Kabinete e kopane ka Laboraro la 18 Diphalane 2017, ka Tuynhuys, Motsekapa.
A. Merero Seemong sa Bjale
1. Letšatši la Tokologo ya tša Kgašo
1.1. Kabinete e ba le maAfrika Borwa ge ba keteka Letšatši la Tokologo ya tša Kgašo ka Labone la, 19 Diphalane 2017.
1.2. Kgašo e ralokile tema ye bohlokwa ka ntweng kgahlanong le kgethologanyo, ya bea nyanyeng bošoro le sehlogo seo se bego se dirwa ke mmušo wa kgethologanyo. Ngwaga wo ke wa bo 40 go tloga mola mmušo wa kgethologanyo o iletšago dikuranta tša kgatelopele tša go swana le ya the World, the Weekend World le the Voice.
1.3. Lehono, tokologo ya tša kgašo e ukangwa kudu ka go Molaotheo wa Afrika Borwa ebile e tšwela pele goba taba ye bohlokwa ka go setšhaba sa rena seo se hlabologago.
1.4. Kabinete e tšwela pele go hlohleletša maAfrika Borwa go tšwetša pele phihlelelo ya tshedimošo le go šomiša tokelo ya tokologo ya tša kgašo ka boikarabelo ka nepo ya go thuša go aga Afrika Borwa ye e kopanego, ya go hloka semorafe, ya go hloka kgethologanyo ya bong, ya temokrasi le ye e atlegilego go bohle.
2. Ekonomi ya Mawatle
2.1. Kabinete e reta Mopresidente Jacob Zuma ge a abile pego ya kgatelopele go bakgathatema ka ga go tsenywa tirišong ga Operation Phakisa ya Ekonomi ya Mawatle ebile e ipiletša go bakgathatema ka moka go tšwela pele go dirišana le mmušo go lokolla bokgoni bja tša ekonomi bja mawatle a rena.
2.2. Ekonomi ya Mawatle e šetše e bile le seabe sa 4.4% go Palomoka ya Letseno la Ditšweletšwa la Afrika Borwa gomme pego ya Mopresidente go bakgathatema e tloga e laetša ka maatla maitapišo a magolo le thekgo yeo badirišani ba mmušo ka moka ba nago le yona go bokgoni bjo bogolo.
2.3. Diprotšeke tša Ekonomi ya Mawatle go fihla mo lebakeng le di lokollotše peeletšo ye e kopanego ya R24.6 pilione go tšwa go mmušo le go lefapha la phraebete, gomme e hlomile mešomo ye e fetago ye 6 500.
2.4. Peeletšo ye kgolo kudu go di feta ka go Ekonomi ya Mawatle, yeo e phethagaditšwego ka go diriša diputseletšo tša mmušo, e lebišitšwe go tlhabollo ya mananeokgoparara, kudukudu go kago ya maemakepe, botšweletši, go ageng ga dikepe, borei bja dihlapi le go dinyakišišo tša mahlale ka go lefapha la oli le la gase.
2.5. Mmušo o ikemišeditše go hloma lefelo le tee le legolo kudu la go aga dikepe ka borwa bja Afrika. Lefelo la Kago ya Dikepe la ka KwaZulu-Natal ka Boemakepeng bja Durban le tla hwetša bokgoni go peeletšo ye mpsha, go diromelwantle le go tlhomo ya mešomo.
3. Ketelo ya Semmušo go la Zambia
3.1 Kabinete e amogela dipoelo go tšwa go Ketelo ya Mopresidente Zuma ka Repabliking ya Zambia go tloga ka la 12 go fihla ka la 13 Diphalane 2017.
3.2 Dipoledišano gareng ga Mopresidente Zuma le modirišani ka yena wa ka Zambia Edgar Lungu di maatlafaditše dikamano tše botse tša bjale tša sepolotiki, tša ekonomi le tša setšo gareng ga dinaga tše ka bobedi, tšeo di theilwego ke dikamano tše tiilego go tloga mengwageng ya ntwa ya go lwela tokologo.
3.3 Dihlogo tše tše pedi tša Dinaga di butše semmušo lefelo la Bohwa la Bosetšhaba la OR Tambo ka Chelstone, Lusaka, e le go hlompha seabe seo OR Tambo a bilego le sona go ntwa ya go lwela tokologo ya ka borwa bja Afrika.
