Pego ya Kopano ya Kabinete ya la 14 Hlakola 2018

Pego ya Kopano ya Kabinete ya la 14 Hlakola 2018

Kabinete e kopane ka Laboraro la 14 Hlakola 2018, ka Tuynhuys, Motsekapa

A. Merero seemong sa bjale

1. Kgolo ya ekonomi

1.1. Kabinete e amogela kgolo ya 1.3% ka ekonoming ka 2017. Se ke koketšego go tloga go 0.3% ka 2016. Go šoma gabotse ga ekonomi ka fase ga maemo a boima go direla bokaone dikgonagalo tša kgolo ya ekonomi ka moso.
1.2. Dipalopalo tša kgolo ya ekonomi di laetša gore ekonomi e maemong a go gola, fao e lego gore Kgoro ya Ditšhelete ya Bosetšhaba e emetše gore ekonomi e tla gola ka 1.5% mongwageng wo le go hlatloga go fihla go 2.1% ka 2020.
1.3. Kabinete e ipiletša go mafapha ka moka a setšhaba go aga go seemo se sekaone sa 2017, le go šomišana le mmušo go fetošetša dipeakanyo tša ona go ba tiro ye e bonagalago ka nepo ya go godiša ekonomi go ya go ile le go hloma mešomo.

2. Peakanyoleswa ya Naga 

2.1. Kabinete e amogela kakanyo ye e dumeletšwego ya gore go fetošwe Molaotheo wa Repabliki ya Afrika Borwa wa 1996 go realo e le go dumelela go tšeela naga ka ntle le tefo.
2.2. Go tloga ka 1994 mmušo o šomile kudu go bušetša morago ditiro tša mašaledi a go amoga bathobaso naga ka fase ga bokoloniale le kgethologanyo. Ka go šoma ka gare ga mellwane ya molao, mmušo o šomile kudu go netefatša gore tšweletšo ka naga e tšwetšwa pele, mola ka go le lengwe o akgofiša tshepedišo ya peakanyoleswa ya naga go bao ba amilwego ke ditiro tša go amogwa naga.
2.3. Taba ye e lebišitšwe go Komiti ya Tekodišišoleswa ya Molaotheo, yeo e swanetšego go begela Palamente ka moragonyana pele ga la 30 Phato 2018 le dikela. Ditšhišinyo tšeo di tlago fiwa Kopanokgothekgothe ya Maloko a Palamente di tla hwetša tshedimošo go tšwa go molokoloko wa ditheeletšo tša setšhaba tšeo di tlago latelwa ke dikopano tša komiti.
2.4. Kabinete e ipiletša go bakgathatema ka moka go tliša ditšhišinyo tša bona ka nakong ya tshepedišo ye ya go rerišana le setšhaba, tšeo di tlago tliša ditharollo tša go iša naga ya rena pele. Bjalo ka mmušo wo o kgathalago le wo o theilwego go batho, go tla rerišanwa le bakgathatema ka moka ka tshepedišong ye.
2.5. Kabinete e tšwela pele go ipiletša go ditšhaba ka moka go tlogela go šušumela nageng ka fao go sego molaong. Re naga yeo e hlomphago molao le ye e ratago khutšo ye e nago le mekgwa ye e lekanego ya go šomana le mathata, go akaretša taba ya naga.
2.6. Afrika Borwa e dula e buletše kgwebo, gomme dipeeletšo ka go temo le ka go bolemi di a amogelwa. Ke kgahlegong ya Afrika Borwa go ba le balemi bao ba dirago kgwebo gomme tshepedišo ye e ka netefatša gore re ba le palo ye kgolo ya balemi bao ba dirago kgwebo bao ba atlegilego.

