kotara tša lebaka la nako ya la 1 Moranang go fihla ka la 30 Phupu 2015. Kabinete e thabetše kgatelopele ye e dirilwego ebile e bone mafapha ao a nyakago go tsenwa gare. Kgoro ya Tshepedišo ya Dikgokagano le Tshedimošo ya Mmušo (GCIS) e tlo kgokaganya ditshedimošo tša ba ditaba ka nepo ya go fana ka tshedimošo ka ga phethagatšo ya mananeo a mmušo. Thulaganyo ye e tla tsebagatšwa ka moragonyana.
1.3 Kabinete e sedimošitšwe ka ga kopano ya G20 ye e swerwego ka Ankara, Turkey go tloga ka la 3 go fihla ka la 5 Lewedi 2015. Kopano ye e tsenetšwe ke Tona ya Kgoro ya Ditšhelete le ya Kgoro ya Mešomo le Mmušiši wa Pankakgolo ya Afrika Borwa. Kopano ya mohlakanelwa ya Tona ya Kgoro ya Ditšhelete le ya Kgoro ya Mešomo e ahlaahlile maano a go aba mešomo ye mentši le ye mekaone, go fokotša tlhokego ya tekatekano le go thekga kgolo ya ekonomi ye e akaretšago bohle.
1.4 Kopano ya Tona ya Kgoro ya Ditšhelete le Babušiši ba Dipankakgolo e boletše kudu ka ga, magareng ga tše dingwe, ekonomi ya lefase ka bophara; motheo wa kgolo ya go ya go ile le ye e lekaneditšwego; peeletšo le mananeokgoparara; merero ya metšhelo ya boditšhabatšhaba, go thuša tlhabollo ka mašeleng, le phetogo ya klaemete. Kabinete e lemogile gore kgolo ya lefaseng ka bophara e palelwa ke go fihlelela dikemelo tša yona. Le ge go le bjale, Kabinete e amogetše boikano bjo boswa bjo bo dirilwego ke G20 go tšwela pele go hlokomela ditlhabollo, go sekaseka mabaka ao a dirago gore mathata a ekonomi a ame dinaga tše dingwe le go rarolla dikotsi ka ge go nyakega go tšwetša pele boitshepho le seemo sa go se fetoge sa maemo a ditšhelete.
G20 e amogela gape poelo ye kaone ya Khonferentshe ye e swerwego Addis Ababa ka ga Thušo ya Mašeleng go Tlhabollo yeo ka go yona Afrika Borwa e ralokilego tema ye bohlokwa bjalo ka modulasetulo wa G77 le China.
1.5 Kabinete e amogela go hlomamiša semmušo le go gotetša mohlagase ga Polasa ya Mohlagase wa Phefo ya Kouga ka Kapa Bohlabela ka la 4 Lewedi 2015.
Polasa ya Mohlagase wa Phefo ya Kouga e tla aba dikikawate tše 300 ka iri tša mohlagase wo o hlwekilego ngwaga ka ngwaga. Se se tla abela palogare ya malapa a 50 000. Ke karolo ya leano la naga go farologanya kabo ya mohlagase go lebilwe go kabo ya mohlagase ya go ya go ile.
Peleng mo ngwageng wo, Kgoro ya Enetši e katološitše dibaka tša ka lefapheng la phraebete go re le tsenye letsogo ka tšweletšong ya mohlagse ka go dumelela Baabi ba baswa ba go Ikema ba Mohlagase wa go šomišwa leswa ba 13 leo le tlago oketša dimekawate tše 5 243 ka mothopong wa bosetšhaba.
1.6 Kabinete e lemogile ditiragalo tša go falala ga batho ka Yuropa tšeo di laetšago go hlakahlakana ga taolo ya bofaladi le kamano ya yona le melaotshepetšo ya dinaga tša ka ntle ya dinaga tšeo di amegago.
Afrika Borwa e tšwetše pele go leka go šoma ka merero ya bofaladi ka setho ka fao go kgonagalago. Mathata a bofaladi ka Yuropa ke tlhohlo ya ka seleteng seo yeo e nyakago maitapišo a dinaga ka moka tše di amegago. Go kgatha tema ka mafolofolo ga ditšhaba, metse le mekgatlo ya baagi le tirišanommogo ya tšona ka moka di a nyakega go šoma ka mathata a bofaladi.
