1. Phethagatšo ya Mananeo a Bohlokwa a Mmušo
1.1. Kabinete e amogela protšeke ya R20 milione ya go lekola kgonagalo ya Tlhabollo ya Dikgwebo. Lenaneo le la mengwaga ye mebedi la go lekola kgonagalo ya tlhabollo ya dikgwebo le ikemišeditše go tsošološa diphaka tša diintasteri tša Afrika Borwa, go hloma mafelo a diintasteri ao a kgethegilego le go thekga kopanyo ya tlhabollo ya ekonomi ya ka nageng ka nepo ya go tiiša lefapha la dikgwebopotlana.
Protšeke ye e dirišana le Kgoro ya Kgwebišano le Diintasteri, Kgoro ya Tlhabollo ya Dikgwebopotlana, Kgoro ya Matlotlo ya Bosetšhaba, le Lekala la Thušo ya Mašeleng go bao ba Hwetšago Letseno la Magareng la Pankatlhabollo ya Afrika. Protšeke ye e lebeletše go tsenya letsogo go go hlomeng ga mešomo, go fokotša bohloki ka ditšhabeng tše di hlokago, le go kaonafatša phihlelelo go theknolotši le go mabokgoni ka dikgwebopotlana, ka dikgwebo tša magareng le dikgwebo tše nnyane (di-SMME).
Lesolo le le tla fa thekgo go lefapha la di-SMME go fihla ka Manthole 2017. Go lebeletšwe katlego ya lona, mmušo o tla tšea sephetho sa go e tsenya tirišong go ya setšhabeng nageng ka bophara.
1.2. Kabinete e amogela go tsebagatšwa semmušo ga Lefelo la Phethagatšo ya Mošomo la Mohlakanelwa ka Mopresidente Jacob Zuma ka Skukuza. Lefelo le le tla kgokaganya mešomo ya kgahlanong le leuba la go bolaya ditšhukudu go nyakwa manaka a tšona ka lefelong leo.
2. Diphetho tše bohlokwa tša Kabinete
2.1. Kabinete e dumeletše Molawana wa Bahlami ba Diintasteri ba Bathobaso, wo e lego karolo ya Leanotiro la Melawana ya Diintasteri (IPAP). Molawana wo o sepelelana le Leanotlhabollo la Bosetšhaba le Leano la Dintlha tše Senyane leo le tsebagaditšwego ke Mopresidente Zuma ka Polelong ya gagwe ya Maemo a Setšhaba ya 2015.
Gape ke karolo ya maithomelo a kakaretšo a mmušo a go hloma diintasteri go katološa bogolo bja diintasteri le go tsenya tirišong phetogo ye mpsha ya bohlami bja dikgwebo ka ekonoming. E ipiletša go ditsenogare tša tlhamo ya melawana tše di tiilego ka lehlakoreng la Mmušo go katološa bogolo bja diintasteri tša ka nageng le go godiša ekonomi ka thekgo ye e tseneletšego go bahlami ba diintasteri ba bathobaso ka ge go laeditšwe ka go the IPAP.
Molawana wo o tla lebelela kudu kgolo le bokgoni bja lefaseng ka bophara ga dikgwebo tša bathobaso. Maikemišetšo a se ke go tsenya letsogo go phetošong ya sebopego sa dipalopalo tša merafe ye e nago le diintasteri ka lefapheng la diintasteri tša Afrika Borwa le go rerišana le beng ba diintasteri ba bathobaso, bao ba bonwago bjalo ka methopo ya go hloma dikgwebo yeo e sa šomišwego kudu, ba go tsenya letseno, ba metšhelo le ba boitlhamelo. Molawana wo o tla sepediša go kgatha tema go bohlokwa ga bontši bja dikhamphani tšeo di lego tša bathobaso le tšeo di laolwago ke bona ka dikgwebong tša kabo ya ditšweletšwa ka lefapheng la diintasteri la ekonomi. Tona ya Kgoro ya Kgwebišano le Diintasteri o tla swara kopano ye e aroganego le bagaši ba ditaba go ba sedimoša ka ga molawana wo.
2.2. Kabinete e dumeletše Pego ya Bosetšhaba ya Boraro ya Afrika Borwa ka ga Phethagatšo ya Tshepedišo ya Polokego ya Diphedi ya Cartagena, gore e tle e romelwe go Bongwaledi bja Seboka sa Diphedi tše di Farologanego.
