A. Merero ye Bohlokwa Seemong sa Bjale
1. Tšhireletšego ya Meetse
1.1. Kabinete e lebogile MaAfrika Borwa ka moka ge ba obametše taelo ya go fokotšwa ga meetse ye phethagaditšwego dikarolong tše dingwe tša Johannesburg, Tshwane le Ekurhuleni go boetša sekeng maemo a matamo. Matamo ka mehutahuta a ka fase ga kgatelelo ye kgolo kudu ka baka la dithemphereitšha tša go fiša tšhiritšhiri gola Gauteng, ebile nyakego ye golelago godimo ya meetse a gapeleditše Rand Water go fokotša ka bontši meetse ao a abelwago mebasepala. Rand Water e aba meetse a go nwega a mantši bathong ba go feta 11 milione go la Gauteng, dikarolong tše dingwe tša Mpumalanga, Freistata le Leboa Bodikela.
1.2. Tšona diphokotšo tše tša go se efogege di nepile go boloka kabo ya meetse ebile di tla dula di le gona go ba go fihlela ge seemo se kaonafala. Kabinete e dirile boipiletšo setšhabeng go tšwelapele go obamela magato a phokotšo ya meetse le go kgatha tema ya bona ka go a šomiša ka tshwanelo ka ge e le sedirišwa sa go hlokwa kudu.
2. Mogwanto wa Transnet
2.1. Kabinete e amogetše kwano ya meputso ya mengwaga ye meraro ye kwanetšwego ke Transnet le Yunione ya Mohlakanelwa ya Bosetšhaba ya Dinamelwa (UNTU), ye e tlo dirišwago pakeng ya 1 Moranang 2022 go fihla ka la 31 Hlakola 2025. Khomišene ya Poelano, Bonamodi le Ditherišano e namotše kwano ye, gomme magato a bona a dirile gore boipelaetšo ka maloko a UNTU bo fedišwe ka ponyo ya leihlo. Kabinete e amogetše gape sephetho sa go fediša mogwanto ka Yunione ya Dinamelwa ya Afrika Borwa le ya Bašomi.
2.2. Kabinete e amogetše boikgafo bja Transnet bja go bea šedi godimo ga go fediša ditšhalelomorago tše bilego gona go ralala boemakepe le dipeakanyong tša ditimela nakong ya magato a boipelaetšo, ao a bilego le seabe se se mpe ikonoming le makaleng ao a tshepetšego godimo ga Transnet go aba ditirelo.
2.3. Kabinete e bontšhitše tebogo ya yona godimo ga thekgo le tšhomišanommogo ye laeditšwego ke dikgwebo ka nako ya mogwanto. E hlohleletša kamano ye sa felego magareng ga balaodi ba Transnet le bašomi gore khamphani ye le ikonomi ya naga ka bophara di holege.
3. Dikamano tša Afrika Borwa le Saudi Arabia
3.1. Kabinete e amogetše Ketelo ya Mošomo ye atlegilego ya go ya kua the Kingdom of Saudi Arabia ka Mopresidente Cyril Ramaphosa ka la 15 le 16 Diphalane 2022. Nakong ya keteko ye, dinaga tše ka bobedi di saenetše Dimemorantamo tše 17 tša Kwešišano go magoro a go fapafapana a go swana le temo, boreatlhapi, meepo, enetši ya go mpšhafatšega, tšhireletšego, dinamelwa le temo ya diphedi le dimela tša ka meetseng. Dimemorantamo tše dingwe tša kwešišano tšeo di saenetšwego ke tša mabapi le go hlongwa ga Khansele ya Mohlakanelwa ya Dikgwebo, tšhomišano legorong la diintasteri tša sešole le dithekišetšano, tšhomišano ya ditekolonyakišišo tša thutaswika.
3.2. Mopresidente o šomišitše ketelo ye go mema dikgwebo tša Saudi Arabia go iponagatša khonferenseng ya bohlano ya dipeeletšo ya Afrika Borwa ye tlo swarwago ka 2023. Saudi Arabia ke mogwebišani wa bobedi wo mogologolo wa Afrika Borwa seleteng sa Bohlabelagare ebile ke mothopo wo mogologolo wa diromelwa ka nageng go tšwa go sona selete se. Dikamano tša boditšhabatšhaba magareng ga dinaga tše ka bobedi di bile le ditlamorago tše botse godimo ga ditlwaedi tša kgwebišano le dipeeletšo.
