A. Merero ye Bohlokwa Seemong sa Bjale
1. Ekonomi
1.1. Leano la Tsošološo le Kagoleswa ya Ekonomi leo Mopresidente Cyril Ramaphosa a le hlagišitšego pele ga Tulo ya Mohlakanelwa ya Dintlo tša Palamente ka Moka ka Labone la 15 Diphalane 2020, le nyaka gore makala ka moka a ikemišetše go šoma le go šomišana mmogo ka nepo ya go bušetša ekonomi sekeng.
1.2. Leano le le aga go metheo yeo e re amago ka moka yeo e hlomilwego ke badirišani ba setšhabeng – e lego mmušo, bašomi, ba kgwebo le mekgatlo ya setšhaba – ka go tsenela ditherišano tšeo di tseneletšego le tša botlalo mo dikgweding tše mmalwa tše di fetilego.
1.3. Go na le makala a mane ao a beilwego pele ao a thekgilego leano le la tsošološo ya ekonomi, la mathomo e lego tlhomo ye kgolo ya mananeo kgopanara. Lekala la bobedi leo le beilwego pele ke go katološa bokgoni bja go tšweletša mohlagase fao e lego gore mušo o akgofiša phethagatšo ya Leano la Methopo leo le Kopantšwego. Lekala la boraro leo le beilwego pele ke la go hlohleletša go thwala batho mešomong ka nepo ya go hloma mešomo le go thekga go iphediša ga batho. Lekala la bone le nepišitše kudu kgolo ya intasteri fao e lego gore mmušo o tla thekga kgolo ka go botšweletši bja ka nageng le go dira gore diromelwantle tša Afrika Borwa di be le bokgoni kudu.
1.4. Makala ao a utollotšwego ao a beilwego pele a tla tsenya letsogo go ageng ga boitshepo le go bea Afrika Borwa tseleng ya go hloma dipeeletšo le kgolo ya ekonomi ka morago ga masetlapeleo ao a bakilwego ke leuba la Bolwetši bja Coronavirus (COVID-19).
1.5. Go netefatša gore go ba le tlhokomelo ya kgafetšakgafetša ya phethagatšo ya lenaneo le, Kabinete e dumeletše gore go hlangwe Lekgotla la Bosetšhaba la Tsošološo ya Ekonomi. Lekgotla le modulasetulo wa lona e tla ba Mopresidente gomme lona le bopilwe ke Motlatšamopresidente, Tona ka Kantorong ya Mopresidente le Ditona ka moka tša Dikgoro tšeo di lebanego le Ekonomi. Lekgotla le le tla kopana gatee ka kgwedi go hlokomedišiša phethagatšo ya leano la kagoleswa le tsošološo ya ekonomi le gape go dirišana le badirišanimmogo ba setšhabeng ka go Lekgotla la Bosetšhaba la Tlhabollo ya Ekonomi le Bašomi.
2. Seemo sa Masetlapelo sa Bosetšhaba
2.1. Katološo ya Seemo sa Masetlapelo sa Bosetšhaba go fihla ka la 15 Dibatsela 2020, go latela Molao wa Taolo ya Masetlapelo wa 2002 (Moalo wa 57 wa 2002), e tla kgontšha mmušo go tšwela pele go fokotša go phatlalatšwa ga baerase.
2.2. Le ge Afrika Borwa e itemogetše phokotšego ye kgolo ka phetetšong le ka go phatlalatšeng ga COVID-19 mo dikgweding tše di fetilego, baerase ye e sa na le rena.
2.3. Ge naga ye e tlwaela bophelo bja ‘setlwaedi se seswa’ sa go phela mmogo le COVID-19 le kgonagalo ya gore e ka hlasela gape, Kabinete e ipiletša gape go maAfrika Borwa ka moka go tšwela pele go obamela ditshepedišo tša maphelo tša go apara dimaseke, go tlogela sekgoba magareng ga batho le go hlapa diatla kgafetšakgafetša ka meetse le ka sesepa goba ka go šomiša sanithaesa sa alekhohole. A ke ona magato fela a tšhireletšo ao a lego gona gore re itšhireletše, re šireletše ba malapa a rena le bao re ba ratago gore ba se fetelwe ke COVID-19.
2.4. Kabinete e lakaletša batho ka moka bao ba fetetšwego ke baerase ye go akaretšwa le Tona ya Maphelo, Ngaka Zweli Mkhize le mosadi wa gagwe Ngaka May Mkhize go fola ka pela.