3.4 Zambia e tšwela pele go ba ye nngwe ya bagwebišani ba bagolo le Afrika Borwa ka mo seleteng se le ka khonthinenteng. Tirišano ya tša ekonomi gareng ga Afrika Borwa le Zambia e tšwela pele go gola, fao e lego gore diromelwantle tša Afrika Borwa go ya ka Zambia di fihlile go tšhelete ye e ka bago R30 pilione ka 2016. Dinaga tše ka bobedi di dirišana ka mafaoheng a mehutahuta, go akaretšwa ka dikgwebišanong le ka dipeeletšong, ka mahlaleng le theknolotši, mašole, temo, tikologo, enetši le maphelo.
4 Ketelo ya Mošomo go la Nigeria
4.1 Kabinete e lebogiša Mopresidente Zuma ge e hlomphilwe ka sehlwaseeme le mmila wo o reetšwego yena ka Nigeria, ka nakong ya ketelo ya mošomo ka nepo ya go maatlafatša dikamano tša ekonomi ya setšhaba le ditirišano tše dingwe.
4.2 Mmušiši wa Imo State Governor, Rochas Okorocha, o abetše Mopresidente Zuma Sefoka sa Bokgoni sa Imo, e lego sefoka sa maemo a godimodimo ka Pušong ye go bao ba dirilego phapano ka tlhabollong ya ditšhaba tša bona.
5 Kopano ya bo 17 ya Lekgotla la Ditona tša Mokgatlo wa Ocean Rim (IORA)
5.1 Afrika Borwa e netefaleditše Modulasetulo wa IORA ka kopanong ya bo 17 ye e bego e swerwe ka Durban go tloga ka la 14 go fihla ka la 18 Diphalane 2017.
5.2 Morero wa Afrika Borwa wa ge e tla be e le modulasetulo ke “Re Kopanya Batho ba Afrika, Ešia, Australasia le ba Dinagagare ka Tirišano ye e Maatlafaditšwego ya go tliša Khutšo, Seemo sa go hloka dikgaruru le Tlhabollo ya Go ya go ile”.
5.3 Kabinete e bušeleditše boikgafo bja yona go bodulasetulo bjo go tšwetša pele tirišano ya ka seleteng ka makaleng a go swana le ekonomi ya mawatle; maatlafatšo ya basadi ekonoming; tšwetšopele ya dikgwebopotlana, dikgwebo tša magareng le dikgwebo tše nnyane; maatlafatšo ya bafsa, le tirišano ka dithutong, ka mahlaleng le theknolotši.
6 Kopano ya Ngwaga ka Ngwaga ya Sekhwama sa Ditšhelete sa Boditšhabatšhaba (IMF) le ya Panka ya Lefase
6.1 Kabinete e sedimošitšwe ke Tona ya Ditšhelete, Morena Malusi Gigaba, ka morago ga ge Afrika Borwa e kgathile tema ka go kopano ya ngwaga ka ngwaga ya IMF le ya Panka ya Lefase tša 2017, tšeo di swerwego go tloga ka la 13 go fihla ka la 15 Diphalane 2017.
6.2 Dikopano tše di file sebaka sa go sekaseka kgatelopele ya boditšhabatšhaba ka ga merero ya tlhabollo le go tsebiša ka ga masolo a Afrika Borwa a mabapi le tlhabollo ya ekonomi ya setšhaba, kgolo ye e akaretšago bohle, tlhomo ya mešomo le go fediša bohloki.
6.3 Kabinete e tšwetše pele ya sedimošwa ka ga kopano yeo Tona Gigaba a e swerego le ditheo tše di ikemego tša kelo ya seemo sa go lefa dikoloto ka dinageng le babeeletši ka nepo ya go tiišetša leswa melaotshepetšo ya bjale ya Afrika Borwa le mokgwa wo o dirišwago go maitshwaro a makaone a ditšhelete.
6.4 Kabinete e kgotsofaditšwe ke netefaletšoleswa ye e filwego babeeletši mabapi le maano a mmušo a go godiša ekonomi le boikgafo bja mmušo bja go rarolla merero ya pušo ka dikgwebong tša rena tša mmušo.
6.5 Polelo ya Melaotshepetšo ka ga Ditekanyetšo tša Lebaka la Magareng e tla alwa ka Palamenteng, Motsekapa, ka la 25 Diphalane gomme yona e tla ahlaahla maano a tšhomišo ya tšhelete mo mengwageng ye e tlago ye meraro.
