Ge e le gore o na le mengwaga ye 16 goba go feta, o ka dira kgopelo ya Pukwana ya Boitsebišo (ID). O tla swanelwa ke go ba le Pukwana ya Boitsebišo go ingwadišetša ditlhahlobo tša gago tša marematlou, go hwetša lengwalo la go otlela goba go bula akhaonte ya panka.
Ge o ka hwetša Pukwana ya Boitsebišo ya gago gomme wa gwetša go na le diphošo ka ga dintlha tša gago, Kgoro ya Merero ya Selegae e tla go direla Pukwana ye nngwe ya Boitsebišo ntle le tefo.
O ka dira kgopelo ya gore o direlwe Pukwana ye nngwe ya Boitsebišo ge e le gore:
- o nyetšwe gomme o nyaka go thoma go šomiša sefane sa monna wa gago
- o mosadi gomme o nyaka go dira kgopelo ya Pukwana ya Boitsebišo e mpsha ka sefane sa gago se o ilego wa se šomiša nakong ye e fetilego
- Pukwana ya gago ya Boitsebišo e lahlegile, e utswitšwe goba e senyegile
Kgoro ya Merero ya Selegae e tloša Pukwana ya Boitsebišo e talamorogo gomme e tsenya karata ya Boitsebišo. Se se tla dirwa mo mengwageng ye e tlago e seswai, ka fao o ka se hwetše karata ya Boitsebišo ge o dira kgopelo mo lebakeng le. Ge e le gore o šetše o na le Pukwana ya Boitsebišo, o tla laletšwa go dira kgopelo ya karata ya boitsebišo.
Hwetša dintlha ka botlalo mabapi le go hwetša pukwana ya boitsebišo goba ikgokaganye le Kgoro ya Merero ya Selegae.