2.5. Kabinete e rata gape go leboga bašomi ka moka ba tša maphelo bao ba šomago go balwetši bao ba fetetšwego ke baerase ye ka ga boikgafo le maikemišetšo a bona tšeo di dirilego gore go be le koketšego ya dipalopalo tša ka mo nageng tša bao ba fodilego go COVID-19 ka palo ya go feta 90% le go dira gore dipalopalo tša batho ba rena bao ba hlokofalago go no ba go 2.6%
3. Nepišo go Polokego ya Dipolaseng
3.1. Kabinete e thekga ka botlalo mošomo wo o dirwago ke Tirelo ya rena ya Maphodisa ya Afrika Borwa ge ba golegile bao ba dirago bosenyi bja go šiiša ka mo nageng ya rena go akaretšwa go bolaya le go gobatša ga balemi le bašomi ba dipolaseng nageng ka bophara. Balemi ke karolo ye bohlokwa ya ekonomi ya rena, gomme bosenyi dipolaseng go tliša kotsi e sego fela go polokego ya balemi le ya bašomi ba meepong eupša gape le go polokego dijong ya ka mo nageng.
3.2. Mmušo o akgofiša phethagatšo ya Leano la Polekego leo le bušeleditšwego la Dipolaseng ka nepo ya go arabela ditlhokego tša polokego tša ditšhaba tša dipolaseng le go thekga tlhabollo ya ekonomi ya setšhaba sa fao.
3.3. Kabinete e ipiletša go setšhaba go thuša Tirelo ya Maphodisa ya Afrika Borwa (SAPS) ka ntweng kgahlanong le bosenyi ka go tsenela diboka tša bohlapetši bja setšhaba le go bega bosenyi setešeng sa maphodisa sa kgauswi, ba letšetše nomoro ya go se lefelwe ya Thibelo ya Bosenyi ya 08600 10111, ba romele SMS yeo e sa tšweletšego leina la bona go Mogala wa tša Bosenyi wa 32211 goba ba šomiše App ya MySAPS – app ya go se lefelwe ya go bega bosenyi ka selefoune yeo e hwetšagalago go diselefoune tša sebjalebjale ge ba nyaka go loma maphodisa tsebe ka bosenyi.
3.4. Re swanetše go šoma mmogo go fediša bosenyi ka ditšhabeng tša rena le go dira gore naga ya rena e bolokege go bohle.
4. Twantšho ya Bosenyi
4.1. Kabinete e amogela go golegwa ga batho bao ba gononelwago gore ba kgathile tema ka bosenying bja go fapafapana bja bomenetša, boradia, go hlwekiša tšhelete ye e hweditšwego ka bomenetša le bohodu. Melato ye e akaretša, gareng ga tše dingwe, ya go amana le go utswa ditšhelete tša kimollo ya leago mabapi le COVID-19, go reka ditlabelo tša boitšhireletšo kgahlanong le COVID-19 ka bomenetša, ditaba tše di tšweletšego nyanyeng tša go amana le protšeke ya marulelo a marela le go palelwa ke go fa pego le go se bege letseno ka moka go Tirelo ya Metšhelo ya Afrika Borwa. Kabinete e reta ka botlalo le go thekga maitapišo ka moka a go hwetša ditšhelete tša setšhaba go batho ka moka bao ba kgathilego tema ka ditiragalong tša bomenetša
4.2. Go golegwa ga batho ba fao go sa tšwago go dirwa ke bohlatse bja gore ga go motho yo a lego ka godimo ga molao gomme se se laetša boikgafo bja mmušo bja go rweša bao ba tshelago molao maikarabelo ka ge ba utswetša bahloki ba maAfrika Borwa thušo ya mmušo le Thekgo tše ba di hlokago kudu.
4.3. Kabinete e ipiletša go setšhaba go raloka tema ya bona ka go bega bao ba dirago bosenyi bja mohuta wo go ditheo tša phethagatšo ya molao goba ka go letšetša Mogala wa Bosetšhaba wa Twantšho ya Bomenetša mo go 0800 701 701.
5. Dikgaruru tša Bong le Polao ya Basadi (GBVF)
5.1. Bothata bjo bogolo bja GBVF le tlaišo ya bana, bjo Mopresidente Ramaphosa a bo kgalemilego phatlalatša gore ke leuba la bobedi leo le latelago COVID-19, bo tšwela pele go hlasela ditšhaba tša rena gomme re swanetše go dira ka fao re ka kgonago ka gona go bo fediša. Molaokakanywa wa Ditokelo wo o ukangwego ka gare ga Molaotheo wa Repabliki ya Afrika Borwa wa 1996 o tloga o laetša gore ngwana yo mongwe le yo mongwe o na le tokelo ya go šireletšwa go tshwaro ye mpe, go hlokomologwa, go tlaišo goba go go nyatšwa.
