A. Ditaba tšeo di Amago Badudi
1. Mohlagase
1.1. Kabinete e amogela ditsenogare tšeo di tsebišitšwego ke mmušo go šogana le mathata a mohlagase ka nageng. Magato a bohlokwa ao a tšerwego a kgora tsela ya go fokotša go kgaotšwa ga mohlagase, le go fetoša lekala la mohlagase le go fihlelela tšhireletšo ya mohlagase ya nako ye telele.
1.2. Mo go thekgeng kabo ya mohlagase le go thuša naga ya rena ka kabo ya mohlagase yeo e imelwago, re nyaka go fokotša tšhomišo ya mohlagase nageng ya rena ka dimekawate tše 600 mo dikgweding tše tharo tše di latelago.
1.3. Malapa a ka kgatha tema ya wona mo go bolokeng mohlagase ka go tima didirišwa tšeo di sego bohlokwa le tšeo di šomišago mohlagase wo montši mo dinakong tšeo tšhomišo e lego godimo. Dikgwebo di hlohleletšwa go šomiša theknolotši ya tšweletšo ya mohlagase ya mohola gape ye ntši le go kgatha tema mo mananeong a go fokotša tšhomišo ye ntši ya mohlagase.
2. Operation Vulindlela
2.1. Kabinete e amogela tšwelopele yeo e dirilwego ka fase ga Operation Vulindlela go fediša dititelego tše di lebanego le mohlagase, dikgokagano tša megala, meetse le lekala la boeti go tsošološa ekonomi.
2.2. Dimpshafatšo tša meago tše senyane go tše 26 di feditšwe, mola go na le tšwelopele ya dimpshafatšo tše 11. Dikatlego di akaretša go thoma ga dilaesense go tšweletšo ye e tiilego, go fetošetša ga Taolo ya Maemakepe a Setšhaba a Transnet, tokollo ya mabokgoni a bohlokwa ao a lekotšwego lefsa le phethagatšo ya lenaneo la e-Visa mo dinageng tše 14, go akaretša mebaraka ya boeti ye mefsa ye megolo go swana le China, India, Kenya le Nigeria.
3. Dikgaruru le Dipolao tšeo di Hlolwago ke Bong (GBVF)
3.1. Kabinete e tšweleditše pefelo mo go katweng go go šoro ga basadi ba seswai mo Krugersdorp ka Gauteng. Ditiro tše tše dimpe le tlhorišo kgahlanong le basadi di nyatša mokgwa wa rena wa leago. Kabinete e retile gape Tirelo ya Maphodisa a Afrika Borwa ka go swara babelaelwa ba mmalwa malebana le bosenyi bjo bošoro.
3.2. Kabinete e ipiletša go ditšhaba go šoma le maphodisa le makala a mangwe a phethagatšo ya molao ka go abelana ka tshedimošo goba go bega mešongwana ya go belaetša. Ge re šoma mmogo, re ka dira gore ditšhaba tša rena di bolokege go basadi le bana.
3.3. Moafrika Borwa yo mongwe le yo mongwe o na le mošomo wa go ba kgahlanong le basenyi ba dikgaruru ka karolong ya molao. Bega ditiragalo ka moka tša GBV setišing sa kgauswi sa maphodisa goba leletša nomoro ya Crime Stop: 08600 10111, Senthara ya Taolo ya Setšhaba: 0800 428 428 goba Mogala wa go Emiša Dikgaruru tša Bong: 0800 150 150.
4. Kgwedi ya Basadi
4.1. Kgwedi ya Basadi ya ngwaga le ngwaga ka Phato e hlompha basadi bao ba kgathilego tema ntweng ya tokologo le basadi ka moka mo setšhabeng.
4.2. Kgwedi ya Basadi ya ngwaga wo e ketekwa ka fase ga morero: “Ditokelo tša Basadi tša Ekonomi ya Leago: Go Aga Lefsa Bokaone go Matlafala ga Basadi moo go Kaonafetšego”.
4.3. Basadi ba go feta 20 000 bao ba gwantetšego Union Buildings ka Pretoria ka la 9 Phato 1956 ba kgathile tema go kgonthiša gore tekatekano ya bong le matlafatšo di dule di le bohlokwa ka temokrasing ya Afrika Borwa.
4.4. Dikgato tša bona tša bogale di hlohleleditše basadi ka kakaretšo go tšea maemo a bona ao a ba swanetšego ka Palamenteng, mmušong le setšhabeng, gomme re dira dikaonafatšo tše ga nnyane ga nnyane go tloga mola re hwetšago tokologo ka 1994.
