A. Merero ye Bohlokwa Seemong sa Bjale
1. Bafenyi ba Sebjana sa Lefase sa Rakepiyi sa 2023
1.1. Kabinete e lebogišitše sehlopha sa Springboks ka phenyo ya sona ya Sebjana sa Lefase sa Rakepiyi sa 2023 yeo e dirilego gore Afrika Borwa e be naga e nnoši yeo e thopilego Sebjana sa Lefase sa Rakepiyi makga a mane (4) le go ba naga ya bobedi ya go thopa sefoka gabedi ka tatelano.
1.2. Mo historing ya rakepiyi ka Afrika Borwa, sehlopha se sa Springboks ke se se fapaneng kudu go ya ka kemedi ya dipalopalo tša batho ba Afrika Borwa. Tlhopho ya sehlopha se bjalo se se fapaneng e be e se tiro ya go itiragalela fela, eupša e be e le maitapišo a ka boomo a balaodi le bahlahli ba sehlopha sa Springboks go kgetha sehlopha seo se akaretšago bohle. Sephetho seo sa sebete sa mohlahli wa nako yeo Rassie Erasmus le sehlopha sa gagwe se tšwela pele go laetša Maafrika Borwa le lefase ka moka, gore mang le mang yo a nago le bokgoni, ge a ka fiwa sebaka le thekgo, a ka ba mogale – tiišetšo ya gore re ba le Maatla ge re le Mmogo.
1.3. Sa bohlokwahlokwa, kgotlelelo le boikemišetšo bja sehlopha sa Springboks lepatlelong la dipapadi ke mohlala wa moya wa nnete wa go ba Moafrika Borwa, tšeo di dirago gore re be setšhaba se setee se segolo kgahlanong le ditšhitišo le mathata ka moka gore sehlopha se atlege go ba mofenyi. Ba bangwe ba dibapadi tše kaone tša sehlopha se sa Springboks ba ile ba swanelwa ke go fenya mathata a motho ka noši tseleng ya bona ya go ya bogolong.
1.4. Kabinete e lebogišitše Siyamthanda “Siya” Kolisi, mokapotene wa go thopa Sebjana sa Lefase gabedi sa Springboks ka go eta pele sehlopha gore se fihle maemong a go ba Dinkgwete tšeo di Dirilego Mošomo wa go Kgahliša (GOAT) gomme meketeko e swanetše go tšwela pele.
2. Foramo ya AGOA
2.1. Kabinete e amogetše tiišetšo yeo e dirilwego bobedi ke mmušo wa Amerika le Palamente ya yona ka maikemišetšo a go oketša nako ya go šoma ga AGOA, yeo e fago babeeletši maatla ka dinageng tšeo AGOA e di šomelago.
2.2. Kabinete e be e amogetše gape go swarwa ga Foramo ya AGOA ya 2023 ka Johannesburg go tloga ka la 2 – 4 Dibatsela 2023 ka bakgathatema ba go tšwa dinageng tše 32 tša Afrika go tšwa mmušong, Kgwebong, setšhabeng sa badudi le bašoming lekga la mathomo le baemedi ba mmušo wa Amerika.
2.3. Kabinete e be e dutše e tiišetša gore AGOA e fa Amerika sebaka sa go matlafatša kamano ya yona ya ikonomi le Afrika gomme ka go realo e swanetše go oketša nako ya go šoma ga AGOA ka nako ya go bonagala, go e dira gore e be le khuetšo le go goga šedi.
3. Kopano ya Ditona tša Boeti tša BRICS
3.1. Kabinete e amogetše go fihla mafelelong ka katlego ga Kopano ya Ditona tša Boeti ya BRICS ya 2023 yeo e swerwego ka Motsekapa, yeo e tlamilego ditšhabamaloko go tšhomišano ye e tseneletšego le go tšwetša pele boeti bja ka gare ga BRICS, go hlabolla ditsela tša go kaonafatša maeto a boeti le kgokagano magareng ga dinagamaloko.
