1. Maemo a Kabinete mabapi le dintlha tsa bohlokwa maemong a ha jwale
1.1. Kabinete e imatahanya le setjhaba le ba matjhabeng bakeng sa ho rapella ntate wa setjhaba, Mopresidente wa mehlengNelson Mandela. Nakong ena e boima, ha re bontsheng lerato le kutlwelobohloko mme re etse Madiba motlotlo.
1.2. Kabinete e ananetse ho ketekwa ha selemo sa bo 58 sa ho tekenwa ha Tjhata ya Tokoloho e neng e tekenwe ka la 26 Phuptjane 1955 e leng motheo wa demokerasi le Molaotheo wa rona. Kabinete e etsa kgoeletso ho maAforika Borwa oohle ho ‘Bapala karolo ya lona’ mabapi le ho isa naha haufiufi le pono ya Aforika Borwa e kopaneng, e hlokang semorabe, e hlokang kgethollo ka bong, ya demokerasi le e tswetseng pele.
1.3. Kabinete e amohela boitlamo bo botjha ba Lefapha la Bophelo bo Botle, mmoho le bafuputsi bakeng sa ho tobana le dintlha tse hlahisang diphepetso bakeng sa mekutu e kopanetsweng ya ntwa kgahlanong le HIV. Kabinete hape e amohela boitokisetso ba Lefapha la Bophelo bo Botle ba ho hlahisa boikenyako bo atisitsweng ho mefuta e teng e kenyeletsang tlhokomediso e ekeditsweng mabapi le HIV le AIDS, le mehato bakeng sa ho fokotsa kotsi ya tshwaetso ya HIV.
1.4. Kabinete e lebisa matshediso ho Kompone ya Setjhaba e Mogadishu ho la Somalia ya Mokgatlo wa Matjhaba a Kopaneng (UN) ho latela tlhaselo e mpe ya ka la 19 Phuptjane 2013 eo ho yona ho shweleng batho ba 15 ho kenyeletswa maAforika Borwa a mabedi. Re etsa boipiletso ho dihlopha tsohle tsa dipolotiki tse ka thoko ho ditsamaiso tsa dipolotiki ho la Somalia ho nyahlatsa dikgoka le ho hlahisa ditletlebo tsa yona Mmusongwa Bofederale wa Somalia ka tsela e bopang le e nang le moya wa poelano.
1.5. Kabinete e ipiletsa ho maAforika Borwa oohle ho ithaopa ka metsotso e 67 ya nako ya ona ka Letsatsi la Nelson Mandela (18 Phupu) bakeng sa ho thusa ho tlisa phethoho dibakeng tsa ona le Aforika Borwa bakeng sa ntlafatso ya bophelo. Ketsahalo ya selemong sena e tla tswela pele tlasa sehloho se reng “Etsa ho hong; tlisa phethoho; etsa letsatsi ka leng ebe Letsatsi la Mandela” maikutlo a tsepamisitswe ho hlahiso e sa haelleng ya dijo, bodulo le ho tseba ho bala.
1.6. Kabinete e lemohile hore, jwaloka karolo ya Letsatsi laNelson Mandela, ho tla thakgolwa mokgahlelo wa pele wa Karete ya Boitsebiso. Ho thakgolwa hona ke karohano ya bohlokwa mehleng ya rona e fetileng le ho qetello ya mehla ya ho jara dipasa Aforika Borwa. Karete ya Boitsebiso ke karete e sa hlokeng ho hlahiswa mme e nang le bokgoni ba ho tshwara tlhahisoleseding e tswang ho bankakarolo ba fapafapaneng ba ha jwale le ba isao. Letona la Merero ya Lehae le tla fana ka dintlha tse batsi pitsong e tlang ho tshwarwa haufinyana.
1.7. Kabinete e amohela ho thakgolwa ha letsholo la Lefapha la Thuto ya Motheo le bitswang Diprojeke tse 94+ bakeng sa Madiba ho keteka letsatsi la tswalo la Nelson Mandela le lefa la hae. Sepheo sa letsholo lena ke ho ntlafatsa meralo ya motheo dikolong tse fetang 94 hore e be dibaka tsa mankgonthe tsa ho ithuta le tsa boleng. Letsholo lena le fana ka tshepo le seriti dikolong ho phatlalla le naha. Nakong ya Kgwedi ya Mandela ho tloha ka Phupu 2013, lefapha le tla be le eteletse pele phano ya sekolo se setjha se phethetsweng beke ka nngwe e le karolo ya boitlamo ba ho ntlafatsa boleng ba thuto ya motheo.