3. Protšeke ya Ekonomi ya Diphoofolo tša Lešoka ya Double Drift ka Setšhabeng sa Nofingxana

3.1. Kabinete e amogelwa go tsebagatšwa semmušo ga Protšeke ya Ekonomi ya Diphoofolo tša Lešoka ya Double Drift ka Setšhabeng sa Nofingxana, ka Lešokeng la Diphoofolo la Double Drift ka Kapa Bohlabela ke Tona ya Merero ya Tikologo, Ngaka Edna Molewa. Se se akareditše go fana ka mangwalo a tšhupo ya beng go mokgatlo wa dithoto tša setšhaba wa Likhaya Lethu Communal Property Association (CPA) legatong la Tona ya Tlhabollo ya Dinagamagae le Peakanyoleswa ya Naga, Mohumagadi Maite Nkoana-Mashabane.
3.2. Setšhaba sa Double Drift se amogilwe ditokelo tša sona tša madulo le tša mafulo ke Molao wa Naga wa 1913. Ka 1994, setšhaba se se dirile kgopelo ya go bušetšwa mabu gomme se se phethagaditšwe ka 2012, fao go feleditšwego ka go hlongwa ga Likhaya Lethu CPA.
3.3. Likhaya Lethu CPA e bopilwe ke maloko a setšhaba sa Double Drift a 1 500 gomme sona se amogetše R6 milione go tšwa go Kgoro ya Merero ya Tikologo gore ba hlome kgwebo ya ekonomi ya diphoofolo tša lešoka ka polaseng ya Naudeshoek (ya dihekthara tše 1 400). Kgwebišano ye e šomilwe ka go diriša Kgoro ya Tlhabollo ya Dinagamagae le Peakanyoleswa ya Naga.

4. VBS Mutual Bank

4.1. Kabinete e lemogile tsebišo ye e dirilwego ke Panka ya Resefe ya Afrika Borwa mabapi le panka ye e laolwago ke mmušo ya VBS Mutual Bank. Go thwalwa ga mohlokomedi wa panka ye go tla thekga VBS Mutual Bank go bušetša sekeng mathata a go phuhlama ga yona le go direla dikgahlego tša setšhaba le bao ba tepositilego tšhelete ka pankeng ya VBS. Kabinete e dula e ikgafile go go farologanya ga lefapha la ditšhelete ka ntle le go šitiša kgahlego ya bao ba tepositilego tšhelete ka pankeng.

5. Lesolo la dipeeletšo

5.1. Kabinete e amogela lesolo la bahlankedibagolophethiši la ‘CEOs Know’ leo le tlilego ka Brand South Africa, ka go dirišana le mokgatlo wa Business Leadership South Africa, ka nepo ya go tšwetša pele Afrika Borwa bjalo ka lefelo la dipeeletšo.
5.2. Se se aga go mananeokgoparara a rena a maemo a godimo lefaseng ka go diriša Lefelo la go Etelwa la InvestSA, bokgoni bja dinyakišišo le tlhabollo, boitlhamelo le motheo wa botšweletši wo o hlomilwego ka nepo ya go thekga babeeletši. Makala a maswa a kgolo le ona a butšwe ka ekonoming ya mawatle, ka go mohlagase wa go dirišwa leswa, ka go ekonomi ya tikologo le ka go kutollo ya gase ye e tšwago maswikeng.
5.3. Lesolo le le akareditše Bahlankedibagolophethiši  go tšwa dikhamphaning tša dinaga tše ntši tšeo di šomelago ka Afrika Borwa ka go fana ka tsebo ya bona ka ga peeletšo ye e tšwetšwago pele ka Afrika Borwa.
5.4. Kabinete e hlohleletša maAfrika Borwa ka moka ka moya wa “Thuma Mina” (Nthome) wo o fokago go rarala le setšhaba sa rena go kgatha tema ya bona ka go botšana dikanegelo tša bona tše kaone ka nepo ya go aga seriti sa naga ya rena le go godiša boipiletšo bja yona bja dipeeletšo.

