1. Phethagatšo ya Mananeo a Bohlokwa a Mmušo
1.1. Kabinete e amogetše Polelo ya Maemo a Setšhaba ka Mopresidente Jacob Zuma ye a e filego ka Labone la 11 Dibokwane. Polelo ye e adile tsela ya togamaano ya go tsenya tirišong leanotiro la mmušo. Mopresidente o ipileditše go mmušo, go bašomi le ba kgwebo go šoma mmogo go hwetša ditharollo tšeo di ka kgontšhago kgolo ya ekonomi ya go ya go ile. Kabinete e thekga magato a go fokotša tshenyegelo ao a tsebagaditšwego ke Mopresidente, ao a tlago hlagišwa ka botlalo ke Tona ya Ditšhelete ka la 24 Dibokwane.
Polelo ya Ditekanyetšo ya ngwaga wa ditšhelete wa 2016/17 e tla tšwela pele go ala kabo ya methopo go mananeo a mmušo a mehutahuta ka ge go gateletšwe ke Mopresidente.
1.2. Kabinete e amogetše Kopano ya Baemedi ba Meepo ye e atlegilego, yeo e bego e swerwe ka Cape Town go thoma ka la 6 go fihla ka la 11 Dibokwane. Baemedi bao ba etilego pele go tšwa ka lefapheng la meepo le ka mebušong ye mmalwa go tšwa ka Afrika ba ile ba fana ka tsebo ka ga ka fao lefapha le le ka hlohleletšago dipeeletšo le go šomiša dibaka tše di lego gona ka Afrika. Kabinete e lebogile boikgafo bjo bo dirilwego ke mmušo wa Japane bja go oketša peeletšo ya yona ka Afrika Borwa.
Kabinete e tiišeleditše gape boikgafo bja yona bja gore go be le lefapha la meepo leo le lego seeming se sekaone le seo se atlegago. Tumelelano ka ga Tlhako ya Intasteri ya Meepo ya Go ya go ile e thekga intasteri ya meepo ka mo seemong se se boima sa mo lebakeng le. Mmušo o tšwela pele go aba bonnete bja taolo gomme o tla netefatša gore go phethwa Molaokakanywa wa Tlhabollo ya Methopo ya Diminerale le Phetroliamo, wo o lego pele ga Palamente.
2. Diphetho tše bohlokwa tša Kabinete
2.1. Kabinete e dumeletše Molawana wa mabapi le Go Betša wa Bosetšhaba wa mafelelo, wo o rarollago ditlhohlo tšeo di šitišago go šoma gabotse ga Molao wa mabapi le Go Betša wa Bosetšhaba, wa 2004 (Molao wa Bošupa wa 2004). Molawana wo o šetše o sepetše tshepedišong ya ditherišano le setšhaba. Molawana o šišinya diphetošo go metheo ya sebopego sa taolo sa makgotla a mabapi le go betša le go maatlafatša mekgwa ya taolo go fokotša tšhomišobošaedi ya go betša. O šoma go dikhasino, bingo, go metšhene ya tefo ye e diretšwego mellwane le go betša ka mabelong a dipere. Molawana wo o tla tšeela legato Lekgotla la mabapi le Go betša la Bosetšhaba gomme go tla ba le Molaodi wa Go betša wa Bosetšhaba yo a tlago bega thwii go Kgoro ya Kgwebišano le Intasteri.
2.2. Kabinete e dumeletše go romelwa ga Pego ka ga Tekodišišo ya Mengwaga ya Fasefase ya gore Bana bao ba Tshetšego ba be le Maswanedi a go ba Basenyi ka Palamenteng, yeo e nyakegago go latela Molao wa Toka go Bana, wa 2008 (Molao wa 75 wa 2008). Pego ye e šišinya gore naga e amogele ditlamego tša boditšhabatšhaba le tša ka seleteng se ya mabapi le mengwaga ya fasefase ya gore bana bao ba tshetšego molao ba be le maswanedi a go ba basenyi.