5.2. Kabinete e ipiletša go maAfrika Borwa ka moka go šoma mmogo le ditheo tša rena tša phethagatšo ya molao go netefatša gore dihlopha tša batho ka moka tšeo di lego kotsing – kudukudu batšofadi, basadi le bana – ba šireletšwa go dikgaruru le go tlaišo.
5.3. Tiragalo ye e sa tšwago go direga ya basetsana ba babedi ba mengwaga ye seswai (ba mafahla) go tšwa ka Mpumalanga, bao go kwagalago gore ba tlaišitšwe ke tatago e tloga e tshwenya le go hlobaboroko kudu. Yo mongwe wa basetsana o begile tiragalo ye go morutiši wa gagwe gomme re swanetše go reta phetolo ye e dirilwego ke sekolo yeo e feleleditšego ka gore go golegwe mogononelwa. Bjale ka setšhaba seo se obamelago molao le seo se ratago khutšo, ka moka ga rena re swanetše go kopana re kgalemeleng bosenyi bjo bo šiišago ka lenyatšo leo le bo swanetšego.
6. Tokologo ya Kgašo
6.1. Segopotšo sa bo 43 sa tokologo ya kgašo, yeo e tsebjago bjalo ka Black Wednesday ka Afrika Borwa, se ketikilwe ka Mošupologo wa la 19 Diphalane 2020. Letšatši le le re gopotša ka ga bohlokwa bja tokologo ya go hlagiša maikutlo ka gare ga molaokakanywa wa rena wa ditokelo, yeo e akaretšago, tokologo ya kgašo bjalo ka selo se bohlokwa ka gare ga naga ya rena ya temokrasi ye e laolwago ke molaotheo.
6.3. Letšatši la Tokologo le gopola go iletšwa ga dikuranta tše mmalwa le go golegwa ga bangwadi ba mmalwa ka la 19 Diphalane 1977 ke maphodisa a mmušo wa kgethologanyo, ge ba beile nyanyeng ditiro tše šoro tše di bego di dirwa ke mmušo wa kgatelelo. Kgašo e tšwela pele go raloka tema ye bohlokwa go thabiša, go ruta le go tsebiša setšhaba, gammogo le hlatholla makala ka moka a maphelo a ekonomi ya setšhaba le a sepolotiki.
6.4. Kgašo e tšwela pele go ba modirišanimmogo yo bohlokwa go maatlafatšeng ga temokrasi ya rena le go tšwetša pele ditokelo tša molaotheo tša badudi ba rena. Tokologo ya go dira mešomo ya bona e nyaka maikarabelo a go netefatša gore ba bega ditaba ka maleba le ka go se tšeye lehlakore dinakong ka moka.
6.5. Kabinete e gopola babegi ba ditaba ka moka bao ba lahlegetšwego ke maphelo a bona mo nakong ye boima ya COVID-19, ebile e ikgafa go hlompha le go tšwetša pele tokologo ya go hlagiša maikutlo ka mo nageng ya rena.
7. Ditlhahlobo tša Mafelelong a Ngwaga
7.1. Kabinete e lakaletša mahlatse le mahlogonolo go baithuti ba Kreiti ya 12 ba 1 058 699 ge ba thoma go itokišetša ditlhahlobo tša bona tša mafelelong a ngwaga tšeo di tlogo thoma ka la 5 Dibatsela 2020 gomme tša fela ka la 15 Manthole 2020. Mo ngwageng wo Kgoro ya Thuto ya motheo e begile gore go na le palo ya godimodimo ya baithuiti ba Kreiti ya 12 go feta mengwaga ka moka ye e fetilego bao ba tlogo ngwala ditlhahlobo tša bona tša mafelelong a ngwaga.
7.2. Ka morago ga ditšhitišo tša ngwaga wa dithuto ka lebaka la COVID-19, Kabinete e ipiletša go batswadi ka moka le go bahlokomedi ba baithuti go thekga bana ba bona mo nakong ye bohlokwa ye. Mphato wa marematlou wa 2020 o kgopelwa go šomiša methopo yeo e dirilwego ke mmušo gore e hwetšagale ka go diriša lesolo la Boikgakollo la Woza Matrics 2020 (wozamatrics.co.za le #Wozamatrics) go itokišetša ditlhahlobo tša Setifikeiti sa Marematlou.