6. Lenaneo la Bodiredi bja ka Ntle bja Batšweletši ba Mohlagase bao ba Ikemego (di-IPP)

6.1. Kabinete e lemogile molato wa Kgorotsheko ya Godimo wo o butšwego ke mekgatlo ye e sego ya mmušo ye mebedi mabapi le sephetho sa mmušo sa go saenela ditumelelano tša go reka mohlagase le di-IPP tše 27. Taba ye e tla fetšwa ke Kgorotsheko ya Godimo ka la 27 Hlakola 2018. Ka moya wa go hlompha molaotheo le molao, go saena fa go fegilwe.
6.2. Kabinete e tiišetša boikgafo bja yona bja go rarolla merero mabapi le mananeo a. Lenaneo la Bodiredi bja ka Ntle bja Batšweletši ba Mohlagase wa go Dirišwa Leswa bao ba Ikemego le tla netefatša gore badiriši ka mo nageng ya rena ba kgona go fihlelela mohlagase wa go se ture le wo o hlwekilego, gomme le tla tliša peeletšo ye e nyakegago kudu ka Afrika Borwa. Diprotšeke tše di tla tliša mešomo ye 61 600 ya dinako ka moka, gomme 95% ya yona ke ya badudi ba Afrika Borwa, gomme yona e tla fiwa kudu bafsa.
6.3. Kabinete e tiišetša leswa boikgafo bja yona go selekane seo se tiilego gareng ga setšhaba le lekala la phraebete ge re tšwela pele go šala morago maikemišetšo a rena a ka moso a phetošo ya enetši le a bophelo bjo bokaone go bohle. Se se a nyakega go tliša melawana ye e nyakegago kudu le bonnete bja taolo, le go tšwetša pele maemo a Afrika Borwa bjalo ka lefelo la kgetho la dipeeletšo mabapi le enetši.

7. Bolwetši bja Listeriosis

7.1. Kabinete e lebiša mahloko a yona a magolo go bagwera le go ba malapa a bao ba lahlegetšwego ke maphelo a bona ka morago ga go fetelwa ke bolwetši bja Listeriosis, ebile e lakaletša bao ba folago gore ba fole ka pela. Batho bao ba fetago ba 180 ba hlokofetše gomme ditiragalo tša bolwetši bjo tše 940 di begilwe ka Afrika Borwa.
7.2. Kabinete e hlohleletšwa ke maitapišo ao a tseneletšego ao a dirwago ke Kgoro ya Maphelo, Sehlongwa sa Bosetšhaba sa Malwetši a go Fetela (NICD) le Mokgatlo wa Maphelo wa Lefase go thibela paketheria ya listeria gore e se phatlalale. Go tšwela pele go maatlafatša maitapišo a, Tona ya Maphelo, Ngaka Aaron Motsoaledi, o tla kopana le Lekgotla la Booki la Afrika Borwa ka Labone la 15 Hlakola 2018.
7.3. Kabinete e lemoga kgatelopele ye kaone ye e dirilwego ya go tseba le go šupa mothopo wa go phatlalala ga bolwetši bjo bo bolayago bja Listeriosis. Go gomišwa ga ditšweletšwa tša dijo fao go dirilwego ka go latelana ka dipolanteng tše tharo tša go šoma dinama tša Enterprise le Rainbow – fao paketheria e hweditšwego gona – e bile selo se bohlokwa sa go thibela go phatlalala ga bolwetši bjo. Bolwetši bjo bo hwetšwago dijong bo bonwe la mathomo ka Phupu 2017.
7.4. Listeriosis ke bolwetši bjo šoro bjo bo ka thibelwago bjo bo ka alafšago ka katlego ka dianthipayothiki. Batho bao ba lego kotsing ye kgolo ya go fetelwa ke bolwetši bjo ke basadi ba baimana, maseana a mannyane kudu, batšofadi le batho bao mašole a bona a mmele a fokolago. Batho bao ba nago le maswo a go fiša ga mmele, dihlabi tša mešifa, go sellega goba letšhologo ba swanetše go etela ngaka ya bona goba kliniki ya kgauswi ka bjako.
7.5. Kabinete e holofela gore Afrika Borwa e tla fenya go phatlalala ga bolwetši bjo ebile e ipiletša go batho ka moka go latela melawana ye mehlano ya mabapi le polokego ya dijo mo nakong ye:

• Hlapa diatla ka sesepa le meetse pele ga ge o swara dijo, le ka morago ga go šomiša ntlwana ya boithomelo;
• Apea dijo di butšwe gomme o se ke wa ja dijo tšeo di sego tša butšwa ka ge paketheria ya Listeria e tla hwa ge dijo tše di apeilwego di butšutšwe;
• O se ke wa swara dijo tše tala le tše di apeilwego mmogo;
• Bea dijo ka dithempheretšhara tša maleba; gomme o
• Netefatše gore ditšweletšwa tša maswi ka moka di a phasetšheraeswa goba bonyane o bediše le go hlatswa dijo tše di sego tša apeiwa ka meetse a thepe ao a hlwekilego pele o di ja goba bonyane ka meetse ao a bedišitšwego peleng.