5. Segopotšo sa Marikana
5.1. Ka Labobedi, 16 Phato 2022, mmušo o kopane le naga ka moka go gopola masetlapelo ao a diragetšego ka Marikana Leboa Bodikela ka 2022. Bohloko bjoo bo kwelwego ke bašomi, malapa a bona le naga ka bophara bo tla dula bo le gona mo historing ya rena.
5.2. Lenaneo la Mpshafatšo la Marikana le phethagaditšwe go aga lefsa le go hlola tikologo ya go dumelela go kaonafatša maphelo a setšhaba sa Marikana. Ngwaga wa go feta mmušo o lefile R176 milione go lliša malapa a batšwasehlabelo gomme melato ye e sa šetšego ye e lego dikgorotshekong go letetšwe gore e phethwe mafelelong a 2022.
5.3. Dintlo tše di mpshafaditšwego goba tšeo di agilwego lefsa di filwe bahlologadi ba Marikana gomme tše dingwe di tla phethwa ngwaga wo. Protšeke ya dintlo ya R700 milione e dira gore go bonwe bašomi ba moepong ba fiwa dintlo tša seriti. Go filwe infrastraktšha ya leago ye bohlokwa go kaonafatša maemo a go phela a ditšhaba tša moepong.
6. Imbizo ya Mopresidente ya ka Gauteng ka Mmotlolo wa Tlhabollo ya Dilete (DDM)
6.1. Go latela katlego ya Izimbizo tša Mopresidente tše tharo tšeo di swerwego ka Leboa Bodikela, Freistata le Mpumalanga ka tsela yeo, Mmasepala wa Selete wa Sedibeng ka Gauteng o swere karolo ya bone ka Labohlano, 12 Phato 2022.
6.2. Ka fase ga morero: “Akaretša batho ka moka”, Mopresidente Cyril Ramaphosa o etile pele sehlopha sa bahlenkedi ba maemo a godimo go tšwa go mebušo ya bosetšhaba, ya profense le ya selegae. Maafrika Borwa ka mekgatlo le makala a bona ba beakantšwe gore ba šome mmogo kgahlanong le magato ao a golago a bohloki le mathata ao a hlotšego maemo ao a hlotlago a ekonomi.
6.3. Selete sa Sedibeng se na le tšwelopele mo phethagatšong ya Vaal River Special Economic Zone (SEZ), yeo e lego bohlokwa go kaonafatšeng selete, profense le naga. Vaal River SEZ e beakanya go swara makala a bohlokwa a a latelago: Vaal River Smart City; Hapo ya Tlhabollo ya Green Hydrogen; hapo ya khabisi; agro-logistiki, aerotropolisi; aetrome, sefofane sa merwalo le lekala la tšweletšo ya tšhipi ye e matlafaditšwego.
7. Samiti ya Lekala la Leago ya Mopresidente
7.1. Samiti ya Lekala la Leago ya Mopresidente yeo e swerwego ka Ekurhuleni, Gauteng go tloga ka la 4 go fihla ka la 5 Phato 2022 ka fase ga morero “Go godiša Tirišano ya Leago go kgontšha go Kgatha Tema go Ekonomi ya Leago mo Ditšhabeng”,, e kopantše bakgathatema go tšwa dileteng go šoma le mmušo go šogana le ditlhohlo tša ekonomi ya leago le go beakanya methopo ya ditšhaba tša leago, gare ga dinepo tše dingwe.
7.2. Samiti e lebeletše dipego tša dipoledišano go tšwa go diprofense tše 9 ka ditlhohlo tša tšona, tšeo di akaretšago thekgo ya ditšhelete, ditaba tša taolo, phetogo ya lekala la leago ka kgopolo ya go godiša tirišano ya go šogana le ditlhohlo tšeo di lebanego le bohloki, go se lekalekane le tlhokego ya mešomo.
7.3. Kabinete e ipiletša go mekgatlo ya selegae le badudi go kgatha tema ya bona ka mafolofolo go kgonthiša gore re aga bokamoso bjo bokaone, bjalo ka ge go beakantšwe go Leano la Tlhabollo la Setšhaba: Pono ya 2023.