3.2. Se se tla matlafatša gape lefapha la boeti la Afrika Borwa leo le šetšego le bontšha maswao a tsošološo. Dikgweding tše 8 tša mathomo tša 2023, baeti ba dimilione tše 5.5 ba tsene ka gare ga naga bao ba emetšego koketšego ya 63.4% go tloga nakong ye e swanago ka 2022.
4.Boingwadišo bja Bakgethi
4.1. IEC e tsebišitše letšatšikgwedi la 18 le la 19 Dibatsela 2023 bjalo ka mafelelo a beke a mathomo a boingwadišo bja bakgethi ba Dikgetho tša Kakaretšo tša 2024.
4.2. Kabinete e ipiletša go bakgethi ka moka bao ba nago le maswanedi go ingwadišetša go kgetha go Dikgetho tša Kakaretšo tša 2024 diteišeneng tša go kgetha tša kgauswi le bona.
4.4. Boingwadišo bja bakgethi bja inthanete bo buletšwe go tloga ka Dibokwane 2023 gomme badudi ba hlohleletšwa go šomiša inthanete go ingwadiša goba go mpshafatša dintlha tša bona.
4.5. Maafrika Borwa ao a dirilego dikgopelo tša di-ID a hlohleletšwa go etela ofisi ya tikologo ya gabo bona ya Merero ya Selegae go di tšea. Go na le disematekhathe tša ID tša go feta 500 000 tšeo di sa ntšego di swanetše go tšewa dikantorong tša Merero ya Selegae go ralala le naga.
5. Mohlagase
5.1. Tona ka Kantorong ya Mopresidente yeo e rwelego maikarabelo a Mohlagase o file tshedimošo ye e feletšego ka ga maemo a mohlagase ka nageng.
5.2. Kabinete e retile maitapišo a Mmušo wa Profense ya Gauteng wo o šomišanago le Eskom go bušetša mohlagase mafelong a Gauteng ao a hlasetšwego ke go tima ga mohlagase ka lebaka la bohodu goba tshenyo ya ditransefoma.
5.3. Maabane bošego, ditransefoma tše tshela tše mpsha tša mohlagase di tšhumilwe go la Kagiso, tikologong ya West Rand morago ga gore ditšhaba di dule di se na mohlagase mengwaga ya go feta ye 3.
5.4. Kabinete e ipiletša go ditšhaba tše go šireletša mananeokgoparara a bohlokwa go bohodu, tshenyo ya ka boomo le tshenyo yeo e hlolwago ke dikgokagano tšeo di sego molaong.
6. Mpholo wa Dijo
6.1. Kabinete e tshwenyegile ka go ata ga go ja ga bana mpholo wa dijo ka lebaka la go ja dijo tšeo di fetilwego ke nako le tšeo di šilafetšego go tšwa mabenkeleng a diphaza le barekišing ba mebileng.
6.2. Kabinete e hlohleletšwa ke maitapišo a phethagatšo ya molao go gapeletša tatelo ya polokego ya dijo.
7. Tlhahlo ya Maemo a Boditšhabatšhaba ya Bomeyara le Magoši ka Bofaladi
7.1. Kabinete e tsebišitšwe ka ga Tlhahlo ya Maemo a Boditšhabatšhaba ya Bomeyara le Magoši ka Bofaladi yeo e swerwego ke Kgoro ya Merero ya Selegae ka go kgatha tema ga Kgoro ya Tlhabollo ya Dikgwebopotlana, Kgoro ya Pušotirišano le Merero ya Setšo, Kgoro ya Bodulo bja Batho kamoka le magoši le bomeyara go tšwa mebasepaleng ya dimetro le ya dilete bao ba bego ba lebeletše kudu go thibela ditlamorago tša bofaladi bjo bo sego molaong, go akaretšwa le ditshepedišo tša mabenkele a diphaza.
7.2. Dipoelo tše bohlokwa di akaretša go tsebagatšwa ga melawana ye mmalwa go rarolla ditlhohlo tše di amanago le phethagatšo ya melawana ya kgwebo ke mebasepala le balaodi ba setšo. Go tla ba le ditlhahlobo tša mohlakanelwa tša ka pela tša dikgwebo, kudukudu mabenkele a diphaza ka dikgoro tša bašomi, maphelo, tlhabollo ya dikgwebopotlana le dihlopha tša bahlahlobi ba bofaladi ba Merero ya Selegae, go bona gore melao ye e amegago e a latelwa.