7.6. Bao ba se nago le bonnete bja ge eba ba na le bolwetši bja Listeriosis ba ka ikgokaganya le NICD mo go 011 386 6400.

8. Ditšhelete tša thušo ya leago

8.1. Kabinete e sedimošitšwe ka ga seemo sa go itokišetša ga Setheo sa Tšhireletšo ya tša Leago sa Afrika Borwa (SASSA) go hlagiša mokgwa wa mekgwa ye mentši ka go abeng ga ditšhelete tša thušo ya leago go baholegi ka la 1 Moranang 2018. Se ke go obamela kahlolo ya Kgorotsheko ya Molaotheo (ConCourt) yeo e laetšego gore konteraka ya bjale le Cash Paymaster Services (CPS) e katološwe go fihla ka la 31 Hlakola 2018.
8.2. Kabinete e bušeletša boikgafo bja yona go lenaneo la mmušo la thušo ya tša leago, leo le lego bohlokwa go masolo a rena a go fediša bohloki le go ba mohola go go bušetša seriti sa batho ba rena. Go tiišetšwa gore baholegi ba ditšhelete tša thušo ya leago ba tla lefša ka la 1 Moranang 2018.
Dikarata tša bjale tša SASSA di dula di šoma go fihla ka Manthole 2018. Tshepedišo ya go fetoša dikarata tša baholegi e tla dirwa ka mokgwa wa go hloka mathata wo o ka se šitišego go lefša ga ditšhelete tša thušo ya leago. Baholegi ka moka ba tlo hwetša ditšhelete tša bona tša thušo ya leago mafelong a bona a tefelo ya ditšhelete tše go akaretšwa dipanka tša kgwebo, Poso ya Afrika Borwa (SAPO) le go mabenkele a mangwe.
8.3. Kabinete e ipiletša go bao ba se nago le diakhaonte tša panka go etela makala a SAPO go bula diakhaonte tša bona. Kabinete e laetše SASSA, gammogo le Tshepetšo ya Dikgokagano le Tshedimošo ya Mmušo (GCIS), go dira ka fao ba ka kgonago go tsebiša baholegi ka moka ka ga kgonagalo efe goba efe ya diphetogo tšeo di ka dirwago ka tshepedišong ya go fetogela go tšwa go CPS go ya go mokgwa o moswa wa mekgwa ye mentši. Kabinete e dula e ikgafile go netefatša gore mmušo o obamela kahlolo ya Kgorotsheko ya Molaotheo. Dikantoro tša SASSA di tla bulwa le go itokišetša go šoma dikgopelo tše diswa.
8.4. Kabinete e ipiletša go maloko a setšhaba ka moka, kudukudu baholegi le ba malapa a bona, go ikgokaganya le SASSA mo go 0800 60 10 11 goba ba etele kantoro ya kgauswi le bona ya SASSA go hwetša tshedimošo ka botlalo.

9. Ngwadišo ya bakgethi

9.1. Kabinete e ba le Khomišene ya Dikgetho ye e Ikemego (IEC) le Mopresidente Cyril Ramaphosa ge ba leboga maAfrika Borwa ka moka bao ba ilego ba obamela boipiletšo bja gore ba ye go ingwadišetša go kgetha goba go mpshafatša dintlha tša diaterese tša bona mo bekeng ye e fetilego ya lesolo la ngwadišo ya bakgethi. Se ke motheo wa go itokišetša dikgetho tša botshelela tša bosetšhaba le tša diprofense tšeo go emetšwego gore di tla swarwa ka 2019.
9.2. Palomoka ya badudi ba 2 767 139 ba etetše diteše tša go boutela mo bekeng ye e fetilego.
9.3. Go bakgethi bao ba ka fetago 2.76 milione bao ba etetšego diteše tša bona tša go boutela:

• Palo ye e fetago 1.3 milione e ingwadišitše leswa ka seleteng sa bona sa bjale sa dikgetho;
• Ba go feta ba 800 000 ba fetošitše boingwadišo bja bona go ya seleteng se seswa sa dikgetho;
• Palo ye e nyakilego go ba 500 000 e bile bakgethi bao ba ingwadišago la mathomo;
• Go bao ba ingwadišetšago go kgetha la mathomo, 82% ba bile ba mengwaga ya ka fase ga ye 30 gomme palo ye e ka bago 54% e bile basadi;
• Gauteng e bile le palo ya godimo ya bao ba ingwadišago la mathomo ka 23.69%, gwa latela KwaZulu-Natal ka 18.78% le Limpopo ka 17.03%.