1.7 Kabinete e reta mošomo wo o dirilwego ke Lekgotla la Karoganyo ya Mebasepala (MDB) leo le sa tšwago go fetša karoganyo le karoganyoleswa ya mellwane ya ka ntle ya mebasepala ka diprofenseng tše seswai nageng ka bophara.
MDB e dirile mošomo wa yona go latela thomelo ya melao ebile e šomišitše ditlhagišo tša maatla a yona go tšea diphetho tša mafelelo.
Kabinete e tšweleditšwe tlhobaboroko ye kgolo ka ga mekgatlo ye mengwe ya dipolotiki yeo e thomišitšego ka go hlasela MDB ka go nyaka go nyatša boikemo bja yona le go ba molaong ga yona pele ga setšhaba.
Kabinete e ipiletša go mekgatlo ya dipolotiki ka moka go tlogela go nyatša mošomo wa sehlongwa se bohlokwa se se ikemego seo se thekgago temokrasi ya rena. Go na le ditsela tšeo di filwego ka molaong tša go hlohla diphetho tša MDB.
1.8 Sehla sa go bega ka ga Tekatekano Mešomong (EE) se butšwe ka la 1 Lewedi 2015 go bobedi go bega ka go šomiša dipampiri goba ka inthanete, gomme se tswalelwa ka la 1 Diphalane 2015 (go ba dipampiril) le ka la 15 Pherekgong 2016 (go ba inthanete) ka go latelana.
Kabinete e gopotša bengmešomo ka moka go romela dipego tša bona tša EE go Kgoro ya Mešomo. Dipego tšeo di thuša mmušo go hlokomela kgatelopele ya mabapi le go rarolla kgethologanyo le tlhokego ya tekatekano.
Kgoro ya Mešomo e gare ka masolo a go ya setšhabeng ka fase ga morero wa: “Phetogo – e a kwešišega kgwebong” go maatlafatša phethagatšo le go netefatša go obamela melao.
2. Diphetho tše Bohlokwa tša Kabinete
2.1 Kabinete e sedimošitšwe ka ga Pego ya Mafelelo ya Dinepotlhabollo tša Ngwagakete (di-MDG) ya Afrika Borwa. Kabinete e dumeletše sethalwa sa pego ya mafelelo ka ga MDG seo se tlago fiwa Mokgatlo wa Dinagakopano mo ngwageng wo.
Go ya ka pego ye, ka morago ga mengwaga ye 20 ya tlhabollo, go bile le kgatelopele ye kgolo ka kabong ya bosetšhaba ya ditirelo tše bohlokwa le go fokotša maemo a bohloki a godimo kudu. Le ge go le bjale, Afrika Borwa e tšwela pele go lebana le ditlhohlo tše tharo tša bohloki, tlhokego ya tekatekano le tlhokego ya mešomo.
Pego e laetša leano la go fihlelela lenaneotlhabollo leo le šomago gabotse kudu la ka morago ga 2015 le dinepo tša tlhabollo ya go ya go ile tše di amanago le lona.
2.2 Kabinete e dumeletše ditšhišinyo tše di dirilwego ke Tona ya Kgoro ya Dinamelwa tša go aba tumelelano ya tšhoganetšo ya go hiriša Tag Yachts (PTY) Ltd. Maikemišetšo a yona ke go thomiša go tšweletša dikepe tša mohuta wa khathamarane tša folaga ya ntlha ya go fihla godimo ka Boemakepeng bja Port Elizabeth. Se ke go tsenya tirišong mošomo wo o filwego wa go hloma Lekala la Kabo ya dikepe ka fase ga masolo a Operation Phakisa go hloma Lefelo le Legolo la Kago ya Dikepe ka Kapa Bohlabel. Tumelelo ye e latela Karolo ya Tšhoganetšo ya 57 ya Molao wa Maemakepe wa Bosetšhaba, wa 2005 (Molao wa 12 wa 2005);
2.3 Kabinete e dumeletše go romelwa ga Sengwalwa sa Afrika ka ga Dipalopalo Palamenteng go yo dumelelwa.
Sengwalwa se ke tlhako ya melaotshepetšo ya tlhabollo ya dipalopalo ka Afrika, gomme se bea melawana ya sephrofešenale ye e laolago tšweletšo le taolo ya dipalopalo ka maemong a bosetšhaba, a ka dileteng le a ka khonthinenteng.