7 Tlhabollo ya Mananeokgoiparara
7.1 Kabinete e retile thekgo ye kgolo ka go tlhabollo ya mananeokgoparara a mmušo fao e lego gore maporogo a mararo a abilwe semmušo ka Botlokwa ka Limpopo ke Mopresidente Zuma ka la 17 Diphalane 2017.
7.2 Setheo sa Ditsela sa Bosetšhaba sa Afrika Borwa se agile maporogo a Botlokwa, ao a nago le leporogo la difatanaga le maporogo a mabedi a basepelakamaoto tseleng ya lephefo ya N1 gareng ga Polokwane le Makhado.
7.3 Kabinete e na le kholofelo ya gore protšeke ye e tla kaonafatša kudu maemo a maeto le polokego go badiriši ba ditsela ka moka ka mo lefelong le.
8 Dikgwebopotlana le dikgwebo tša magareng (di-SME)
8.1 Kabinete e reta Kgoro ya Tlhabollo ya Dikgwebopotlana ge e le monggae gotee le China wa Pontšho ya Boditšhabatšhaba ya ngwaga wo ya di-SME ya China, ka ge se se lokolla mmaraka wa ka China go dikgwebopotlana le go dikgwebo tša mohlakanelwa tša Afrika Borwa. Pontšho ye ya SME e swarwa ka Guangzhou, China go tloga ka la 10 go fihla ka la 27 Diphalane 2017.
8.2 Dikgwebopotlana ke motheo wa ekonomi ya rena le entšene ya kgolo ya ekonomi le tlhomo ya mešomo ka Afrika Borwa, gomme go kgatha tema ga rena ka mo pontšhong ye ya kgwebišano e tšweleditše pele phihlelelo ya mebaraka le dibaka tša go godiša dikgwebo.
8.3 Kabinete e na le kholofelo ya gore se se laetša boikgafo bja mmušo go nepo ya go tšwetša pele le go dira gore bohlami bja dikgwebo e be bja go ya go ile. Go beeletša ka go dikgwebopotlana go tla thuša naga ye go arabela mathata a bjale a ekonomi ya setšhaba.
9 Boeti
9.1 Kabinete e amogela go tsebagatšwa semmušo ga Lenaneo la Bosetšhaba la Balekodi ba tša Boeti ka Soweto, ka Labobedi la 17 Diphalane 2017, leo le ikemišeditšego go maatlafatša maitemogelo a baeti gammogo le go kaonafatša polokego ya baeti.
9.2 Kgoro ya Boeti, ka tirišano le Bolaodi bja Boeti bja Gauteng, e tsebagaditše semmušo lenaneo le ka Vilakazi Street, e lego mmila o nnoši mo lefaseng wo o nago le bodulo bja Baamogelasefoka sa Khutšo ba babedi – e lego Mopresidente wa peleng Nelson Mandela le Mopišopomogolo Desmond Tutu.
9.3 Lenaneo le le sepelelana le dinepo tša Leanotlhabollo la Bosetšhaba (NDP) ebile le ikemišeditše go hloma mešomo go bafsa ba 200, bao ba tlago hlahlwa go ba balekodi ka mafelong a tša boeti mo lebakeng la dikgwedi tše 36.
9.4 Kabinete e hlohleletša beng ba dikgwebo le ditšhaba ka Gauteng go šoma mmogo le balekodi ba tša boeti ka nepo ya go kaonafatša polokego ya baeti le go maatlafatša bokgoni bja tša ekonomi ka mo intastering ye.
10 Mahlale le Theknolotši
10.1 Kabinete e amogela le go lebogiša boramahlale bao ba kgathilego tema ka kutollong ya Afrika Borwa ya dithelesekoupu tša Tekolonaledi (SAAO) le ya Thelesekoupu e Kgolo ya ka Borwa bja Afrika (SALT). Se se feleditše ka tirišano ye e sa lekanywego ya boditšhabatšhaba ya go nyakišiša mathomo ya kutollo ya mathomo a maphotho a enetši ao a tšweletšwago ke dinaledi tše pedi tša nyutrone tše di thulanago. Go thulana fa gape go feleleditše ka go thuthupa ga seetša sa kilonova. Kilonova ke tiragalo ya dinaledi ye e hlagago ka tshepedišong ya dilo tše pedi fao e lego gore dinaledi tše pedi tša nyutrone goba ge naledi ya nyutrone le lešoba le leso di kopana gotee.
