A. Merero ye Bohlokwa Seemong sa Bjale
1. Matsapa a go Boetša Seemo Sekeng le go Aga ka Leswa Morago ga Mafula
1.1. Kabinete e retile le go thabela batho ka moka le mekgatlo ge e tsentšhitše letsogo mo matsapeng a go boetša seemo sekeng le go aga ka leswa morago ga mafula a moragorago a go setla pelo dikarolong tše dingwe tša naga, kudukudu gola KwaZulu-Natal. Kabinete e lebogile gape le mekgatlo ye sego ya mmušo, mekgatlo ya sedumedi, setšhaba ka kakaretšo, bengdikgwebo le mekgatlo ya go imolla batho maima a bona yeo e abetšego batho dijo, diaparo, mapai, diphuthelwana tša mengatana ya lehlapo, diyunifomo tša dikolo go malapa ao a wetšwego ke masetlapelo a gore ba kgone go fihlelela dinyakwa tša bona tša motheo.
1.2. Senthara ya Bosetšhaba ya Taolo ya Masetlapelo e tla kopantšha didiko ka moka tša mmušo mo matsapeng a yona a go fana ka kimollo ya moya wa botho malapeng ka moka ao a amilwego ke mafula. Ditirelo tša go abela batho madulo di gare di abelwa batho ba go feta 7 000 mo dileteng tšeo di amilwego go se lekane le selo gola KwaZulu-Natal.
1.3. Mošomo o šetše o thomile go aga madulo a lebakanyana a malapa a go angwa ke mafula mo nageng ye lego ya mmušo ye hlaotšwego gola KwaZulu-Natal ka kgonagalo ya gore malapa a a ka šuthišetšwa fao. Kabinete e tiišeleditše maikgafo a mmušo go laola dikhwama tša kimollo ya masetlapelo ka šedi ye kgolo le ka go se fihle selo. Mohlakišipharephare wa Afrika Borwa o fana ka ditirelo tša tlaleletšo tša go bea seemo leihlo le go lebiša dikhwama dinyakweng tše dingwe ka go tsamaišana le peakanyo ya tekanyetšo ya mmušo.
2. Tsebišo ya Seemo sa Bolwetši bja Coronavirus (COVID-19)
2.1. Kabinete e hlohleleditše batho ka moka mo Afrika Afrika go tšea magato a tlhokomelo go efoga go phatlalala ga COVID-19 morago ga gore dipalopalo tša moragorago di laetše tlhatlogo ye bonagalago ya kelo ya diphetelo le malwetši a go amana le sehla sa marega ka mo nageng.
2.2. Kabinete e re gopoditše ka moka ga rena go tšwelapele go ihlokomela le go hlokomela ba bangwe ka go hlapa matsogo a rena goba go sanithaesa kgafetšakgafetša, go apara dimaseke ge re le ka gare ga meago, go šielana sekgala sa go bolokega, go bula mafastere gore go hlabele moya le go hlaba meento.
2.3. Meento e santše e le boiphemelo bjo bo kaonekaone kgahlanong le COVID-19 ka ge e thibela malwetši a šoro, go amogelwa maokelong le go efoga mahu a go hlolwa ke COVID-19. Ga go hlokege aterese ya mo dulago pele o ka entelwa. Motho mang le mang, wa go ba le pasa goba a sena yona, a ka hlaba moento ntle le tefo mafelong a bohle a go hlaba meento go potologa naga ka bophara.
3. Semorafe a se fele!
3.1. Kabinete e sotše ka bogale ditiragalo ka moka tša semorafe ka mo nageng, go akaretšwa le ditiragalo tšeo di begilwego Sekolong seo se Phagamego sa Good Hope Seminary le Yunibesithing ya Stellenbosch gola Kapa Bodikela. Ditiragalo tše tša mahlabišadihlong di thulana le metheo ya Molaotheo yeo naga ya rena ya temokrasi e ithekgilego ka yona, yeo e akaretšago seriti sa botho, go se kgetholle ka semorafe, go se kgetholle ka bong, tekatekano le tlhomphano.