2.3. Kabinete e dumeletše go ngwala ka gare ga Kuranta ya Mmušo ga Mafelo a Tlhabollo ya Mohlagase wa go Šomišwa Leswa (REDZ). Se se tla tsenya tirišong tshepedišo ya taolo, go tseba mafelo ao go ona ditheknolotši tša Fothobolthaiki tša mohlagase wa letšatši di ka thekgwago ka mašeleng le fao koketšo ya kabo ya mohlagase ‘ye e tseneletšego’ e ka lebišwago gona.
Di-REDZ tše di tla netefatša gore go ba le phetogelo go ekonomi ya tšweletšo ya khapone ya fase, go akgofiša tlhabollo ya mananeokgoparara, le go ba le seabe go motheo wa taolo wa tirišano ye kgolo le wo o ka akanywago wo o fokotšago taolo ye e sego maleba ya mabapi le tshenyegelo ya go obamela melao.
2.4. Kabinete e sedimošitšwe ka ga dikutollo tša Pego ya 2014 ya Dilaetši tša Mahlale, Theknolotši le tša Boitlhamelo tša Afrika Borwa ya Lekgotlakeletšo la Bosetšhaba ka ga Boitlhamelo. Pego ye e fa diphetogo ka ga phethagatšo ya mošomo ka Lenaneo la Boitlhamelo la Bosetšhaba (NSI). E sekaseka phethagatšo ya mošomo le seabe sa NSI go dilo tše bohlokwa tše di tlago pele maemong a bosetšhaba tšeo di ukangwego ka go Leanotlhabollo la Bosetšhaba (NDP).
2.5. Kabinete e dumeletše tšhomišo ya bašomi ba mmušo bao ba rotšego modiro le bao ba sa lego mešomong bjalo ka bafahloši ka Sekolotlhahlo sa Mmušo sa Bosetšhaba (NSG).
NSG e tsebagaditšwe semmušo ka 2013, ya tšeela legato Sekolo sa Boetapele le Bolaodi bja Tshepedišo ya Merero ya Setšhaba (PALAMA), gomme e filwe mošomo wa go tšwetša pele go fihlelela ga mekgwa le melaotshepetšo yeo e laolago tshepedišo ya merero ya setšhaba le go maatlafatša boleng, bogolo le seabe sa tlhabollo ya bokgoni bja bašomi ka dihlongweng.
Lesolo le le tla lekwa ka go phethagatšwa ga Lenaneo la Bohle la Tsebagatšo la bašomi ba mmušo.
Mokgwa wo o kgontšha bašomi ba mmušo go oketša boleng go tirelo ya mmušo. Ba tla ruta ka ga maitemogelo a bona, botsebi, bokgoni le tsebo go eletboleng bja ditirelo tšeo re di abelago setšhaba le go hlahla bašomi ba mmušo. Lesolo le le tla tšwela pele go kaonafatša boleng bja ditirelo tšeo re di abelago setšhaba ka mokgwa wo o šomago gabotse le wa go seketša tšhelete.
2.6. Kabinete e dumeletše Pego ya Mafelelo ya Naga ya Afrika Borwa ya Kgato ya Boraro ka ga Phethagatšo ya Mokgatlo wa Tirišano le Tlhabollo ya Ekonomi (OECD) (Kwano ya Twantšho ya Bomenetša). Pego ye e tlo romelwa go Sehlophatšhomo ka ga Tsogolekobong sa OECD.
Pego ye e bolela ka ga kgatelopele ye e dirilwego ke mmušo ka ga ditsenogare tša ona tša go fediša tsogolekobong leo le dirwago dinageng tša ka ntle ka go hwetša, go nyakišiša le go sekiša badiri ba bjona. Pego ye e tšwela pele go bolela ka ga maitapišo ao a dirilwego go tliša temošo ka ga bosenyi bjo.
2.7. Kabinete e dumeletše gore Kgoro ya Merero ya Selegae (DHA) e bewe ka fase ga Legoro la tša Toka, Thibelo ya Bosenyi le Tšhireletšo.