1.8. Kabinete e amohela ho phethelwa le phano ya Borokgo ba Lefa la Morena Dalibhunga Mandela ho badudi ba Mvezo ba eteletsweng pele ke Morena Mandla Mandela, e leng setloholo sa Mopresidente wa mehleng Nelson Mandela, ka la 18 Phupu 2013. Phano ena e tla tsamaelana le letsatsi la tswalo la Mopresidente wa mehleng Monghadi Nelson Mandela, eo a tla beng a qeta dilemo tse 95 ka letsatsi lena.
1.9. Kabinete e ananetse ho hopola hwa Aforika Borwa hwa Letsatsi la Matjhaba a Kopaneng le kgahlanong le Tshebediso e mpe ya Dithethefatsi le ho Rekiswa ha batho ho seng Molaong ka la 26 Phuptjane 2013, ho la Kimberley. Letsatsi lena le ile la sebediswa ho toboketsa bohlokwa ba ho sebetsana le diphephetso tse tobileng lefatshe, tse kenyeletsang botlokotsebe, HIV le AIDS, boitshwaro bo hlephileng, dikgoka tsa malapeng le ho ima ha barwetsana.
1.10. Kabinete e amohela ho tshwarwa ha Seboka sa Saense, Theknoloji le Ntjhafatsose tla tshwarwaho tloha ka la 20 ho ya ho la 21 Phupu. Seboka se tla shebana le kgothaletso ya tlaleho ya Komiti ya Tekolo ya Matona, kgokahano e ntlafetseng le kopanelo ka hara Mokgwa wa Naha wa Ntjhafatso le dipuisano tse matlafaditsweng mahareng a mmuso, indasteri le borathuto.
1.11. Kabinete e amohetse tlaleho mabapi le tswelopele e entsweng motsaneng wa Muyexe ho la Giyani, Profenseng ya Limpopo, ho kenngweng tshebetsong ha boitlamo ba mmuso ba ho ntlafatsa bophelo ba batho. Ho feta moo, Kabinete e phetile ngongoreho ya Mopresidente ya hore makala oohle a mmuso a lokela ho potlakisa phano ya ditshebeletso ho ya ka meralo eo ho dumellanweng ka yona.
1.12. Kabinete e amohela ho thakgolwa ha Projeke ya Mawala a Meralo ya Motheo ya bo 18 ka Moqebelo, 29 Phupu 2013 e tsamaelanang le mabaka a meralo ya motheo bakeng sa ho fana ka metsi le bohlweki ba ona. Projeke e tla netefatsa phano ya ka nako e telele ya metsi bakeng sa ho kgotsofatsa ditlhoko tsa kahisano le ho tshehetsa kgolo ya moruo.
1.13. Kabinete e amohetse lesedi leo e le fumaneng mabapi le diketso tsa mmomori wa lekala la tsa kaho. Kabinete e amohela sephetho sa diphuputso tse hlahisitseng bopaki ba ditheko tse fosahetseng, mmomori le bobodu indasteringya kaho ya poraefete. Sekgahla sa mmomori se batla letsoho le matla la ba ka sehloohong ho tsa phehisano. Kabinete e emetse tsamaiso ya sephethosa Lekgotla la Diphehisano empa e lemohile hore bopaki bo supa hore ho bile le tshenyo e kgolo kgahlehong ya setjhaba ka lebaka la ditheko tse phahamisitsweng tseo mmuso o di lefileng ka lebaka la mmomori ona.
2. Dipuisano le Diqeto tsa bohlokwa tsa Kabinete
2.1. Kabinete e tjhaeletse monwana Moralo wa Mankgonthe wa Naha wa Dithethefatsi (2013-2017) le hore o kenngwe tshebetsong bakeng sa dilemo tse hlano tse tlang. Moralo o sebetsa jwaloka lewa la mmuso bakeng sa ho thibela le ho fokotsa tshebediso e mpe ya tahi le dithethefatsi le ditlamorao tse tsamaelanang le tsona tsa bophelo ba kahisano le moruo setjhabeng sa Aforika Borwa.