3.2. Molaotheo wa Rephabliki ya Afrika Borwa wa 1996 ke ona o re hlahlago gore re fediše ditiragalo tšeo di tšwago kua morago tša go se hlamatsege tšeo di dirago gore re se be ngatana ye tee le tšeo di abelanago ka toka ka go se swane. Batswadi ba hlohleletšwa go ruta bana go ganetša semorafe le go thabela ditšo tša go fapafapana, bjalo ka karolo ya lesolo la rena la mohlakanelwa la go hlohleletša kago ya setšhaba le phedišano setšhabeng.
3.3. A re šomeng mmogo go bea nyanyeng semorafe nako le nako ge se se thoma go ba setlwaedi sa ka mehla le go romela molaetša wo bogale wa gore semorafe ga sena bodulo ka mo nageng ya gaborena ya temokrasi.
4. Dikamano tša Afrika Borwa le Germany
4.1. Kabinete e amogetše ketelo ye atlegilego ya semmušo ka Mokhanseliri wa Rephabliki ya Germany, Mohlomphegimogolo Olaf Scholz, go tla ka mo Afrika Borwa ka Labobedi, 24 Mopitlo 2022.
4.2. Ketelo ye ya Semmušo ka Mokhanseliri Scholz ebile gona ka baka la taletšo ya go tšwa go Mopresidente Cyril Ramaphosa yo a eteletšego pele seboka sa go kgontšha dikamano tše botse tša dilete le tša boditšhabatšhaba, gotee le go goka dipeeletšo tšeo di hlokagalago kudu.
4.3. Baetapele ba bababedi ba boletše ka, magareng ga tše dingwe, mekgwa ya go thoma tirišano magorong a go swana le enetši le phetogo ya klaemete, kgwebišano le dipeeletšo, le magato kgahlanong le COVID-19 le nyakego ya meento. Baetapele ba ba ile ba lebeledišiša kgatelopele ye lego gona kontinenteng ya Afrika le maemong a boditšhatšhaba, go akaretšwa le dithulano nageng ya Ukraine le ditlamorago tša gona go lebeletšwe ikonomi ya boditšhatšhaba le tšhireletšego ya dijo le ya enetši.
4.4. Germany a se fela mogwebišani wa bobedi wo mogologolo wa Afrika Borwa, eupša ke gape mothopo wa boraro wo mogologolo wa baeti ba moše mmeeletši wo mogolo le mogwebišani go tša tlhabollo.
5. Khonferense ya Bohlano ya Lefase ka Bophara ka Phedišo ya Tšhomišo ya Bana Bokgoba
5.1. Kabinete e amogetše thumo ye atlegilego ya Khonferense ya Bohlano ya Lefase ka Bophara ka Phedišo ya Tšhomišo ya Bana Bokgoba yeo e bego e swaretšwe gola Durban go thoma ka la 15 go fihla ka la 20 Mopitlo 2022. Bakgathatema go tšwa lefaseng ka bophara ba bile gona khonferenseng ye, yeo e bego e swerwe ka tšhomišano le Mokgatlo wa Boditšhabatšhaba wa Bašomi.
5.2. Morago ga go rerišana ka ditlwaedi tše botse tše phethagaditšwego ke dinaga tša go fapafapana le go hlaola mabošaedi le magato a ka pelapela ao a nyakegago go akgofiša phedišo ya bobedi tšhomišo ya bana bokgoba le ya dikgoka, bakgathatema khonfereseng ye ba kwanetše morero wo ‘Boipiletšo bja Durban bja go Tšea Magato’ go swaragana le lemena la tšhomišo ya bana bokgoba.
5.3. Tšhomišo ya bana bokgoba ke ye nngwe ya go laetša bohlogo bjo bo ka dirwago ke setšhaba ebile e išeletša bana maemong a kotsi. Tšhomišo ya bana bokgoba ka boyona ke tlaišo ebile e thibela bana go hwetša thuto ye maleba le menyetla ye mengwe ya go ba hlabolla. Ngwana wo mongwe le wo mongwe ka mo Afrika Borwa o nale tokelo yeo e ka se ganetšwego ke motho ya gore a šireletšege kgahlanong le ditlwaedi tša go jabetša tša go šomišwa bokgoba.