Mošomo wa Kgoro ya Merero ya Selegae ke go hlokomela retšistara ya boitsebišo bja batho yeo e bolokegilego, ye e nepagetšego le maemo a batho ka moka ka gare ga mellwane ya naga ya rena, e lego selo se bohlokwa seo se kgontšhago mešomo ka moka ya mmušo. E filwe gape mošomo wa go laola tshepedišo ya tša bofaladi, e lego seo se amago thwii tšhireletšego ya naga, tirišano ya setšhaba le phihlelelo ya dinepo tša tlhabollo.
Mo lebakeng leo le fetilego DHA e be e beilwe bjalo ka tirelo ya thekgo ya Tshepedišo ka kakaretšo ka fase ga Legoro la Pušo le Tshepedišo.
3. Melaokakanywa
3.1. Kabinete e dumeletše go romelwa ga Molaokakanywa wa Tšhireletšo, Tšwetšopele, Tlhabollo le Taolo ya Tsebo ya Setlogo ka Palamenteng. Molaokakanywa wo, ke go šireletša, go tšwetša pele tlhabollo le Taolo ya mananeo a Tsebo ya Setlogo.
O hlagiša gore go hlongwe le go šoma ga kantoro ya Bosetšhaba ka ga Mananeo a Tsebo ya Setlogo, Taolo ya ditokelo tša batho bao ba swerego tsebo ya setlogo, go hloma le go šoma ga sebokakeletšo ka ga mananeo a tsebo ya setlogo.
E dumelela gape phihlelelo le maemo a phihlelelo go tsebo ya ditšhaba ta setlogo le tša tikologo, go hlongwa ga lenaneo la kgatišo la bosetšhaba la mananeo a tsebo a setlogo, ngwadišo, tumelelo ya semolao le go fa bašomi ba tša tsebo ya setlogo disetifikeiti, go sepediša le go kgokaganya boitlhamelo bjo bo theilwego go tsebo ya setlogo. Molaokakanywa o tla thuša Molaophetošwa wa Melao ya Dithoto tša Bohlale, wa 2013 (Molao wa 28 wa 2013).
Kabinete e dumeletše go gatišwa ga Molaokakanywaphetošwa wa Dingwadišo tša Mangwalo a Dithoto wa 2015 gore o tle o swayaswaywe ke setšhaba. Molaokakanywa o fetoša Molao wa Ngwadišo ya Dithoto, wa 1937 (Molao wa 47 wa 1937). Molaokakanywa wo o ikemišeditše go fetoša Molao wa Dingwadišo tša Mangwalo a Dithoto, wa 1937 (Molao wa 47 wa 1937) ka nepo ya go huduga go tloga go kantoro ya dingwadišo tša dithoto ye e ngwalelago godimo ga dipampiri go ya go yeo e šomišago elektroniki. O bolela ka ga merero ya tšhireletšo ka go dumelela ngwadišo ya dithoto tše e lego dinamelwa bjalo ka bašomiši bao ba dumeletšwego ba lenaneo la ngwadišo ya dithoto tša elektroniki.
3.2. Kabinete e dumeletše go romelwa ga Molaokakanywa wa Maphelo a Dimela (Pabalelo ya Maphelo a Dimela) wa 2015 ka Palamenteng. Molaokakanywa wo o amantšha melao ya Afrika Borwa le ditlamego le melawana ya maleba go sepediša kgwebišano ye e bolokegilego le ye e lokilego ka nepo ya go šireletša kgwebišano ya ka mo nageng le ya boditšhabatšhaba ka dimeleng le ka ditšweletšweng tša dimela. Ge molaokakanywa wo o fetša go fetišwa, Afrika Borwa e tla kgona go thibela go tsena ga dibokwana le malwetši ao a sego a ka seleteng ao a tlago phatlalatša dibokwana le malwetši a kotsi go dimela ka mo nageng.
