Kabinete e ile ya kopanela Union Buildings Pretoria, ka Laboraro, mohla la 19 Loetse 2018.
A. Dintlha tsa Ha jwale
1. Moruo
1.1. Kabinete e amohela thuso e nanabetswang ke ba kgwebo bakeng sa ho romelwa ha baporofeshenale ba lekala la poraefete mmusong. Sena se ropohile kopanong ya boitlhophisetso e neng e tshwerwe ke Moporesidente Cyril Ramaphosa le baetapele ba kgwebo, maqosa a kgethehileng a botsetedi le Mokgakolo wa Bahlanka ba Baholo ba Phethahatso (CEO), pele ho Seboka se tlang sa Mesebetsi le Botsetedi.
1.2. Kopano e dumellane ka hore tsosoloso ya moruo wa Aforika Borwa e batla ho kenngwa tshebetsong ho potlakileng ha mokgekgetho wa diqholotsi le ditlhabollo tse tshepisitsweng tse ntlafatsang kgolo. Ditshisinyo di ile tsa boela tsa tshohlwa mabapi le ho thea mokgakolo wa ntshetsopele ya meralo ya motheo e kenyang ditjhelete tse tswang lekaleng la poraefete esita le botsebi bo hodimo ba phano ya ditshebeletso.
2. Thahasello ya botsetedi
2.1. Kabinete e boela e amohela thahasello ya botsetedi kwana Japan, e etelletsweng pele ke Lefapha la Kgwebisano le Indasteri (dti). Thahasello ena e habile ho hohela matsete a boleng ba US$ 100 bilione moruong wa Aforika Borwa nakong ya dilemo tse hlano tse tlang.
2.2. Haesale Japan e le molekane wa ba leshome ba kahodimodimo wa batsetedi ba nako e telele Aforika Borwa, ka dikhamphane tsa yona tse kahodimo ho 140 tse sebetsang naheng ena ya rona, e bonwang e le kgubu ya lebatowa la tlhahiso ya ho kena Aforika. Kabinete e kgothaletsa dikhamphane ho tsetela le ho nama Aforika Borwa.
3. Mananeo a thupello
3.1. Kabinete e amohela kgakolo ya projeke ya thupello ya R22-milione ke Letona la tsa Mesebetsi, Mofumahadi Mildred Oliphant, e tla thea mesebetsi makaleng a bofofisi, a kgwebo ya ho qwela metsing a lewatle esita le a temothuo. Projeke ena e sebetswa ka selekane le Setheo sa Ngaka John Langalibalele Dube esita le Letlole la Inshorense ya ba Feletsweng ke Mesebetsi (UIF), eo e leng setheo sa Lefapha la tsa Bosebetsi. Projeke ena e tla shadimana le ba kentseng letsoho ho UIF ba feletsweng ke mesebetsi.
3.2. Sehlopha sa pele sa ba tla fola molemo se akga ba 50 ba kentseng letsoho ba tswang Boemafofaneng ba Virginia bo Durban; ba 50 ba tswang projekeng ya kgwebo ya ho qwela metsing a lewatle e Scottsburg, KwaZulu-Natal, athe basadi ba mahaeng ba 100 ba tswang Emadungeni ba tla rupellwa hore ba thee koporasi ya ho lema le ho jala ditholwana, meroho le khothene tse holang ka mokgwa wa tlholeho, ho akga le ho lokisetswa ha thekiso ya tsona. Dikoporasi tsena di tekenne tumellano le Pick ‘n Pay bakeng sa ho e fepela ka meroho, hammoho le Lefapha la Ntshetsopele ya Setjhaba bakeng sa ho fumana disebedisuwa tsa ho roka diyunifomo tsa dikolo.
4. Lefapha la Merero ya Lehae
4.1. Kabinete e amohela pulo ya semmuso ya dikantoro tse ntjha tsa Lefapha la Merero ya Lehae tse Hluhluwe KwaZulu-Natal ke Moporesidente Ramaphosa.
4.2. Nanabetso ena e atollotsweng ya ditshebeletso tsa setjhaba dibakeng tse neng di kotetswe, e na le seabo sa bohlokwa ho dumelleng le ho tebiseng demokrasi le toka setjhabeng. Sena se etsa karolo ya boikitlaetso ba mmuso ho atametseng ditshebeletso bathong.