5.4. Tokelo ya go hwetša thuto ya motheo e gona ka gare ga Molaotheo wa rena ebile goya le ka Molao wa Dikolo wa Afrika Borwa, 1996 (Molao 84 wa 1996), “motswadi mang le mang o swanetše go gapeletša morutwana ofe goba ofe yo a lego ka fase ga taolo ya gagwe go ya sekolong go tloga ka letšatši la mathomothomo la go bulwa ga dikolo ngwageng wo go fihlela ge morutwana wo a fihlelela mengwaga ye šupa goba mphato wa bosenyane, goya le ka gore go tlile efe pele”.
5.5. Goya ka Molao wa Bana, 2005 (Molao 38 wa 2005), “ga gona motho yo a dumeletšwego go šomiša, go bapatša, go nea goba go thwala ngwana goba go mo diriša mo mešomong bjalo ka mo mešomong ya tšhomišo ya bana bokgoba”.
B. Diphetho tša Kabinete
1. Kwanelo ya Kwano ya Boditšhabatšhaba ka go Šireletšwa ga Batho ka Moka Kgahlanong le go Nyameletšwa ka Dikgoka ke Maphodisa (ICPPED)
1.1. Kabinete e dumeletše tlhagišo ya ICPPED Palamenteng go lebeledišišwa le go dumelelwa go šomišwa ga kwano ye ke Afrika Borwa. Kwano ye ke tumelelano yeo e tlemago gohlegohle ya Ditšhabakopano (UN) yeo e swaraganego le go gatakwa ga ditokelo tša botho ka go nyameletšwa ga batho ka dikgoka ke maphodisa.
1.2. Kwano ye e hlaloša go nyameletšwa ga batho ka dikgoka ke maphodisa go akaretša go tšhabišwa, go golegwa, go swarwa goba mokgwa ofe goba ofe wo pheletšo ya ona e ka dirago gore mosolwa a latole go dumela goba gona go uta fao motšwasehlabelo a lego gona.
1.3. Ge e šetše e dumetše gore kwano ye e tsenywe melaong ya rena ya ka mo nageng, Afrika Borwa go tla letelwa gore e begele UN mengwaga ye mengwe le ye mengwe ye mebedi ka fao e phethagatšago seo se dumeletšwego kwanong ye. Kwano ye e fana ka magato a thibelo ao dinaga tšeo di lego maloko a kwano ye di swanetšego go a hloma go efoga go nyameletšwa ga batho ka dikgoka ke maphodisa dinageng tša bona tša go fapafapana.
2. Pego ya Bone ya Naga ya Afrika Borwa ka Tšhireletšo le Tlhohleletšo ya Ditokelo tša Botho
2.1. Kabinete e dumeletše tlhagišo ya Pego ya Bone ya Naga ye ka Tšhireletšo le Tlhohleletšo ya Ditokelo tša Botho go Khansele ya Ditokelo tša Botho ya Ditšhabakopano. Bafetleki ba UN ba Gohlegohle le ba Kgafetšakgafetša ba tla fetleka pego ye ge ngwaga o ela go fela. Go tloga mola e bago naga ye kwanetšego ya Kwano ya UN ya Ditokelo tša Botho, Afrika Borwa e sekasekilwe makga a mararo, ebile tshekatsheko ya mafelelo e dirilwe ka Lewedi 2017.
2.2. Pego ye e fana ka seemo sa ditšhišinyo tše 187 tše amogetšwego go tšwa tshepetšong ya diphetleko tša ngwaga wa 2017. Dikgopolo di hweditšwe go tšwa go tshedimošo yeo e kgonthišišitšwego, tshedimošo go tšwa go dikgoro tše maleba, Ditheo tša go Thekga Molaotheo le mekgatlo ye maleba ya go tšwa setšhabeng.
