Khabinethe yo ṱangana kha muṱangano wayo wa u fhedza wa 2017 ngei Union Buildings kha ḽa Pretoria.
A. Tsheo dza Khabinethe
1. Khabinethe yo tendela u thomiwa ha Maano a Sekithara ya Vhuendelamashango ha Lushaka (NTSS) a 2016-2026. NTSS yo tewa kha thikho dza maano maṱanu, dzine dza vha zwa thengiso, u tshimbidzwa ha ndeludzo ya tswikelelo ya vhuendelamashango, u khwaṱhisa tshenzhemo ya vhaeni, ndango ya vhuyo na mbuelo dzo ṱanḓavhuwaho. Ḽiṅwalo ḽo fhelelaho ḽi kho wanala kha webusaithi ya Muhasho wa Vhuendelamashango: www.tourism.gov.za
2. Khabinethe yo tendela muhanga kha u thomiwa ha Khamphani ya Nethiweke ya Burodibennde ya Lushaka. I ḓo vhumbwa u bva kha vhushumisani ha Sentech na Broadband Infraco. Hezwi zwi ḓo tshimbidza u rwelwaṱari ha zwipiḓa zwi tikedzanaho nga nḓila ya tshumisano na u sika vhugwena ha burodibennde ya lushaka.
3. Khabinethe yo tendela Muvhigo wa u Thoma wa Mvelaphanḓa ya Ṅwaha nga Ṅwaha kha u Thomiwa ha Nḓivhadzamulayotibe kha Pfanelo dza Vhathu vha na Vhuholefhali (WPRPD). Muvhigo u katela themo ya u bva ḽa 1 Phando u swika ḽa 31 Nyendavhusiku 2016.
Muvhigo u ṋetshedza ngaganyo ya maimo a nṱha a nḓila ine mihasho ya muvhuso yo no thoma u lugisa matshimbidzele a mbekanyamaitele dza WPRPD kha sisiṱeme ya kupulanele, mugaganyagwama na nḓisedzo ya tshumelo na sisiṱeme dza u vhiga.
4. Khabinethe yo tendela u anḓadzwa ha Muhanga wa Mbekanyamaitele ya Maano a Vhuholefhali wa Pfunzo ya Nṱha na Sisiṱeme ya Vhupfumbudzi uri tshitshavha tshi bvise vhupfiwa.
5. Khabinethe yo nyeṱulelwa nga ha mvelelo dza Tsedzuluso dza Mbekanyamushumo ya Nzudzanyululo ya Dzithekhisi dzo itwaho u bva nga Lara 2015 u swika Khubvumedzi 2016. Mbekanyamushumo iyi ndi tshipiḓa tsha Maano a Vhuendi ha Tshitshavha o ṱanḓavhuwaho, ane ndivho yao ha vha u ṋetshedza tsireledzo yo ṱanganelaho na sisiṱeme yo fanelaho ya vhuendi Afrika Tshipembe.
Khabinethe yo tendela uri nyengedzeo kha vhuvhudzisi na mushumo zwi tea u itiwa na mihasho yo teaho phanḓa ha musi Muhasho wa Vhuendi wa Lushaka u tshi shumisa maitele o vusuluswaho.
6. Khabinethe yo tendela u bviselwa tshitshavhani ha khanḓiso ya vhumalo ya Zwisumbi zwa Mveledziso (2016). Muvhigo wa Zwisumbi zwa Mveledziso wo sedza kha mveledziso ya Afrika Tshipembe u bva tshe demokirasi ya vha hone na u ṱola u thomiwa ha Pulane ya Mveledziso ya Lushaka: Bono 2030.
7. Khabinethe yo tendela maga a u khwaṱhisa ndango ya ndaṱiso ya vhashumi vha muvhusoni maelana na vhaofisiri vhane vha ita zwa mabindu na zwiimiswa zwa muvhuso. I ṋea maaanḓa Ndangulo dza Tshumelo ya Tshitshavha dza 2016, dzi hanelaho vhashumi vha muvhuso uri vha ite zwa mabindu na Muvhuso. U bva nga 1 Ṱhafamuhwe, Vhufaragwama ha Lushaka, hu tshi tikedzwa nga Muhasho wa Tshumelo ya Muvhuso na Ndaulo (DPSA), zwi ḓo ṱola u ṅwaliswa hoṱhe hu itwaho kha inthanethe kha Central Supplier Database (CSD) i tshi vhambedzwa na Sisiṱeme ya Persal.