9.4. Kapa Bohlabela e bile le maemo a godimodimo a boingwadišo ka 87%, gwa latela Foreisetata ka 82%, gomme KwaZulu-Natal, Limpopo le Kapa Leboa tšona kat 79%. Boingwadišo bja kakaretšo ka Gauteng bo bile go 67.3%.
9.5. IEC e begile gore lenaneo la bakgethi bjale le eme go bakgethi ba 26 250 939, gomme se se lekana le 75% ya setšhaba seo se nago le maswanedi a go kgetha, go lebeletšwe dikakanyo tša setšhaba seo se lego mengwageng ya go kgetha tša Tirelo ya Dipalopalo ya Afrika Borwa.
9.6. Badudi bao ba ka bago ba 300 000 bao ba etetšego diteše tša go kgetha ba gareng ga bakgethi bao ba nyakilego go ba ba 2.8 milione bao IEC e bego e se na le diaterese tša bona ge go lebilwe mafelelong a beke ao a fetilego.
9.7. Lenaneo la bakgethi leo le mpshafaditšwego le leo le nepagetšego le tiišetša seriti sa lenaneo la bakgethi ebile le maatlafatša temokrasi ya rena ka go netefatša gore go ba le dikgetho tše di lokologilego, tše di nago le bonnete le tšeo di hlomphegilego.
9.8. Kabinete e ipiletša go maAfrika Borwa ka moka bao ba paletšwego ke go etela diteše tša bona tša go kgetha mo mafelelong a beke ao a fetilego gore ba etele kantoro ya bona ya kgauswi ya IEC go tiišetša le go mpshafatša diaterese tša bona. Ka go le lengwe, ba ka tsena inthaneteng ya IEC go www.elections.org.za/MyIEC gomme tirišo ye e dula e le gona diiri tše 24 ka letšatši gore bakgethi bao ba ingwadišitšego ba lekole le go mpshafatša dintlha tša diaterese tša bona.

10. Re lakaletša moatlelete wa dipapadi tše tharo Mhlengi Gwala gore a fole

10.1. Kabinete e ba le Tona ya Dipapadi le Boitapološo, Mohumagadi Thokozile Xasa, ge a kgalema phatlalatša tiro ya botlaela ya dikgaruru kgahlanong le moatlelete wa rena wa mofsa, Mhlengi Gwala, yo a hlasetšwego ka saga ya tšhaene ge a be a nametše paesekele ka KwaZulu-Natal.
10.2. Kabinete e lakaletša moatlelete yo gore a fole ka pela ebile e lebiša ditebogo go sehlopha sa kalafo sa Sepetlele sa St Augustine seo se mo hlokometšego.

Bosenyi ga go na fao re bo beilego gona ka setšhabeng sa rena gomme Kabinete e ipiletša go ditšhaba gore di šome mmogo le ditheo tša phethagatšo ya molao gore di golege basenyi ba.

11. Komelelo e begilwe bjalo ka masetlapelo a bosetšhaba

11.1. Ka fase ga boetapele bja Tona ya Kgoro ya Pušo ya Tirišano le Merero ya Setšo Zweli Mkhize, mmušo o begile seemo sa bosetšhaba sa masetlapelo ka nepo ya gore o šomane le komelelo ya ka mo nageng le mathata a meetse.
11.2. Kabinete e lebiša ditebogo tša yona go bao ka mo Afrika Borwa ba tšwelago pele go seketša meetse le maitapišo a go se tekateke ao a dirilwego ke Komiti ya Ditona ka ga Komelelo, gammogo le bakgathatema ka makaleng a mmušo ka moka le a setšhaba, ge ba šoma ka maemo a komelelo ao a ganeletšego ao a hlasetšego dikarolo tše mmalwa tša naga.
11.3. Ka ntle le taba ya gore Afrika Borwa ke naga yeo e hlaelelago meetse, Kabinete e netefaletšwa gore re dula re le lefelo la boikgethelo go baeti.