2.3. Kabinete e thabišitšwe ke kgatelopele ye fihleletšwego phethagatšong ya ditšhišinyo tše le fao mošomo o sa tšwelago pele gona. Pego ye e tla dirwa phatlalatša morago ga ge e hlagišeditšwe UN ka Phato 2022.
3. Pholisi ya 2022 ya Taolo ya Meetse a Meepo
3.1. Kabinete e dumeletše Pholisi ya 2022 ya Taolo ya Meetse a Meepo gore e phethagatšwe. Pholisi ye e fana ka mekgwa le magato a go šireletša le go babalela tšhomišo ya meetse. Yona e lekalekanya ditiragalo tša ikonomi tša meepo ka taelo ya go kgontšha tšhomišo ye swarelelago ya meetse ka mo nageng ya gaborena.
3.2. Godimo ga magato a mangwe, pholisi ye e hlatholla mehola le maikarabelo ka gare ga didiko tše tharo tša mmušo mabapi le merero ya go amana le meetse a ka meepong. Diphetogo tšeo di šišintšwego di tla rarolla ditlhotlo tša go thoma go hloma melao ya go iletša bao ba hlolago tšhilafalo le go dira gore go be moroba go gapeletša molawana wa gore mang le mang yo a hlolago tšhilafalo a rwešwe maikarabelo a go e phošolla goba go e bušetša morago. Pholisi ye e hlamilwe ka go tsamaišana le Molao wa Bosetšhaba wa Meetse, 1998 (Molao 36 wa 1998).
4. Pego ka Tlhako ya Thulaganyo ye Hlamilwego goya ka Bong, Bolekanyetši, Phetleko ya Mošomo le Botlhakiši
4.1. Kabinete e amogetše pego ya mošomo wo o dirilwego godimo ga phethagatšo ya Tlhako ya Thulaganyo ye Hlamilwego goya ka Bong, Bolekanyetši, Phetleko ya Mošomo le Botlhakiši.
4.2. Kabinete e thabetše kgatelopele ye kgolo ye fihleletšwego ke bontši bja dikgoro tša mmušo go hloma ditheong tša tšona tlhako ye yeo sale e amogelwa ka 2019 gore e phethagatšwe.
4.3. Ga e sale go tloga fao, dikgoro tše ntši di thomile go hloma dinyakwa tše bohlokwa tša pholisi ye go hlahla mananeo a thupetšo ao a nepišitšwego basading, go baswa le bathong ba go phela ka bogolofadi. Kabinete e dirile gape le boipiletšo bja tekolo ya mošomo le dipego tše tiišeleditšwego letsogo, kudukudu go tše dingwe tša dikgoro tšeo go fihla gabjale di sa kago tša fa dipego.
5. Dipoledišano tša Baswa go Hlompha Nelson Mandela (NMYD)
5.1. Kabinete e dumeletše NMYD go kgatlampana ngwaga ka ngwaga go thoma ka 2022. NMYD ya pulamadibogo e tla swarwa go thoma ka la 7 go fihla ka la 20 Mosegamanye 2022. Le ke lesolo la Mopresidente go nea baswa ba Kontinente ye monyetla wa go tsenela dipoledišano tše di ba agago mererong ye e ba amago kudu.
5.2. Dipoledišano tše, tšeo di tla bego di bolela ka senatla sa rena sa boditšhabatšhaba e bago Mopresidente wa Maloba Nelson Rolihlahla Mandela – di tla thoma ka dipoledišano tše ka maikemišetšo a go ruta batho ka go itlwaetša boetapele bja potego mo Afrika.
5.3. Dipoledišano tše di tla nea baswa monyetla wa go nyetlela ba bangwe ka bohwa bjo humilego bja ditšo tša bona. Lesolo le le tla tiišeletša le dikamano tša magareng ga batho go lebeletšwe baswa ba kontinente ye. Kgoro ya Basadi, Baswa le Batho ba go Phela ka Bogolofadi e tla fana ka dintlha ka botlalo tša lenaneo le ditiragalo tšeo di tla bago gona ka moragonyana.