10.2 Kutollo ye e dira go thomišwa ga lebakanako le leswa ka go dithutamahlale tša dinaledi, e lego tiragalo ya mathomo ya lefaufaung ye e bonwego ka go bobedi maphoto a enetši le seetša. Dithelesekoupu tša SALT le tše dingwe tša SAAO di fane ka tshedimošo ya mathomothomo mabapi le seo se bonagalago e le tiragalo ya dithutamahlale tša naledi tšeo di nyakišišitšwego kudu go feta tše dingwe.
10.3 SALT le SAAO ke tše dingwe tša mafelo a tekolonaledi a 70 a fase le a lefaufaung ao a bonego go thuthupa go gogolo go šoro ga tlhago ga dinaledi tše pedi tša nyutrone tšeo di thulanego, ka pela ka morago ga go roromela fa, maphoto a ile a bonwa ke Lefelotekolonaledi la Maphoto a Enetši ya Kopanyoetša ya Leisara la ka United States le Moutollaboikalonaledi wa ka Yuropa.
11 Moletlo wa Lefase wa Bafsa le Baithuti
11.1 Russia ke monggae wa Moletlo wa Bafsa le Baithuti wa 2017 go tloga ka la 14 go fihla ka la 22 Diphalane 2017, wo o tsenelwago ke bafsa ba go feta 20 000 go tšwa dinageng tše 150.
11.2 Maikemišetšo a moletlo wo ke go kopanya mmogo bafsa ba ditšhaba tša lefase mabapi le kgopolo ya toka, go maatlafatša dikamano tša boditšhabatšhaba, le go hlabolla dikamano tša mehlobo le ditšo tša go fapafapana.
12 Tšhireletšo ya bana
12.1 Kabinete e laeditše tlhobaboroko ka morago ga dipego tšeo di kwešago bohloko tša dikgaruru kgahlanong le bana, gomme ye e sa tšwago go diragala ke tlaišo ya tša thobalano ya barutwana ba go feta ba 80 ka Sekolong sa Phoraemari sa AB Xuma ka Orlando, Soweto ke mohlapetši wa baithuti. Kgoro ya thuto ya ka phrofenseng ye e a retwa ge e arabile ka pela ka go tloša ka pela bolaodibogolo bja sekolo se, gomme ya kgopela thušo ya badirelaleago le go tsenya tirišong dinyakišišo tšeo di dirwago ke sehlongwa seo se ikemego.
12.2 Kabinete e ipiletša go ditšhaba ka moka ka Afrika Borwa go šoma mmogo go šireletša bana ka moka go mokgwa ofe goba ofe wa kotsi le wa tlaišo, le go dirišana le maphodisa a kgauswi go dira gore ditšhaba tša rena di bolokege.
13 Ditlhahlobo
13.1 Kabinete e na le boitshepo bja gore ditlhahlobo tša mafelelo a ngwaga tša dikolo di tla tšwela pele ntle le tšhitišo ka morago ga ditšhupetšo tša batho ka bontši tšeo di bilego gona mo bekeng ye tšeo di bego di etilwe pele ke mokgatlo wa Barutiši wa South African Democratic Teachers’ Union (SADTU).
13.2 SADTU e fane ka memorantamo go Tona ya Thuto ya Motheo, Mohumagadi Angie Motshekga, yo a ikgafilego go rarolla dipelaelo ka pela ka fao go kgonagalago. Go bohlokwa gore bakgathatema ka moka ba šome mmogo go hloma seemo se sekaone ka nepo ya go kgontšha baithuti go lebelela kudu go ithuta le ditlhahlobo tša bona.
14 Dipula tša matlakadibe
14.1 Kabinete e lebiša mahloko a yona a kwelobohloko go bao ba bego ba ba rata bao ba hlokofetšego ka dipuleng tša matlakadibe tšeo di sa tšwago go hlaga ka dikarolong tše dingwe tša ka mo nageng.
14.2 Kabinete e lebiša ditebogo tša yona go baithaopi ka moka, go mekgatlo ya badudi, go ditšhaba, go bašomi ba thušo ya kimollo le go dihlopha tša Taolo ya Masetlapelo ge ba thušitše bao ba amegilego.
