Kgopelo ya thušo ya tšhelete ya bagale ba ntwa

Ka ga
Seo o swanetšego go se dira
Lebaka
E dira tshenyagelo ya bokae
Diforomo tšeo di swanetšwego go tlatšwa
Dintlha tša boikopanyo

 

 

Ka ga thušo ya bagale ba ntwa

Ge eba o lešole la peleng leo le lwetšego Ntwa ya Mathomo ya Lefase (1904-1918), Ntwa ya Bobedi ya Lefase (1939-1945), ntwa ya maZulu (1906) goba Ntwa ya Korea gomme ga o kgone go ihlokomela, o ka dira kgopelo ya thušo ya mogale wa Ntwa.  

Ke tseba bjang gore ke a dumelelwa?

O swanetše:

  • o be moagi wa Afrika Borwa goba modudi wa go ya go ile
  • o dule ka Afrika Borwa
  • o be le mengwaga ye 60 goba go feta goba o be segole
  • go ba o lwele mo go Ntwa ya Bobedi ya Lefase goba Ntwa ya Korea 
  • go ba ga o amogele thušo efe goba efe ya leago
  • go ba e le gore ga o hlokomelwe lefelong la mmušo
  • go ba e le gore o amogela R 86 280 ka ngwaga, ge eba o nyetše, letseno la gago ge le kopantšwe ga la swanela go feta R172 560 ka ngwaga 
  • dithoto tša gago ka moka ga di fete R 1 227 600 ge eba ga se wa nyala. Ge eba o nyetše, wena le molekane wa gago ga la swanelwa go ba le dithoto tša go feta R2 455 200.

Ela hloko: Ge eba o dula ka ntlong yeo e le go gore ke ya gago le molekani wa gago, boleng ga bo šetšwe lebakeng la teko.

O tla amogela bokae?

Palomoka yeo o tla e hwetšago ke R 2 110 ka kgwedi.

O tla lefelwa bjang?

Tirelo ya Tšhireletšo ya Leago ya Afrika Borwa (SASSA) e tla go lefela thušo ka ye nngwe ya ditsela tše di latelago:

  • tšhelete lefelong leo le itšego la tefelo ka letšatši le le itšego
  • peo ya elektroniki ka gare ga akhaonte ya gago ya panka goba akhaonte ya poso (panka e ka go lefišetša tirelo ye)  
  • lefelo leo le dirago bjalo ka mongwadiši wa thušo ,mohlala, lefelo la bohloki.

Ela hloko: Ge eba o hlolega go amogela tšhelete ka bowena, o ka šupa moemedi kantorong ya SASSA, goba wa fa mongwe maatla a semolao go amogela thušo legatong la gago.  

Thušo ya gago e ka lekodišišwa neng gape?

SASSA e ka tšea sephetho ge eba thušo ya gago e swanetše gore e lekodišišwe gape.  Letseno la gago go ya ka moo le tsebagaditšwego ge o dira kgopelo ya thušo le tla ba motheo wa sephetho. O tla tsebišwa dikgwedi tše tharo pele ga nako ka tšatšikgwedi leo tekodišišo gape e tla dirwago ka lona goba letšatšikgwedi leo o swanetšego go romela setifikeiti sa bophelo ka lona. Ge eba o amogela tšhelete ya gago ka panka, lefelo goba moemedi, o hloka gore a tlatše setifikeiti sa bophelo dikantorong tša SASSA ngwaga wo mongwe le wo mongwe.    

Thušo ya gago e ka fegwa neng?

Tše di latelago di ka dira gore thušo ya gago e fegwe: 

  • ge maemo a gago a fetoga
  • dipoelo tša tekodišišo
  • ge o hlolega go dirišana ge thušo ya gago e lekodišišwa 
  • ge o dira botsotsi goba o sa ikemele bonneteng 
  • ge eba go bile le phošo ge thušo ya gago e dumelelwa.  

Thušo ya gago e tla fetšišwa neng?

Thušo e tla fetšišwa mo lebakeng la:

  • lehu
  • kamogelo lefelong la mmušo
  • ge thušo e sa amogelwe lebaka la dikgwedi tše tharo tša go latelana 
  • ge o se gona ka mo nageng.

Ge mohlokomelwa a amogelwa institšušeneng ye e nago le kontraka le mmušo malebana le go hlokomela motho yoo, krante ya leago e fokotšwa go fihla 25% ya palomoka ya tšhelete ka moka go tloga ka kgwedi ya bone mola mohlokomelwa a amogelwago institšušeneng yeo. Krante ye e fokoditšwego e tlo oketšwa go tloga ka nako yeo mohlokomelwa a sa hlwego a dulago institšušeneng yeo.