6. Pego ya 2021/22 ya Ngwaga ka Ngwaga ya go Bewa Leihlo ga Bodiragatši ka Matlafatšo ya Basadi le Tekatekano ya Bong, Tlhabollo ya Baswa le Tlhohleletšo ya Ditokelo tša Batho ba go Phela ka Bogolofadi
6.1. Kabinete e amogetše pego ya ngwaga ka ngwaga ya go bewa leihlo ga bodiragatši go lebeletšwe pego ya 2021/22 ya go matlafatšwa ga basadi, baswa le batho ba go phela ka bogolofadi. Pego ye e latišiša mohlala wa ditaetšo tše bohlokwa tša tlhohleletšo ya tekatekano, maemo a mešomo, taolo le go kgatha tema ga dihlopha tše tša batho ka gare ga ditiragalo tša dikgoro le makalakgwebo a go laolwa ke mmušo.
6.2. Pego ye e ngwadilwe ka go bapetšwa le tlhako ya bolekanyetši bjo bo hlamilwego goya ka bong, phetleko ya mošomo le botlhakiši yeo e amogetšwego ke Kabinete ka 2019.
C. Melaokakanywa
1. Molaokakanywaphetošwa wa Maphelo le Polokego ya tša Meepo
1.1. Kabinete e dumeletše go phatlalatšwa ga Molaokakanywaphetošwa wa Maphelo le Polokego ya tša Maphelo gore setšhaba se fe ditshwayotshwayo. Molaokakanywa wo o šetšane le go kaonafatša maphelo le polokego ya bašomedi ba meepo, go akaretšwa le tikologo yeo go yona ditiragalo tša meepo di phethagalago. Molaokakanywa wo o fetoša Molao wa bjale wa Maphelo le Polokego ya tša Meepo, 1996 (Molao 29 wa 1996).
1.2. Diphetošo tše di fetekilwego magareng ga tše dingwe, di fana ka tlhathollo ya a mangwe a mareo ka Molaong wo, di tiišeletša tlhako ya taolo ya tša maphelo le polokego le go di bapiša le ditlwaedi tše kaonekaone tša boditšhabatšhaba mabapi le polokego meepong.
2. Molaokakanywaphetošwa wa Molaotheo wa bo-18 wa 2022
2.1. Kabinete e dumeletše phatlalatšo ya Molaokakanywaphetošwa wa 2022 wa bo-18 wa Molaotheo gore setšhaba se fe ditshwayotshwayo tša sona le gape gore Tona ya Toka le Tshokollo ya Bagolegwa, Morena Ronald Lamola a kgone go fana ka tsebišo ye nago le dintlha ka botlalo tša diphetošo tšeo di šišinywago Molaotheong.
2.2. Molaokakanywa wo o fetoša Karolo 6(1) ya Molaotheo wa Rephabliki ya Afrika Borwa wa 1996, wo o bolelago gore maleme a semmušo a 11 a Afrika Borwa ke Sepedi, Sesotho, Setswana, siSwati, Tshivenḓa, Xitsonga, Afrikaans, English, isiNdebele, isiXhosa le isiZulu.
2.3. Diphetošo tše di tla dira gore Polelo ka Diatla ya Afrika Borwa (SASL) e lemogwe bjalo ka polelo ya semmušo ya bo-12 ya naga ye ebile e tla iša pele kamogelo ya yona ya setšo le go netefatša ditokelo tša go lekalekana go MaAfrika Borwa ka moka, go sa kgathale bogolofadi bja bona. Kgoro ya Thuto ya Motheo e šetše e lemoga SASL bjalo ka polelo ya letswele.
D. Ditiragalo tšeo di Tlago
1. Beke ya Tšhireletšo ya Bana
1.1. Afrika Borwa e tla keteka Beke ya Bosetšhaba ya Tšhireletšo ya Bana go thoma ka la 29 Mopitlo go fihla ka la 4 Phupu 2022 ka fase ga morero wo: “A re šireletšeng Bana nakong ye ya COVID-19 le go fetela pele”.
1.2. Mo gare ga beke, šedi ya moswananoši e tla lebišwa godimo ga tlhobaboroko ya bosetšhaba ya go ima ga ditšwamahlalagading, yeo e hlatlogetšego godimo nakong ya COVID-19 ka ditšwamahlagading bao ba beleilego masea ka 2020.