14.3 Tona ya Pušo ya Tirišano le Merero ya Setšo, Morena Des van Rooyen, ka maemo a gagwe bjalo ka hlogo ya Lefelo la Bosetšhaba la Taolo ya Masetlapelo ka Afrika Borwa, o ile a etela mafelo ao a amilwego ke dipula tše tša matlakadibe le dipula tše maatla ka Masepaleng wa Bogare bja Toropo wa eThekwini ka KwaZulu-Natal ka la 13 Diphalane 2017 le ka Masepaleng wa Selegae wa Mogale City ka Gauteng ka la 16 Diphalane 2017.
Ka lebaka la dipula tše maatla le dipula tša matlakadibe tšeo di sentšego dikarolo tše ntši ka mo nageng, batho ba 19 ba hlokofetše gomme ba go feta ba 20 ba gobetše. Tona van Rooyen le yena o etetše ditiragalo tše di sa tšwago go hlaga ka Philippi ka Kapa Bodikela fao maloko a lapa a tshela, go akaretšwa bana ba bararo, ba hlokofetšego ka lebaka la mollo wo o tšhumilego mekhukhu e meraro le thakešopo.
15 Life Esidimeni
15.1 Kabinete e lemoga go thomišwa ga tshepedišo ya boikgethelo ya tharollo ya dithulano ya Life Esidimeni bjalo ka seo se ka bago mathomo a go tswalelwa ga taba ye go ba malapa a balwetši bao ba hlokofetšego.
15.2 Kabinete e laetša tshepo ka botlalo go Motlatšamoahlodimogolo yo a rotšego Modiro wa Kgorotsheko ya Molaotheo Dikgang Moseneke, yo e lego modulasetulo go taba ye ebile e lakaletša maloko a lapa go tia moyeng ge ba theeleditše bopaki bja kanegelo ye boima ya masetlapelo a.
15.3 Dinyakišišo tše ga se tša swanela go thuša fela go tliša khutšo ka malapeng ao a amegilego eupša di swanetše gape go fana ka dintlha tšeo mmušo ka kakaretšo o tla ithutago go tšona. Mmušo o ikgafile go fana ka ditirelo tša maemo a godimo go maAfrika Borwa ka moka.
16 Mokhwehlane wa Dinonyana
16.1 Kabinete e netefaleditšwe gore Kgoro ya Temo, Kagodithokgwa le Boreahlapi (DAFF) e dira ditekodišišo ka tsinkelo go dipolasa nageng ka bophara ka nepo ya go thibela go phatlalatšwa ga leuba la Mokhwehlane wa Dinonyana (HPAI) wa H5N8.
16.2 Bothata bja mokhwehlane wa dinonyana bo utollotšwe go dinonyana. Kabinete e ipiletša go setšhaba go tlogela go swara dinonyana tše di babjago goba tše di hwilego gomme ba se ke ba leka go fepa dinonyana tša lešoka eupša ba bege dinonyana tše di gononwago gore di a babja go bolaodi bja kgauswi.
17 Ditlhaselo tša maphodisa
17.1 Kabinete e kgalema tlhaselo ya maloko a Tirelo ya Maphodisa a Afrika Borwa ka Vanderbijlpark ka Gauteng ka la 10 Diphalane 2017 ke maloko a setšhaba.
17.2 Ditheo tša phethagatšo ya molao di filwe mošomo wa go šireletša setšhaba go tiro efe goba efe ya bosenyi. Ka fao, ga go pefelo efe goba efe ye e ka dirago gore motho mang goba mang a hlasele ditheo tša phethagatšo ya molao.
17.3 Kabinete e ipiletša go maloko a setšhaba seo go dirišana le maphodisa go golega batho bao ba dirilego ditiro tše tša bosenyi le go thuša go dira gore Afrika Borwa e bolokege go bohle.
B. Diphetho tša Kabinete
18 Lenaneo la Setšhaba la Kago ya Dintlo
18.1 Kabinete e sedimošitšwe ka ga dikutollo le ditšhišinyo tša Diabe le Tshekatsheko ya Phethagatšo ya Lenaneo la Setšhaba la Kago ya Dintlo le leano la kaonafatšo, ka nepo ya go fediša mekgwa ka kgethologanyo ye e arotšego batho go ya ka madulo ka go kaonafatša mafelo a bodulo le kopanyo ya metsesetoropong ya diprotšeke tša kago ya dintlo.