2.2. Kabinete e tjhaeletse monwana Ho tshwarwa ha Seboka sa Naha sa Matlafatso Moruong e Pharaletseng ya Batho ba Batsho ka Mphalane 2013. Seboka sa Naha se tla bontsha dipale tsa katleho le ho namalatsa boikenyako ba mmuso tshehetsong ya bonkakarolo bo hlwahlwa le phumantsho ya batho ba batsho ho tsa moruo ka hara moruo o phatlaletseng, ka tsela e tlang ho nyehela moruong o kopanetsweng.
2.3. Kabinete e tjhaeletse monwana hore Aforika Borwa e tshwarisane le Lenaneo la Mokgatlo wa Matjhaba a Kopaneng la Bodulo ba Batho (UN-HABITAT) ka ho tshwara Khonferense ya “Ho etella pele Phethoho ya Motsemoholo”ka la 5 le 6 Loetse 2013. Tabakgolo ya khonferense e hodima bonkakarolo ba basadi bophelong ba motsesetoropo ho la Aforika. Khonferense e tla fana ka lepatlelo bakeng sa Aforika hore e tobane ka botlalo le diphephetso tsa ho dula ditoropong le ho qhaneha ho dula ditoropong bakeng sa ntshetsopele ya batho.
2.4. Kabinete e tjhaeletse monwana Pampiri e Tshweu ya Moralo mabapi le Malapa le Moralo wa ho kenngwa Tshebetsong. Pampiri e Tshweu ya Moralo Mabapi le Malapa e tla kgontsha Mmuso le bankakarolo ba bang ho sebedisa lelapa e le motheo wa ho fihlella bophelo ba mankgonthe ba setjhaba. Pampiri e Tshweu e sisinya mawala a mararo a ka sehloohong, Kgothaletso ya bophelo bo botle ba lelapa, matlafatso ya Lelapa le paballo ya Lelapa.
2.5. Kabinete e tjhaeletse monwana phethelo le ho kenngwa lesedinyaneng la molao ha Lewa la bobedi la Mohlodi wa Naha wa Metsi. Lewa lena le ahelletswe hodima Lewa la Mohlodi wa Naha wa Metsi la 2004. Lewa la bobedi la Mohlodi wa Naha wa Metsi le fanaka mohlophollo ho karolo eo metsi a e bapalang moruong le ho hlwaya diphephetso tse teng, menyetla ya ntshetsopele le diketsahalo tse supisang moralo o dumellanweng ka ona bakeng sa dibaka tsa bohlokwa tsa naha. Lewa la bobedi hape le batla ho netefatsa boteng ba metsi ba nako e telele, a lekanang bohle le a bolokehileng bakeng sa bophelo bo betere le tikoloho e betere bakeng sa bohle le hore metsi a laolwa hantle le ka makgethe bakeng sa kgolo e lekanang ya nako e telele le ntshetsopele.
2.6. Kabinete e tjhaeletse monwana tlaleho ka Diphetho tsa kopano ya bo 16 ya Khonferense ya Mekga bakeng sa Seboka sa Kgwebo ya Matjhaba bakeng sa Dibopuwa tse Kotsing tsa Diphoofolo le Dimela tse Hlaha (CITES CoP 16), e neng e tshwaretswe Bangkok, ho la Thailand ho tloha ka la 3 – 14 Hlakubele 2013. Ho feta moo Kabinete e tjhaeletse monwana hore Aforika Borwa e lokise le ho kenya tshisinyo e lokelang ho tsepamisetswa maikutlo kopanong ya CITES CoP 17 ka 2016 ho la Aforika Borwa.
2.7. Kabinete e ananetse memo e tswang ho Banka ya Ntshetsopele ya Aforika bakeng sa Aforika Borwa ya ho ba setho sa Lemulwana la Dikaho tsa Motheo bakeng sa Aforika (ICA) le ileng la thakgolwa Sebokeng sa G8 ho la Gleneagles ka 2005. Letsete le leholo la Aforika Borwa ho dikaho tsa motheo bakeng sa nako e mahareng le tla ntlafatswa ke ho ba setho sa ICA haholoholo tlhahisong ya tshedimosetsole dihlahiswa tsa tsebo le kgokahano ya maano a ntshetsopele pakeng tsa dinaha tsa G20 le tsa Aforika.