B. Diphetho tša Kabinete
1. Leanolegolo la Diintasteri tša Boithomelo le Setšo
1.1. Kabinete e dumeletše gore leanolegolo la Diintasteri tša Boithomelo le Setšo le phethagatšwe. Leanolegolo le nepiša bokgabo bja pono; tiroatla le moakanyetšo; bobegaditaba bja go bonwa le go kwa le bja kgokaganyo, ditirelo tša moakanyetšo le tša bokgabo; phethagatšo le keteko, go akaretša mmino, phatlalatšo le bobegaditaba bja kgatišo.
1.2. Leanolegolo le tla tsena ka bogare mo makaleng go aga lekala la kaonafatšo ya boithomelo leo le tla lemogwago lefaseng ka moka le go phadišana mo lefelong. Le tla šoma intastering ya boithomelo ya Afrika Borwa la kgona go fihlelela mebaraka ya gae le ya boditšhabatšhaba.
2. Tlhako ye e Mpshafaditšwego ya Ditšhelete tša Dikadimo go Mebasepala ka moka le Ditšhelete tša Merero ya Ditšhoganetšo
2.1. Kabinete e dumeletše dimpshafatšo go Tlhako ye e Mpshafaditšwego ya Ditšhelete tša Dikadimo go Mebasepala ka moka le Ditšhelete tša Merero ya Ditšhoganetšo. Dimpshafatšo di go karolo ya kadimo ya tlhako ye. Gare ga dimpshafatšo tšeo di akantšwego go thoma paka ya go adima ya nako ye telele go sepelelana le nako ya mohola ya tše dingwe tša dithoto tšeo di thekgilwego ka ditšhelete. Dimpshafatšo di hlakiša mohola wa diinstitušene tša ditšhelete tša tlhabollo mo sekgobeng sa kadimo sa mebasepala.
2.2. Karolo ya 230 ya Molaotheo wa Repabliki ya Afrika Borwa ya 1996 e matlafatša mebasepala go kgoboketša dikadimo tša matlotlo a bona goba ditshenyagelo tša gonabjale. Tlhako ya kgale e dumeletšwe ke Kabinete ka 2000 go hlahla Kgaolo ya 6 le 13 ya Molao wa Ditšhelete wa Mebasepala, wa 2003 (Molao wa 2003). Dimpshafatšo tše di dumeletšwego di nyaka go hlohleletša baadimiši ba bantši mo mebasepaleng go hlokomela melao ya motheo yeo e hlohleletšago go adima ga mebasepala.
3. Tšhupamabaka ye e Lokolotšwego Pele ga Nako ya Phatlalatšo ya Dipalopalo tša Bosenyi tšeo di Begilwego tša Kotara ya Ngwaga wa Ditšhelete wa 2022/23
3.1. Kabinete e dumeletše Tšhupamabaka ye e lokolotšwego Pele ga Nako ya Phatlalatšo ya Dipalopalo tša Bosenyi tšeo di Begilwego tša Kotara ya Ngwaga wa Ditšhelete wa 2022/23. Kabinete e dumeletše go lokollwa ga dipalopalo tša bosenyi tša kotara. Se e be e le go fetoša tokollo ya ngwaga yeo e dirilwego ya dipalopalo tša bosenyi tša naga.
3.2. Dinako tšeo di beilwego tšeo ka tšona go tla lokollwago tšhupamabaka ye ya dipalopalo tša bosenyi e tla ba ka Phato 2022 mo go tla lokollwago tša kotara ya pele gomme ye nngwe e be ka Dibatsela 2022 mo go tla lokollwago tša kotara ya bobedi. Dipalopalo tša bosenyi tša kotara ya boraro le kotara ya bone di tla lokollwa ka Dibokwane le Mopitlo 2023 ka go latelana
4. Go fedišwa ga Seemo sa Masetlapelo a Setšhaba (NSoD)
4.1. Kabinete e dumeletše go fedišwa ga Seemo sa Masetlapelo a Setšhaba (NSoD) seo se tsebišitšwego go latela mafula ka Kapa Bohlabela le KwaZulu-Natal.
4.2. NSoD se fedišitšwe ka la 18 Phato 2022 go latela katološo ya sona ka 18 Phupu 2022. Katološo e lebeletše tlhokego ya go tšwela pele go matlafatša magato a tšhireletšo ao a lego gona ao a thomilego ke dibopego tša mmušo go fokotša le go šogana le maemo a boso a šoro mo diprofenseng tšeo di amegilego.
4.3. Kabinete e dumetše gore maemo a gonabjale ga a sa nyaka magato a go se tlwaelege ka ge dibopego tša mmušo, lekala la praebete le ditšhaba tša segae di tla tšwela pele go kgonthiša gore go ba le kimollo ye e tšwelago pele, mpshafatšo le kagolefsa.