8. Khabinethe yo tendela Ndangulo Ntswa ya Kushumele na Mveledziso ya Sisiṱeme kha Ṱhoho dza Mihasho, zwine zwa tou sumbedzisa zwavhuḓi vhuṱumani vhukati ha kushumele kwa muthu na dzangano. I ḓo thoma u shuma nga ḽa 1 Lambamai 2018.
9. Khabinethe yo tendela u thomiwa na u shumiswa ha Muhanga wa Tshikimu tsha Tshumelo ya Tshitshavha ya u Thola Matshudeni vho Ṱhaphudzaho Pfunzo. Hezwi ndi tshipiḓa tsha mbekanyamushumo ya mveledziso ya kha Tshumelo dza Tshitshavha ya u kunga matshudeni vho fhedzaho pfunzo dza nṱha vha na vhukoni kha Tshumelo dza Tshitshavha.
Muhanga u katela u vhetshela thungo masheleni a poso iṅwe na iṅwe i si na muthu kha mihasho hu u itela u thola matshudeni vho fhedzaho pfunzo dza nṱha kha mishumo i si na vhathu vhanzhi. Minisiṱa wa Tshumelo ya Muvhuso na Ndaulo vha ḓo dovha vha livhanya muhanga uyu na Mbekanyamushumo ya Tshumelo dza Mishumo ya Vhaswa.
10. Khabinethe yo tendela u anḓadzwa ha Nothisi dzi tevhelaho kha Gazete ya Muvhuso zwi tshi elana na Vhuḓiimeleli vhu Pfadzaho ha Mannḓalanga a Maga a Mulayo Dzikhothe, zwo sedzaho kha u engedza tswikelelo ya vhulamukanyi kha vhupo ha mahayani he ha vha ho tsikeledzea na u sa wana tshumelo. Maitele a ya a mveledziso a kha zwiṱiriki zwa madzhisiṱirata ngei Free State na Kapa Devhula, na u bviswa ha zwiṅwe Zwiṱiriki zwa Madzhisiṱirata kha Khethekanyo ya Khothe Khulwane ya Gauteng uri zwi ye fhasi ha Khethekanyo ya Khothe Khulwane ya Devhula Vhukovhela.
11. Khabinethe yo tendela Ndaulo kha Ndayo ya Vhupfumedzani u ya nga Mulayo wa Tsireledzo ya Vhubindundzi, wa 2015 (Mulayo wa vhu 22 wa 2015). Mulayo uyu wo sedza kha mubindudzi ane a sa tendelane na ḽiga ḽo dzhiiwaho nga muvhuso kha zwa vhubindudzi, uri a ise khumbelo kha Muhasho wa Mbambadzo na Nḓowetshumo (the dti) uri u dzhenelele nga kha maitele a khonadzeo ya vhupfumedzani.
12. Khabinethe yo tendela u dzudzanywa na u tshimbidzwa ha khonfarentsi dzi tevhelaho:
- Khonfarentsi ya Vhuvhudzisi ha Mbekanyamushumo ya Vhashumi vha Mveledziso ya Tshitshavha ya Muvhuso ya 2018 nga DPSA.
- Khonfarentsi ya Ṅwaha nga Ṅwaha ya vhu23 ya Dzangano ḽa Dzitshakatshaka ḽa Vhatshutshisi, ine ya ḓo tshimbidzwa nga Manḓalanga a Vhutshutshisi ha Lushaka ngei Durban nga Khubvumedzi 2018.
- Foramu ya Saintsi ya Ḽifhasi ya Afrika Tshipembe ya 2021. Muhasho wa Saintsi na Thekhinoḽodzhi u ḓo kwamana na Komiti i Tshimbidzaho Foramu ya Saintsi ya Ḽifhasi u itela khonadzeo ya u tshimbidzwa ha mushumo uyu.
- Mufhindulano wa Maimo a Nṱha wa Mbumbano ya Afrika (AU) wa 2017, une wa ḓo tshimbidzwa nga DPSA u bva nga ḽa 6 u swika ḽa 8 Nyendavhusiku 2017.