7.3. Go tla dirwa tekolo ya mabenkele a diphaza ka metseng le ditoropong, le mekgwa ya go a ngwadiša bobedi ka baetapele ba setšo le mebasepala. Gape go na le maitapišo a go thekga balaodi ba setšo gore ba boloke rekoto ya badudi ba dinagadišele ditšhabeng tša bona.
7.4. Molao wa dilaesense tša kgwebo o a fetošwa go thekga bohle bao ba ratago go gweba ka lekaleng leo e sego la semmušo.
8. Twantšho ya Bosenyi ye e Kopanetšwego
8.1. Kabinete e retile SAPS ka go šwalalanya segongwana sa boditšhabatšhaba sa diokobatši ka morago ga go hwetšwa ga khokheine ya boleng bja R80 milione yeo e thopilwego ka la 20 Diphalane 2023 ka lefelong la polokelo ka Boemakepeng bja Kgwebišano bja Dube ka gare ga Boemafofane bja Boditšhabatšhaba bja King Shaka. Matšatši a mabedi pele ga se, khokheine ye nngwe ya boleng bja R70 milione le yona e thopilwe ka gare ga khontheina Boemakepeng bja Durban.
8.2. Kabinete e reta SAPS ka mošomo wa bona wa go šitiša le go šwalalanya bosenyi bjo bo rulagantšwego bja boditšhabatšhaba bjo bo beago badudi le naga kotsing ye kgolo.
8.3. Lesolo la Sehla sa Matswalo a Morena se se Bolokegilego le šetše le tšweletša dipoelo ka maphodisa ao a golegilego bagononelwa ba go feta 140, go akaretšwa le dintona tša meepo yeo go thwego ga e molaong, le go thopa dithunya tšeo di se nago mangwalo a tumelelo.
9.Ketelo ya Tekolo ya Mopresidente
9.1. Kabinete e amogetše Ketelo ya Tekolo ya Mopresidente go Mmasepala wa Emfuleni, yeo e latetšego ditšhomišano le setšhaba nakong ya ketelo ya Mmotlolo wa Tlhabollo ya Selete wa 2022.
9.2. Ketelo ya 2022 ya Emfuleni e lemogile ditaba tša tlhokomelo ye mpe ya mananeokgoparara ka masepala.
9.3. Ka tsenogare ya Kgoro ya Meetse le Kelelatšhila, go bile le kgatelopele ye e lemogegago ka go rarolla ditlhohlo tša mananeokgoparara a meetse le tlhwekišo tšeo di feleleditšego ka go phuhlama ga tshepedišo ya Meetse a Ditšhila a Vaal.
9.4. Go dirilwe mošomo wa go kaonafatša kabo ya meetse, go šoma gabotse ga mananeokgoparara a meetse a ditšhila gomme ka go realo go fediša bothata bja meetse a ditšhila ao a sepelago a kitima mebileng le dijarateng tša batho.
9.5. Kgatelopele ye e lemogilwego nakong ya ketelo ye e akaretša dikaonafatšo tša diphaephe tše bohlokwa tša bontši le diteišene tša dipompo tša meetse, go tšweletšwa gape le go tswalelwa gape ga ditsela, le thakgolo ye kgolo ya mabone a setarateng go kaonafatša mabone le polokego.
10. Mmapatsela wa Mokgwa wa Dithulaganyo tša Merwalo ka Afrika Borwa
10.1. Kgoro ya Dinamelwa e thomile ditherišano ka ga Mmapatsela wa Mokgwa wa Dithulaganyo tša Merwalo ka Afrika Borwa, bjalo ka karolo ya magato a go rarolla ditlhohlo tšeo di lebanego le lekala la go rwala merwalo le dithulaganyo le go matlafatša maitapišo a go tsošološa ikonomi ya Afrika Borwa.