4. Dipeeletšo tša Mananeokgoparara
4.1. Kabinete e amogetše go thongwa ga polante ya tšweletšo ya plastiki ya maemo a godimodimo lefaseng ka khampani ya go dira plastiki yeo e tšwago pele maemong a boditšhabatšhaba, ya go bitšwa ALPLA Group, go la Lanseria kua Gauteng.
4.2. Se se tlaleletša maikgafo a Mopresidente Ramaphosa a go bea sekeng tlhabollo ya mananeokgoparara bjalo ka mokgwa wa go hlohleletša kgolo ya ikonomi le go atiša mešomo.
4.3. Dipeeletšo tša boleng bja US$50 milione di kgatha tema ye kgolo godimo ga Leanolegolo la Toropo ya Mabonwa ya Lanseria leo le tlo hlohleletšago seemo seo se tieletšego le tšhomišoleswa le gape go hlola le go šireletša mešomo ye 350. Godimo ga dipeeletšo tše go akaretšwa le lenaneo la go ithutela mošomo la batsebi ba 36 ba bointšineere bja dikgerekgere le ba tšhomišogape ba ditiro tša ALPLA Group go ralala selete sa Borwa bja Afrika. Lenaneo le la boithutelamošomo le tlo thoma ka 2023, ka baithutelamošomo ba mathomo ba 12 ba MaAfrika Borwa ba go tšwa mafelong a ka mo nageng.
5. Meepo ye Sego Molaong
5.1. Meepo ye sego molaong e kweša setšhaba bohloko le go gobatša ikonomi ya gaborena, ebile dipoelo tša yona ke tobo ya letseno go bobedi mmušo le lefapha la meepo.
5.2. Kabinete e amogetše go amogwa ga dithunya tšeo di bego di utilwe le go golegwa ga bagononelwa ba 20 ba go amana le meepo ye sego molaong ka nako ya lesolophuruphutšo kua mokoting wa moepo wa Stilfontein go la Leboa Bodikela.
5.3. Kabinete e dira boipiletšo go MaAfrika Borwa go tšwelapele go šomišana le mabotho a phethagatšo ya molao go netefatša go atlega ga masolo a kamoso a twantšho ya bosenyi. Se se tla romela molaetša wo bogale wa gore bosenyi ga bo thuše ka selo, le gore badirabosenyi ba tlo golegwa le go sekišwa ntle poifo goba go šokelwa.
6. Enetši
6.1. Eskom e saenetše dikwanelo tša go hiriša tša mengwaga ye 30 gotee le babeeletši ba bane ba batšweletši ba go ikema ba mohlagase go aga metšhene ye mefsa ya go fehla enetši ya go hlweka kua ditišing tša mohlagase tša Majuba le Tutuka gola Mpumalanga. Khirišo ye ya seripa sa naga e tla goketša dipeeletšo tše phopholeditšwego tša go batamela R40 bilione.
6.2. Babeeletši ba ba bane – HDF Energy South Africa, Red Rocket SA, Solar Group le Mainstream Renewable Power Developments South Africa – ba tlo fehla mohlagase wa go lekana dimekawate tše 2 000 godimo ga mohlagase wa go tšweletšwa setšhabeng.
6.3. Phehlo ye ye mpsha ya mohlagase go letetšwe gore e kgokaganywe le mohlagase wo o tšweletšwago nageng ka bophara mo dikgweding tše 24 go fihla go tše 36 go tloga ge ngwaga wo wa ditšhelete o fela, ka go latela ditumelelo tša tikologo, tša karolo ya mafelo le tše dingwe tša taolo.
7. Tšhireletšego ya Dijo
7.1. Kabinete e amogetše go swarwa ka mo nageng ga Lekgotla la 2022 la Agri SA go la Pretoria ka la 13 le la 14 Diphalane 2022 ka fase ga morero wo: “Kgodišo ya Tšweletšo ya ka Nageng”. Lekgotla le le rerišane ka merero ya go swana le go dira gore maanakgolo a temo a šomele batšweletši ba ka mo nageng; mananeokgoparara a go swarelela a dijo tša go tšweletšwa ka mo nageng; go dira gore tikologo ya ka mo nageng e tšee nako ye telele godimo ga tšweletšo ya dijo ya ka mo nageng le ka bokamosong, le go matlafatša mabokgoni a tšweletšo ya dijo go diriša ditšweletšo tšeo di tšweleditšwego ka mo nageng.