2.8. Kabinete e tjhaeletse monwana ho hlahiswa ha Protokhole ya Setjhaba sa Ntshetsopele ya Dinaha tsa Borwa ba Aforika (SADC) bakeng sa Kgwebisano Ditshebeletsong Palamenteng bakeng sa tshekatsheko, ho ya ka karolo ya 231 ya Molaotheo. Merero ya Protokhole ke ho lokolla kgwebo ya ditshebeletso ka hara mabatowa ho itshetlehilwe hodima tekatekano, botsitso le ho kgola molemo mmoho. Protokhole ena hape e qaqisa moralo bakeng sa tokoloho ya kgwebisano ditshebeletsong pakeng tsa dinaha tseo e leng ditho tsa SADC le ho sebetsa e le motheo wa ditherisano.
2.9. Kabinete e ananetseho thakgolwa ha lengolo la thuto la Batjhela ya Ntshetsopele ya Dibaka tsa Bodulo tsa Batho (BHSD) kakopanelo le Lefapha la Thuto le Thupello e Phahameng le Yunivesithi ya Nelson Mandela Metro. Lengolo lena la thuto la BHSD morero wa lona ke ho ntshetsapele balaodi le bahlanka ba hlwahlwa ba Dibaka tsa Bodulo ba tla ba le tsebo le bokgoni bo hlokahalang bakeng sa ho bopa, ho ntlafatsa le ho potlakisa ntshetsopele ya bodulo ba batho bakeng sa nako e telele Aforika Borwa.
2.10. Kabinete e etsa kgoeletso ho mafapha oohle a mmuso, bomasepala le makala a mmuso a sebetsang Gauteng ho ngodisa dipalangwang tsohle tsa mmuso bakeng sa dipapetlwana tsa di e-tag.
2.11. Kabinete e tjhaeletse monwana mehato ya ho kenngwa tshebetsong e sisintsweng bakeng sa ho thehwa ha Lekala la Bolaodi ba Meedi (BMA). BMA e tla laola phallo, madiboho le ho laola metjha e naheng ya ditshebeletso tsa meedi le ho hokahanya tshebeletso ya mafapha oohle madibohong a ho kena. Lefapha la Merero ya Lehae e tla ba Lefapha le eteletseng pele ho thehwa ha BMA.
3. Kabinete e tjhaeletse monwana dibili tse latelang bakeng sa ho hlahiswa Palamenteng:
3.1. Bili ya Taolo ya Madiboho, Bili ya Lekgetho la Madiboho, ya 2013 le Sehlomathiso sa Molao wa Madiboho le Ditefello, wa 2013 – Dibili tsena di fana ka motheo bakeng sa tsamaiso ya kgwebo ya matjhaba le tshireletso ya moruo le setjhaba, kahoo di bopa botsitso pakeng tsa taolo ya madiboho le tsamaiso ya kgwebo.
3.2. Sehlomathiso sa Bili ya Diphuputso tsa Metsi – Sepheo sa Sehlomathiso sena ke ho se matahanya le diphethoho tse kgolo ho diinstitjute, leano, saense ya metsi le tikoloho ya tsa molao hape le ho eketsa nyehelo ya Khomishene ya Diphuputso tsa Metsi bakeng sa ditlhoko tsa diphuputso tsa metsi tsa Aforika Borwa le ho netefatsa hore naha e eme hantle bakeng sa ho arabela ditlhoko le diphephetso tsa naha e nang le bothata ba metsi jwaloka Aforika Borwa.
3.3. Sehlomathiso sa Bili ya Melao ya Naha ya Taolo ya Tikoloho, sa 2013 –Bili ena e sisinya dihlomathiso dipehelong tse itseng tlasa Molao wa Taolo ya Tikoloho, wa 1998 (Molao wa 107 wa 1998) le ho feta moo ho netefatsa hore mehlodi ya naha ya tlhaho e tshireleditswe bakeng sa moloko wa jwale le o tlang jwaloka ha ho labalabelwa ke Morero wa Ntshetsopele ya Naha.
