Sitatimende seMhlangano weKhabhinethi Lokhetsekile wangaLesitsatfu, mhla ti-15 Mabasa 2020
Umhlangano weKhabhinethi loKhetsekile lobanjwa kumavidiyo bewubanjwe lamuhla, ti-15 Mabasa 2020, kukhulunyiswana ngelisu lekwelulama esimeni lesifanele kwemnotfo ngemuva kwekwendlula kwesikhatsi seKuhlala eMakhaya kungatsiwa khushu kwaVelonkhe kwe-COVID-19.
Loku kulandzela simemetelo lesentiwe nguMengameli Cyril Ramaphosa emavikini lamabili lendlulile, sekutsi Ikhabhinethi itawubamba tingcoco letigcwele kute itfole lisu lekwelulama kwemnotfo walelive.
Kutfolwe tetfulo letisihlanu letivela kulamaklasta: (1) Imikhakha yeTemnotfo, Telutjalomali, Tekucashwa neSakhiwonchanti; (2) Tekubusa, Tekutfutfukisa Emakhono eMbuso neweTikhungo; (3) Tekuvikela Tenhlalo, Tekutfutfukisa Ummango neBantfu; (4) Telubanjiswano lweMave eMhlaba, Teluhwebo neKuvikeleka; kanye (5) neTebulungiswa, Tekuvikela Bugebengu neTekuphepha.
Letetfulo tibe ngumphumela lomkhulu wemsebenti lowentiwe nguwo onkhe emaklasta eKhabhinethi, tigcile ekwelulameni kwemnotfo walelive lekungumphumela welubhubhane i-COVID-19 nekwehliselwa ezingeni lemnotfo lelingentasi kweNingizimu Afrika lokusandza kwentiwa ngema-ejensi etekulinganisa i-Moody’s ne-Fitch ngalokufananako.
Ikhabhinethi incume kutsi kusadzingeka tingcoco nekubonisana lokuchubekako ngembi kwekutsi kuvunywe lelisu lekugcina lelihlanganisile lekutawabelwana nalo nesive sonkhe.
Onkhe emaklasta eKhabhinethi acelwe kutsi asebentisane kute akhiphe idokhumenti yinye yetintfo telisu lekwelulamisa umnotfo walelive lakitsi letibalulekile letifanele kutsi tibekwe embili, letawuphotfulwa eMhlanganweni weKhabhinethi lolandzelako lohlelelwe kubanjwa ngeMsombuluko, Mhla tinge-20 Mabasa 2020.
Ikhabhinethi iphindze yayalela Indvuna yeTemabhizinisi aHulumende Pravin Gordhan kutsi ahlele umbiko wakamuva lomayelana ne-South African Airways, kutewukhulunyiswana ngawo kulomhlangano lotako. Ngemuva kwaloko, Ikhabhinethi itawubese iphotfula lelisu lekwelulamisa umnotfo walelive.
Ikhabhinethi ibonga bonkhe bantfu balelive ngekuhlala ekhaya ngalesikhatsi sekuhlala ekhaya ungatsi khushu.
Imibuto ingacondziswa ku: Mk. Phumla Williams – Libambela laloKhulumela Ikhabhinethi
Makhalekhikhini: 083 501 0139