Seo o swanetšego go se dira

  •  E ya go Tirelo ya Tšhireletšo ya Leago ya Afrika Borwa (SASSA) yeo e lego kgauswi le mo o dulago gomme o tle le tše di latelago:
    • Pukwana ya gago ya boitsebišo ya dinomoro tše 13. Ge eba ga o na pukwana ya boitsebišo:
      • o swanetše o tlatše bohlatse godimo ga foromo ya semolao ya SASSA pele ga Mokomišinare wa Boikano yoo e se go mohlankedi wa SASSA
      • o swanetše o tle le setatamente seo se netefaditšwego se saenilwego ke motho wa maleba (wa go swana le mokhanselara, moetapele wa setšo, modiredi wa leago, tonakgolo ya sedumedi goba hlogo ya sekolo) yoo a ka netefatšago leina le mengwaga ya gago 
      • bohlatse bja gore o dirile kgopelo ya pukwana ya boitsebišo goba setifikeiti sa matswalo go tšwa go Kgoro ya Merero ya Selegae.  
    • pukwana ya boitsebišo ya motšwaoswere yeo e neetšwego ke Kgoro ya Merero ya Selegae (ge eba e gona)
    •  bohlatse bja tirelo ya gago ya ntwa, mohlala, setifikeiti sa tirelo 
    • ge eba o ka fase ga mengwaga ye 60, kelo ya maphelo goba pego yeo e laetšago gore o ka se kgone go šoma
    •  bohlatse bja maemo a lenyalo. Ge eba
      • ga se wa nyala, bohlatse bjoo bo bolelago gore ga se wa nyala 
      • o nyetše, setifikeiti sa lenyalo le pukwana ya boitsebišo ya molekani wa gago 
      • o hladile, pego ya tlhalo ya gago
      • molekani wa gago o hlokofetše, setifikeiti sa lehu la molekani wa gago.  
    • ge eba wena le molekani wa gago le a šoma, ditlankana tša matseno
    • ge eba ga o šome, Sekhwama sa Inšorense ya go se šome (UIF) ‘plukhate’ goba setifikeiti sa tokollo go tšwa go modirelwa wa gago wa peleng
    • ge eba o na le akhaonte ya panka, ditatamente tša panka ya gago tša dikgwedi tše tharo tša go feta
    • ge eba o na le dipeeletšo, tshedimošo ya dinamanyana le dikabelo tšeo o di amogelago.  

Ela hloko: Ge eba o tšofetše kudu goba o lwala kudu go ka etela kantoro go dira kgopelo, moleloko goba mogwera a ka dira kgopelo legatong la gago.  Motho yoo o swanetše a tšee lengwalo go tšwa go wena le/goba tsebišo ya ngaka yeo e rego o ka se kgone go etela kantoro.  

  • Tlatša foromo ya kgopelo pele ga mohlankedi wa SASSA (ela hloko gore ke wena fela bjalo ka mokgopedi goba mohlankedi wa SASSA bao le ka tlatšago foromo ya kgopelo).  
  • O tla fiwa setlankana. Se boloke bjalo ka bohlatse bja gore o dirile kgopelo.  
  • Ge eba o nyaka go ingwadišetša ditefelo tša tšhelete, mohlankedi wa SASSA o tla go fa letšatšikgwedi leo o hlokegago go boa ka lona le tšeo o hlokago gore o tle ka tšona.  

Go direga eng ge eba kgopelo ya gago ga se ya dumelelwa?

Ge eba kgopelo ya gago ga se ya dumelelwa, SASSA e tla go tsebiša ka lengwalo gore ke ka lebaka la eng kgopelo ya gago e se ya dumelelwa.   

Ge eba ga o dumelelane le sephetho, o ka lebiša ngongorego go Tonakgolo ya Tšwetšopele ya Leago kantorong ya bosetšhaba ya Kgoro ya Tšwetšopele ya Leago. O swanetše o dire ngongorego mo matšatšing a 90 ge o se no tsebišwa gore kgopelo ya gago ga se ya dumelelwa. 

Lebaka

  • E ka tšea dikgwedi tše tharo go sepediša kgopelo ya gago.  
  • Ge eba thušo ya gago e dumeletšwe, o tla lefelwa go tloga ka letšatši leo o dirilego kgopelo ka lona.

E dira tshenyagelo ya bokae

Tirelo ga e lefelwe.

Diforomo tšeo di swanetšwego go tlatšwa

Foromo ya kgopelo ga e hwetšagale inthaneteng. O ka e hwetša kantorong ya kgauswi le wena ya tshireletšo ya leago (SASSA).

Dintlha tša boikopanyo

Tirelo ya Tšhireletšo ya Leago ya Afrika Borwa (SASSA)

 

SASSA Toll free: 0800 60 10 11
Email:  GrantEnquiries@sassa.gov.za  

Share this page