Tshepedišo ye e laola Diphedi tšego bophelo bja tšona bo laolwago ka Ditšini tša maitirelo, tšeo gape di tsebjago bjalo ka Diphedi tša go Godišwa ka Mokgwa wa Ditšini tše Fetošitšwego ka lebaka la theknolotši ya diphedi ya sebjalebjale, go tloga go naga e tee go ya go ye nngwe.
Afrika Borwa ke motšweletši wa bosenyane yo mogologolo wa dibjalo tša go dirwa ka ditšini tša maitirelo lefaseng gomme e tšwela pele go ba naga ye e tšwetšago pele go amogela le go šomiša dibjalo tša go dirwa ka ditšini tša maitirelo. Se se sepelelana le Karolo ya 24 ya Molaotheo, yeo e hlohleletšago tšhomišo ya maleba ya diphedi tše di farologanego.
2.3. Kabinete e dumeletše kabo ya ditirelo ya mathomong ka Afrika Borwa go latela sephetho sa Khonferentshe ya bo 9 ya Mokgatlo wa Kgwebišano wa Lefase (WTO) sa go fa Dinaga tše di Sego tša Hlabologa (di-LDC) tshwaro ye e kgethegilego.
Afrika Borwa e ikgafile go phethagatša tumelelano ya WTO, yeo e bolelago gore di-LDC di fiwe thekgo ye e kgethegilego. Go dinaga tše 34 tšeo di hlaotšwego bjalo ka di-LDC, tše 25 di tšwa Afrika. Kabo ya mathomong ya Afrika Borwa e tla ba go ditirelo tša ka ditirelong tša ditšhelete, ka go dikgokagano tša megala, ka go mafapha a boeti le a dinamelwa. Kabo yeo e bopa karolo ya go nolofatša phihlelelo go mebaraka ya ditirelo le go baabi ba ditirelo ka mebarakeng ya Dinaga tšeo di Hlabollogilego.
2.4. Kabinete e dumeletše meputso ye e bušeleditšwego ya tshenyegelo ya go iphediša ya 5.5% gore e lefelwe maloko a Khomišene ya Ditokelo tša Botho ya Afrika Borwa (SAHRC) go thoma ka la 1 Moranang 2015. Se se sepelelana le Karolo ya 9(1) ya Molao wa SAHRC, wa 2013 (Molao wa 40 wa 2013).
2.5. Kabinete e dumeletše go romelwa ga Pego ye e kopantšwego ya Bobedi ya Lebakatiro ya Afrika Borwa ka fase ga Tšhata ya Afrika ka ga Ditokelo tša Botho le tša Batho le Pego ya Mathomong ka fase ga Tshepedišo go ya go Tšhata ya Afrika ka ga Ditokelo tša Basadi ka Afrika.
Pego ka ga Khomišene ya Mokgatlo wa Selekane sa Afrika (AU) ke tshekatsheko ya diphihlelelo le ditlhohlo go p[hethagatša ditokelo tša baagi, tša sepolotiki, tša ekonomi ya setšhaba le tša setšo. Se se sepelelana le ge Afrika Borwa e le karolo ya Tshepedišo ya AU go leba go Tšhata ya Afrika ka ga Ditokelo tša Botho le tša Batho ka ga Ditokelo tša Basadi ka Afrika.
2.6. Kabinete e dumeletše go tsebagatšwa ga Tshepedišo ya bafaladi ba Lesotho gore e thome ka la 1 Hlakola 2016. Se se latela Tshepedišo ye e kgethegilego ya ye e filwego bafaladi ba go tšwa Zimbabwe ka 2010, yeo le yona ka morago ga fao e ilego ya katološwa.
Tshepedišo ye e tla thuša go laola bokaone go tsena ba badudi ba Lesotho bao ba tlago ka Afrika Borwa bao ba tshelago melawana ya bjale ya bofaladi.
Tona ya Kgoro ya Merero ya Selegae o tla fa dintlha ka botlalo ka kopanong le bagaši ba ditaba ka moragonyana.