B. Dipheto tša Kabinete
1. Thekgo go Intasteri ya ka mo Nageng ya Ferokoromo
1.1. Kabinete e dumeletše ditsenogare tše mmalwa tša go thekga tšweletšo ya ferokoromo ka mo nageng le lekala la yona la thekišo ya ditšweletšwa tša ferokoromo. Ditsenogare tše di akaretša go tsenywa tirišong fao go šišintšwego ga motšhelo wa diromelwantle tša borale bja koromo, tšhomišo ya ditheknolotši tša tsheketšo ya mohlagase ka disemelthareng, le tirišo ya ditheknolotši tša tšweletšommogo le tša boitšweleletšo bja mohlagse.
1.2. Lekala la ferokoromo la ka mo nageng ke motšweletši yo mogolo kudu lefaseng ka bophara wa ferokoromo ebile ke lona le nnoši le tšweletšago tšhipi ya go se ruse. Ke motšweletši yo mogolo kudu wa tšhipi ya go se ruse go intasteri ya difatanaga. Ditsenogare tše di šišintšwego di hlamilwe ke sehlophatšhomo seo se bopilwego ke kgoro ya Methopo ya Diminerale le Enetši, ya Kgwebišano, Intasteri le Diphenkgišano, ya Dikgwebo tša Mmušo le ya Ditšhelete tša Setšhaba.
2. Melawana ya Bafsa ya Bosetšhaba (NYP): 2020-2030
2.1. Kabinete e dumeletše NYP ya 2020-2030 ye e bušeleditšwego laboraro, e lego melawana ya makala a mehutahuta yeo e hlamilwego ke dikgoro tša mmušo tšeo di emetšego mmušo, bakgathatema ba setšhaba, dihlongwa tša thuto ya godingwana le dihlongwa tša kgwebo. E tšeela legato NYP 2015-2020, yeo e felelago go šoma mafelelong a Manthole 2020.
2.2. Melawana ye e šišinya dilo tše hlano tšeo di beilwego pele: (1) thuto ya boleng, mabokgoni le dibaka tša bobedi; (2) phetošo ya ekonomi, bohlomi bja dikgwebo le tlhomo ya mešomo; (3) tšwetšopele ya maphelo a mmeleng le a menagano, go akaretšwa COVID-19; (4) tirišano ya setšhaba le kago ya setšhaba, le (5) lenaneo la tlhabollo ya bafsa le le šomago gabotse le leo le nago le phetolo.
3. Leano la Bosetšhaba la Bana (NPAC): 2019-2024
3.1. Kabinete e dumeletše NPAC ya bo 4, yeo e phethagatšago ditlamego tša naga tša mabapi le Kwano ya Mokgatlo wa Dinagakopano (UN) ka ga Ditokelo tša Ngwana le Tšhata ya Afrika ka ga Ditokelo le Go Phela Gabotse ga Ngwana.
3.2. Leano le la mengwaga ye mehlano le hlagiša dilo tšeo di beilwego pele tša togamaano le mekgwa ya go tsenywa tirišong ga mekgwa ya go šireletša le go tšwetša pele ditokelo tša bana. Leano le le sepelelana le Tlhako ya Togamaano ya Lebakanako la Magareng yeo e hlagišago magato ao mmušo e tlago a tšea le dinepišo tšeo di tlago fihlelewa ka nakong ya lebaka la dikgetho. Le tla tsenywa tirišo ka tirišano le mekgatlo ya setšhaba.
3.3. NPAC e tla šoma gape bjalo ka tlhako ya go fana ka dipego tša kgatelopele ya naga go bobedi Komiti ya Afrika ya Ditsebi ka ga Ditokelo le Go Phela Gabotse ga Ngwana le go Komiti ya UN ka ga Ditokelo tša Ngwana.
4. Tshekatsheko ya Phethagatšo ya Molao wa Batšofadi wa 2006
4.1. Kabinete e dumeletše pego ya tshekatsheko yeo e kgopetšwego gore e dirwe mabapi le phethagatšo ya Molao wa Batšofadi wa 2006 (Molao wa 13 wa 2006). Ditšhišinyo tše akantšwego mabapi le go kaonafatša go obamela ga ditaelo tša Molao wa Batšofadi wa 2006 di ile tša fiwa kgoro ya maleba.