B. Diphetho tša Kabinete

1. Kabinete e dumetše gore Tumelelano ye e Fetošago Tlaleletšo ya Pele (ya Tirišano ka ga Peeletšo) ya Phrothokholo ka ga Ditšhelete le Peeletšo (FIP) ya Dinaga tše di Hlabologago tša Borwa bja Afrika (SADC) e alwe ka Palamenteng gore e dumelelwe.

1.1. Maikemišetšo a FIP ke go swantšha melawana ya ditšhelete le ya dipeeletšo ya Dinagamaloko, gore e kgone go sepelelana le maikemišetšo a SADC. Se se tla netefatša gore diphetošo dife goba dife go melawana ya ditšhelete le ya dipeeletšo ka go Nagaleloko e tee ga di gapeletše gore go be le diphetošo tšeo di sa nyakegego ka go Dinagamaloko tše dingwe.
1.2. Diphetošo tše di ikemišeditše go lota tokelo ya mebušo ya go laola ka kgahlego ya setšhaba, le go lekanyetša ditokelo le ditlamego tša babeeletši le tša mebušo.

2. Kabinete e dumeletše go alwa ga Melawana ya Fasefase ya Tlwaelo ye e Bušeleditšwego le ye e Filwego Leina Gape ya Tshwaro ya Bagolegwa (“Melawana ya Nelson Mandela”) ya Mokgatlo wa Dinagakopano (UN), ka Palamenteng.

2.1. Go fa leina gape ga Melawana ya Fasefase ya Tlwaelo go ba “Melawana ya Nelson Mandela” go hlompha bohwa bja Mopresidente wa rena wa peleng, yo a tšerego mengwaga ye 27 a le kgolegong.
2.2. Go bile le katološo ya lefase ka bophara ya bogolo bja Letšatši la Boditšhabatšhaba la Nelson Mandela, leo le hlomphiwago ke Dinagamaloko tša UN ka la 18 Mosegamanye, go tšwetša pele maemo a setho a go dula ka kgolegong, go tliša temošo ya gore bagolegwa ke karolo ya setšhaba le go bona bohlokwa bja mošomo wa bašomi ba kgolegong bjalo ka tirelo ya setšhaba.
2.3. Melawana ye e tla thuša Afrika Borwa go akgofiša phetošo mabapi le tshepedišo ya tshokollo ya bagolegwa ye e hlabollago batho ye e sepelelanago le melawana le ditlhahli tša mehutahuta tša boditšhabatšhaba.

C. Melaokakanywa

1. Kabinete e dumeletše go romelwa ga Molaokakanywa wa Thibelo le Twantšho ya Bosenyi bja Lehloyo le Dipolelo tša Lehloyo wa 2018 ka Palamenteng.

Molaokakanywa wo o ikemišeditše go hloma melato ya mabapi le bosenyi bja lehloyo le dipolelo tša lehloyo, le go tsenya tirišong magato a go thibela le go lwantšha melato ye. O ikemišeditše go rarolla dikgaruru kgahlanong le batho go lebeletšwe go tšea lehlakore ka ga se sengwe. O tla phethagatša gape ditlamego tša Afrika Borwa go latela ditlhagišo tša boditšhabatšhaba mabapi le ditokelo tša botho.

2. Kabinete e dumeletše gore Molaokakanywa wa Sehlongwa sa Bosetšhaba sa Bokgoni bja Elektroniki sa iKamva (iNeSI) wa 2018 o romelwe Palamenteng. Molaokakanywa wo o hlagiša gore go hlongwe iNeSI bjalo ka sehlongwa sa semolao seo se nago le melao ya sona ka nepo ya go rarolla mathata a bokgoni bja tša elektroniki (bokgoni bja titšithale) ka mo nageng. Tlhabollo ya bokgoni bja  elektroniki e bonwa bjalo ka ye nngwe ya makala ao a beilwego pele a mmušo ka go ageng ga ekonomi ye e akaretšago mang le mang, le go hloma mmušo wo o nago le bokgoni le wa tlhabollo.

iNeSI e tla šoma bjalo ka setheo sa bosetšhaba seo se hlohleletšago tirišano le phetogo, ka go hlabolla mabokgoni a tša titšithale le botsebi bja dikhamphani ka mo nageng.