18.2 Lenaneo le le fana ka madulo a go rentišwa a go se ture go malapa ao a hwetšago letseno la fase le la magareng boagišaneng fao maemo a mebaraka ya dintlo a ka ba beelago thoko goba a aba dintlo tše di sego tša maleba.
18.3 Le ke lenaneo le nnoši leo le ikemišeditšego go lefa dikoloto; leo le hlokometšego go šoma go ya go ile ga diprotšeke tše mabapi le ditšhelete; le go hloma maemo a ditšhelete a makaone le bahiri bao ba lefago dirente ge dihlongwa tša kago ya dintlo tšona di lefa metšhelo, ditefišo tša metšhelo le tša ditirelo go mebasepala.
18.4 Pego ye e thuša dikgoro tša maleba go tšwela pele go kaonafatša maano a tšona a phethagatšo ya mošomo. Pego ka botlalo e tla bewa wepsaeteng ya Kgoro ya Peakanyo, Tekodišišo le Tshekatsheko ya Phethagatšo ya Mošomo (www.dpme.gov.za).
19 Tirelo ya Bafsa ya Bosetšhaba (NYS)
19.1 Kabinete e dumeletše Tlhako ya Lenaneo la NYS ye e bušeleditšwego le go kaonafatšwa bjalo ka karolo ya go hlabolla bafsa bjalo ka badudi ba mafolofolo ba Afrika Borwa.
19.2 NYS ke sekgontšhi go bafsa ka Afrika Borwa gore ba be badudi ba mafolofolo ba ka mo nageng le go tsenya letsogo bokaone go tlhabollo ya naga mola ka go le lengwe ba fihlelela boitlhabollo le tlhabollo ya sephrofešenale. Se se tla akaretša bafsa gore ba kgathe tema ka medirong ye e holago ditšhaba tša kgauswi mola ka go le lengwe ba hlabolla bokgoni bja bona ka tirelo le go ithuta gore dibaka tša bona tša go tsena ka go mmaraka wa bašomi ka katlego le go ba bahlomi ba dikgwebo di thušwe.
20 Beke ya Seboka sa boraro sa Afrika sa Katološetšosetšhabeng le Ditirelo tša Keletšo ka ga Bolemi
20.1 Kabinete e dumeletše go swarwa ga Beke ya Seboka sa boraro sa Afrika sa Katološetšosetšhabeng le Ditirelo tša Keletšo ka ga Bolemi, seo se tlago swarwa ka KwaZulu-Natal go tloga ka la 30 Diphalane go fihla ka la 3 Dibatsela 2017.
20.2 Tiragalo ye e sepelelana le NDP ebile e bona tšhireletšego dijong bjalo ka mokgwa wa go rarolla ditlhohlo tše tharo tša tlhokego ya mešomo, bohloki le tlhokego ya tekatekano.
20.3 Morero ke: “Re hlatloša bolemi bja bohlale bjo bo hlokometšego boemo bja boso: re diriša bafsa, basadi, le tsošološoleswa ya titšithale”, gomme tiragalo ye e tla swarwa ka fase ga boetapele bja DAFF, ka tirišano le Mokgatlo wa Afrika Borwa wa Katološetšosetšhabeng ya tša Bolemi le Seboka sa Afrika sa Ditirelo tša Keletšo ka ga Bolemi.
20.4 Kamaganyo ye ya ka mo khonthinenteng ya Katološetšosetšhabeng le Ditirelo tša Keletšo ka ga Bolemi (AEAS) ka Afrika e fana ka sebaka sa gore go ithutwe ka moka le go itlhamela gareng ga baabi ba AEAS go ralala le Afrika le lefase.
20.5 NDP le yona e hlohleletša gore go be le kaonafatšo ya bokgoni le tlhahlo ka lefapheng la tša temo, go akaretšwa go hlahla bašomi ba baswa ba go katološetša bolemi setšhabeng bao ba tlago arabela dinyakwa tša balemipotlana ka maleba.