3.4. Moralo wa Naha wa Taolo ya Tikoloho: Sehlomathiso sa Bili ya Boleng ba Moya, sa 2013 – Bili ena e fetola dipehelo tse itseng tlasa Taolo ya Tikoloho ya Naha: Molao wa Boleng ba Moya, wa 2004 o laolang boleng ba moya ka hara naha bakeng sa ho tshireletsa tikoloho ka ho fana ka mekgwa e kgonehang bakeng sa thibelo ya tshilafatso le ho thefula maemo a tlhaho ho ntse ho kgothaletswa ntshetsopele e lokileng ya moruo le kahisano.
3.5. Taolo ya Naha ya Tikoloho: Sehlomathiso sa Bili ya Matlakala, sa 2013 – Bili ena e fetola Taolo ya Naha ya Tikoloho: Molao wa Matlakala, wa 2008 (Molao wa 59 wa 2008) o laolang taolo ya matlakala bakeng sa ho tshireletsa bophelo bo botle le tikoloho.
3.6. Taolo ya Naha ya Tikoloho: Sehlomathiso sa Bili ya Dibaka tse Tshireleditsweng, sa 2013 – Bili ena e fetola Taolo ya Naha ya Tikoloho: Molao wa Dibaka tseTshireleditsweng, wa 2003 (Molao wa 57 wa 2003). Diphethoho di kenyeletsa taolo ya Dibaka tsa Lewatle tse Tshireleditsweng mokgweng wa taolo ya dibaka tse ding tse Tshireleditsweng le ho fana ka sefutho ho Diphatlalatso tsa Mopresidente tse arolang mesebetsi pakeng tsa mabaka a botshwasi ba ditlhapi le taolo ya tikoloho.
3.7. Sehlomathiso sa Bili ya Banka ya Poso ya Aforika Borwa – Sepheo se seholo sa Molao wa Banka ya Poso ya Aforika Borwa, wa 2010 (Molao wa 9 wa 2010) ke ho theha setsha sa ditjhelete bakeng sa ho kgothaletsa batho ka bongata ho boloka le ho tsetela le ho bopa banka ya kgetho ya mantlha bakeng sa sehlopha se fumanang meputso e tlase.
3.8. Kabinete e tjhaeletse monwana Sehlomathiso sa Bili ya Inshorense ya Tlhoko ya Mosebetsi sa 2012 bakeng sa ho nonya maikutlo a setjhaba le bakeng sa tjhebisano le Bomphato ba Kahisano ba Lekgotla la Naha la tsa Moru le Mesebetsi. Bili ena e fetola Molao wa Inshorense ya Tlhoko ya Mosebetsi, wa 63 wa 2001. Sehlomathiso sena se tobana le ntlha ya basebetsi bao mothating wa jwale ba teetsweng ka thoko Molaong ona le ho ntlafatsa ditefello tsa menyetla ho ba nyehelang, ho eketsa nako ya tefo ya menyetla ho ba nyehelang ho tloha dikgweding tse robedi ho ya ho tse leshome le metso e mmedi le ho fana ka kgetho ya bakgolamolemo haeba ho lokelwa ho fanwa ditlhapiso ha lefu le ka hlaha.
3.9. Kabinete e ananetse ho hlahiswa ha Sehlomathiso sa Bili ya Dikgetho sa 2013 Palamenteng. Sehlomathiso sa Bili se batla ho fana ka dikgetho tse ikgethang dikgethong tsa Seboka sa Naha, le ho fana ka boingodiso ba bakgethi bao ka tlwaelo e leng batho ba dulang ka ntle ho Riphaboliki ho ba kgontsha ho kenya kgethoe ikgethang
4. Dithonyo
4.1. Kabinete e dumellana le ho thonngwa ha MonghadiRomeo Adams maemong a Motlatsa Motsamaisi-Kakaretso: Ditshebeletsong tsa Kgwebo ho Lefapha la Toka le Ntshetsopele ya Molaotheo.
4.2. Kabinete e dumellana le ho thonngwa ha Mofumahadi Irene RofhiwaSingo maemong a Mohlanka ya ka Sehloohong wa Ditjhelete ho Lefapha la Mehlodi ya Diminerale.
4.3. Kabinete e dumellana le ho thonngwa haMofumahadi Kalayvani Pillay maemong a Motlatsa Motsamaisi-Kakaretso: Ntshetsopeleng ya Theramelao ho Lefapha la Toka le Ntshetsopele ya Molaotheo.