2.7. Tona ya Kgoro ya Ditšhelete e sedimošitše Kabinete ka ga phethagatšo ya Molaophetošwa wa Melao ya Motšhelo wa 2013 le wa 2014 gore o tsenywe tirišong ka la 1 Mopitlo 2016. Melao ye ya phetošo e ikemišeditše go kopanya le go nolofatša go lefiša motšhelo go ditšhelete tša nakong ya go rola modiro ka lebaka la bogolo le dikholego tša tšona. Go iša kholego ya motšhelo go akaretša ditšhelete tša phrobintente tša maloko ao a amegago go tla kgontšha bašomi bao ba ka bago ba milione o tee go ipshina ka moputso wa godingwana wo o ba šalelago.
Se gape se tla thibela ditiro tša go efoga go lefa motšhelo ka batho bao ba hwetšago letseno la godimo go fihla go palo ya godimodimo ya 27.5% ya moputso goba ya letseno leo le lefišwago motšhelo go fihla go letseno la R350 000.
Tona o sedimošitše gape Kabinete ka ga molawana wa mabapi le go lefa dipeeletšo ka dinako tše itšego go ditšhelete ka moka tše motho a di hwetšago ge a etšwa mošomong ka lebaka la bogolo, fao motho yo a holegago go metšhelo ye e gogwago gape a swanetšego go dira gore ditšhelete tše di swanetšego go lefša ge a etšwa mošomong ka lebaka la bogolo di be karolo ya tšhelete ye e bolokwago gore e tle e lefše ge a etšwa mošomong.
Melao ye ya phetošo e tsenywa tirišong ka morago ga ditherišano tše di tseneletšego le bakgathatema ka moka ka gare le ka ntle ga Lekgotla la Bosetšhaba la Tlhabollo ya Ekonomi le Bašomi, fao go ilego gwa swarwa bonyane dikopano tše 33 tše di swerwego le bašomi le diintasteri go tloga ka 2012. Palo ya godimo kudu ya bakgathatema e laeditše gore e fa thekgo ya bona gore melao ye e tšwetšwe pele ka la 1 Mopitlo 2016.
3. Melaokakanywa
3.1. Kabinete e dumeletše go romelwa ga Molaokakanywaphetošwa wa Kgašo wa 2015 ka Palamenteng. Molaokakanywa wo o fetoša Molao wa Kgašo, wa 1999 (Molao wa 4 wa 1999) go realo e le go hlama le go phethagatša mokgwa wa pušo ya dikhamphani wa go se fetoge wo o netefatšago gore go ba le seemo sa go se fetoge sa lebaka le letelele le sa go ya go ile sa Lekgotlakgašo la Afrika Borwa (SABC).
Mmušo o ikgafile go mogaši wa setšhaba yo maatla, yo a ikemego le wa maleba, yo a ikarabelago go bengdišere, go setšhaba le go Palamente.
Bokgoni bja go phethagatša mošomo wo e filwego ona bo laolwa ke tiro ya mošomo ka fao go tletšego seatla ka Lekgotlataolo la SABC ka go fa mogaši wa setšhaba tšhupetšo ya togamaano.
3.2. Kabinete e dumeletše gore Molaokakanywa wa Inšorentshe wa 2015 o tsebagatšwe ka Palamenteng. Molaokakanywa wo o hlagiša tlhako ya semolao ye e kopantšwego ya taolo ye e nago le šedi ya lefapha la inšorentshe ye e sepelelanago le melawana ya boditšhabatšhaba ya taolo ya inšorentshe. Molaokakanywa wo o maatlafatša Taolo ya dikotsi ya bjale, letlotlo le dinyakwa tša mmušo. O tšeela legato le go kopanya dikarolo tše kgolo tša Molao wa Inšorentshe ya Lebaka le Letelele wa 1998 (Molao wa 52 wa 1998) le Molao wa Inšorentshe wa Lebaka le Lekopana wa 1998 (Molao wa 53 wa 1998) wa mabapi le Taolo ye e nago le šedi.
3.3. Kabinete e dumeletše go phatlalatšwa ga Sethalwa sa Molaokakanywa wa Kutollo le Thušo ya Mašeleng ya Meepo ya Afrika ka gare ga Kuranta ya Mmušo gore se sekasekwe ke setšhaba. Molaokakanywa wo o hloma Koporase ya Kutollo le Thušo ya Mašeleng ya Meepo ka go diragatša melao. Gape o hlaloša mošomo wa yona le maikemišetšo a togamaano. O maatlafatša pušo le tlhokomedišišo ya sehlongwa se.