C. Melaokakanywa
1. Molaokakanywa wo o Mpshafaditšwego wa Ngwadišo ya Mangwalo a Bodulo wa 2022
1.1. Kabinete e dumeletše go išwa ga Molaokakanywa wo o Mpshafaditšwego wa Ngwadišo ya Mangwalo a Bodulo wa 2020 Palameneteng gore o lebelelwe gape. Kabinete e dumeletše Molaokakanywa ka Phupu 2020 gore o lebelelwe gape ke setšhaba.
1.2. Dimpshafatšo tše di šišintšwego di tla huetša gore go lemogwe nako ya naga yeo e šireleditšwego ka semolao ka go Karolo ya 25(6) ya Molaotheo wa Repabliki ya Afrika Borwa ka 1996. Molaokakanywa o dumelela go kgoboketšwa ga dipalopalo go ya ka morafe, bong, naga, bodudi bja beng ba ditokelo tša naga ka Afrika Borwa. Peakanayo ye e tla kgontšha gore go be le dipego tša tlhakišo ya naga le dinyakišišo tšeo di nepagetšego ka moso malebana le phetošo ya go ba mong wa naga.
2. Molaokakanywa wa Mokgatlo wa Infrastraktšha wa Mothopo wa Meetse wa Setšhaba (NWRIA) wa 2022
2.1. Kabinete e dumeletše go phatlalatšwa ga Molaokakanywa wa NWRIA wa 2022 gore setšhaba se swayeswaye ka mo nakong ya matšatši a 90. Molaokakanywa o akanywa go beakanywa ga NWRIA gore e tšeye maikarabelo a go beakanya, go thekga ka ditšhelete le go kaonafatša infrastraktšha ya naga. E tla ba gape le maikarabelo a go hlokomela infrastraktšha ya gonabjale ya meetse.
2.2. Mokgatlo ke wa go kgonthiša go abja ga meetse ga go swarelela, ga go kwagala go sepelelana le maikarabelo a molaotheo a go fihlelela a meetse le go šireletša tikologo ye botse. Mokgatlo o tla beakanywa bjalo ka Lekala la Setšhaba ka fase ga Lenaneo la 2 la Molao wa Taolo ya Ditšhelete tša Setšhaba, wa 1999 (Molao wa 1 wa 1999). Mokgatlo o tla tšea mešomo yeo e šetšego e dirwa ke Trans-Caledon Tunnel Authority.
3. Molaokakanywa wo o Mpshafaditšwego wa Maatla le Mešomo ya Ditšhelete tša Mmasepala
3.1. Kabinete e dumeletše go išwa ga Molaokakanywa wo o Mpshafaditšwego wa Maatla le Mešomo ya Ditšhelete tša Mmasepala wa 2022. Molaokakanywa o mpshafatša Molao wa Maatla le Mešomo ya Ditšhalete tša Mmasepala, wa 2007 (Molao wa 12 wa 2007).
3.2. Dimpshafatšo di laola maatla a mebasepala mo go kgoboketšeng ditshenyagelo tša tlhabollo malebana le dikgopelo tša tlhabollo ya naga tšeo di išitšwego mebasepaleng. Dimpshafatšo tše di tla kgonthiša gore mebasepala e diriša ditshenyagelo tše ka go lekana, go sa khutiše selo le gabotse. Kabinete e dumeletše Molaokakanywa ka 2020 gore setšhaba se swayeswaye.
4. Molaokakanywa wo o Mpshafditšwego wa Ditaba tša Ditšhelete wa 2022
4.1. Kabinete e dumeletše go išwa ga Molaokakanywa wo o Mpshafaditšwego wa Ditaba tša Ditšhelete, wa 2022. Molaokakanywa o akanya mpshafatšo go Melao ye šupa, e lego (1) Molao wa Diinstitušene tše di Amanago le Sekhwama sa Diphenšene, wa 1963 (Molao wa 41 wa 1963); (2) Molao wa Diphenšene tša Mašole, wa 1976 (Molao wa 84 wa 1976); (3) Molao wa Diphenšene tša Bašomi ba Mmušo wa 1996; (4) Molao wa Ditšhelete le Khomišene ya Ditšhelete, wa 1997 (Molao wa 99 wa 1997); (5) Molao wa Panka ya Tlhabollo ya Naga le Temo, wa 2002 (Molao wa 15 wa 2002); (6) Molao wa Profešene ya Tlhakišo wa 2005 (Molao wa 26 wa 2005) le (7) Molao wo o Mpshafaditšwego wa Profešene wa 2021 (Molao wa 5 wa 2021).