5. Lenaneo la ho Fallela Kgasong e Ntjha ya Dijithale
5.1. Kabinete e kgotsofetse ka kgatelopele e entsweng ya ho falla ha naha ho tloha kgasong ya kgale ya analoko ho ya ho e ntjha ya dijithale. E le karolo ya ho bala nako e setseng ya ho ya ho Tshitwe ya 2018 bakeng sa ho Tingwa ha Kgaso ya Kgale ya Analoko Freistata, transmithara ya pele e Senekal Freistata e tla tingwa ka la 20 Loetse 2018. Sena se tsamaisana le boikitlaetso boo ho dumellanweng ka bona le Mokgatlo wa Matjhaba wa Meralo ya Dikgokahano.
5.2. Letsholo la dikgokahanyo le se le thakgotswe ho netefatsa hore malapa ohle a ba malalaalaotswe bakeng sa ho tingwa hona. Malapa a nang le dithelevishene (TV) tse sebetsang ka analoko a batlang ho reka tse ntjha, a eletswa ka hore a reke tse nang le konopo ya dijithale e seng e hoketswe. Malapa a nang le lekeno le kahodimo ho sekepele sa R3 200 ka kgwedi a na le kgetho ya ho reka TV e ntjha e seng e hoketswe dijithale ebile e le e nang le dikhoudara ya TV ya Dijithale e bopelletsweng kahare, e fumanehang mabenkeleng a maholo a rekisang thepa.
6. Ho heletswa mesebetsing
6.1. Ho ya ka kgoeletso ya Moporesidente Ramaphosa ya ho kginwa nakwana ha dipukutlo tsa mesebetsi ka lebaka la maemo a moruo naheng ena, Kabinete e thasisetsa boipiletso ba yona ho bahiri hore taba ya ho heletswa mesebetsing e mpe e be ntho ya ho qetela eo ba ka e nahanang, le hore mekgwa e meng e teng ya sejwalejwale ya ho notla ditjeo e shebisiswe ka hloko molemong wa ho boloka mesebetsi ka nako e telele.
7. Dipalopalo tsa ditlolo tsa molao
7.1. Kabinete e bo tjhaella monwana bokenadipakeng ba Setlamo sa tsa Toka, Thibelo ya Ditlolo tsa Molao le Tshireletso, ba ho tshetshetha ka potlako ka lewa le phethahetseng la ho lwantshana le dintho tse fapaneng tse ropohang dipalopalong tsa ditlolo tsa molao tse sa tswa ntshuwa.
7.2. Sena se akga Seboka sa Naha ho Thibelo ya Ditlolo tsa Molao le Merusu se neng se tshwerwe haufinyane katlasa mookotaba wa, “Ho aba dibaka tse bolokehileng ka mokgwa o kopantsweng ebile e le o tswelang pele wa thibelo ya ditlolo tsa molao le merusu”, e leng se ileng sa rala tjhebelopele ya kopanelo ho tsa polokeho e le boikarabello bo kopanetsweng, sa ba sa fana ka lepatlelo bakeng sa ba amehang ba ka sehloohong esita le ditsebi ho tshetshetha ka ho kenngwa tshebetsong ho kgabane ha Tokomane ya Tataiso ya 2016 ho tsa Polokeho le Tshireletso makaleng ohle.
8. Diketsahalo tsa merusu
8.1. Kabinete e ngongorehile haholo ka sekgahla sa merusu setjhabeng sa habo rona mme e etsa kgoeletso makaleng ohle, dibakeng tsohle esita le ditheong tsa qobello ya molao hore ho sebetswe mmoho ho netefatsa hore dikolo le dibaka tsa setjhaba di bolokehile ebile di tshireletsehile.
8.2. Diketsahalo tsa merusu tse ropohileng dikgutlwaneng tse ngata tsa naha ena ha di a amoheleha ebile di kgahlanong le Molaotheo wa rona. Kabinete e thoholetsa Tshebeletso ya Sepolesa sa Aforika Borwa (SAPS) ka ho arabela ka potlako hore ho tshwarwe bao ba belaellwang ka ho ba le seabo merusung hara setjhaba, esita le ho fumanwa ba na le thepa e belaellwang ka hore e utswitswe.
9. Ho ropoha ha bohloko ba Klebsiella
9.1. Kabinete e fetisa matshediso malapeng a masea a tsheletseng a hlokahetseng kamora ho ropoha ha bohloko ba Klebsiella pneumoniae Sepetleleng sa Thelle Mogoerane se Vosloorus.