13. Khabinethe yo tendela miolo na vhakuvhanganyi vha tshihumbudzo na serisi ya khoini ya phaḓaladzo uri i bviswe nga 2018.
Dizaini dza khoini, na nḓivhiso dzayo zwi ḓo ganḓiswa kha Gazete ya Muvhuso:
- 2018 2oz, 22-carat gold ya Krugerrand;
- 2018 24-carat gold ya serisi dza khoini ya Natura (U vuwa ha dainasoso – Archosauria);
- 2018 24-carat gold ya ya serisi dza khoini ya R1 (RZwikokovhi zwa Afrika Tshipembe – tshibode tsha mulomo wa pharoti);
- 2018 bi-metal ya khoini ya R5 i phaḓaladzwaho (Senthenari ya Vho Nelson Mandela);
- 2018 24-carat gold na sterling-silver ya serisi dza khoini ya Protea (Vhutshilo ha Muthu a ḓivhiwaho ḽifhasini – Vho Nelson Mandela);
- 2018 sterling-silver R2 Crown na 2 ½ ya serisi dzaTickey (Zwitumbulwa zwa Afrika Tshipembe – Computed Tomography); na
- 2018 serisi dza khoini yo fhelaho ya muvhala wa silivhere (Zwiṋoni na Maluvha a Waterberg Biosphere Reserve).
B. Mafhungo a Vhuponi
14. Mvelelo dza Zwibveledzwa Guṱe
Khabinethe i khou takadzwa nga nyaluwo ya ikonomi ya Afrika Tshipembe yo aluwaho nga phesenthe mbili kha kotara ya vhuraru ya 2017, u bva kha 2.8% yo sedzululelwaho nṱha kha kotara ya vhuvhili. Kushumele ku fhiraho kwo lavhelelwaho kwo vha hone nga kha nyaluwo yo khwaṱhaho i yaho phanḓa kha sekithara ya vhulimi, ine yo engedzea nga phesenthe dza phoindi dza 0.9 kha nyaluwo yoṱhe yo katelaho ya 44.2% ya nyaluwo ya kotara nga kotara.
Kushumele kwo khwaṱhaho kha zwa vhulimi, kwe kwa ita uri hu vhe na nyaluwo yo dziaho kha kotara tharu nga u tevhekana, kwo vhangwa nga u vha hone ha zwibveledzwa zwinzhi zwa zwiliṅwa (sa mavhele) kha vhupo vhu naho mvula tshilimo na zwibvelezwa zwa maḓaka. Zwa migodi na vhubveledzi na zwone zwo shela mulenzhe kha nyaluwo yo rekhodwaho, he zwa migodi na zwa u bvisa matombo zwa khou engedzea nga 6.6% na u shela mulenzhe kha nyaluwo nga phoindi dza phesenthe dza 0.5.
Sekithara ya muḓagasi yo vha yo salelesa murahu, yo tsa nga 5.5%. Nyaluwo kha tshumiso ya hayani ya 2.6% yo vhangwa nga mannḓa nga u shumiswa ha zwishumiswa zwihulwane zwa nḓuni, zwe zwa ita phoindi dza phesenthe dza 1.6 kha nyengedzo ya 2.6%. Nyaluwo i fhiraho yo lavhelelwaho na tsedzuluso ya nṱha kha mvelelo dza nyaluwo ya kotara ya vhuvhilli zwi amba uri nyaluwo i nga swika kha 0.9% nga 2017.
Hezwi zwi nṱha nga 0.7% ye ya lavhelelwa nga tshifhinga tsha Tshiṱatamennde tsha Mbekanyamaitele ya Mugaganyagwama wa Themo ya Vhukati. Muvhuso u khou tea u vhona uri kualutshele ukwu ku dzule kwo rali nga u isa phanḓa na u shumisa maga a 14 a u engedza fulufhelo ḽi fhaṱaho kha u khwinisa fulufhelo ḽa murengi na uri zwi nga vhuedzedza fulufhelo ḽa mabindu.
15. Tshiimiswa tsha InvestSA tsha Thuso
Khabinethe i ṱanganedza u rwelwaṱari ha Tshiimiswa tsha InvestSA tsha Thuso ngei KwaZulu-Natal nga Muphuresidennde Vho Jacob Zuma sa tshipiḓa tsha vhuḓidini ha u khwinisa ndeludzo ya mabindu Afrika Tshipembe. Hetshi ndi Tshiimiswa tsha Thuso tsha vhuraru tshine tsha khou rwelwatari kha shango. Ndivho yatsho ndi u sika mupo u vhuedzaho nga u ṋetshedza fhethu hu re vhukati kha vhabindudzi uri vha wane tshumelo dzoṱhe u ṱavhanyisa thandela na u fhungudza zwithivheli musi hu tshi thomiwa bindu.