1.3. Kabinete e dirile boipiletšo bja mohlakanelwa go tšwa go batswadi, mekgatlo ye lego setšhabeng, dihlopha tša sedumedi le setšhaba ka kakaretšo gore e be ngatana ye tee go thuša go fokotša tlhatlogo ya go ima ga ditšwamahlalagading.
2. Foramo ya Bolefase ya Ikonomi (WEF)
2.1. Afrika Borwa e kgatha tema go WEF gola Davos-Klosters, Switzerland go thoma ka la 22 go fihla ka la 26 Mopitlo 2022, ka fase ga morero wo: “Re šoma mmogo, go bušetša potego sekeng”.
2.2. Afrika Borwa e hlompha monyetla wa go ba karolo ya tharollo le go nyetlela naga tše dingwe maitemogelo a rena foramong ya bolefase. Go ba gona ga naga ya rena kua WEF go bohlokwa go godiša seriti sa rena bjalo ka naga ya dipeeletšo lefaseng ka bophara, ka go nyetlela lefase ka bophara ponelopele ya bokamoso le go bonagatša ditlhabollo tše diswa ka mo nageng.
3. Kgwedi ya Baswa
3.1. Kabinete e dumeletše Lenaneo la Kgwedi ya Baswa la 2022 ka fase ga morero wo: “Tlhohleletšo ya mekgwa ya boiphedišo ya go tšea telele le bopelotelele bja baswa go fihlelela bokamoso bjo kaone”. Letšatši la semmušo la Baswa le tla ketekwa gola Kapa Bohlabela.
3.2. Letšatši le ke anibesari yabo-46 ya 16 Phupu 1976 ya megwanto ya baswa kgahlanong le go gapeletšwa go ithuta dithuto ka moka ka leleme la Afrikaans.
3.3. Ka moya wa Phupu 1976, Kabinete e dirile boipiletšo go baswa ba naga ye go kalokana le tlhotlo ya tlhokego ya mešomo yeo e golelago godimo basweng ka go kgatha tema mananeong a go ba hlabolla go swana le boithutelamošomo le boithutela maitememogelo a mošomo.
3.4. Mmušo o hlamile mananeo a go thekga go thwalwa ga baswa le tlhomo ya mešomo ya lebakanyana. Dikgwebo le tšona di hlohleletšwa go gokagoketša baswa ba bangwe ba bantši mešomong ka go ba hlolela dibaka tša mešomo.
3.5. Lenaneo la baswa la kgwedi ka moka ya Phupu le akaretša ditiragalo ka moka go thoma ka go thakgolwa ga lesolo la baswa la makgoraditsela, go tsebagatšwa ga Lenaneo la Moemedi wa Leswaokgwebo la NYDA le bontši bja go thomišwa ga Ditirelo tša Bosetšhaba tša Baswa go potologa naga ka bophara.
3.6. Tona Kantorong ya Mopresidente ya Basadi, Baswa le Bao ba Phelago ka Bogolofadi o tlare go se goye kae a hlatholla lenaneo ka botlalo. Ditiragalo ka moka tša baswa go letetšwe gore di obamele ditshepedišo tša maphelo tša COVID-19.
4. Samiti ya Dinaga tša go Laolwa ke Magoši
4.1. Mmušo, ka tšhomišano le Setheo sa Bosetšhaba sa Ntlo ya Magoši, o tla swara Samiti ya Dinaga tša go Laolwa ke Magoši ka Labohlano, 27 le ka Mokibelo, 28 Mopitlo go rerišana ka merero ya go amana le taolo ya naga.
4.2. Tše ka moka di akaretša tshepedišo ya go fetišetša dinaga tša go laola ke magošigo tšwa Mmušong goya go beng ba tšona ba maloka a maleba, e lego taba ye bohlokwa go matlafatša batho ba go tšwa dinagamagaeng. Ditiragalo tša go dira gore batho ba palelwe ke go ba beng ba dinaga ba semmušo mo dinageng tšeo ba dulago go tsona ko magaeng ga e sesefatše fela ditokelo tša batho bao tša go bale naga ye lego ya bona eupša e fokotša le mabokgoni a bona a go šomiša yona naga yeo go kaonafatša maphelo a bona le a maemo a bona a ditšhelete.