Dipalopalo ke motheo wa tlhokomedišišo le tshekatsheko tše di šomago gabotse, ebile di netefatša gore maikemišetšo a a fihlelelwa le gore dipoelo di a fihlelelwa. Sengwalwa se se fa ditlhahli tša tšweletšo ya dipalopalo tša boleng tše kaone tše di nyakegago go hlokomedišiša Leanotlhabollo la Bosetšhaba (NDP), le mananeo le dilo tše di tlago pele tša mmušo.
2.4 Kabinete e dumeletše gore Kgoro ya Peakanyo, Tekodišišo le Tshekatsheko ya Phethagatšo ya Mošomo (DPME) e tšwetše pele Lenaneo la Twende Mbele ka nepo ya go beeletša ka tirišanong mabapi le tlhokomedišišo le tshekatsheko go ralala le Afrika ka bophara.
Lenaneo la Twende Mbele le tla thuša Afrika Borwa go aga le go tsenya tirišong ya semmušo ditirišano tše di sego tša mmušo tša bjale, tšeo di ka akaretšago ditumelelano tša dinaga ka bobedi. Se se thekga mošomo wa go nyaka go fihlelela bophelo bjo bokaone ka Afrika Borwa, gomme se amantšhitšwe le nepo ya go fihlelela Afrika Borwa ye kaone ka lefaseng le lekaone.
3. Melaokakanywa
3.1 Kabinete e dumeletše go romelwa ga Molaokakanywaphetošwa wa Katološo ya Tšhireletšego ya Madulo, wa 2015 ka Palamenteng.
Molaokakanywa wo o fetoša Molao wa Katološo ya Tšhireletšego ya Madulo, wa 1997 (Molao wa 62 wa 1997) ka nepo ya go maatlafatša, go hlathola le go šireletša ditokelo tša badudi ba lefelong leo.
Diphetošo tše, tšeo di tšwago go Tšhireletšo ya Melaotshepetšo ya Go Dula Lefelong le ya go Raka Lefelong ka Mafelong a Dipolasa tša Dikgwebo, di ikemišeditše go hwetša tharollo ya ditlhokego tša tšhireletšego ge o dula lefelong ka go kopanya magato a kaboleswa ya nag aka gare ga mekgwa ye e šomago gabotse ya tšhireletšo ya semolao le ya tharollo ya dithulano.
Dithulaganyo tša bjale tša dihlongwa le bokgoni ga se tša lekana go rarolla boleng le bogolo bja dithulano tša ditokelo go naga le tšhireletšego ya madulo tšeo di hwetšwago ka mafelong a dipolasa tša dikgwebo.
4. Ditiragalo tše di tlago
4.1 Bjalo ka karolo ya meketeko ya Kgwedi ya Bohwa ka Lewedi, Mopresidente Jacob Zuma o tla tsebagatša semmušo Lefelo la Segopotšo le Tlhathollo la Matola ka Mozambique ka Labohlano la 11 Lewedi 2015, le Sebetlwa sa Kgoši Bhambhatha ka Greytown, KwaZulu-Natal ka la 22 Lewedi 2015.
4.2 Mopresidente o tla fa gape polelo ya letšatši ka Letšatši la Bohwa ka Vleifontein Makhado ka Limpopo ka la 24 Lewedi 2015. Morero wa meketeko ya ngwaga wo ya Kgwedi ya Bohwa ke: “Tsebo ya rena ya setlogo, bohwa bja rena: Re lebile go go tseba, go tšwetša pele le go lota bohwa bjo bo phelago bja Afrika Borwa.”
MaAfrika Borwa a hlohleletšwa go utolla bohwa bja rena bja tlhago ka go etela dirapa tša bosetšhaba tšeo go tlago tsenwa go tšona ka ntle le tefo go tloga ka la 14 go fihla ka la 18 Lewedi 2015, bjalo ka karolo ya Beke ya ngwaga ka ngwaga ya bo 10 ya Dirapa tša Bosetšhaba tša Afrika.
4.3 Kgoro ya Thuto ya Motheo e tla ngwadiša Ditekolo tša Bosetšhaba tša Ngwaga ka ngwaga (ANA) tša bohlano ka Lewedi 2015 go nyaka go tseba ka ga kgatelopele ya dipoelo tša go ithuta ka go tsebo ya go bala le go ngwala le ka dipalong ka kreiting ya mathomo go fihla ka ya senyane.