4.2. Dimpshafatšo tše di šišintšwego di akaretša, ka fase ga Molao wa Diphenšene tša Mašole wa 1996, kakaretšo ya balekane ba bophelo ka moka go dikholego go tloga morago go la 27 Phato 1994. Molao wo o mpshafaditšwego wa diphenšene o tla kgontšha balekane go lemoga dikgahlego tša bona tša diphenšene ka bjako ge ba hlalana.
4.3. Go tlaleletša go hlaloša mošomo wa Tona ya Matlotlo le go hlakiša, dimpshafatšo di fetoša gape maatla a komiti ya phethagatšo moo motlhakiši a amogelago molato. Molaokakanywa o phatlaladitšwe gore setšhaba se swayeswaye ka Dibokwane 2022.
5. Molaokakanywa wo o Mpshafaditšwego wa Melao ya Kakaretšo (Molaokakanywa wo o lego Kgahlanong le go Sepetša Tšhelete ka Tsela yeo e Sego Molaong le go Lwantšha go Adimiša Tšhelete ka Tswala ya Godimo) wa 2022
5.1. Kabinete e dumeletše go išwa ga Molaokakanywa wo o Mpshafaditšwego wa Melao ya Kakaretšo (Molaokakanywa wo o lego Kgahlanong le go Sepetša Tšhelete ka Tsela yeo e Sego Molaong le go Lwantšha go Adimiša Tšhelete ka Tswala ya Godimo) wa 2022 Palamaneteng gore o lekolwe gape.
5.2. Molaokakanywa ke Molaokakanywa wa dikgoboketšo woo o mpshafatšago Melao ya gonabjale e lego (i) Molao wa Senthara ya Bohlale bja Ditšhelete, wa 2001 (Molao wa 38 wa 2001); (ii) Molao wa Mokgatlo wo o se Nago Poelo, wa 1997 (Molao wa 71 wa 1997); (iii) Molao wa Taolo ya Traste ya Dithoto, wa 1988, (Molao wa 57 wa 1988); (iv) Molao wa Dikhamphani, wa 2008 (Molao wa 71 wa 2008) le (v) Molao wa Melawana ya Lekala la Ditšhelete, wa 2017 (Molao wa 9 wa 2017).
5.3. Dimpshafatšo di arabela diphošo tšeo di hweditšwego nakong ya tshekatsheko ya balekane ya naga yeo e dirilwego ke Sehlopatšhomo sa Magato a Ditšhelete (FATF). Pego ya tekolo yeo e kopanetšwego e file maele a 40 ao a ka thušago gore Afrika Borwa e sepelelane le magato a boditšhabatšhaba a go lwantšha go sepetša tšhelete ka mokgwa wo o sego molaong le go lwantšha go adimiša tšhelete ka tswala ya godimo.
5.4. Go hweditšwe gore Afrika Borwa e hlaelela dikarolong tše 20. Molaokakanywa o šogana le dikarolo tše dingwe tšeo di utollotšwego. Afrika Borwa e dutše e le leloko la FATF go tloga ka 2003.
6. Molaokakanywa wo o Mpshafaditšwego wa Diokobatši le go Rekišwa ga Diokobatši wa 2022
6.1. Kabinete e dumeletše go išwa ga Molaokakanywa wo o Mpshafaditšwego wa Diokobatši le go Rekišwa ga Diokobatši wa 2022 go lekolwa go ya pele. Molao wa Diokobatši le go Rekišwa ga Diokobatši, wa 1992 (Molao wa 140 wa 1992) o re ke bosenyi go dira le go aba seokobatši se sengwe le se sengwe seo se akareditšwego ka fase ga Lenaneo la 1 le Lenaneo la 2 la Molao.
6.2. Dimpshafatšo di šogana le go se nepagale ga Karolo ya 63, yeo go hweditšwego gore ga e sepelelane le molaotheo malebana le ge Tona a filwe ditokelo tša go mpshafatša mananeo ntle le go akaretša ditshepetšo tša palamente.
6.3. Ka 2020, Kgorotsheko ya Molaotheo e tsebišitše gore Karolo ya 63 ya Molao wa Diokobatši le go Rekišwa ga Diokobatši wa 1992 ga go sepelelane le molaotheo gomme gwa emišwa nakwana go se be molao ga gona go fihla ka la 17 Manthole 2022 go fa Palamente nako ya go o lokiša.