9.2. Ha jwale ho ropoha ha bohloko bona ho tlasa taolo. Letona la Bophelo bo Botle, Ngaka Aaron Motsoaledi, o se a entse tsebiso ya hore masea le bomma ona sepetleleng sena ba tla fetisetswa Sepetlele sa Bana sa Nelson Mandela le Sepetlele sa Dithuto sa Charlotte Maxeke Johannesburg ka tatelano.
9.3. Sena se fa lefapha la bophelo bo botle la profense monyetla wa ho hlwekisa tikoloho, esita le ho rarolla ditaba tsa sebopeho sa sepetlele, ntle le tshitiso ya letho.
B. Diqeto
10. Mokgekgetho wa diqholotsi
Kabinete e tshohlile yaba ya ananela mokgekgetho wa diqholotsi o sisintsweng, o sisinyang mehato ya ho tsosolosa moruo wa rona ho tswa ditshebetsong tse ngatanyana tse amanang le wona. Seboka sa ditaba se etelletsweng pele ke Moporesidente Ramaphosa se tla tshwarwa ka Labohlano mohla la 21 Loetse ho teka mokgekgetho ona.
11. Ditlhabollo tse amanang le VISA
Kabinete e boetse ya amohela tlaleho ya kopanelo e tswang ho Matona a Merero ya Lehae le Bohahlaudi ka tatelano, mabapi le ditlhabollo tse ngatanyana tse amanang le visa tse tla nolofaletsa bahahlaudi, bahwebi le barutehi ho tla Aforika Borwa.
Ditlhabollo tsena di akga dihlomathiso melawaneng e sebetsang ho melata ya bana e etelang Aforika Borwa, tse tla phatlalatswa kaseteng ya mmuso ka Mphalane. Ditherisano tsa ho nyahlatswa ha ditlhoko tsa di-visa le ho nyehliswa ha ditlhoko tsa di-visa bakeng sa dinaha tse itseng, le tsona di a phethelwa. Dintlha tse tomanyana di tla tsebiswa bekeng ena.
C. Dibili
12. Kabinete e ananetse Dibili tse latelang bakeng sa ho phatlalatswa hore setjhaba se tshwaele ka tsona:
12.1. Sehlomathiso sa Bili ya 2017 ya Tekano Mesebetsing. Dihlomathiso tsena di habile ho matlafatsa mekgwa ya boikamahanyo mme di tla dumella ho ralwa ha dipeelo tsa lenane le badilweng tsa tekano mesebetsing ya makala a totobaditsweng. Letona la tsa Bosebetsi, ka pontshano le ba amehang lekaleng, ba tla kgona ho rala dipeelo tsa lenane le badilweng tsa tekano mesebetsing ya makala a totobaditsweng.
12.2. Sehlomathiso sa Bili ya 2018 ya Melao ya Lekala la tsa Ditjhelete: Dihlomathiso tsena di habile ho matlafatsa ditlhoko tsa poloko ya matlotlo bakeng sa dibanka, ho akga le dibanka tsa kopanelo le tsa dikoporasi, le tse ding tse itseng tseo e seng dibanka. Diphetoho di tla netefatsa hore ha ho ka etsahala hore ditheo tsena tsa ditjhelete di be le mathata, di ka thuswa ka mokgwa o tshireletsang beng ba tjhelete ba tlokotsing ka hore ho se ke ha eba teng ditshita tse kgolo tsamaisong ya tsa ditjhelete le moruo ka bobatsi.
D. Diketsahalo tse Tlang
13. Letsatsi la Bojalefa
13.1. Keteko ya Letsatsi la Bojalefa la 2018 katlasa mookotaba o reng: “Selemo sa Nelson Mandela: Ho ntshetsa pele phetoho lepatlelong la bojalefa ba Aforika Borwa”, e tshwarelwa Lebaleng la Dipapadi la Riverview Kokstad, KwaZulu-Natal. Ena ke karolo ya lenaneo le le lelele la kgwedi kaofela la diketsahalo tse rarollang dintho tse amanang le phetoho, phahamiso le paballo ya mohlahlwe wa bojalefa le manoni a Aforika Borwa.