7.2. Ka gona go bea pele tšhireletšego ya dijo kamoso, Kabinete e amogetše go tsebagatšwa ga Hapo ya Bosetšhaba ya Tšhireletšego ya Tlhago, ka Kgoro ya Saense le Lenaneo la Kgwebišano ya Temo ya Ikonomi ya Diphedi, ka tšhomišano le Yunibesithi ya Pretoria. Hapo ye e tla thekga thibelo, phokotšo le taolo ya dipuno le malwetši a diphoofolo, ao a tlo bago le seabe sa tšweletšo ye hlatlogetšego godimo, tšhireletšego ya dijo le tlhabollo ye swarelelago ya dinagamagae.
B. Diphetho tša Kabinete
1. Go Dumelelwa ga Tšhatha ya Kopano ya Afrika (AU) ya go Hlongwa ga Makala
1.1. Kabinete e dumeletše tlhagišo Palamenteng ga Tšhatha ya AU ka Mehola le Metheo ya go Hlongwa ga Makala, Pušoselegae le Tlhabollo ya ka Nageng gore e dumelelwe. Afrika Borwa e saenetše tšhatha ye ka Phato 2021.
1.2. Tšhatha ye ya go Hlongwa ga Makala e fana ka tlhako go mebušo ka moka ye lego maloko ka sengwalwa sa tlhahlo ka khuetšo ya go hlongwa ga makala le mehola ya ona go tloga mmušong wa bosetšhaba go ya didikong tše dingwe tša mmušo. Tšhatha ye e swaragane kudu le phatlalatšo ya taolo le mehola, tlhako ya pušo le tlhabollo ya ka mo nageng.
2. Khansele ya bo-32 ya Ngwaga ka Ngwaga ya Boditšhabatšhaba ya Polokego ya Ditimela (IRSC)
2.1. Kabinete e dumeletše go swarwa ga Kopano ya bo-32 ya Ngwaga ka Ngwaga ya IRSC gola Johannesburg go thoma ka la 1 go fihla ka la 6 Diphalane 2023 ka fase ga morero wo: “Phetošo ya sebopego sa ditimela mo Lefaseng leo go sa tsebjego tša kamoso”.
2.2. IRSC ke foramo ya boditšhabatšhaba ya go kopantšha mmogo ditsebi tša polokego ya ditimela go tšwa lefaseng ka bophara go fana maitemogelo go kaonafatša polokego ya ditimela.
2.3. Bjalo ka leloko la IRSC, Kemedi ya Afrika Borwa ya Polokego ya Ditimela e swere foramo ye la mafelelo ka 2015.
3. Seakanywa sa Leano la Bosetšhaba sa Mananeokgoparara a 2050 (NIP 2050) Kgato ya 2
3.1. Kabinete e dumeletše phatlalatšo kuranteng ya mmušo ya Kgato ya Bobedi ya seakanywa sa NIP sa 2050 gore setšhaba se fe ditshwayotshwayo tša sona. Leano le le fa tlhahlo matlafatšong le kaonafatšong ya diprotšeke tše logetšwego maano tša mmušo tša mohlakanelwa.
3.2. Seakanywa se se hlaola diprotšeke tše logetšwego maano madulong a batho; mohlagase wa mmasepala; meetse; dilahlwa tše thata; dinamelwa tša banamedi; thuto le mananeokgoparara a maphelo; mananeokgoparara a titšithale, le bosenyi le bomenetša.
3.3. Sebopego sa leano le se fana ka ponelopele ya fao go swanetšego go fiwa šedi, se fana ka phetleko ya seemo sa bjale, se hlatholla dipeelano tše bohlokwa tša go atlega le go bolela gore go swanetše gore go dirwe eng go fihlelela ponelopele ye. Se šišinya tshepedišo ya phethagatšo ye swanetšego go latelwa mo leanong la magato la go gagaba tekano ya mengwaga ye meraro.
4. Tlhako ya Phethagatšo ya Bosetšhaba ya go Fihlelela Bokgoni Ditirelong tša Mmušo
4.1. Kabinete e dumeletše Tlhako ya Phethagatšo ya Bosetšhaba ya go fihlelela Bokgoni Ditirelong tša Mmušo. Tlhako ye e phatlaladitšwe ka 2021 gore setšhaba se ntšhe sa mafahleng a sona.