16. Vhushaka ha Afrika Tshipembe na Angola
Khabinethe i ṱanganedza thendelano yo sainwaho nga musi wa Madalo a Tshiofisi Afrika Tshipembe nga Muphuresidennde wa Angola Vho João Manuel Gonçalves Lourenço. Ho sainwa thendelano dzi tevhelaho: Memorandamu wa u Pfesesa (MoU) kha u vhumbiwa ha Khomishini ya Ofisi ya Muphuresidennde ya Mashango Mavhili, MoU kha Tshumisano ya Sia ḽa Mupo, u Shumiswa ha Ndededzo dza waiva ya visa, Phurothokhoḽo kha Tshumisano ya Mapholisa na Thendelano kha Thikhedzo ya Vhulangi ha Ṱhanganelo kha Mafhungo a Mithelo.
17. Samithi ya Vhuṱanu ya Mbumbano ya AU-Europe (EU)
Khabinethe i ṱanganedza mvelelo dza Samithi ya Vhuṱanu ya AU-EU. Samithi yo ḓisa tshikhala kha Afrika Tshipembe tsha u engedza ikonomi ya maano na vhushaka ha vhudipuḽomati nga kha vhudzheneleli ho fhambanaho kha samithi na vhuṅwe vhuṱambo ha nga thungo vhu ngaho Foramu ya Bindu na Samithi ya Vhaswa, yo sedza kha nyaluwo ya ikonomi i katelaho, u tholwa ha vhaswa na vhubindudzi.
18. Mbambadzo ya phuli dza ṱhunḓu dza Afrika
Khabinethe i ḓibadekanya na tshitshavha tsha dzitshakatshaka kha u lwa na mivhigo ya u rengiswa ha dziṱhunḓu ngei Libya sa dziphuli. Zwiito zwo ralo zwa tshiṱuhu a zwi tshimbilelani na AU, na zwishumiswa zwo teaho zwa Afrika na zwa dzitshakatshaka, hu tshi katelwa Thendelanonzwiwa ya Afrika nga ha Pfanelo dza Muthu na Vhathu.
Khabinethe i ṱanganedza nḓivhadzo nga manḓalanga ya uri vha ḓo dzudzanya tshiimiswa tsha zwiendedzi na u ṱuwiswa ha tshavhi na dziṱhunḓu ngei Tripoli vhane vha ṱoḓa tsireledzo ya dzitshakatshaka
19. U phaḓalala ha Listeriosis
Khabinethe i ita khumbelo kha vhathu vhoṱhe uri vha dzhie tsirakhombo ya ndeme – u fana na u ṱamba zwanḓa phanḓa ha musi vha tshi lugisa zwiḽiwa na u litsha u ḽa zwiḽiwa zwi songo bikiwaho kana zwi songo vhibvaho – u itela u fhelisa u phaḓalala ha Listeriosis, ngeno tsedzuluso dzi tshi khou ya phanḓa dza u wanulusa tshiko tsha tshitzhili itshi.
Vhulwadze uvhu vhu vhangwa nga tshitzhili tshi bvaho mavuni, maḓini, mirohoni na kha zwibveledzwa zwa mafhi zwi songo vhewaho ḓuvhani u vhulaya zwitshili, zwi nga ḓisa tsumbadwadze dzi ngaho mukhushwane na u shuluwa. Vhu ya alafhea nga u shumisa anthibayothiki, arali ho ṱavhanya ha wanala.
Khabinethe i ita khuwelelo kha maAfrika Tshipembe uri vha ise phanḓa na u vhulunga maḓi vhunga shango ḽi tshi kha ḓi vha gomeleloni. Naho mvula dzi tshi khou na zwa zwino, ḽeveḽe dza madamu dzi khou ya phanḓa na u tsela fhasi. Hezwi zwi khou vhangwa nga themparetsha dzire nṱha na uri ari athu vha na mvula dza mibvumbi.