13.2. Keteko ena ya Letsatsi la Bojalefa e etsetswa ho tlotla Adam Kok le ditjhaba tsa Makgerikwa ka sebete, boikitlaetso le matla a bona ka ho hanana le boipehi ba bokoloniale.
13.3. Kabinete e etsa kgoeletso ho setjhaba hore se keteke kopano ya sona ka mohlahlwe wa sona, jwalo ka ha re sebetsa mmoho ho aha naha eo batho bohle ba yona ba hlomphanang ba bile ba tsotellana.
14. Seboka Kakaretso sa Matjhaba a Kopaneng (UNGA)
14.1. Ho kenyeng letsoho mabapi le dilemo tse lekgolo tsa tswalo ya Moporesidente wa mehleng Nelson Mandela, ka la 24 Loetse 2018 UNGA e tla tshwara kopano ya boemo bo hodimo mabapi le kgotso ya lefatshe lohle e tsejwang ka hore ke Seboka sa Kgotso sa Nelson Mandela, e le ho tlotla dilemo tse lekgolo tsa tswalo ya Madiba.
14.2. Kopano ena e reretswe ho ananela tsebiso ya selekane sa sepolotiki e duletsweng majwana ke Dinaha tseo e leng Ditho tsa UNGA. Sena se etsahala kamora dipuisano tsa Baemedi ba Moshwelella mokgatlong wa UN ba Aforika Borwa le Ireland, ba sebetsang e le bahlophisetsi, hammoho le mebuso e mmedi ena ka dikateng tsa tsebiso ena ya selekane. Moporesidente Ramaphosa o boetse o lebelletswe ho ba le seabo Kopanong ya UN ya Boemo bo Hodimo mabapi le bohloko ba Lefuba (TB) mohla la 26 Loetse 2018. TB ke bohloko bo ka sehloohong Aforika mme tse ding tsa dinaha tse thefutsweng ke TB ka ho fetisisa di khontinenteng ena.
E. Melaetsa
15. Matshediso
Kabinete e fetisetsa matshediso a yona ho malapa a lahlehetsweng ke baratuwa ba ona ho swahlamaneng ha bese ho etsahetseng mmileng wa N1-25 haufi le Tobias, Masepaleng wa Setereke sa Waterberg Limpopo. Kabinete e boela e lakaletsa bao ba lemetseng hore ba fole ka potlako.
16. Dithoholetso
Kabinete e thoholetsa Letona la Dikgwebo tse Nyenyane, Mofumahadi Lindiwe Zulu, ka hore a amohelwe boemong bo hodimodimo ba Tlotlo ya Rio Branco (Ordem de Rio Branco), le Grand Cross ho tswa Mmusong wa Brazil.
Sena se entswe ka lebaka la matsapa a Letona a ntseng a tswelapele a ho ntlafatsa dikamano tsa dinaha tse pedi dipakeng tsa Brazil le Aforika Borwa. Tlotlo ena ya Brazil e fuwa bao ba ipabotseng ka diketso tsa tshebeletso e tswileng matsoho esita le makgetha a setjhaba. Letona Zulu e ne e le Leqosa la Aforika Borwa Brazil dipakeng tsa 2004 le 2008.
F. Dithonyo
Dithonyo kaofela di lokela ho netefatswa ka mangolo a thuto le tumello e amehang.
17. Boto ya Rand Water:
a. Moadvokheiti Faith Matshidiso Hashatse (Modulasetulo);
b. Mofumahadi Massacha Khulekelwe Glynnis Mbonambi (Motlatsi wa Modulasetulo);
c. Monghadi LL Makibinyane;
d. Mofumahadi Phindile Sweetness Mbanjwa;
e. Monghadi Ahmed Mohammed Pandor;
f. Mofumahadi Mahlatse Martha Kabi;
g. Mofumahadi Mankone Ntsaba;
h. Mofumahadi Nomsa Georgina Mbileni;
i. Monghadi Protas Thamsanqa Phili;
j. Mofumahadi Sophie Fende Molokoane;
k. Mofumahadi Savannah Nonhlanhla Maziya; le
l. Monghadi Ramateu Johannes Monyokolo.
18. Monghadi Percival Sechemane e le Mohlanka e Moholo wa Phethahatso wa Trans-Caledon Tunnel Authority.
Dipotso: Mofumahadi Phumla Williams – Phala ya Kabinete e Tshwereng Molepo
Mohala: 083 501 1039