E. Melaetša
1. Ditebogišo
Kabinete e lebiša ditebogišo tša yona le go lakaletša mahlatse le mahlogonolo go:
- Mme Leanne Manas, Modiragatši wa Lenaneo la Mesong la SABC la Morning Live, ge a amogeditšwe sefoka sa Botswerere bja Bosetšhaba sa go bitšwa Knight of France go tšwa France ka Labobedi, 17 Phupu 2022, ka go kgatha tema ga gagwe go bongwadi, bobegaditaba le magoro a mangwe a kakaretšo a go fapafapana.
2. Mahloko
Kabinete e lebiša mahloko a yona go malapa le go bagwera ba:
- Ntate Mpho Moerane (52), Meyaraphethiši wa maloba wa Toropokgolo ya Johannesburg, yo gape a bego a le mafolofolo mo dipolotiking bophelo bja gagwe ka moka le mohlankedi wa batho ba Johannesburg. Pele a tlo thwalwa go ba Meyaraphethiši, o hlanketše setšhaba bjalo ka Leloko la Komiti ya Meyara ya go šoma ka Tikologo le Ditirelo tša Mananeokgoparara.
- Ngaka Deborah Fraser (56), seopedi sa mmino wa sedumedi yo a thopilego difoka tše mmalwa yo malobanyana mo a hlomphilwego ka Bongaka bja Filosofi ka Mmino wo Galalelago ka Christian Leadership Academy.
- Ngaka Namane Magau (70), serutegi sa go hlomphega kudu le leloko leo le hlomphegago la Lekgotla la Babolokedi la Khansele ya Bosetšhaba ya AIDS ya Afrika Borwa.
- Ntate Mike Schüssler (60), raikonomi wa go tsebega kudu wa Moafrika Borwa yo e bego e le mmotegi wa intasteri ye ebile e le yena a bego a kgona go botša batho ka se le sela mabapi le seemo sa ikonomi ya Afrika Borwa.
- Ntate Jamie Bartlett (56), modiragatši wa go ratega kudu, wa go thopa difoka tše mmalwa tša difala tša Afrika Borwa le bodiragatši bja thelebišene, yo a bego a tsebega kudu ka ditema tšeo a di bapetšego bjalo ka Mike O'Reilly go Isidingo le David Genaro go Rhythm City.
- Kabinete le yona e bile le Mopresidente Ramaphosa go lebiša mahloko mmušong le setšhabeng sa United Arab Emirates (UAE) morago ga go hlokagala ga Lešika la ka Bogošing Sheikh Khalifa bin Zayed Al Nahyan (73), Mopresidente wa UAE.
F. Bao ba Thwetšwego Mešomong
Batho ka moka bao ba thwetšwego mešomong mangwalo a bona a dithuto a tlo netefatšwa le go tiišeletšwa ka tsela ye maleba.
1. Ntate Bongani Sinenhlanhla Dladla bjalo ka Mohlankediphethišimogolwane wa Lekgotla la Tlhabollo ya Intasteri ya Kago.
2. Ntate Shabeer Hamid Khan bjalo ka Mmalamatlotlopharephare kua Matlotlong a Bosetšhaba.
3. Mme Mendoe Ntswahlana bjalo ka Mohlankedimogolwane wa Dithekišetšano kua Matlotlong a Bosetšhaba.
4. Kabinete e kwanetše go thwalwa ga badiradikgopelo bao ba latelago go tlatša dikgoba tša mešomo tša Lekgotla la Balaodi ba Sekhwama sa Bohlokwa sa Enetši:
(i) Ntate Mosimaneotsile Jim Besnaar;
(ii) Mme Unati Nombakuse-Figlan.
Dinyakišišo:
Mme Phumla Williams – Seboleledi sa Kabinete
Sellathekeng: 083 501 0139