3.4. Kabinete e dumeletše go tsebagatšwa ga Molaokakanywaphetošwa wa Go Tsebagatša fao go Šireleditšwego wa 2015 ka Palamenteng. Molaokakanywa wo o katološa tiragatšo ya Molao wa Go Tsebagatša fao go Šireleditšwego wa 2000 (Molao wa 26 wa 2000) go feta kamano ye e tlwaelegilego ya mongmošomo le mošomi.
Diphetošo tše di laola boikarabelo bja mohlakanelwa, di tsebagatša mošomo wa go nyakišiša go tsebagatša, o hlagiša dikimollo kgahlanong le boikarabelo bja molao wa baagi le wa bosenyi ka mabakeng a mangwe gomme o dira gore go tsebagatša ga maaka ka maikemišetšo go be bosenyi.
Molaokakanywa wo o tsenya letsogo go boikgafo bja mmušo bja go lwantšha boradia le bomenetša ka go maatlafatša go šireletšwa ga bao ba begago bosenyi.
3.5. Kabinete e dumeletše go tsebagatša ga Molaokakanywaphetošwa wa Tshepedišo ya Kahlolo ya Melato ya Sephethephethe sa Mebileng wa 2015 ka Palamenteng. Molaokakanywa wo o fetoša Molao wa Tshepedišo ya Kahlolo ya Melato ya Sephethephethe sa Mebileng wa 1998 (Molao wa 46 wa 1998).
Molaokakanywa wo o tla thuša Setheo sa Tshepedišo ya Melato ya Sephethephethe sa Mebileng le dihlongwa tša go aba dikotlo gore di be seemong se sekaone sa ditšhelete, ebile gape o tsebagatša ditshepedišo tše kaone ge go fiwa ditsebišo tša go tshela melao ya tsela go badiramelato.
4. Ditiragalo tše di tlago
4.1. Mopresidente Zuma o tla tsenela Samiti ya G20 ka la 15 le 16 Dibatsela 2015 ka Antalya, Turkey, fao go tlago lebeledišiša kudu kgolo ye e akaretšago bohle le ye e tseneletšego ka go diriša tiro ya mang le mang.
Baetapele ka samiting ye ba tla ahlaahla go akaretša mang le mang, go tsenya tirišong le peeletšo go fihlelela kgolo ye e tiilego, ya go ya go ile le yeo e lekanetšego maemong a lefaseng ka bophara.
4.2. Mopresidente Zuma o tla Etela Berlin Semmušo, ka Jeremane ka la 10 Dibatsela 2015, fao a tlago amogela ke Motšhanselara Angela Merkel. Mopresidente o tla etela gape Mopresidente Joachim Gauck. Ka nakong ya ketelo ye dinaga tše ka bobedi di tla tiišetša leswa boikgafio bja tšona go tšwela pele go maatlafatša dikamano tša ekonomi tša dinaga tše ka bobedi.
4.3. Mopresidente Zuma o tla amogela Tonakgolo ya Netherlands Mark Rutte ka Meagong ya Union Buildings ka la 17 Dibatsela 2015. Go latela se, Tonakgolo Rutte o tla eta pele baromiwa ba tša kgwebo go leba Johannesburg le Cape Town bao ba tlago ahlaahla kudu merero ya temo, tlhokomelo ya maphelo, dinamelwa, mananeokgoparara, meetse le mohlagase.
4.4. Afrika Borwa e tla ba monggae wa Foramo ka ga Samiti ya Tirišano ya China le Afrika ka Johannesburg ka la 4 le la 5 Manthole 2015. Maikemišetšo a samite ye ke go ahlaahla Lenaneo la Tirišano ya Togamano la Mengwaga ye 5-10 magareng ga Afrika Borwa le China (2015-2024) le go tšwetša pele ditumelelano magareng ga dinaga tše ka bobedi.
4.5. Motlatšamopresidente Cyril Ramaphosa o tla eta pele baromiwa ba maemo a godimo ka ga Ketelo ya Semmušo ya go leba Rphabliking ya MaIslamo ya Iran go thoma ka la 7 go fihla ka la 9 Dibatsela 2015, go tšwetša pele dikamano tša sepolotiki le tša ekonomi magareng ga dinaga tše ka bobedi.
4.6. Mopresidente Zuma o tla re ka la 6 Dibatsela 2015 a dira ketelo ya tlhokomedišišo ya Siyahlola go leba Bushbuckridge ka Mpumalanga, yeo e tlago lebeledišiša kudu meetse le kelelatšhila.