3.3. Kabinete e dumeletše go romelwa ga Molaokakanywaphetošwa wa Dikgorotsheko tša Molao wa 2015 ka Palamenteng.
Molaokakanywa wo o fetoša Molao wa Dikgorotsheko tša Maseterata, wa 1944 (Molao wa 32 wa 1944) le Molaophetošwa wa Dikgorotsheko tša Godimo, wa 2013 (Molao wa 10 wa 2013).
Diphetošo tše di nyaka go fediša seemo sa baadimi bao ba ikhwetšago ba le mathateng a ditlaišo ka tshepedišong ya kgoboketšo ya dikoloto ka dikgorotshekong tša maseterata le go akaretša protšeke ya Kgoro ya Kgwebišano le Diintasteri ya go tloša tshedimošo ya dikoloto ya badiriši. Molaokakanywa wo o nyaka go fetoša dikarolo tša Molao wa Dikgorotsheko tša Maseterata, wa 1994 (Molao wa 32 wa 1994) (e legoe MCA), go rarolla ditlaišo tša ka Taelo ya Go Tšeela Dithoto tša go se Lefelwe (EAO).
Molaokakanywa wo o nyaka go rarolla le go fediša dikahlolo tšeo di fiwago ka fao e sego molaong, kudukudu ke bomapalane ba dikgorotsheko ka ntle le tlhokomedišiša ya ba molao, makga a mantši ka lebaka la go hloka maitemogelo gob aka lebaka la go kwana peleng le baabi ba dikoloto, le baboleledi ba bona ba tša molao goba le bakgoboketši ba dikoloto. Molaokakanywa o tla netefatša gore baadimi ba fiwa kahlolo yeo e obamelago taelo ya tefo ya kgwedi le kgwedi goba le Taelo ya Go Tšeela Dithoto tša go se Lefelwe yeo e lego ka gare ga mollwane wa tefelo ya kgwedi le kgwedi ye e beilwego ke molao.
4. Ditiragalo tše di tlago
4.1. Go ingwadišetša go kgetha la mathomo mafelelong a beke ka Dikgethong tša Mmušo wa Selegae wa 2016 go tla dirwa ka la 5 go fihla ka la 6 Hlakola 2016. Kabinete e ipiletša go maAfrika Borwa ka moka go šomiša le go hlompha temokrasi ye e hweditšwego gabohloko ka go ya go phethagatša tokelo ya bona ya temokrasi go ingwadiša le go bouta ka dikgethong tše di tlago.
4.2. Mopresidente Zuma o tla ya Ketelong ya Semmušo Repabliking ya MaIslamo ya Iran go tloga ka la 28 go fihla ka la 29 Dibokwane 2016. Ketelo ye e tla maatlafatša ditherišano tša rena tše di tšwelago pele tša sepolotiki le tša ekonomi le Iran le go thekga dikamano tša Dinaga tša Borwa bja Molatšatši.
Bjalo ka Malaodiphetiši wa Lebotho la Mašole a Afrika Borwa (SANDF), Mopresidente Zuma o tla eta pele mokete wa bohlano wa Letšatši la Mašole ao a Itlhamilego ka Port Elizabeth, ka Kapa Bohlabela, ka la 21 Dibokwane 2016. Mokete wo wa ngwaga ka ngwaga o laetša thekgo le go lebogiša banna le basadi ba SANDF.
4.3. Mopresidente Zuma o tla fa polelo ka pulong ya Ntlo ya Baetapele ba Setšo ya Bosetšhaba ka Palamenteng, ka Motsekapa ka la 26 Dibokwane 2016. Tirišano magareng ga mmušo le baetapele ba setšhaba e bohlokwa ge ba šomela go kaonafatša maphelo a batho.
4.4. Ka Mokibelo wa la 20 Dibokwane 2016, Motlatšamopresidente Cyril Ramaphosa o tla eta pele kemedi ya go leba go Pontšho ya Tlhabollo ya Bafsa ya Mopresidente ka Kerekeng ya Grace Bible Church ka Pimville, Soweto. Pontšho ye e thekgwa ke Kgoro ya Merero ya Selegae, Kgoro ya Bašomi, Kgoro ya Tlhabollo ya Leago le Kgoro ya Tšhireletšo.