3. Kabinete e dumeletše gore go tsebišwe Molaokakanywa wa Dinyakišišo ka ga Meetse wa 2018 ka Palamenteng. Molaokakanywa wo o nyaka go tseba le go fa maemo a semolao go Kantoro ya Mohlankedimogolo wa Dinyakišišo ka ga Meetse, yeo e bilego gona ka Kgorong ya Tšhireletšo (Tirelo ya Mašole a ka Meetseng) go tloga mola go hlongwa ditirelo tša dinyakišišo tša meetse ka Afrika Borwa.

O tla kgontšha Mohlankedimogolo wa Dinyakišišo tša Meetse wa Tirelo ya Mašole a ka Meetseng ya Afrika Borwa go bonwa bjalo ka Mohlankedimogolo wa Bosetšhaba wa Dinyakišišo tša Meetse. O tla netefatša gore kabo ya ditirelo tša dinyakišišo tša meetse e dirwa semmušo le go phethagatšwa go ba molao. Se ke go latela Mokgatlo wa Boditšhabatšhaba wa Mawatle le Kwano ya Boditšhabatšhaba ka ga Polokego ya Bophelo ka Lewatleng, e lego kwano ya boditšhabatšhaba ya mawatle yeo e beago maemo a polokego a fasefase ka go ageng, go hlama le go sepediša dikepe tša merwalo.

D. Ditiragalo tše di tlago

1. Kgwedi/Letšatši la Ditokelo tša Botho

Meketeko ya Kgwedi/Letšatši la Bosetšhaba la Ditokelo tša Botho la 2018 e tla swarwa ka fase ga morero wa: “Ngwaga wa Nelson Rolihlahla Mandela: re tšwetša pele le go maatlafatša seemo sa ditokelo tša botho go ralala le setšhaba”.

Tiragalo ye ya bosetšhaba e tla swarwa ka la 21 Hlakola 2018 ka Lebaleng la Khrikhete la George Thabe, Sharpeville ka Vereeniging. Kabinete e ipiletša go mafapha ka moka go hlompha letšatši le la bosetšhaba, leo le ketekago setlwaedi sa ditokelo tša botho ka Afrika Borwa le go hlompha batho ba go swana le Madiba bao ba lefilego gabohloko le go itima tšohle ka nepo ya go fihlelela tokollo le tokologo yeo re ipshinago ka yona lehono.

2. Beke ya Bosetšhaba ya Nepišo ya Imbizo

Beke ya Bosetšhaba ya Nepišo ya Imbizo e tla swarwa go tloga ka la 9 go fihla ka la 15 Moranang 2018 ka fase ga morero wa: “Mmogo le iša Afrika Borwa pele”. Mo ngwageng wo, mokete wa Mengwaga ye Lekgolo ya Mandela o bopa karolo ye kgolo ya beke ye ya nepišo, ka fase ga morero waka fasana wa: “Eba bohwa”. Bolaodiphethiši bja mmušo bo tlo boledišana le ditšhaba ka dikarolong tše di fapafapanego tša naga. Mananeo a Ditona a tla tsebišwa ge nako e dutše e sepela.

3. Go thwala bafsa mešomong 

3.1. Mopresidente Ramaphosa go emetšwe gore o tla tsebiša semmušo lesolo la go leka kgonagalo ya Ditirelo tša go Thwala Bafsa Mešomong ka Lefelong la Tlhahlo ka ga Mešomo la Riversands ka Diepsloot ka la 27 Hlakola 2018. Lesolo le, ka tirišano le lekala la phraebete, le ikemišeditše go maatlafatša bafsa ba milione o tee mo mengwageng ye e latelago ye mehlano gore ba kgathe tema ka ekonoming, e ka ba bjalo ka maloko a bašomi goba ba sepetša dikgwebo tša bona goba ba hwetša lerato la bona la go tšwetša pele dithuto.

4. Diketelo tša mošomo go la Mozambique le Zimbabwe

Mopresidente Ramaphosa o tla tšea maeto a mošomo go leba Repabliking ya Mozambique le Repabliking ya Zimbabwe ka Mokibelo wa la 17 Hlakola 2018. Diketelo tše di tla lebeledišiša kudu go maatlafatša dikamano tša dinaga ka bobedi le dinaga tše go boletšwego ka tšona ka mo godimo.