ANA e tšweletša bohlatse bjo bo lekaneditšwego bja go hlokomedišiša kgatelopele ya ditsenogare tša mmušo le gape go hlahla tlhabollo ya ditsenogare tšeo di nepišitšwego.
Batswadi le bahlokomedi ba bana ba hlohleletšwa go thekga baithuti nakong ya tekolo le go netefatša gore dipoelo di šomišwa go rarolla makala afe goba afe a tlhabollo. Lenaneo la dinako tša ANA la 2015 le hwetšagala go: www.education.gov.za
Kabinete e ipiletša go barutiši go bea dinyakwa tša baithuti pele ka go netefatša gore ANA e tšwela pele ka ntle le go šitišwa.
4.4 Kabinete e leboga maAfrika Borwa bao ba kgathilego tema ka go Letšatši la Boditšhabatšhaba la Tsebo ya go bala le go ngwala leo le swerwego ka la 8 Lewedi 2015 go hlohleletša setlwaedi sa go bala le go tšwetša pele bohlokwa bja tsebo ya go bala le go ngwala. Dingwalwa tša rena tše di hlomilego Temokrasi ye ya Sengwalwa sa Tokologo di boletše gore re tla lwela gore “mabati a thuto a bulelwe bohle.
Kgoro ya Thuto ya Motheo mo kgweding ye e ipiletša go maAfrika Borwa ka moka go kgatha tema ka lesolong la tsebo ya go bala le go ngwala leo le hlohleletšago go bala ka ditšhabeng tša rena. Kabinete e ipiletša go yo mongwe le yo mongwe go fana ka dipuku tše di tlago šomišwa ka makgobapukung a dikolo, re fane ka nako ya rena re ye go balela bana ka ditšhabeng tša rena.
4.5. Beke ya Ngwaga ka Ngwaga ya Lefelo la Tirelo la Thusong la Bosetšhaba go tloga ka la 13 go fihla ka la 18 Lewedi 2015 e tla fan aka ditirelo go mafelo le go didirišwa tša go thetha go tliša ditirelo tša mmušo kgauswi le maAfrika Borwa. Se se bopa karolo ya Kgwedi ya Tirelo ya Setšhaba.
Kabinete e hlohleletša maAfrika Borwa ka moka go šomiša mehutahuta ya ditirelo le tshedimošo ye e fiwago ka Mafelong a Tirelo a Thusong go itšwetša pele le go imaatlafatša.
Kabinete e ipiletša go maAfrika Borwa go hlompha bašomi ba mmušo bao ba kgethegilego goba dihlongwa tša mmušo tše di kgethegilego ka go šišinya maina a tšona pele ga la 30 Lewedi 2015 go tla go abelwa Difoka tša Boraro tša Bokgoni bja Godimo tša Bosetšhaba tša Batho Pele tša 2015, tšeo moletlo wa tšona o tla swarwago ka fase ga morero wa: “Batho Pele – Re Bea Batho Pele”. Tshedimošo ka botlalo e hwetšagala go: www.dpsa.gov.za
4.6 Kabinete e lemogile gore Kopano ye e Tlwaelegilego ya bo 70 ya Kopanokgothekgothe ya Mokgatlo wa Dinagakopano (UN) (UNGA 70) e tla bulwa ka la 15 Lewedi 2015 ka Dikantorongkgolo tša UN ka New York. Go tloga ka la 25-27 Lewedi 2015 Samiti ya go Amogelwa ga Lenaneotlhabollo la ka Morago ga 2015 e tla swarwa..
Dingangišano tša Kakaretšo tša Kopano ya bo 70 ya UNGA e tla swarwa go tloga ka la 28 Lewedi - 6 Diphalane 2015. Samiti ya mafelelo ya Mokgatlo wa Selekane sa Afrika (AU) ye e ilego ya swarwa ka Afrika Borwa e ile ya ipiletša go dinagamaloko ka moka tša AU go šomiša monyetla wa sefala sa Kopanokgothekgothe ya UN go akaretša taba ya peakanyoleswa ya Lekgotlatšhireletšo gareng ga dilo tše di tlago pele tša bona tša melaotshepetšo ya dinaga tša ka ntle ge ba boledišana le balekane bao e sego ba Afrika; kudukudu, go tsenya ka dipolelong tša bona nakong ya ge ba swere dingangišano tša Kopanokakaretšo ya Mokgatlo wa Dinagakopano, nyakego ya go phošolla ditiro tša go se loke tša lebaka leo le fetilego ka khonthinenteng ya Afrika.