11. Tlhabollo ya Mananeokgoparara le Tlhokomelo
11.1. Kabinete e amogetše kgatelopele ye e dirwago ka tlhabollo ya mananeokgoparara le tlhokomelo ka go phethwa ga maporogo a dinagamagaeng a 36 ka fase ga Maporogo a Dinagamagae a Welisizwe, le kago ye e tšwelago pele ka diprotšekeng tše 20 ka mafelong a bodulo a batho, ditsela, le meetse.
12. Thakgololeswa ya Ditsela tša Boditšhabatšhaba tša South African Airways (SAA)
12.1. Kabinete e amogetše thakgololeswa ya ditsela tša boditšhabatšhaba tša SAA ka go tsebagatšwa leswa ga sefofane sa yona go kgabaganya dikontinente go ya São Paulo, Brazil, seo gape se swayago go boya ga tirelo ya leeto le letelele go tšwa Motsekapa le Johannesburg.
12.2. Go boya ga SAA ka ditseleng tša boditšhabatšhaba go tla tsenya letsogo thwii go hlohleletša kgolo ya maeto a boditšhabatšhaba go ya ka nageng, le kgolo ya lefapha la boeti morago ga masetlapelo a leuba la COVID-19.
13. Afrika Borwa e Thakgola Troune ye Kgolokgolo mo Afrika
13.1. Kabinete e lebogišitše khamphani ya Tšhireletšo le ya sefofane ya Milkor ka go tsebagatšwa ga bona ka katlego ya sefofane sa eriale ya go se sepetšwe sa Milkor 380 (UAV), seo se beago Afrika Borwa gare ga dinaga tšeo di tšwelago pele go dira dikgatelopele ka theknolotšing ya ditroune.
13.2. Milkor 380 ke troune ye kgolo yeo e agilwego ka Afrika gomme e tla šomišwa ke intasteri ya tšhireletšo go lwa, taolo ya mellwane, maitapišo a pabalelo go akaretšwa go lwantšha go tsoma ka tsela ye e sego molaong.
14. Ditlhahlobo tša Dikolo tša Mphato wa Marematlou le tša Mafelelo a Ngwaga
14.1. Kabinete e amogetše go thoma ka thelelo ga ditlhahlobo tša Setifikeitisegolo sa Bosetšhaba (marematlou) tša 2023, tšeo di thomilego ka la 30 Diphalane 2023. Batswadi le bahlokomedi ba hlohleletšwa go tšwela pele go thekga baithuti mo nakong ye ye bohlokwa.
14.2. Kabinete e romela gape dikeletšo tša yona tše botse go baithuti ka moka bao ba tlago dula ditlhahlobong tša
B. Diphetho tša Kabinete
1. Maemo a Palestina
1.1. Kabinete e nyamišitšwe ke go gana ga mmušo wa Israele go hlompha molao wa boditšhabatšhaba le go tšwela pele ga wona go nyenyefatša diphetho tša Ditšhabakopano tša phethagatšo ya peo ya marumo fase ntle le kotlo.
1.2. Ditsela tša thušo ya botho go batho ba Palestina di sa tswaletšwe ka ditlamorago tše šoro go bana, basadi le badudi bao ba se nago molato.
1.3. Ditlhaselo tša difofane tša polao ya molokwanarite ke mmušo wa Israele go batho ba Palestina, di tšwela pele ka go hlatloga ga palo ya mahu ao a akaretšago basadi le bana. Matšatšing a mabedi a go feta, lefase le dutše le se na thušo gomme la lebelela ge ditlhaselo tša difofane tšeo di gateletšago Gaza le West Bank di sentše dikolo, mafelo a maphelo, diampulensi le mananeokgoparara a setšhaba le ditsela tšeo go thwego di bolokegile tšeo di sepelago ka Borwa bja Gaza.
1.4. Go tše, Kabinete e tšeere sephetho sa go gopotša badiplomate ka moka ba Afrika Borwa go tšwa Tel Aviv gore ba boledišane.