4.2. Tlhako ye e fana ka maikokotlelo a mahlano mo magatong a go hloma bokgoni Ditirelong tša Mmušo. Metheo ye ya boikokotlelo e akaretša kgoketšo ya pele o tsena le tlhokolo mo Ditirelong tša Mmušo; kgakolo le tlwaetšo; thulaganyo le taolo ya bodiragatši; thuto ye tšwelagopele, kgatelopele ya kgetho ya mošomo le ditiragalo tša mabapi le kgetho ya mošomo.
5. Diphetogo ka Gare ga Dipeelano tša Mošomo tša Balaodipharephare (di-DG)
5.1. Kabinete e dumeletše pego ya go šišinya magato a go matlafatša mabokgoni le bokgoni bja Balaodipharephare (di-DG) Ditirelong tša Mmušo. Pego ye e dirile ditšhišinyo tše mmalwa, go akaretšwa le paka ya ka kantorong ya di-DG le taolo ya baromiwa ka Lekgotlaphethiši go bahlankedi ba taolo.
5.2. Pego ye e šišintše gape le gore Molaodipharephare Kantorong ya Mopresidente o tla neelwa Hlogo ya Ditirelo tša Mmušo. Kua diprofenseng, mošomo wo o tla neelwa Balaodipharephare dikantorong tša Ditonakgolo. Pego ye e šišintše gape le magato a go hlahla dikgoro ka taolo ya dikontraka le Balaodipharephare.
5.3. Peakanyo ye Fetlekilwego ya Taolo ya Bodiragatši go Balaodipharephare e gare e ya fetlekwa gore e gate ka mošito o tee le diphetogo tšeo di dumeletšwego.
5.4. Tona ya Motšwaoswere ya Ditirelo tša Mmušo le Tsamaišo, Ntate Thulas Nxesi, o tlare mo bekeng ye tlago a sware kopano ya tshedimošetšo ya babegaditaba go hlatholla Tlhako ya Bosetšhaba ya Phethagatšo go fihlelela Bokgoni Ditirelong tša Mmušo le gape go hlatholla gabotse diphetogo tše dumeletšwego dipeelanong tša go thwalwa ga Balaodipharephare.
6. Pego ya Bohlano ya Mošomo ka Phethagatšo ya Sengwalwa sa Makgoraditsela ka Ditokelo tša Batho ba go Phela ka Bogole (WPRPD) 2020-2021
6.1. Kabinete e dumeletše Pego ya Bohlano ya Mošomo ka phethagatšo ya WPRPD, yeo e fanago ka seemo sa bjale ka phethagatšo ya WPRPD. Pego ye e akaretša le ditshwayotshwayo go tšwa dikgorong tša mmušo tša bosetšhaba le tša profense. E fana ka seemo sa bjale ka phethagatšo ya pholisi ye akaretšago diriparipana tša ditekanyetšokabo.
6.2. Pego ya mathomo ya seemo sa mošomo ya ngwaga ka ngwaga e phatlaladitšwe ka 2017. Pego ye ya bohlano e dumeletšwe go gatišwa kuranteng ya mmušo le go phatlalatšwa ke Kgoro ya Basadi, Baswa le Batho ba go Phela ka Bogole.
7. Phetošo ya Athikele ya 20(1) ya Kopano ya Phedišo ya Mehuta ka Moka ya Kgethollo Kgahlanong le Basadi (CEDAW)
7.1. Kabinete e dumeletše tlhagišo Palamenteng ya Phetošo ya Athikele 20(1) ya CEDAW gore e dumelelwe. Diphetošo tše di fana ka nako ye teletšana ya dikopano tša komiti tša go lebelela dipego tša mebušo ye lego maloko.
7.2. Afrika Borwa e saenetše kwano ye ka 1993 le go e dumelela moragonyana ga fao ka Manthole 1995. Tlhagišo ye Palamenteng e šetšane le go tsamaiša ka mošito o tee kwano ye e dumeletšwego kua morago gotee le phetošo ya Athikele 20(1) ya kwano ye.