4.7 Kabinete e lemogile gore Afrika Borwa e tla ba naga ye go tlogo swarelwa Samiti ya Bobedi ya Foramo ya Tirišano ya China le Afrika (FOCAC) ka la 04-05 Manthole 2015. Mmušo wa Afrika Borwa o tlo šomišana kudu le Mmušo wa China, Sehlopha sa Batseta ba Afrika ka Beijing le Addis Ababa, le Khomišene ya AU ka ga ditokišetšo tše di feletšago ka Samiting ya FOCAC. Go emetšwe gore Samiti ya FOCAC e tla amogela Kwano ye mpsha le Leanotiro (la 2016-2018). Afrika Borwa mo lebakeng le e rerišana le batho ka moka bao ba rulaganyago dingwalwa tše tše pedi tše bohlokwa tša dipoelo.
Melaetša ya ditebogišo
4.8 Kabinete e amogela tsebišo ye e dirilwego ke Kopanokgothekgothe ya Mokgatlo wa Dipapadi tša Commonwealth gore Durban e tlo swara Dipapadi tša Commonwealth tša 2022, gomme se se dira gore e be la mathomo ge dipapadi tše tša maemo a godimo di tlo swarwa ka nageng ya Afrika.
Durban e tla šomiša mapatlelo a Sebjana sa Lefase sa Kgwele ya Maoto sa FIFA 2010 go swara tiragalo ye, yeo go emetšwego gore e tla tsenya tšhelete ya go fihla go R20 pilione ka ekonoming, gomme se sa fetogela go tšhelete ya tlaleletšo ya R11 pilione ka go kgolo ya palomoka ya letseno la ka nageng.
4.9 Kabinete e lebogiša baraloki ba rena ba diatleletiki ge ba feditše ba le maemong a bo 13 ka Diphadišanong tša bo 15 tša Bonkgwete bja Diatleletiki bja Lefase ka Beijing, ka China le ge ba thopile metale o tee wa gauta le ye mebedi ya porontshe.
4.10 Kabinete e rata gape go lebogiša Bafana Bafana ge e thopile Phadišano ya bo 21 ya Sebjana sa Mandela, ka ge e fentše Senegal 1-0. Phenyo ye e latela tahlegelo go Mauritania mo mafelelong a beke ao a fetilego gomme re holofela gore se se tla thuša boitshepho bja sehlopha gore se kgone go fihlelela diphadišano tša kgwele ya maoto tša Sebjana sa Dinaga tša Afrika.
Ka go thopa Phadišano ya Sebjana sa Mandela, Mokgatlo wa Kgwele ya Maoto wa Afrika Borwa o okeditše neelano ya ona ka go Sekhwama sa Nelson Mandela Children’s Fund go tloga go R1 milione go fihla go R1, 5 milione.
4.11 Kabinete e lakaletša sehlopha sa Springbok mahlatse le mahlogonolo ka Phadišanong ya bo Seswai ya Sebjana sa Lefase sa Rakbi yeo e tlogo swarelwa ka Engelane go tloga ka la 18 Lewedi go fihla ka la 31 Diphalane 2015 gomme e ipiletša go maAfrika Borwa go kopana ka go thekga sehlopha sa rena sa naga.
4.12 Kabinete e ba le Mopresidente ge a lebogiša Yunibesithi ya Witwatersrand ge e bile le kutollo ye kgolo ye mpsha ya mašaledi a marapo ka Maropeng ka lefelong la Bohwa la Lefase la Cradle of Humankind ka Ranteng Bodikela, Gauteng.
Kutollo ye ye mpsha ya go makatša e latela dinyakišišo tše di bego di tseneletše tše di bego di dirwa ke bašomi ba tša mahlale ka fase ga thekgo ya Kgoro ya Mahlale le Theknolotši le Sehlongwa sa tša Bokgoni sa Setheo sa Dinyakišišo tša Bosetšhaba ka Yunibesithing ya Witwatersrand.