Kabinete e ipiletša go bafsa ka mo lefapheng le go tsenela pontšho ye, yeo e tlago aba tshedimošo ka ga ka fao ba ka tšwetšago pele dithuto tša bona, ba thome dikgwebo tša bona goba go holega go masolo a thekgo a mmušo.
4.5. Kabinete e dumeletše gore naga e be monggae wa Seminara sa ka Seleteng sa Afrika ka ga Tšhireletšo ya Batho go lebeletšwe Maemo a Bona a Thobalano, Boitšhupo bja Bong le Boitlhagišo, yeo e tlago swarwa ke Khomišene ya Ditokelo tša Botho ya Afrika Borwa, go tloga ka la 3 go fihla ka la 5 Hlakola 2016.
Seminara se se tla sepediša dingangišano tša go hloma kwešišano ye kgolo ka ga selo seo se bakago ditlhohlo tše le seo se di oketšago ka nepo ya go hwetša ditharollo tše di ka phethagalago le dikgetho tše di lego gona go Mebušo go rarolla go tshela molao fa.
4.6. Kabinete e lakaletša baithuti ka moka bao ba ngwalago ditlhahlobo tša Tlaleletšo tša Marematlou mahlatse le mahlogonolo. Baithuti ba hlohleletšwa go fihlelela Lenaneo leo le sa tšwago go hlongwa semmušo la thekgo ya baithuti bao ba ngwalago marematlou labobedi leo le hwetšagalago ka diprofenseng ka moka le go thuša baithuti ka dithuto tša bona ka go šomiša methopo ya mehutahuta.
Maikemišetšo a Lenaneo la Thekgo ya Baithuti bao ba Ngwalago Marematlou Labobedi ke go fa bafsa bao ba paletšwego dithutong go fihlelela dinyakwa tša Setifikeiti sa Marematlou (NSC) sebaka sa bobedi sa go tšwelela go marematlou go realo e le go kaonafatša boleng bja bophelo.
Ditlhahlobo tša tlaleletšo di bopa karolo ya Lenaneo la Thekgo ya Baithuti bao ba Ngwalago Marematlou Labobedi la kgoro le go fa baithuti bao ba sego ba fihlelela dinyakwa tša fasefase tša gore ba tšwelele le go hwetša setifikeiti, eupša bao ba hlokago palo ya godimodimo ya dithuto tše pedi gore ba hwetše NSC sebaka sa go dira bjalo.
Kabinete e amogela tsebišo ye e dirilwego ke Mopresidente ya maina a maloko a Khomišene ya Dinyakišišo ka ga Thuto ya Godingwana. E ipiletša go bakgathatema ka moka bao ba nago le kgahlego go Thuto ya Godingwana go tsenya letsogo ka mošomong wa khomišene ka nepo ya go hwetša tharollo ya go ya go ile go ditlhohlo tšeo Thuto ya Godingwana e lebanego le tšona.
5. Maemo a Kabinete go merero ye bohlokwa seemong sa bjale
5.1. Tona ya Kgoro ya Methopo ya Diminerale Mosebenzi Zwane, Tona ka Kantorong ya Mopresidente Susan Shabangu le Tona ya Kgoro ya Tlhabollo ya Leago Bathabile Dlamini – bao ba thwetšwego ke Mopresidente Zuma go fa thekgo go mmušo wa profense, go beng ba meepo le ba malapa ao a amegilego ka masetlapelong a moepo wa Lily Gold Mine ka Barberton – ba sedimošitše Kabinete ka ga ditiragalo tša moragorago. Kabinete e bile le Mopresidente ge a ipiletša go setšhaba go kwela bohloko le go rapediša bašomi ba bararo ba moepong bao ba sa kgakgetšwego ka fase ga moepo le ba malapa a bona.