4.2. Pego ye e ka hwetšwa wepsaeteng ya Kgoro ya Peakanyo, Tlhokomedišišo le Tshekatsheko (www.dpme.gov.za).
5. Molaodipharephare (DG) wa Mokgatlo wa Lefase wa Kgwebišano (WTO)
5.1. Kabinete e thekga go šišinywa ga Ngaka Ngozi Okonjo-Iweala bjalo ka DG ya WTO. Mo nakong ye e fetilego o šomile bjalo ka Tona ya Ditšhelete ka Nigeria le bjalo ka Molaodi wa Panka ya Lefase. Go šišinywa ga gagwe go thekgilwe gape ke Ditona tša Afrika tša Kgwebišano tšeo modulasetulo wa bona e lego Tona Ebrahim Patel
Kabinete e lakaletša Ngaka Okonjo-Iweala mahlatse le mahlogonolo ebile e letetše mošomo wa WTO wo o bonago tlhabollo bjalo ka selo se bohlokwa ka lenaneong la yona le bjalo ka seo se tsenyago letsogo go tsošološo ya ekonomi ka morago ga COVID-19. Ge a ka atlega ka tikologong ye e latelago ya go hlokola ga WTO, o tla ba moAfrika wa mosadi wa mathomo yo a kgethilwego mo maemong a DG ya WTO.
C. Melaetša
1. Ditebogišo
1.1. Kabinete e lebogiša Tona ya Tlhabollo ya Leago Lindiwe Zulu ge a thwetšwe bjalo ka Modulasetulo wa Badirišani ka go Setšhaba le Tlhabollo (PPD), go thoma ka 2021 go fihla ka 2023. PPD ke seboka sa dinaga tše di hlabologago tše 27 tšeo di dirišanago go tšwetša pele tirišano ya dinaga tša Borwa mabapi le setšhaba le tlhabollo ya sona, maphelo a tša pelego le tekatekano ya bong. Afrika Borwa e tšea bodulasetulo bjo go badulasetulo ba nako ye e fetilego e lego China le India.
2. Mahloko
Kabinete e rometše mahloko go:
2.1. ba lapa le bagwera ba Ngaka Vuyokazi Mahlati, yo e bego e le modulasetulo wa Phanele ya Keletšo ya Mopresidente ka ga Peakanyoleswa ya Naga le Temo. O be a šoma gape ka pakatirong ya gagwe ya bobedi go Khomišene ya Peakanyo ya Bosetšhaba.
2.2. ba lapa le bagwera ba Mokhomišinare wa Dikleime tša Pušetšo ya Naga ka Kapa Bodikela, Mohumagadi Beverley Jansen, yo a bego e le moetapele ka ntweng ya rena kgahlanomg le kgethologanyo ebile o ralokile tema ye bohlokwa ka katlegong ya dikleime tša pušetšo ya naga tšeo di dirilwego ke ditšhaba go ralala le naga.
2.3. Ba lapa, bagwera le bašomimmogo ba Motlatšamodulasetulo wa Khomišene ya Ditokelo tša Botho, Motseta Devikarani Priscilla Jana, yo a bego e le mošomi wa tša molao wa maemo a godimo yo a bego a sa tšhoge selo yo a gafetšego mošomo wa gagwe wa tša molao go lwantšha mmušo wa kgethologanyo. Mopresidente Ramaphosa o mo file Poloko ya Semmušo ye e Kgethegilego ya Profense: ya Legoro la Bobedi.
2.4. Ba lapa, bagwera le bašomi ba tša kgašo ba Morena Dumisane Lubisi, yo a bego e le morulaganyiphethiši wa kuranta ya City Press. O be a ikgafile go netefatša gore maikutlo ao a fapafapanego a a theeletšwa ka nageng ya rena.
2.5. ba lapa, bagwera le bašomimmogo ba Leloko la Palamente (MP), Mohumagadi Dorah Dunana Dlamini, yo a bilego leloko la Palamente ya boselela ka morago ga dikgetho tša 2019. E bile leloko la Lekgotlatheramelao la Profense ya KwaZulu-Natal magareng ga mengwaga ya 2014 le 2019 pele ga ge a tla šoma ka Palamenteng ya Bosetšhaba.
2.6. ba lapa, bagwera le bašomimmogo ba Morena Zamuxolo Joseph Peter, yo a bilego leloko la Palamente ya boselela ka maemong ao a fapafapanego, go akaretšwa bjalo ka Mmeyaraphethiši wa Masepala wa Selegae wa Makana ka Kapa Bohlabela.