Palomoka ya malapa a 16 600 a holega go Kgato ya mathomo ya protšeke ya meets ya mmušo ka lefelong leo, yeo e abago meetse go metse ye 24 ka Masepaleng wa Selegae wa Bushbuckridge.
Mmušo o tšwela pele go ikgafa go netefatša gore maAfrika Borwa ka moka a na le phihlelelo go ditirelo tša motheo. Magareng ga mengwaga ya 2002 le 2014, dipersente tša malapa tše di nago le phihlelelo go meets di oketšegile go tloga go 80% go fihla go 86%, mola e le gore phihlelelo go kelelatšhila yona e oketšegile go tloga go 62% go fihla go 80%.
4.7. Mopresidente Zuma o tkla tsenela go hlomamiša semmušo ga Mopresidente yo a kgethilwego ka dikgethong wa United Republic of Tanzania, Mohlomphegi Morena John Pembe Magufuli, ka la 5 Dibatsela 2015.
5. Molaetša wa ditebogišo
5.1. Kabinete e lebogiša bašomi ba mmušo bao maina a bona a šišintšwego ka go Difoka tša Boraro tša Bosetšhaba tša Bokgoni ka ga Batho Pele. Mokete wa Difoka o tlo swarwa ka la 13 Dibatsela 2015 ka Emperor’s Palace, ka Gauteng ka fase ga morero wa: “Batho Pele – Re Bea Batho Pele”. Ba aba difoka tša ditiro tše kaone, tša phethagatšo ye kaone ya mošomo le go ela go kgotsofala ga badudi go mošomo wa mmušo.
5.2. Kabinete e lebogiša mmušo le batho ba bobedi Repabliki ya Côte d’Ivoire le ba United Republic of Tanzania ge ba swere dikgetho tša khutšo. Go kgatha tema ga badudi ba Côte d’Ivoire le ba Tanzania ka bontši kudu ka dikgethong tša kakaretšo go aletša kwešišo ya bona ya go phethagatša maikarabelo a bona a boagi le ditokelo tša motheo. Ke taetšo ya gore tshepedišo ya temokrasi ka mo khontinenteng e gatetše pele.
5.3. Kabinete e lebogiša sehlopha sa di-Springbok ka ga thaloko ya bona ka Phadišanong ya Sebjana sa Lefase sa Lekgotla la Boditšhabatšhaba la Rakbi ya 2015. Sehlopha se se tlile gae le metale wa porontshe.
5.4. Kabinete e lebogiša sehlopha sa go rutha sa Afrika Borwa ge se feditše diphadišano tša Sebjana sa Lefase sa go Rutha tša FINA/airweave ka Doha, Qatar.
Cameron van der Burgh o thopile metale wa gauta ka lebelong la dimetara tše 100 la breaststroke, Chad le Clos yena o thopile ka go lebelo la dimetara tše 100 la butterfly gomme o kgonne go fetša maemong a bone ka go dimetara tše 200 tša backstro. Michael Meyer o thopile silibera ka lebelong la dimetara tše 200 la individual medley. Douglas Erasmus o thopile metale wa porontshe ka lebelong la dimetara tše 50 la go tšhabeša kudu la freestyle. Kaylene Corbett o tšwele maemong a boseswai ka lebelong la dimetara tše 50 la breaststroke la makgaolakgang mola Calvyn Justus le yena a tšwele maemong a boseswai ka lebelo la dimetara tše 200 la freestyle.
6. Dikhoferentshe
6.1. Kabinete e amogela baromiwa bao ba tsenelago Khonferetshe ya Boditšhabatšhaba ya Phadišano ya bo 4 ya BRICS go tloga ka la 12 go fihla ka la 13 Dibatsela 2015 ka Inkosi Albert Luthuli Convention Centre, ka Durban ka fase ga morero wa: “Phadišano le Kgolo ye e Akaretšago Mang le mang”.
Se se kopanya mmogo ditsebi tša molao wa phadišano go utolla ka fao melawana ya phadišano e ka tsenyago letsogo go kgolo le tlhabollo ya ekonomi ye e akaretšago mang le mang ka go dinaga tša BRICS (Brazil, Russia, India, China le Afrika Borwa).