5.2. Kabinete e tšwela pele go belaetšwa ke komelelo yeo e sa amago dikarolo tše dingwe tša ka nageng. E tšweleditše ditebogo tša yona go maAfrika Borwa, bao ba thekgago masolo a kimollo ya komelelo.
Kabinete e lebiša ditebogo tša yona go bao ba obametšego boipiletšo bja go bega go dutla gofe goba gofe ga meetse ka nepo ya go thekga Lesolo la Twantšho ya go Ditla ga Meetse leo le etilwego pele keTona ya Kgoro ya Meetse le Kelelatšhila Nomvula Mokonyane. Kabinete e leboga moya wa Botho wo o laeditšwego ke lesolo leo le etilwego pele ke Operation Hydrate leo le dirilego phapano go ditšhaba tšeo di lego masetlapelong.
5.3. Kabinete e rerišane le go amogela diabe ka botlalo tša go thomiša ga Molaophetošwa wa Melao ya Motšhelo, wa 2014. Go ya ka Molao woo, go dira gore dikholego tša sekhwama sa phrobitente di lefše moholegi kgwedi ka kgwedi go tla thomišwa ka la 1 Hlakola 2016.
Seo se ra gore go thoma ka letšatšikgwedi leo dikholego tša sekhwama sa phrobitente le dikholego tša sekhwama sa phenšene di tla swarwa go swana ka gore maloko a sekhwama sa phrobitente ba tla re ge ba rola modiro ba dumelelwa go go tšea tee-tharong ya dikholego tša bona tša phrobitente bjalo ka tefelo ya palomoka ya kheše gomme pedi-tharong ye e šetšego ya dikholego tša bona e tla swanelwa ke go šomišwa ke bona go reka inšorentshe ye e tlago ba lefa kgwedi ka kgwedi. Tlhagišo ya go swana le ye e šoma go maloko a dikhwama tša phenšene mo lebakeng le.
Diphetogo tše tša elao di ama bašomi bao ba hwetšago moputso wa godimo le batho ka moka bao ba welago go dikhwama tša phrobitente.
Mekgatlo ye mmalwa le batho ba hlagišitše pelaelo ya bona mabapi le go tsenya tirišong ga diphetogo tše diswa gomme ba dirile ditlhagišo go mmušo ka ga phethagatšo ye. Go molaleng gore ka ntle le ditshepedišo tša ditherišano tšeo di tseneletšego tšeo di ilego tša dirwa pele ga ge molao wo o fetišwa gore dipelaelo tšeo di sa le gona le gore dipelaelo tšeo di swanetše go rarollwa ka tšhoganetšo go netefatša gore ge molao o thoma go šoma diphetogo go dikholego tša sekhwama sa phrobitente di tla tsenywa tirišong ntle le mathata le gabotse.
Ka lebaka leo, Kabinete e tšere sephetho sa go ala phetošo ya molao go Molaophetošwa wa Melao ya Motšhelo ka tšhoganetšo go fega letšatšikgwedi la go thoma go šoma ga ona go tloga go la 1 Hlakola 2016 go fihla go la pele Matšhe 2018 go dumelela gore go be le ditherišano tše dingwe go tšwela pele le bakgathatema ka moka ba bohlokwa. Ditherišano tšeo di ka feletša ka phetošo ye nngwe go melao ye. Molaokakanywaphetošwa wo o tla alwa ka Palamenteng mo matšatšing a mmalwa ao a latelago.
6. Mahloko
6.1. Kabinete e lebiša mahloko ka go hlokofaleng mo nakong ye e sa tšwago go feta ga Mokgethwa Mopišopo Glayton Modise wa International Pentecostal Holiness Church. Mopišopo Modise o be a etile pele phuthego ya maloko ao a fetago dimilione tše tharo go ralala le Borwa ba Afrika, ka morago ga lehu la tatagwe le mothomi wa kereke, Mokgethwa Moemedi Frederick Modise ka 1996.