8. Kwano ya Lefase ka Bophara ka Kamogelo ya Mangwalo a Thuto Mabapi le Thuto ya Godingwana
8.1. Kabinete e dumeletše tlhagišo Palamenteng ya Kwano ya Lefase ka Bophara ka Kamogelo ya Mangwalo a Thuto mabapi le Thuto ya Godingwana gore e dumelelwe. Ge e šetše e dumeletšwe e tla romelwa Mokgatlong wa Ditšhabakopano (UN) wa Thuto, Saenthefiki le tša Setšo le go kgontšhwa go šoma ka mo nageng ka Molao wa Bosetšhaba wa Tlhako ya Mangwalo a Thuto, 2008 (Molao 67 wa 2008).
8.2. Kwano ye ya Lefase ka Bophara e hloma metheo ya motlalanaga ya temogo ya go se tšee lehlakore le ya go se kgetholle ya mangwalo a thuto ya godingwana le mangwalo a thuto ka kakaretšo. E dumelela temogo ya mangwalo a thuto a dinagašele mo mebušo ye 193 ye lego maloko a UN.
9. Kgogelomorago ya Diphetošo tša Tlhahli ya Maloko a Komitiphethiši
9.1. Kabinete e dumeletše kwalakwatšo ye kwalakwaditšwego ke Kantoro ya Mopresidente ka Mošupologo, 17 Diphalane 2022 go gogelamorago diphetošo tšeo di dirilwego go Tlhahli ya Maloko a Komitiphethiši, yeo e bitšwago Pukukgakollo ya Ditona, ya 2022.
9.2. Diphetošo tše di dirilwego ka Moranang 2022 di fane ka thekgo ya tlaleletšo go tše dingwe tša dikantoro tša Ditona tšeo di rwelego maikarabelo a lefapha la go feta le tee. Diphetošo tše di be di nyaka gore Mmušo o rwale maikarabelo ka botlalo a disenyegelo tša go amana le kabo ya mohlagase le meetse madulong a semmušo a go dulwa ke maloko a komitiphethiši.
9.3. Kabinete e lemogile dipelaelo tšeo di hlagišitšwego ke maloko a setšhaba ebile e tšeere sephetho sa go sekaseka Tlhahli ya Maloko a Komitiphethiši. Tshepedišo ye e šogašogwa ke setheo sa go se tšee lehlakore ebile ge e fihlile mafelelong, tlhahli ye e tlo phatlalatšwa setšhabeng ka wepsaete ye ya Kgoro ya Ditirelo tša Mmušo le Tsamaišo: www.dpsa.gov.za.
10. Kgwerano Diphetogong tša Enetši tša go se Tšee Lehlakore (JETP) le Leano la Dipeeletšo la JETP (JETP-IP)
10.1. Ka morago ga go amogela tlhagišo ka JETP le JETP-IP, Kabinete e thekgile ka atla pedi J ETP-IP le go laetša ka fao e kgotsofetšego ka gona ka mošomo wa go tsenelela wo o dirilwego go e kaonafatša.
10.2. JETP-IP e hlatholla dipeeletšo tšeo di nyakegago go fihlelela maikgafo a go fediša khabone ao a dirilwego ke Mmušo wa Afrika Borwa mola ka go le lengwe go hlohleletšwa tlhabollo ya go swarelela nako ye teletšana, le go netefatša gore go fihlelelwa diphetogo tša go se tšee lehlakore go bašomedi bao ba amegago le setšhaba.
10.3. Komiti ya Magareng ga Ditona ka Phetogo ya Klaemete e tlare go se goye kae ya swara tshedimošetšo le babegaditaba go fana ka tshedimošo ka botlalo.
C. Melaokakanywa
1. Molaokakanywa wa 2022 wa Dinamelwakepe tša Bagwebi
1.1. Kabinete e dumeletše tlhagišo Palamenteng ya Molaokakanywa wa 2022 wa Dinamelwakepe tša Bagwebi gore o lebelelwe goya pele. Molaokakanywa wo o mpshafatša Molao wa Dinamelwakepe tša Bagwebi wa go ba le mengwaga ye 70 ka bogolo, 1951 (Molao 57 wa 1951).
1.2. Ge o šetše o dumeletšwe, Molaokakanywa wo o tlo fana ka tlhako ya semolao ya dinamelwakepe tša Bagwebi go laola magatokamano a dikepe. Molaokakanywa wo, magareng ga tše dingwe, o tla laola tlhamo, boingwadišo, go rea maina le go ntšhwa ga dikepe.