Khabinethe i khou ṱuṱuwedzwa nga nyambedzano dza mvelaphanḓa na mimasipala i na zwikolodo zwihulwane u itela u wana thandululo ya tshikolodo tsha masipala.
C. Milayotibe
20. Khabinethe yo tendela u ṋetshedzwa ha Milayotube i tevhelaho Phalamendeni.
20.1. Mulayotibe wa Khwaṱhisedzo ya Tsikhedzo ya Matshilisano wa 2017.
Mulayotibe u ṋetshedza mbuyelo dzo khwiniswaho maelana na magavhelo a thikhedzo ya vhana vha si naho vhabebi na vha kundelwaho, hu tshi katelwa avho vhane vha dzula kha miṱa i ṱhogomelwaho nga vhana.
20.2. Mulayotibe wa Vhashumanaho na zwa Ndaka wa 2017
Mulayotibe u fhelisa Mulayo wa zwino wa Zwa Zhendedzi ḽa Estate, wa 1976 (Mulayo wa vhu112 wa 1976). U ḓisa khonadzeo ya ndaulo ya mupo u engedza zwiito zwa ikonomi kha nḓowetshumo ya real estate ngeno u tshi khou tandulula ṱhoḓea ya u vhona uri hu na tshanduko kha sekithara.
20.3. Mulayotibe wa Khwinisedzo ya Muhanga wa Ndalukanyo dza Lushaka wa 2016
Mulayotibe u khwaṱhisedza Mulayo wa Muhanga wa Ndalukanyo dza Lushaka wa zwino, wa 2008 (Mulayo a vhu67 wa 2008). U ḓisa maga a u sedzana na mafhungo a u shanda zwo ambiwaho na u sumbedzisa masiandoitwa kha vhathu vhane vha netshedza ndalukanyo dzavho dzi si dzone kana madzangano ane a bveledza ndalukanyo dzi si dza vhukuma.
20.4. Mulayotibe wa Vhutshinyi ha Dzitshakatshaka wa 2017
Mulayotibe u ṋetshedza muhanga wo khwiniswaho wa vhusimamulayo u sedzanaho na vhutshinyi ha dzitshakatshaka ho itwaho Afrika Tshipembe na u mona na mikano yashu. U dovha wa ṋetshedza tsireledzo yo khwiniswaho na vhulamukanyi kha zwipondwa zwa vhutshinyi ha dzitshakatshaka.
D. Milaedza
21. Khabinethe yo fhululedza:
21.1. Muphuresidennde Vho Uhuru Kenyatta kha u rwelwaṱari havho sa Muphuresidennde wa Riphabuḽiki ya Kenya na themo yavho ya vhuvhili kha muvhuso. Khabinethe i sedza phanḓa kha u fhaṱa vhushaka ho khwaṱhaho vhu takadzaho vhukati ha mashango aya mavhili.
21.2. Muphuresidennde Vho Emmerson Dambudzo Mnangagwa kha u rwelwaṱari havho sa Muphuresidennde wa Riphabuḽiki ya Zimbabwe. Khabinethe i sedza phanḓa kha vhushaka ha tshumisano vhu yaho phanḓa na Muvhuso wa Zimbabwe.
21.3. Vho Major Seitebatso Pearl Block kha u wina Pfufho ya Ṅwaha ya United Nations (UN) Military Gender Advocate. Pfufho iyi ndi ya vhuḓiimiseli na vhuḓidini ha muthu a ḓisaho mulalo kha u alusa ndaulo kha Thandululo ya Khoro ya Vhutsireledzi ya UN 1325, i itaho khuwelelo kha vhoṱhe vha lwaho kha u tsireledza vhafumakadzi na vhasidzana kha khakhathi dza vhudzekani na dzo livhanaho na mbeu.
21.4. Ladysmith Black Mambazo, vhe vha nangiwa luvhili kha Pfufho dza Grammy dza 2018. Ya u thoma ndi ya tshitenwa tsha Alibamu ya Muzika wa Nṱhesa kha Ḽifhasi ya aḽibamu yavho ya Shaka Zulu Revisited: 30th Anniversary Celebration, ya vhuvhili kha tshiteṅwa tsha Alibamu ya Vhana ya Nṱhesa ya Nyimbo dza Mulalo na Lufuno kha Vhana na Vhabebi u mona na Ḽifhasi. Pfufho dza Grammy dzi ḓo vha hone nga ḽa 28 Phando 2018.