6.2. Kabinete e lebiša gape kwelobohlo ya yona ka ga go hlokofala mo nakong ye e sa tšwago go feta ga Mongwaledipharephare wa peleng wa Mokgatlo wa Dinagakopano (UN) Kgoši Boutros Boutros-Ghali. O thomile go šoma ka 1992 ka nako yeo go bego go na le khuetšo ye e golago go UN go latela mošomo wa yona wa go tšea sephetho ka ntweng ya Gulf war, gomme a šoma lebaka la mengwaga ye mehlano. O hlokofetše ka sepetleleng sa Cairo ka Labobedi a na le mengwaga ye 93. O tla gopolwa ka seabe sa gagwe sa go tliša khutšo le temokrasi.
7. Melaetša ya ditebogišo
7.1. Kabinete e lebogiša Morena Kevin Govender go tšwa ka Kantorong ya Motsekapa ya Mokgatlo wa Thutanaledi ya Tlhabollo le Thutanaledi ya Boditšhabatšhaba yo a tlago abelwa Metale wa aemo a godimo wa Edinburgh wa 2016 ge a hlomile Kantoro ya Thutanaledi ya Tlhabollo ka Motsekapa. Govender ke moAfrika Borwa wa mathomo wa go hwetša sefoka se sa maemo a godimo sa diphihlelelo tša mahlale le theknolotši tšeo di tsenyago letsogo ka go kwešišeng le go phela gabotse ga batho.
Kabinete e reta motantshi wa mmino wa palate wa mengwaga ye 16 Leroy Mokgatle yo a thopilego sefoka sa Mmamoratwa wa Babogedi le thušo ya mašeleng a dithuto a gore a ye phadišanong ya Palate ya Boditšhaba ya Prix de Lausanne ka Switzerland. Ke moAfrika Borwa wa mathomo wa go thopa thušo ye ya mašeleng mo mengwageng ye 28 ebile ke wa bobedi ka historing ya ka mo nageng.
Kabinete e na le Mopresidente Zuma ge a lebogiša bathopasefoka ba Difoka tša Bobedi tša Ngwaga ka ngwaga tša Ubuntu Awards. Difoka tše di hlompha baetapele ba diintasteri ba Afrika Borwa le batho bao ba hlomphegilego ka ga seabe sa bona sa go tšwetša pele dikgahlego tša rena tša bosetšhaba le maitshwaro lefaseng ka bophara.
Kabinete e lebogiša moraloki wa foluti Wouter Kellerman, sehlopha sa mmino wa go opela ka molomo Ladysmith Black Mambazo le seopedi sa mmino wa sedumedi Neville D ge maina a bona a šišintšwe ka Difokeng tša Grammy tša 2016. Badiragatši ba ke tlhohleletšo ebile ba iša pele leina la Afrika Borwa.
8. Bao ba thwetšwego mošomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
8.1. Lekgotla la Meetse la Lepelle Northern Water:
a) Mohlomphegi Thovhele Tshivhase (Modulasetulo);
b) Morena Matsebe Ivor Phasha (Motlatšamodulasetulo);
c) Mohumagadi Thandeka Thembekile Celiwe Hlongwa (leloko);
d) Morena Boxing Phillemon Sebola (leloko);
e) Morena Ntale Herold Matsepe (leloko);
f) Mohumagadi Mankone Mabataung Ntsaba (leloko);
g) Mohumagadi L Malamba (leloko);
h) Mohumagadi Josephine Mampheri Letsoalo (leloko); le
i) Mohumagadi Makgetsi Annabelle Mphahlele (leloko).
8.2. Moatbokheiti JB Skosana o thwetšwe bjalo ka Motlatšamolaodipharephare (DDG): Ditirelo tša Kgorotsheko ka Kgorong ya Toka le Tlhabollo ya Molaotheo (DoJ&CD).
8.3. Mohumagadi GB La Foy o thwetšwe bjalo ka DDG: Tlhabollo ya Molaotheo ka go DoJ&CD.
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