1.3. Diphetošo tše di tlo ba le seabe tsošološong ya lefapha la dinamelwa tša mabopong le go tsamaiša naga ye ka mošito o tee le Kwano ya Mokgatlo wa Boditšhabatšhaba wa tša Mabopo. Afrika Borwa e dumeletše kwano ye.
2. Molaokakanywaphetošwa wa 2020 wa Dipalopalo
2.1. Kabinete e dumeletše tlhagišo Palamenteng ya Molaokakanywaphetošwa wa 2022 gore o lebelelwe goya pele. Molaokakanywa wo o šišinya phetošo ya Molao wa Dipalopalo, 1999 (Molao 6 wa 1999). Diphetošo tše di fana ka tlhabollo le phethagatšo ya Peakanyo ya Bosetšhaba ya Dipalopalo yeo e thekgago diphetho tša go ba le bohlatse.
2.2. Di matlafatša tšhomišano ye lego gona magareng ga Dipalopalo tša Afrika Borwa le ditho tše dingwe tša mmušo, ebile di nabiša tlhako ya taolo ya Molao wo.
D. Ditiragalo tšeo di Tlago
1. Samiti ya Bosetšhaba ya Lesolo la Mopresidente ka Dikgwebopotlana, tše Nnyane le tša Magareng (di-SMME) le Dikoporasi
1.1. Kgoro ya Tlhabollo ya Dikgwebo tše Nnyane, ka kgwebišano le bakgathatema ba lefapha la praebete, e tla swara Samiti ya Bosetšhaba ya Lesolo la Mopresidente ka Dikgwebopotlana, tše Nnyane le tša Magareng (di-SMME) le Dikoporasi gola Bryanston, Gauteng go tloga ka la 13 go fihla ka la 15 Dibatsela 2022.
1.2. Samiti ye e tla kopantšha mmogo bakgathatema ba bohlokwa ba praebete le ba lekala la mmušo ka gare ga peakanyo ya dikgwebo tše nnyane, go rerišana ka go hwetša ditsela tša go šomišana mmogo go matlafatša lefapha le. Bakgathatema bao ba letetšwego ba akaretša lekgotla la dikgwebo, ditsebi tša di-SMME, bahlami ba dipholisi le ditheo tša tlhabollo ya ditšhelete.
1.3. Samiti ye e tla rerišana le ka Leanolegolo la Bosetšhaba la Mohlakanelwa la Dikgwebo tše Nnyane, leo le fanago ka tlhako ye logetšwego maano ya go matlafatša lefapha la di-SMME. Samiti ye go letetšwe gape gore e tsebagatše Difoka tša Ngwaga ka Ngwaga tša Bosetšhaba tša Mopresidente tša di-SMME.
2. Go Swarwa ga Samiti ya bo-2022 ya Dikgaruru tša go Ikala ka Bong le Polao ya Basadi
2.1. Mopresidente Ramaphosa o tla swara Samiti ya Bobedi ya Mopresidente ya GBVF kua Sentharengkgoparara ya Gallagher gola Gauteng ka la 1 le la 2 Dibatsela 2022. Samiti ya mathomo ye bego e swerwe ka 2018 e šomišitšwe go itlama ka boswa ga mmušo le bagwebišani ba leago go fediša ditiragalo tše lego godimo tša dikgaruru kgahlanong le basadi ka mo nageng.
2.2. Samiti ya bobedi e tla šomišwa go sekaseka pele kgatelopele ye fihleletšwego ya Leano la Bosetšhaba le Logetšwego Maano ka GBVF. Yona e tlo swarwa ka fase ga morero wo: “Boikarabelo, Potlakišo le Tlaleletšo GONA BJALE”.
2.3. Samiti ye e tla rerišana ka, magareng ga tše dingwe, go hwetša mekgwa ya go potlakiša magato le boikarabelo go tšwa dikgorong tše bohlokwa le bakgathatema ka moka ba go akaretša mekgatlo ye lego setšhabeng, lefapha la praebete le bašomi.
3. Imbizo ya Bohlano ya Mopresidente kua Kapa Leboa
3.1. Imbizo ya Mopresidente ya Mmotlolo wa Bohlano wa Tlhabollo ya Dilete (DDM) go la Upington, Kapa Leboa e tla phethagala ka Labohlano, 21 Diphalane 2022 Lepatlelong la fao la Mxolisi Dicky Jacobs Stadium.