Melao ye e tiilego ya mabapi le phadišano ya ka Afrika Borwa e kgontšha badudi go kgatha tema ka fao go lokilego ka ekonoming ya bosetšhaba. E tšwetša pele go akaretšwa ga batho ba bantši ka mafapheng a tšweletšo a ekonomi le go beakanya seemo sa go kgatha tema ka kgwebong.
Melao ya mabapi le phadišano ya ka Afrika Borwa e na le seabe se segolo go go kgatha tema ga badudi gomme e bile le phihlelelo ye kgolo go fediša ditumelelano tša go bea ditheko godimo le go beakanyetša ditheko go ya ka fao ba ratago ka gona. O etile pele go tiragatšo ya kgahlego ya setšhaba ka go dikopanyo le dikhwetšo tša ditirelo.
6.2. Tona ya Kgoro ya Dinamelwa Dipuo Peters o tla tsenela Khonferentshe ya Bobedi ya Lefase ka Bophara ya Ditona tša Dinamelwa go tloga ka la 18 go fihla ka la 20 Dibatsela 2015 ka Brazil, fao Afrika Borwa e tlago ala Pego ya yona ya Naga ya Gare ga Ngwaga mabapi le kgatelopele ye e dirilwego ka ga phethagatšo ya Tiro ya Ngwagasome ya Mokgatlo wa Dinagakopano ya Leano ya Lefase ka Bophara ya 2011-2010 ya Polokego Mebileng.
Afrika Borwa e ikgafile go fokotša dikotsi tša mebileng ka 50% go tloga go tše 13 967 go fihla go tša ka fase ga tše 7 000 ka 2020. Afrika Borwa e dira kgatelopele ye kgolo go fihleleleng ga dinepišo tšeo di beilwego ka go Tiro ya Ngwagasome ya Lefase ka Bophara ya 2011-2010 ya Polokego Mebileng, ka ntle le ditlhohlo tšeo naga e lebanego le tšona mo lebakeng le.
7. Maemo a Kabinete go Merero ye Bohlokwa Seemong sa Bjale
7.1. Go rarolla mathata a tlhomo ya mešomo go tšwela pele go ba selo se bohlokwa seo se tlago pele go mmušo. Polelo ya Melawana ya Ditekanyetšo tša Gare ga Ngwaga e hlagišitše kgolo ya ekonomi ya lefaseng ka bophara yeo e gotšego ka go nanya, ye e nago le ditheko tša ditšweletšwa tše di gateletšego le tlhokego ya mešomo ye e hlatlogilego ka dikarolong tše ntši tša lefase.
Se se laeditšwe ka go Dinyakišišo tša Kotara tša mabapi le Bašomi, tšeo ka kotareng ya boraro ya 2015 di begilego tlhokego ya mešomo ya 25.5%, e lego tlhatlogo ye nnyane kudu go tloga go 25.4% ka kotareng yeo mo ngwageng wo o fetilego.
Se se laetša nyakego ya gore mafapha ka moka a swanetše go šoma le mmušo go thekga masolo a ka nageng a go hloma dibaka tša mešomo le go dira gore maAfrika Borwa a mantši a hwetše mešomo.
Mmušo, ka Leano la Dintlha tše Senyane, o šomela go hlohleletša kgolo le go hloma mešomo ka go bula dibaka tše diswa ka mafapheng a ekonomi a togamaano.
7.2. Kabinete e amogela go tsebagatšwa ga go se oketšwe ga ditšhelete tša go lefelwa dihlongwa tša thuto ya godingwana mo ngwageng wa ditšhelete wa 2016. Sephetho se se tliša kimollo ya ditšhelete yeo e bego e hlokega kudu, kudukudu go malapa a bahloki, go bašomi le go malapa a legoro la magareng ao a nago le baithuti bao ba tsenago diyunibesithing.
Kabinete e tšwela pele go amogela sephetho sa Mopresidente sa go hloma khomišene ye e tlago lebeledišiša mathata ka moka ao a tšweleditšwego ke baithuti. Mopresidente o tlo tsebagatša khomišene ye gammogo le dintha tše e swanetšego go di lebeledišiša ge e phethagatša mošomo wa yona ge nako e dutše e sepela.
7.3. Kabinete e amogela ditsenogare tše di dirwago ke Kgoro ya Meetse le Kelelatšhila go thuša ditšhaba tša ka KwaZulu-Natal le tša ka Foreisetata tšeo di amilwego ke komelelo ye e sa tšwago go bonwa. Mafelo ao a abelwago meetse ke matamo a ka dileteng a magolo a meetse a ka nageng le ditlamo tša meetse di tšwela pele go bolokega ka ge mananeo a a meets mo lebakeng le a le maemo a makaone a meets gomme palo ye e tlwaelegilego ya bosetšhaba ya bobolokelo bja matamo e tletše ka 66%.