21 Sehlopha sa Lefase ka ga Kgwebišano ya Beine
21.1 Ka go tsenya letsogo go tlošeng ga mapheko a kgwebišano, Kabinete e sedimošitšwe ka ga Bodulasetulo bja Afrika Borwa bja Sehlopha sa Lefase ka ga Kgwebišano ya Beine go tloga ka Moranang 2017 go fihla ka Mopitlo 2018. Bjalo ka modulasetulo, Afrika Borwa e tla ba monggae wa kopano ya ngwaga ka ngwaga ya Sehlopha sa Lefase ka ga Kgwebišano ya Beine ka Motsekapa go tloga ka la 1 go fihla ka la 3 Dibatsela 2017.
21.2 Sehlopha se se ikemišeditše go nolofatša kgwebišano ya boditšhabatšhaba ka ga beine ka go diriša kabelano ya tshedimošo, go ahlaahla merero ya bolaodi ka mebarakeng ya beine le ditiro tša mohlakanelwa tša go tloša mapheko a kgwebišano. Batšweletši bao ba sa thomago le diromelwantle tša intasteri ya beine ya Afrika Borwa di holega go go kgatha tema ga Afrika Borwa.
21.3 Se se tsenya letsogo go Leano la Dintlha tše Senyane le go NDP, tšeo di nyakago go tsošološa lenaneo la kabo ya ditirelo ka go bolemi le ka go šomeng ga ditšweletšwa tša temo. Ka lefapheng la beine, maikemišetšo ke go oketša lefelo leo le tšweletšago beine, go thekga batšweletši ba bannyane le go nepiša mebaraka ya kgolo ya diromelwantle.
22 Kopano ya bo 5 ya Ngwaga ka ngwaga ya Mokgatlo wa ID4Africa
22.1 Kabinete e dumeletše gore Afrika Borwa e be monggae wa Kopano ya bo 5 ya Mokgatlo wa ID4Africa ka 2019.
22.2 ID4Africa ke mokgatlo wa bakgathatema ba bantši wo o tšwetšago pele tirišo ya boitšhupo bja titšithale ye e hlokago sephiri le ya boikarabelo yeo e tlago hlohleletša tlhabollo ya ekonomi ya setšhaba ka Afrika.
22.3 Dipoledišano di tla nyaka go kaonafatša ka fao ngwadišo ya badudi le tshedimošo ye bohlokwa ya dipalopalo e kgoboketšwago ka gona, e amanywago le go sekasekwa, go realo e le go dira gore tshedimošo ye e tshephagalago e hwetšwe ke bao ba beago melao.
22.4 Go swarwa ga khonferentshe ye go tla thuša Afrika Borwa go fihlelela tše dingwe tša dinepo tša NDP le go dira temošo ya boleng bja togamaano ya mananeo a boitšhupo a Afrika Borwa a go swana le lenaneo la go ngwadišathwii batho ka ga diphasephote le dikarata tša boitsebišo (ID). Se gape se tla hlohleletša bokaone dinaga tše dingwe ka mo seleteng se go lemoga dikholego tša karata ya boitsebišo.
23 Dipalopalo tša bosenyi tša bosetšhaba
23.1 Kabinete e sedimošitšwe ka ga dipalopalo tša bosenyi tša bosetšhaba tša lebaka la nako la 1 Moranang 2016 go fihla ka la 31 Hlakola 2017.
23.2 Dipalopalo tša bosenyi tša ngwaga ka ngwaga di kgontšha mmušo go hlokomela dinepišo tše bohlokwa tša go lwantšha bosenyi, ka ge di beilwe ka go Tlhako ya Togamaano ya Lebaka la Magareng ya 2014-2019. Dipalopalo tša bosenyi di šomišwa bjalo ka mokgwa wa ka pela wa temošo wa go maatlafatša masolo a thibelo ya bosenyi le mekgwa ya dikgoro tša mehutahuta.
23.3 Kabinete e dumeletše go lokollwa ga pego ya Tona ya Maphodisa, Morena Fikile Mbalula.
C. Ditiragalo tše di Tlago
24 Moketeko wa Mengwaga ye lekgolo ya OR Tambo
24.1 Kabinete e thabile ge ditokišetšo tša moketeko wa mengwaga ye lekgolo ya matswalo a OR Tambo di fihlile legatong la mafelelo ebile e ipiletša go maAfrika Borwa ka moka go tšwela pele go itsebiša bohwa bja mogale yo wa Ntwa ya go lwela tokologo, tema ye a e kgathilego ka tokologong ya rena, le ditlhologelo tša gagwe tšeo di sa re hlahlago le lehono.