3.2. Imbizo ya Mopresidente ya DDM e tlo sekaseka kgatelopele ya kabo ya ditirelo le ditlhotlo tša kua Kapa Leboa le go tsena seemo seo ka bogare go rarolla ditlhotlo tšeo. DDM e netefatša gore thulaganyo ya kabo ya ditirelo, phethagatšo le bolekanyetši e ba monwana le lenala go kaonafatša kabo ya ditirelo bathong.
3.3. Ka gona go itokišetša Imbizo ye, Ditona, maloko a makgotlaphethiši le dimeyara ba tlo tsenela ditiragalo tša go fihlelela setšhaba ka gare ga Upington le go e potologa.
4. Pego ya Pholisi ya Tekanyetšokabo ya Paka ya Magareng (MTBPS)
4.1. Kabinete e dumela gore MTBPS ya 2022 yeo e tlo hlagišwago ke Tona ya Ditšhelete Enoch Godongwana ka Laboraro, 26 Diphalane 2022 ke karolo ye bohlokwa ya tshepedišo ya phatlalatša le ya boikarabelo ya bolekanyetši.
4.2. MTBPS ke mokgwa wa go phethagatša maikgafo a mmušo ntle le go fetiša magomokakaretšo a disenyegelo ao mmušo o ka a kgonang. E hlatholla goya pele ka fao mmušo o tla netefatšago gore disenyegelo ga di fete letseno, le go dira tše ntši ka didirišwa tše lego gona.
5. Ditlhahlobo tša Marematlou
5.1. Ditlhahlobo tša 2022 tša Bosetšhaba tša Mphato wa Marematlou di thoma ka la 31 Diphalane le go fela ka la 7 Manthole 2022. Kabinete e lakaletša Barutwana ba Marematlou ba 2022 mahlatse le mahlogonolo ge ba le gare ba tsena kgatong ya mafelelofelelo ya leeto la dithuto tša bona. Thekgo ye tšwelagopele go tšwa go barutiši, batswadi le bahlokomedi e tla fihla kgole go thuša bona barutwana ba go itebanya le ditlhahlobo tše ka boitshepho.
5.2. Kabinete e hlohleletša batswadi le bahlokomedi go kgatha tema ya bona ka go hlohleletša le go šušumetša barutwana, le go dira gore go kgonagale gore ba kgone go ithuta ge ba le gae.
6. Leanotlhabollo la Bosetšhaba (NDP) le Khonferense ya Mabokgoni a Mmušo
6.1. Kgoro ya Ditirelo tša Mmušo le Tsamaišo, ka tšhomišano le Khomišene ya Bosetšhaba ya Dithulaganyo le Sekolo sa Yunibesithi ya KwaZulu-Natal sa Thutotlhabollo, e tlo swara Khonferense ya NDP le ya Mabokgoni a Mmušo go thoma ka la 7 go fihla ka la 9 Dibatsela 2022 Khamphaseng ya Kholetše ya Howard, Yunibesithing ya KwaZulu-Natal.
6.2. Khonferense ye e tlo lebelela mabokgoni a mmušo a bodiragatši ka mengwaga ya mathomo ye lesome ya NDP, ebile e tlo swarwa ka fase ga morero wo: “Tebeledišišo ya Mabokgoni a Mmušo le Bodiragatši bja Mmušo ka mengwaga ya mathomo ye lesome ya NDP”.
7. Neelano ya Sethikifikeithi sa go Amogela Kgoši Misuzulu KaZwelithini Bjalo ka Kgoši
7.1. Mopresidente Ramaphosa o tla neelana ka Sethifikeithi sa go Amogela Kgoši Misuzulu KaZwelithini bjalo ka Kgoši Lepatlelong la Moses Mabhida go la Durban ka Mokibelo, 29 Diphalane 2022.
7.2. Se se latela moletlo wa setšo wa go hlomamiša kgoši wa go bitšwa “Ukungena eSibayeni” wa yena Kgošikgolo wo o bego o swerwe ka la 20 Phato 2022, fao go ona a hlomamišitšwego bjalo ka kgoši ya Setšhaba sa MaZulu.