21.5. Vho Chad Le Clos, kha u vha mubammbeli wa munna wa u thoma u wina dzithaitili dza serisi nṋa dza Tshiphuga tsha Ḽifhasi tsha u Bambela tsha FINA. Ri ḓihudza nga tswikelelo yavho na u vha na fulufhelo ḽa uri vha ḓo isa phanḓa na u imela Afrika Tshipembe nga vhukoni ha nṱhesa.
21.6. SuperSport United, kha u swikelela makhaulatshele a Tshiphuga tsha Khonfiderationi ya Bola ya Milenzhe ya Afrika.
21.7. Miss South Africa, Demi-Leigh Nel-Peters, kha u ambadzwa khare ya Miss Universe kha muṱaṱisano wa lunako wa vhu66 ho farelwaho United States of America zwenezwino.
21.8. Vho Dokotela Nkosazana Dlamini-Zuma, vhe vha pfufhiwa Pfufho ya Lifetime Achievement nga Foramu ya Vhafumakadzi ya Ḽifhasi ya Vharangaphanḓa vha Polotiki.
22. Khabinethe i livhisa ndiliso kha:
22.1. Muvhuso na vhathu vha Egipita zwi tshi tevhela u ṱhaselwa nga matherorisi kha mosque wa Sinai Peninsula zwo siyaho ho vhulawa vhathu vha fhiraho 300 na vhaṅwe vha tshivhalo vho huvhalaho. Khabinethe i lwisana na u ṱhaselwa uhu hu sa ḓivhaleiho kha vhathu vha si na mulandu.
22.2. Muvhuso na vhathu vha Nigeria zwi tshi tevhela bomo ya u ḓivhulaha nga ḽa 21 Lara 2017 yo vhulayaho vhathu vha fhiraho 50 na u huvhadza vhaṅwe vhanzhi. Khabiinethe i dovholola tsatsaladzo yayo i re na vhungoho i sa dzinginyei kha maitele a vhutherorisi na dzikhakhathi dzo kalulaho.
22.3. Muṱa na khonani dza Dokotela Vho Mochubela ‘Wesi’ Seekoe, mulwela mbofholowo wa kale na Muambasada wa Afrika Tshipembe kha Feḓeresheni ya Russia. Vho shumela shango lwa nṱhesa sa Muambasada wa Afrika Tshipembe ngei Russia na musi vha Mudzulatshidulo wa Koporasi ya Fulufulu ḽa Nyukiḽia Afrika Tshipembe. Muphuresidennde Vho Zuma vho bula uri vha itelwe Mbulungo ya Tshiofisi yo Khetheaho ya Vundu.
22.4. Muṱa na khonani dza Mulwela mbofholowo na mufariwa wa kale wa Robben Island, Vho Eddie Daniels, vho ri sia zwenezwino. Vha ḓo elelwa kha vhuḓikumedzeli havho ha u sa humbulela vhone vhaṋe fhedzi na tshumelo yavho kha vhathu vha Afrika Tshipembe.
22.5. Muṱa na khonani dza Minisṱa wa Vhupileli na Vhalwela Mbofholowo vha Kale, Vho Nosiviwe Mapisa-Nqakula, kha u ṱuwa shangoni ha khotsi avho, Vho Douglas Mapisa. Vho lovhela Sibadela tsha Cecilia Makiwane ngei East London, kha ḽa Kapa Vhubvaḓuvha vha na miṅwaha ya 96.
E. Mbekanyamushumo Dzine Dza Khou Ḓa
23. U elelwa ha Senthenari ya Vho Nelson Mandela
Khabinethe i ḓibadekanya na maAfrika Tshipembe kha u elewa anivesari ya vhuṋa ya u ṱuwa shangoni ha Vho Nelson Mandela nga ḽa 5 Nyendavhusiku 2013. Nga 2018 shango ḽi ḓo swaya senthenari ya vhutshilo ha Vho Mandela na uri maAfrika Tshipembe vhoṱhe vha ṱuṱwedzwa u vha tshipiḓa tsha u pembela ha ṅwaha woṱhe musi ri tshi khou livhuwa na u elelwa muṅwe wa vharwa vhahulwanesa vha Afrika.