4.4. Kabinete e dumellana le ho thonngwa ha Ngaka Bismark Tyobeka maemong a Mohlanka ya ka Sehloohong wa Phethahatso wa Taolo ya Naha ya Matla a Nyutlelere ya Aforika Borwa.
4.5. Kabinete e dumellana le ho thonngwa botjha hape ha Monghadi Tsietsi Mokhele jwaloka Mohlanka ya ka Sehloohong wa Phethahatso wa Bolaodi ba Polokeho Mawatleng bakeng sa nako ya dilemo tse hlano ho tloha ka la 1 Mmesa 2013.
4.6. Kabinete e dumellana le ho thonngwa botjha hapeha ditho tseo e seng tsa phethahatso tse latelang ho boto ya Mekgwa ya Ditumello ya Naha ya Aforika Borwa, bao nako ya bona ya tshebetso e tla fela ka la 30 Pudungwana 2013, ho sebetsa lekgetlo la bobedi ho tloha ka la 1 Tshitwe 2013 ho ya ka la 30 Pudungwana 2018.
• Monghadi Vernon Roderick Seymour
• Monghadi PhakamisaZonke.
4.7. Kabinete e ananetse ho thonngwa botjha hape ha ditho tse leshome le metso e meraro ho Lekgotla la Aforika Borwa la Merero ya Sepakapaka ho tloha ka la 24 Phuptjane 2013 ho ya ho la 24 Phuptjane 2015. Kabinete hape e ananetse ho thonngwa ha baemedi ho tswa ho Lefapha la Tshireletso, Lekgotla la Diphuputso tsa Saense le Indasteri (CSIR) le Lefapha la Dikamano le Tshebedisano ya Matjhaba ho tloha ka la 24 Phuptjane 2013 ho ya ho la 24 Phuptjane 2015.
a. Ngaka Peter Martinez
b. Mofumahadi Nomfuneko Majaja
c. Monghadi Kim Victor Gorringe
d. Ngaka Sandile Bethuel Malinga
e. Mofumahadi Pontsho Maruping
f. Mofumahadi Andiswa Mlisa
g. Ngaka Valanathan Munsami
h. Monghadi Tenza Themba
i. Monghadi Ron Olivier
j. Monghadi Linden Petzer
k. Monghadi Hendrik Rheeder
l. Moadfokate Phetole Patrick Sekhule
m. Ngaka Jo-Ansie Karina van Wyk
n. Bathonngwa ba tswang ho Lefapha la Tshireletso
o. Bathonngwa ba tswang ho CSIR
p. Bathonngwa ba tswang ho Lefapha la Dikamano le Tshebedisanoya Matjhaba.
4.8. Kabinete e ananetse ho thonngwa ha Monghadi KutoaneObed Kutoane jwaloka Mohlanka ya ka Sehloohong wa Phethahatsowa Koporasi ya Inshorense ya Mekitlane ya Thepa e rekisetswang Mafatshe a ka ntle ya Aforika Borwa bakeng sa nako ya dilemo tse 3 ho tloha ka la 1 Phato 2013 ho ya la 31 Phupu 2016.
4.9. Kabinete e ananetse ho thonngwa botjha hape ha Moprofesara Linda De Vries jwaloka Modulasetulo eo e seng wa Phethahatso wa Boto ya Naha ya ho Kembola lekgetlo la bobedi ho tloha ka la 1 Tshitwe 2013 ho ya ho la 30 Pudungwana 2018.
4.10. Kabinete e ananetse ho thonngwa ha MonghadiNdwakhulu Samuel Mukhufhi jwaloka Mohlanka wa Phethahatso ya ka Sehloohong wa Institjute ya Naha ya Thutabolepi ya Aforika Borwa bakeng sa nako ya dilemo tsehlano ho tloha ka la 1 Phato 2013 ho ya ka la 31 Phupu 2018.
4.11. Kabinete e ananetse ho thonngwa ha Mofumahadi Agnes Tsele-Maseloanyane jwaloka setho sa ka nako tsohle sa Lekgotla la Dinyewe tsa Dikhamphani bakeng sa nako ya dilemo tsehlano ho tloha ka la 1 Phupu 2013 ho ya ho la 30 Phuptjane 2018.
Dipatlisiso: Phumla Williams (Sebueledi sa Kabinete se Tshwereng Mokobobo)
Mohala: 083 501 0139