1.5. Kabinete e lemogile gape ka go tshwenyega dipolelo tše di tšwelago pele tša go nyatša tša motseta wa Israele ka Afrika Borwa, Morena Eliav Belotsercovsky, kgahlanong le Maafrika Borwa, boetapele bja Afrika Borwa ka gare le ka ntle ga mmušo go akaretšwa le setšhaba sa badudi bao ba bolelago kgahlanong le polao ya setšhaba yeo e dirwago ke Mmušo wa Israele kgahlanong le Mapalestina.
1.6. Dipolelo tša go nyatša tša Moemedi Belotsercovsky di fapanywa ke dipolelo tša batseta ba babedi ba peleng ba Israele ka Afrika Borwa (Illan Baruch le Dr. Alon Liel) bao ba bego ba sa fetoge go hlaloša ditiro tša mmušo wa bona kgahlanong le Mapalestina bjalo ka Kgethollo.
1.7. Dipolelo tše di nyenyefatšago kgahlanong le bao ba bolelago kgahlanong le ditiro tše sehlogo le baetapele ba naga di dira gore maemo a motseta Belotsercovsky a se kgotlelelege le go feta. Ka ge go le bjalo Kabinete e laetše Kgoro ya Dikamano tša Boditšhabatšhaba le Tirišano go fetišetša ka dikanale tša bodiplomate molaetša wa semmušo wa mmušo wa Afrika Borwa wa go se thabele maitshwaro a motseta.
2. Setatamente sa Pholisi ya Tekanyetšo ya Lebaka la Magareng
2.1. Kabinete e amogetše Setatamente sa Pholisi ya Tekanyetšo ya Lebaka la Magareng (MTBPS) sa 2023, seo se filego kelo ya go se pepetletše ya maemo a bjale a ikonomi le go laetša go swara ga mmušo ka go tia ditšhelete tša setšhaba sa rena gare ga dithibelo tše thata tša letseno.
2.2. Diphetho tšeo di lego ka go MTBPS di kaonafatša tlhako ya rena ya ditšhelete; di hlohleletša kgolo ya ikonomi mola re lekalekanya maitlamo a rena a leago ao a thekgago bao ba lego kotsing setšhabeng sa rena.
2.3. Leano la Kagoleswa le Tsošološo ya Ikonomi le bile le seabe go mahlogedi a matala ikonoming ya rena.
3. Go Agwa ga Ditimela tša Lebelo le Legolo
3.1. Kabinete e dumeletše Tlhako ya Go Agwa ga Ditimela tša Lebelo le Legolo gomme go tla ahlaahlwa ditšhelete tša go phethagatša mošomo magareng ga Tona ya Dinamelwa le ya Ditšhelete.
3.2. Kabinete e dumeletše go fa šedi ya pele tsela ya Johannesburg go ya Durban bakeng sa nyakišišo ya kgonagalo ye e tletšego, gomme Johannesburg-Polokwane go ya Musina, le Johannesburg go ya Mbombela di tla bewa mmarakeng.
4. Sethalwa sa Sengwalwa ka ga Boagi, Bofaladi le Tšhireletšo ya Bafaladi
4.1. Kabinete e dumeletše phatlalatšo ya Sethalwa sa Sengwalwa ka ga Boagi, Bofaladi le Tšhireletšo ya Bafaladi bakeng sa ditshwayotshwayo tša setšhaba.
4.2. Sengwalwa sa Pholisi se ikemišeditše go fa tlhako ya go hlahla kabo ya bodulo le boagi go badudi ba dinaga tša ka ntle, gammogo le tšhireletšo ya bafaladi le bakgopedi ba botšhabelo ka Afrika Borwa, go lemoga dikgahlego tša tšhireletšo ya bosetšhaba tša Repabliki le go obamela ditumelelano tša boditšhabatšhaba le diprothokhole ka ga khudugo yeo Afrika Borwa e lego mokgahlo go yona.
5. Pego ya Kgatelopele ya Ngwaga le Ngwaga ya bo 6 ka ga phethagatšo ya Sethalwa sa Sengwalwa sa Ditokelo tša Batho ba go Phela ka Bogolofadi
5.1. Kabinete e dumeletše go phatlalatšwa ka kuranteng ya mmušo Pego ya Kgatelopele ya Ngwaga ka Ngwaga ya bo 6 ka ga phethagatšo ya Sethalwa sa Sengwalwa sa Ditokelo tša Batho ba go Phela ka Bogolofadi.