Khabinethe i livhuwa maAfrika Tshipembe vhoṱhe kha u shela mulenzhe kha vhuṱambo ho fhambanaho ha u elelwa Vho OR Tambo na uri hu khou lavhelelwa uri vhathu vha shele mulenzhe nga nḓila i fanaho na yeneyi musi ri tshi elelwa Muphuresidennde wa u thoma u khethwa lwa tshidemokirasi Afrika Tshipembe Vho Madiba.
24. Maduvha a Madakalo
Khabinethe i tamela maAfrika Tshipembe vhoṱhe maḓuvha a madakalo avhuḓi na o tsireledzeaho. Ri ita khuwelelo kha avho vhoṱhe vhane vha ḓo vha vha tshi khou enda uri vha vhone uri goloi dzavho dzo lugela u tshimbila badani. Vhashumisi vhoṱhe vha bada, vhareili na vhaendangaṋayo vha tea u tevhedza milayo ya badani.
Minisiṱa wa Vhuendi, Vho Joe Maswanganyi, vho rwelaṱari fulo ḽa Arrive Alive ngei Bela-Bela, kha ḽa Limpopo nga ḽa 5 Nyendavhusiku. SAPS i khou thoma fulo ḽayo u mona na shango ḽa uri maḓuvha a madakalo avhe o tsireledzeaho na uri roṱhe ri vhe na vhuḓifhinduleli ha u tikedza SAPS nga u tevhedza mulayo na u ḓifara zwavhuḓi.
Muhasho wa Zwa Muno u ḓo ḓivhadza pulane dzawo dza maḓuvha a madakalo dza 2017/18 mikanoni ya Afrika Tshipembe. Hezwi zwi khou itelwa uri hu vhe na ndango yavhuḓi ya u enda ha vhathu na thundu dzi bvaho na u dzhena Afrika Tshipembe kha tshifhinga itshi tsha shishi.
Ri dovha ra ita khumbelo kha vhabebi na vhaunḓi uri vha songo sia vhana hu si na muthu o vha lindaho vhu nga ri tshi tea u londota vhana vhashu tshifhinga tshoṱhe.
Khabinethe yo takadzwa nga Milingo ya Maṱiriki yo khunyelelaho hu si na khakhathi khulwane na u tamela mashudu kiḽasi ya 2017 musi vha tshe vho lindela mvelelo dzavho dza mafhelo a ṅwaha.
F. U Tholwa
U tholwa ho itwa ho thoma ha khwaṱhisedzwa ndalukanyo dza vho tholwaho na u sedzwa arali vha si na milandu.
25. Vho Ilise Karg sa muimeli wa dti kha Khoro ya Vhutsivhudzi tsha Lushaka kha tshanduko ya Mveledziso.
26. Bodo ya Trustees kha Tshikwama tsha Manḓafhadzo ya Lushaka:
26.1. Vho Nonkqubela Helen Maliza;
26.2. Vho Lerato Cynthia Molefe;
26.3. Vho Nthabiseng Mateboho Moleko;
26.4. Vho Ernest Kwinda; na
26.5. Vho Sipho Zikode (muimeleli wa dti).
27. Vho Sandile Mkhize, sa Muofisiri Muhulwane (CEO) wa Magalies Water.
28. Vho Wiseman Mkhize, sa muraḓo wa Bodo wa tshiimiswa tsha Ndangulo ya Fulufulu tsha Lushaka tsha Afrika Tshipembe.
29. Vho Phakamani Buthelezi, sa CEO wa Overberg Water.
30. Advokheithi Vho Samuel Vukela, sa Mulanguli Gute (DG) wa Muhasho wa Mishumo ya Muvhuso.
31. Vho Brenda Sibeko, sa Mufarisa DG (DDG) wa Vhutsireledzi ho Fhelelaho ha Matshilisano kha Muhasho wa Mveledziso ya Matshilisano.
32. Vho Zephania Nhleko, sa DDG wa Tshumisano na Pulane ya Ikonomi kha Muhasho wa Mveledziso ya Ikonomi.
33. Vho Mandla Victor Ngcobo, sa DDG: Muofisiri Muhulwane wa Mafhungo a Muvhuso kha DPSA.
Mbudziso:
Vho Phumla Williams – Mufarela Mulanguli Guṱe (GCIS)
Lutingo: 083 501 0139