2.7. ba lapa, bagwera le bašomimmogo ba MP, Moatbokheiti Hishaam Mohamed, yo a bilego leloko la Palamente ya Boselela ka morago ga dikgetho tša 2019, ka morago ga mošomo wo a o dirilego lebaka le letelele wo o hlomphegago bjalo ka hlogo ya Phrobentshe ya Kgoro ya Toka le Tlhabollo ya Molaotheo ka Kapa Bodikela.
2.8. ba lapa, bagwera le bašomimmogo ba MP, Mohumagadi Thandi Gloria Mpambo-Sibhukwana, yo a bilego leloko la Palamente ya boselela ka Kopanongkgothe ya Maloko a Palamente, ka morago ga go šoma bjalo ka moemedi wa sa ruri wa Kapa Bodikela ka Lekgotleng la Bosetšhaba la Diprofense ka Palamenteng ya Bohlano. O šomile mengwaga ye mentši bjalo ka morutiši pele ga ge a eba MP.
3. Bao ba Thwetšwego Mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
1. Lekgotla la Mogwebišani wa Taemane wa Mmušo:
a. Mohumagadi Monica M Ledingwane (Modulasetulo);
b. Mohumagadi Faith T Mokwena;
c. Morena Levy G Rapoo; le
d. Mohumagadi Mpho Mosing.
2. Lekgotla la Molaodi wa Taamane le Dimetale tše Bohlokwa la Afrika Borwa:
a. Morena Morake Abiel Mngomezulu (Modulasetulo);
b. Morena Yershen Pillay;
c. Mohumagadi Kanyisa Macingwane;
d. Mohumagadi Mpho Mosing;
e. Mohumagadi Phydelis Zikalala-Mvelase;
f. Morena Warren Wayne Adams; le
g. Morena Ernest Blom.
3. Maloko ao a Sego a Khuduthamaga a Lekgotla la Taolo ya Setheo sa Ditimela tša Banamedi la Afrika Borwa:
a. Morena Leonard Ramatlakane (Modulasetulo);
b. Moatbokeiti Smanga Sethene;
c. Morena Matodzi Mukhuba;
d. Mohumagadi Boitumelo Mokgoko;
e. Morena Dinkwanyane K Mohuba;
f. Ngaka Alison E Lewis;
g. Mohumagadi Nosizwe Nokwe-Macamo;
h. Mohumagadi Thinavhuyo N Mpye;
i. Moemedi go tšwa go Kgoro ya Dinamelwa;
j. Moemedi go tšwa go Kgoro ya Ditšhelete; le
k. Moemedi go tšwa go Mokgatlo wa Dipušoselegae wa Afrika Borwa.
4. Lekgotla la Balaodi la Ditšweletšwa tša Tlhago la Onderstepoort (SOC) Limited:
a. Mohumagadi Rene A Kenosi (Modulasetulo);
b. Moprofesara Khathutshelo A Nephawe;
c. Mohumagadi Nona N Sonjani;
d. Morena Lufuno Nematswerani;
e. Mohumagadi Kribashni Naidoo; le
f. Morena Luvuyo Mabombo.
5. Morena Pieter Uys Pretorius bjalo ka Motlatšamolaodipharephare (DDG): Ditirelo tša Khamphani ka go Kgoro ya Pušo ya Tirišano le Merero ya Setšo.
6. Mohumagadi Nonhlanhla Patience Mkhize bjalo ka DDG: Mananeo a Tikologo ka go Kgoro ya Tikologo, Kagodithokgwa le Boreahlapi.
7. Moatbokheiti Martin Mothusi Mafojane bjalo ka Moabi o Mogolo wa Bohwa ka go Kgoro ya Toka le Tlhabollo ya Molaotheo.
8. Morena Nakampe Joseph Mogale bjalo ka DDG: Ditirelo tša Taolo ya Khamphani ka Kantorong ya Moahlodimogolo.
9. Morena Livhuwani Tommy Makhode bjalo ka DG ya Kgoro ya Merero ya Selegae.
Dipotšišo: Mohumagadi Phumla Williams – Seboleledi sa Kabinete
Mogala: 083 501 0139
Letšatšikgwedi: Labone la 22 Diphalane 2020
E abilwe ke: Tirelo ya Tshepedišo ya Dikgokagano tša Mmušo (GCIS)
www.gcis.gov.za; www.gov.za