5.2. Kgatišo ya pego ya kgatelopele e tla sepelelana le segopotšo sa boditšhabatšhaba sa Kgwedi ya Temošo ya Ditokelo tša Bogolofadi go tloga ka la 3 Dibatsela go fihla ka la 3 Manthole.
5.3. Pego ya kgatelopele e laetša gape koketšego ya nepišo ya tekatekano ya mešomo ya fasefase go tloga go 2% go ya go 3% go batho bao ba golofetšego go tloga ngwageng wa ditšhelete wa 2024/2025, go ya go nepišo ya bonnyane bja 7% ya tekatekano ya mešomo go batho bao ba golofetšego ka 2030.
C. Melaokakanywa
1. Sethalwa sa Molaokakanywa wa Sekhwama sa Tsošološo ya Afrika le Tirišano ya Boditšhabatšhaba (ARF)
1.1. Kabinete e dumeletše go romelwa ga Molaokakanywaphetošo wa ARF Palamenteng.
1.2. Molaokakanywa wo o nyaka go fetoša Molao wa ARF (Molao wa 51 wa 2000) le go hloma Setheo sa Selekane sa Tlhabollo ya Afrika Borwa, seo se tlago šoma bjalo ka mokgwa wa go thekga tlhabollo le tirišano ya Afrika Borwa le dinaga tša baagišane ka tšwetšopele ya temokrasi, taolo ye botse, thibelo le tharollo ya phapang, tlhabollo ya ikonomi ya leago le kopanyo.
D. Go Thwalwa Mošomong
Go thwalwa mošomong ka moka di laolwa ke kgonthišo ya mangwalo a thuto le tumelelo ya maleba.
1. Go thwalwa ga Morena Ebrahim Rasool bjalo ka Modulasetulo wa Panka ya Tlhabollo ya Borwa bja Afrika.
2. Go thwalwa ga Mohumagadi Margaret Mosibudi Phiri bjalo ka leloko la Boto ya Bosetšhaba ya Taolo ya Nyutlelia
E. Ditiragalo tše di Tlago
1. Poledišano ka Twantšho ya Bomenetša
1.2. Poledišano ya Twantšho ya Bomenetša e tla swarwa ka la 8 le la 9 Dibatsela 2023 kua Birchwood Hotel ka Ekurhuleni go kgoboketša setšhaba go lwantšha bomenetša go sepelelana le Leano la Bosetšhaba la Twantšho ya Bomenetša la naga.
1.2. Kabinete, ka Dibatsela 2020, e dumeletše Leano la Bosetšhaba la Twantšho ya Bomenetša (NACS 2020-2030). Le ke leano la naga leo le ikemišeditšego go hlola setšhaba seo se se nago bomenetša mola gape le hlohleletša badudi go ba le kgotlelelo ya lefela ya bomenetša le go obamela pušo ya molao.
2. Lesolo la Matšatši a 16 a Boikgafo bja go Lwantšha Dikgaruru tša Twantšho ya Basadi le Bana la 2023
2.1. Ngwageng wo o swaya segopotšo sa bo 25 sa go tšea karolo ga Afrika Borwa mo Lesolong la Matšatšing a 16 a Boikgafo bja go Lwantšha Dikgaruru tša Twantšho ya Basadi le Bana la 2023 leo le tlago hlokomelwa ka fase ga morero: “Go akgofiša magato a go fediša dikgaruru le dipolao tša basadi (GBVF): go sa tlogelwe motho morago”.
2.2. Lesolo le la lefase ka bophara le thoma ka la 25 Dibatsela, Letšatši la Boditšhabatšhaba la go Fediša Dikgaruru tša Twantšho ya Basadi go fihla ka la 10 Manthole, Letšatši la Boditšhabatšhaba la Ditokelo tša Botho. Lesolo le le ikemišeditše go lwantšha dikgaruru tša twantšho ya basadi mola le thekga ditokelo tša botho.