E. Melaetša
1. Ditebogišo
Kabinete e lebiša ditebogišo tša yona le go lakaletša bao ba latelago mahlatse:
- Ntate Sam Matekane, Tonakgolo ya Mmušo wa Lesotho. Kabinete e bile le Baromiwa ba AU ba Bahlokomedi ba Dikgetho Dikgethong tša Kgothakgothe tša Bosetšhaba Pušong ya Lesotho ge ba be ba reta peakanyo ye buditšwego ya dikgetho ya sepolotiki ya Batho ba Pušo ya Lesotho ge ba swere dikgetho tše atlegilego.
Afrika Borwa e santše e ikgafetše go maatlafatša le go boelanya dikamano tša magareng ga dinaga gotee le go kaonafatša tšhomišano mererong ya selete, ya kontinente le ya lefase ka bophara ya go tsenelana.
2. Mahloko
Kabinete e lebiša mahloko a yona go ba lapa le bagwera ba:
- Ntate Albert Nolan (88), Moruti wa Boikgafo wa Kereke ya Afrika Borwa ya Khatholiki yo a bego a sa dumelelane le mebono ya sedumedi ya go hlohleletša le go šireletša peakanyo ya mmušo wa kgethollo. Ka 2003, Mopresidente wa nako yeo Thabo Mbeki o mo file Sefoka sa Luthuli sa Silibere ka boikgafo bja gagwe bja bophelo ka moka phenkgišanong ya temokrasi, ditokelo tša botho le toka le go se kwane le ditlwaedi tša sedumedi kudukudu tšeo di fahlelago ka mabaka a go bea gabotse le go šireletša mmušo wa kgethollo.
F. Bao ba Thwetšwego Mešomong
1. Batho ka moka bao ba thwetšwego mešomong mangwalo a bona a thuto a tlo kgonthišišwa ka tsela ye maleba.
a. Moadbokheiti James Mlawu – Molaodipharephare: Kgoro ya Dinamelwa.
b. Ntate Shabeer Khan – Mmaledipharephare: Matlotlo a Bosetšhaba.
2. Kabinete e kwanetše go thwalwa ga bao ba latelago:
2.1. Maloko a Boto ya Afrika Borwa ya tša Boeti:
a. Ngaka Nondumiso Maphazi (Modulasetulo);
b. Ngaka Aubrey Mhlongo (Motlatša Modulasetulo);
c. Mme Pretty Ntombela;
d. Mme Nomahlubi Mazwai;
e. Ntate Odwa Mtati;
f. Ntate Ravi Nadasen (O thwetšwe leboelela);
g. Ntate Enver Duminy (O thwetšwe leboelela);
h. Mme Nandipha Mzileni Mbulawa;
i. Ntate Mduduzi Zakwe (O thwetšwe leboelela);
j. Mme Rosemary Anderson;
k. Mme Lehlohonolo Rapodile; le
l. Mme Nonkqubela Silulwane (Moemedi wa Kgoro).
2.2. Maloko a Boto ya Lekoko la Taolo ya Sephethephethe Mebileng:
a. Ngaka Eddie Mogalefi Thebe (O thwetšwe leboelela);
b. Mme Thandi Clara Thankge (O thwetšwe leboelela);
c. Moprofesara Maredi Mphahlele;
d. Mme Nomusa Mufamadi (Modulasetulo);
e. Moadbokheiti Xola Stemela;
f. Mme Lerato Magalo;
g. Moprofesara Chitja Twala;
h. Ntate Nkumeleni John Kudzingana;
i. Mme N Jaxa (Moleloko wa Tlaleletšo); le
j. Mme HM Mbanyele-Ntshinga (Moleloko wa Tlaleletšo).
2.3. Ntate Tshepo Monaheng – Mohlankediphethišimogolwane (CEO): Khamphani ya Kagodithokgwa ya Afrika Borwa (Kontraka ya gagwe e mpshafaditšwe tekano ya mengwaga ye meraro).
2.4. Ntate Reginald Lavhelesani Demana – CEO: Kemedi ya Afrika Borwa ya Bosetšhaba ya Ditsela.
2.5. Mme Ditebogo Kgomo – CEO: Molekanyetši wa Bosetšhaba wa Nyuklea.
2.6. Ntate Risenga Maluleka – Radipalopalopharephare (Kontraka e mpshafaditšwe).
2.7. Mme Kedibone Olga Madiehe – CEO: Kemedi ya Mmušo ya Tsamaišo ya Diphenšene.
Dinyakišišo: Mme Phumla Williams – Seboleledi sa Kabinete
Mogala: 083 501 0139