24.2 Mopresidente o goeleditše gore 2017 ke Ngwaga wa OR Tambo ka fase ga morero wa: “Bophelo le Bohwa bja OR Tambo” gomme o tla re, ka la Labone la 19 Diphalane 2017, a bula sehlwaseeme sa go lekana le OR Tambo ka Boemafofaneng bja Boditšhabatšhaba bja OR Tambo ka Ekurhuleni, Gauteng.
24.3 MaAfrika Borwa a hlohleletšwa go tsenela meketeko ye ya mengwaga ye lekgolo, yeo e tla felelago ka la 27 Diphalane ka Mbizana, Kapa Bohlabela, e lego lefelo la matswalo la mogale yo wa Ntwa ya go lwela tokologo mo mengwageng ye 100 ye e fetilego.
24.4 Mmušo o tšwela pele go aga bohwa bja OR Tambo go tloga ka 1994, gomme diphihlelelo tša rena tše ntši bjalo ka maAfrika Borwa di swanetše go ketekwa le go šireletšwa.
24.5 Komiti ya Ditona ye e filwego mošomo wa go lokišetša meketeko ye ya mengwaga ye lekgolo, ye modulasetulo wa yona e lego Tona Jeff Radebe, e tla re ka Labohlano la 20 Diphalane 2017, ya sedimoša ba kgašo ka ga seemo sa boitokišetšo.
D. Melaetša
25 Tlhaselo ya ka Somalia
25.1 Kabinete e kgalema ka bogale tlhaselo ya pomo ye e sa tšwago go hlaga ka ntle ga hotele ka Mogadishu, Somalia. Bonyane batho ba 300 go begwa gore ba bolailwe gomme ba makgolo ba tlogetšwe ba gobetše. Kabinete e lebiša mahloko go bao ba lahlegetšwego ka mo tlhaselong ye šoro ye ya batho ba go hloka molato.
26 Mahloko go ba lapa la Lubisi
26.1 Kabinete e lebiša mahloko go Molaodipharephare ka Kantorong ya Mopresidente, Ngaka Cassius Lubisi, go latela tahlegelo ya mosadi wa gagwe, Mohumagadi Lumka Lubisi, pejaneng mo kgweding ye. Kabinete e lakaletša ba lapa maatla mo nakong ye boima.
E. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
(a) Motlatšamolaodipharephare (DDG): Taolo ya Tlhahlo le Kabo ya Ditirelo, Sekolotlhahlo sa Bosetšhaba sa Mmušo, Morena S Manana;
(b) Mohlankedimogolo wa Ditšhelete, Kgoro ya Mešomo ya Setšhaba (DPW), Mohumagadi R Sadiki;
(c) Hlogo ya Karolo: Taolo ya tša Boagi ka go Kgoro ya Mešomo ya Setšhaba (DPW), Morena B Mokhothu;
(d) DDG: Ditšhelete tša Setšhaba ka Kgorong ya Matlotlo ya Bosetšhaba, Ngaka MP Modise;
(e) DDG: Ditirelo tša Maphelo a Godingwana tša Dipetlele le Tlhabollo ya Bašomi, Kgoro ya Maphelo, Ngaka WW Chitha;
(f) Molaodiphethiši wa Lefapha la Boitlhamelo la Tirelo ya Bašomi ba Mmušo, Mohumagadi TE Rabebe;
(g) Lekgotlataolo la Lebakanyana la Setheo sa Ditimela tša Banamedi sa Afrika Borwa (Prasa):
- Moatbokheiti Tintswalo Annah Nana Makhubele (SC) – (Modulasetulo);
- Ngaka Natalie Skeepers;
- Moprofesara John Maluleke; le
- Mohumagadi Magdelene Cheryl Reddy.
(h) Lekgotlataolo la Tirelo ya Difofane ya Afrika Borwa:
- Morena JB Magwaza – (Modulasetulo);
- Mohumagadi Nolitha Fakude – (Motlatšamodulasetulo);
- Morena Geoff Rothschild;
- Mdi Tinyiko Mhlari;
- Morena Ahmed Bassa; le
- Morena Martin Kingston.
Dipotšišo: Mohumagadi Phumla Williams – Molaodipharephare wa Motšwaoswere (GCIS)
Mogala: 083 501 0139