Kabinete e amogela go hlongwa ga Komiti ya Ditona (IMC) ka ga Tšhireletšego ya Meetse ye e modulasetulo wa yona e lego Tona ya Kgoro ya Pušo ya Tirišano le Merero ya Setšo Pravin Gordhan. IMC e bopilwe ke Tona ya Kgoro Tlhabollo ya Dinagamagae le Peakanyoleswa ya Naga; ya Kgoro ya Meetse le Kelelatšhila, ya Kgoro ya Temo, Kagodithokgwa le Boreahlapi. Komiti ye e tla ahlaahla le go šišinya ditsenogare tše dingwe go ditšhaba tšeo kudu di amilwego ke komelelo.
7.4. Kabinete e lemogile ditiragalo tša ka Nigeria mabapi le kotlo ya MTN ya US$5.2 pilione ka Khomišene ya Dikgokagano ya Nigeria. Kabinete e holofela gore dipoledišano tšeo di tšwelago pele magareng ga MTN le ba Taolo ba ka Nigerian di tla feletša ka tharollo ya ka pela ya dithuolano tše go realo e le go netefatša gore MTN e tšwela pele ka kgwebo ya yona ya go beeletša ka ekonoming ya Nigerian.
8. Mahloko
8.1. Kabinete e swabišitšwe ke go hlokofala fao go bego go se gwa emelwa ga Chumani Nqakula, morwa wa Tona ya Kgoro ya Tšhireletšo le Bagale ba Mašole Nosiviwe Mapisa-Nqakula le Charles Nqakula, Leloko la Palamente. Kabinete e lebiša mahloko a yona a magolo go ba lapa la ga Nqakula le bagwera.
8.2. Kabinete e lebiša mahloko go tšwa dipeleong tša bona go ba lapa le ba leloko ba Tona ya Kgoro ya Ditirelo tša Setšhaba le Taolo Ngoako Ramatlhodi, ka go hlokofala ga mmagwe wa mengwaga ye 95, Mmatlou Elizabeth Ramatlhodi.
9. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
1. Morena Mogojare Richard Seleka bjalo ka Molaodipharephare (DG) ka go Kgoro ya Dikgwebo tša Mmušo; le
2. Morena Robert Moeketsa Ramasodi bjalo ka Motlatšamolaodipharephare: Tšweletšo ya tša Temo, Maphelo le Tšhireletšego Dijong ka go Kgoro ya Temo, Kagodithokgwa le Boreahlapi.
9.1. Lekgotla la Koporasetaolo ya Sephethephethe sa Mebileng:
a) Mohumagadi Daphline Harridene Charlotte-Ann Ewertse – Leloko le e sego la Khuduthamaga; le
b) Morena Thulani Matiki Norman Kgomo – Leloko le e sego la Khuduthamaga.
9.2. Lekgotla la Koporase ya Dipeeletšo tša Setšhaba:
a) Mohumagadi Lindiwe Toyi – Leloko le e sego la Khuduthamaga;
b) Mohumagadi Sandra Beswick – Leloko le e sego la Khuduthamaga;
c) Mohumagadi Tantaswa Fubu – Leloko le e sego la Khuduthamaga;
d) Ngaka Claudia Manning – Leloko le e sego la Khuduthamaga;
e) Morena Pitsi Paul Moloto – Leloko le e sego la Khuduthamaga; le
f) Mohumagadi Matshepo Faith More – o thwetšwe gape bjalo ka Mohlankedimogolophethiši.
9.3. Lekgotla la Setheotlhabollo ya Dintlo:
a) Morena Mavuso Walter Msimang – Modulasetulo;
b) Morena Maanda Emmanuel Mutheiwana;
c) Morena Pravin Amar Singh;
d) Morena Thuthuka Siphumezile Songelwa; le
e) Morena Nkululeko Nkosingiphile Vilakazi – moemedi wa Tona ya Mešomo ya Setšhaba.
Dipotšišo:
Mohumagadi Phumla Williams
(Seboleledi sa Kabinete sa Motšwaoswere)?
Mogala: 083 501 0139