3. Foramo ya bo14 ya Poledišano ya Pholisi
3.1. Afrika Borwa mmogo le Sehlopha sa Boditšhabatšhaba sa Mošomo wa Barutiši sa Thuto (TTF) sa UNESCO ba tla swara Foramo ya bo14 ya Poledišano ya Pholisi ka Pherekgong 2024 ka fase ga morero wa “Go rarolla tlhaelelo ya barutiši le go dira gore profešene ye e kgahliše kudu”.
3.2. Foramo e tla kopanya bahlankedi ba mmušo, mekgatlo ye e sego ya mmušo, barutiši le ditsebi tša thuto go ahlaahla ditaba tše bohlokwa tšeo di lebanego le maemo a tirelo go barutiši, ditaba tša boipušo bja barutiši le boikarabelo gammogo le ka fao go ka dirago gore borutiši e be profešene ye e kgahlišago.
F. Melaetša
1. Ditebogišo
Kabinete e rometše ditebogiso tša yona le go lakaletša mahlatse:
- Sehlopha sa Proteas ka go hwetša maemo go makgaolakgang a Sebjana sa Lefase sa ICC sa 2023 ka India. Le ge se lahlegetšwe papading ya bona kgahlanong le India maabane, naga e dula e le ka morago ga sehlopha ka maatla gomme e na le tshepho ya gore ba tla tšwela pele go phošolla diphošo le go dira gore re ikgantšhe ka sona.
- Naletšana ya mabelo a Moto GP Brad Binder yo bjale e lego moswari wa rekoto ya sefala sa sehlopha sa maemo a godimo ka go lebanya bakeng sa Afrika Borwa ka morago ga go fetša ga gagwe tše tharo tša godimo ka Thailand Grand Prix.
- Moagi wa mathomo wa Afrika Borwa wa go šomiša setulo sa bagolofadi Macethandile Kulati, ka go šireletša sefoka sa gagwe ka 2023 sa go ba nkgwete ya meraloko ya Mokgatlo wa Boditšhabatšhaba wa Baraloki ba go Kuka Ditšhipi ba Lefase le ba Boitekanelo ba go Aga Mmele ka Slovenia.
- Diakhaontente tše di Hlomilwego tša Afrika Borwa ka go hwetša maemo a godimo nyakišišong ya lefase ka bophara ya ditshepetšo tša profešenale ya Edelman.
- Ngaka Claude Mashego ka go thopa Sefoka sa Mohumagatšana wa Lefase wa mathomo wa Afrika Borwa gomme bjale o tla emela Afrika Borwa Difokeng tša Mohumagatšana wa Lefase ka New Delhi, India ka Manthole ngwageng wo.
- Atebokheite Kholeka Gcaleka ka morago ga go thwalwa ga gagwe bjalo ka Mošireletši yo moswa wa Setšhaba lebaka la mengwaga ye šupa go thoma ka la 1 Dibatsela 2023.
2. Mantšu a kwelobohloko
Kabinete e laeditše mantšu a kwelobohloko go ba lapa le bagwera ba:
- Mofenyi wa sefoka sa gauta sa Bagolofadi Zanele Situ yo e bilego moatlelete wa mathomo wa mosadi wa mothomoso wa Afrika Borwa yo a thopilego sefoka sa gauta Dipapading tša Bagolofadi kua Sydney ka 2000.
- Mothuši wa peleng wa mohlahli wa Bafana-Bafana le naletsana ya kgwele ya maoto Phil “Mr Jones” Setshedi.
- Mowaranteofisa Sthembiso Mazibuko wa Yuniti ya Tsenogare ya Bosetšhaba yo a bolailwego nakong ya go thuntšhana le disenyi ka Ntuzuma, KwaZulu-Natal.
Dipotšišo:
Mohumagadi Nomonde Mnukwa
Mmoleledi wa Mmušo wa Motšwaoswere
Selefoune: 083 653 7485
E phatlaladitšwe ke: Tshepetšo ya Dikgokagano le Tshedimošo ya Mmušo (GCIS)
Letšatšikgwedi: Mošupologo, 6 Dibatsela 2023
www.gcis.gov.za; www.gov.za