D. Tiragalo e Tlago
1. Papadi ya Sebjana sa Lefase ya Rugby ya 2022
1.1. Afrika Borwa e tla ba monggae wa Sebjana sa Lefase sa Rugby sa 2022 ka Motsekapa gare ga la 9 le la 11 Lewedi 2022. Tiragalo ya papadi e swarwa la mathomo ka kontinenteng ya Afrika gomme go tla bonwa dihlopha tša banna ba 24 le basadi ba 16 go tšwa lefaseng ka moka ba phadišana.
E. Melaetša
1. Ditebogišo
Kabinete e lebogiša le go lakaletša tše dibotse:
- Banyana Banyana, ka go dira histori le go thopela Afrika Borwa Africa Cup of Nations ya Basadi (WAFCON), mo makgaolakgang a WAFCON 2022 yeo e bego e swerwe ka Rabat, Morocco ka Mokibelo, 23 Mosegamanye 2022. Ka nako ye tee, ba fihleletše dinyakwa tša go phadišanela Sefoka sa Lefase sa FIFA go swarwa mmogo ke Australia le New Zealand go tloga ka la 20 Mosegamanye go fihla ka la 23 Phato 2023.
- Team South Africa, ka go thopa dimetale tše 27 mo dikarolong tša go fapana mo Dipapading tša Commonwealth tšeo di swerwego Birmingham, England go tloga ka la 28 Mosegamanye go fihla ka la 8 Phato 2022.
- Sehlopha sa Basadi sa Springbok, ge ba thopile kgahlanong le Spain mo phadišanong ya mathomo ya tše pedi ya diteko tša Mohlwaela wa Marega tša Basadi mo Emirates Airline Park go la Johannesburg.
- Mohumagadi Ndavi Nokeri (23), go thopa sefoka sa Mohumagadi Afrika Borwa 2022.
- Mohumagadi Ashleigh Buhai, ka go thopa 2022 AIG Women’s Open gomme ya ba mosadi wa boraro ka Afrika Borwa go thopa sefoka sa gauta se segolo.
2. Mahloko
Kabinete e romela melaetša ya mahloko go:
- Tokollo “Magesh” Tshabalala (46), rammino, seopedi le mongwadi wa dikoša yoo a ilego a tuma ge yena mmogo le bagwera ba gagwe ba babedi ba thoma sehlopha sa bona sa mmino sa kwaito ka 1996 seo se bitšwago TKZee.
3. Bao ba Thwetšwego Mešomong
1. Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.
1.1. Mohumagadi Zenkosi Dumile Mhlongo bjalo ka Motlatšamolaodimogophethiši (DDG): Dinyakišišo tša Pholisi le Melawana mo Kgorong ya Mešomo ya Setšhaba le Infrastraktšha (DPWI).
1.2. Ngaka Bongani Elias Sithole bjalo ka DDG: Senthara ya Taolo ya Masetlapelo a Setšhaba ka Kgorong ya Taolo ya Tirišano.
1.3. Morena Adam Mthombeni bjalo ka DDG: Dikamano tša Boditšhabatšhaba mo DPWI.
2. Kabinete e dumelelana le go thwala batho ba mešomong:
2.1. Ngaka Zwanani Titus Mathe bjalo ka Mohlankedimogolophethiši wa Institute ya Tlhabollo ya Enetši ya Setšhaba ya Afrika Borwa.
2.2. Maloko a Nakwana a Taolo ya Enetši ya Setšhaba ya Afrika Borwa:
a. Morena Thembani Bukula (Modulasetulo);
b. Mohumagadi Zandile Mpungose (Motlatšamodulasetulo);
c. Mohumagadi Precious Sibiya;
d. Mohumagadi Thembeka Semane; le
e. Morena Fungai Sibanda (go thwalwa gape).
2.3. Modulasetulo le leloko la Khansele ya Boto ya Theknolotši ya Diminerale:
a. Ngaka Thibedi Ramontja (Modulasetulo); le
b. Profesa Lwazi Ngubevana.
2.4. Mohumagadi Cladie Thamo Hloniphile Mzobe bjalo ka Molaodiphethiši wa Selete wa Mokgatlo wa Tšhireletšo ya Leago wa Afrika Borwa ka KwaZulu-Natal.
Dipotšišo:
Mohumagadi Phumla Williams – Seboleledi sa Kabinete
Mogala: 083 501 0139