4.13 Kabinete e ba le Mopresidente ge a lebogiša Kereke ya Katholoki ge e lemogile semmušo Morena Tshimangadzo Samuel Benedict Daswa bjalo ka Mokgethwa wa Mathomo ka Afrika Borwa. Moletlo o tla swarwa ka la 13 Lewedi 2015 ka Thohoyandou, Limpopo. Kereke ya Khatholiki e tla swara moletlo wo ka go ona Morena Tshimangadzo Samuel Benedict Daswa a tlago botsefatšwa. Daswa e be e le hlogo ya sekolo ka Profenseng ya Limpopo. O ile a bethwa, a kgatlwa ka maswika le go tšhungwa go fihla a hlokofala ka lebaka la ditumelo tša gagwe tša Sekhatholiki ka Hlakola 1990.
5. Ditaba tše bohlokwa ka seemong sa bjale
5.1 Kabinete e amogetše maikemišetšo ao a šišintšwego magareng ga Koporasetaolo ya Sephethephete sa Mebileng le ba taolo ya sephethephethe ka diprofenseng go tsebagatša dinako tša mošomo tša diiri tše 24 go bašomi ba sephethephethe go rarolla dikotsi tše di bolayago batho ka bontši ditseleng tša rena.
Kabinete e gopotša bašomiši ba tsela ka moka gore polokego ke maikarabelo a yo mongwe le yo mongwe gomme katlego ya masolo a polokego mebileng e laolwa ke ge batho ka moka ba obamela melao ya tsela. Ka ge re tlo tsena sehleng sa maikhutšo a dikolo, Kgoro ya Dinamelwa e tla oketša lesolo la yona la polokego mebileng.
Kabinete e ipiletša go baotledi ba difatanaga go emiša dikotsi tše di bolayago batho ka bontši ditseleng tša rena ka go hlompha maswao a tsela, gore baotledi ba se ke ba otlela ba tagilwe, gore difatanaga tšeo di sego tša lokela tsela ga se tša swanela go ba ditseleng tša rena.
5.2 Kabinete e lemogile gore Khonkrese ya Lefase ya bo 14 ka ga Dithokgwa e swerwe mo lebakeng le ka Durban gomme e tsenetšwe ke baromiwa ba 3 200. Khonkrese ye, yeo e lego la mathomo e swarwa ka Afrika, e akaretša batho bao ba emetšego mafapha ao a fapafapanego a go swana le mmušo, mekgatlo ye e sego ya mmušo, lefapha la phraebete, le mekgatlo ya tša mahlale goba ya diphrofešenale. Go kgatha tema ka kakaretšo ga mafapha a le ditherišano tše di akaretšago bohle ka ga merero ya dithokgwa go tla nolofatša gore di tsenywe ka mananeong a lefase ka bophara a mabapi le tlhabollo ya go ya go ile le go aga dilekane tše diswa.
5.3 Kabinete e le mogile temošo ye e filwego ke Botseta bja US ka Afrika Borwa ye e lemošago gore magogelathoko a ka hlasela dikgahlego tša Amerika ka Afrika Borwa.
Kabinete e bušeletša seo se boletšwego ke Tona ya Kgoro ya Tšhireletšego ya Mmušo ge a netefaletša setšhaba gore polokego ya maAfrika Borwa e dula e le selo seo se tlago pele. Ditheo tša rena tša phethagatšo ya molao di dula di ntšhitše mahlo dinameng go šireletša badudi ba yona le dithoto tša bona.
Mahloko
5.4. Kabinete e ba le Mopresidente Zuma ge a lebiša mahloko go ba lapa, bagwera le bašomimmogo ka go hlokofala ga Moahlodi Thembile Lewis Skweyiya.
O tsentše letsogo kudu ka nageng bjalo ka mmoleledi wa tša molao, molweladitokelo tša botho, Moahlodi wa Kgorotsheko ya Godimo le Moahlodi wa Kgorotshelo ya Molaotheo.
5.5. Kabinete e romela gape mahloko a yona go ba lapa le setšhaba sa Mohlomphegimogolo, Kgoši Lekunutu Cavendish Mota wa Batlokwa ba Mota ka Foreisetata.
6 Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
6.1 Mohumagadi Mmabatho Ramagoshi – Motlatšamolaodipharephare: Kgokaganyo ya Melawana le Taolo ya Tsebo ka Kgorong ya Basadi.
6.2 Hlogo ya Bosetšhaba: Lefapha la Dinyakišišo tša Bosenyi bjo bo Tlago pele. Tona ya Maphodisa o tla dira tsebišo mathapameng a lehono
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