Mopresidente o tla fana ka maikutlo mabapi le merero ya khutšo le tšhireletšo ka mo seleteng se le ka khonthinenteng, gomme ba tšwela pele ba boledišana ka ga merero ya lefase ka bophara yeo dinaga tše di nago le kgahlego go yona.

E. Melaetša

1. Kabinete e lebogiša Ntsiki Biyela, mosadi wa mathomo wa mothomoso ka Afrika Borwa wa go tiitiela beine yo a tsebagaditšego semmušo leina la beine ya gagwe. Ka ge a na le kgrata ka ga go bjala mehlare ya mebeine go tšwa ka Yunibesithing ya Stellenbosch le maitemogelo a mošomo a mengwaga ye 13,  Dibeine tša gagwe tša Aslina di tla re ka 2018 tša rekiša mapotlelo a 12 000 ka United States of America, Germany, Taiwan le Ghana.
2. Kabinete e lebogiša Caster Semenya ge a robile rekhoto ya Afrika Borwa ya Lebelo la dimetara tše 1 000 yeo e tšerego mengwaga ye 35 e sa robiwe ka phadišanong ya Diatleletiki ya Grand Prix ye e bego e swerwe ka Tuks ka Pretoria. Mosetsana wa rena wa gauta o thopile lebelo le ka nako ya 2:35:44, a roba rekhoto ya kgale yeo e beilwego ka 1983 ke Ilze Wicksell ka metsotswana ye e nyakilego go ba mebedi. Kabinete e reta gape Semenya ge a phethagaditše toro ya gagwe ye e lego kgale a na le yona ya go hwetša mangwalo a dithuto tša yunibesithi ge a phetha Tiploma ya gagwe ya Dithutamahlale tša Dipapadi ka Yunibesithing ya Leboa-Bodikela ka Potchefstroom.
3. Kabinete e lebiša mahloko go bagwera le go ba lapa la Leloko la Palamente leo le Hlomphegago, Mohumagadi Loliwe Fazeka, yo a hlokofetšego ka kotsing ya sefatanaga ka Kapa Bohlabela, mo bekeng ye e fetilego.
4. Kabinete e lebiša gape mahloko go bao ba bego ba ratwa ke Motseta wa Afrika Borwa ka Sweden, Mohumagadi Faith Radebe, yo a hlokofetšego ka Labobedi la 13 Hlakola 2018. E be e le Moinspektharapharephare wa Bohlodi ka Afrika Borwa mo nakong ye e fetilego.

F. Bao ba thwetšwego mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1. Ngaka Philemon Mjwara bjalo ka Molaodipharephare wa Kgoro ya Mahlale le Theknolotši mo lebakeng la konteraka ye e katološitšwego ya mengwaga ye meraro, ye e thomago ka la 1 Moranang 2018.
2. Mohumagadi Memme Sejosengwe bjalo ka Mongwaledipharephare wa Kantoro ya Moahlodimogolo mo lebakeng la konteraka ye e katološitšwego ya mengwaga ye meraro, ye e thomago ka la 1 Moranang 2018.
3. Mohumagadi Thuli E Radebe, bjalo ka Molaodiphethiši ka Senthareng ya Boitlhamelo ya Tirelo ya Setšhaba mo lebakeng la konteraka ye e katološitšwego ya dikgwedi tše tshela.
4. Morena Thilivhali Archibald Ramawa bjalo ka Mohlankedimogolo wa Ditšhelete wa Sehlongwa sa Bosetšhaba sa Kgašo ya Elektroniki sa Afrika Borwa.
5. Lekgotlataolo la Sentech SOC Limited:

a. Morena Magatho Mello (o thwetšwe leswa bjalo ka molaodi yo e sego wa khuduthamaga le Modulasetulo);
b. Morena Lumko Mtimde (o thwetšwe leswa bjalo ka molaodi yo e sego wa khuduthamaga);
c. Ngaka Sandile Malinga (molaodi yo e sego wa khuduthamaga); and
d. Mohumagadi Elizabeth Malaka (molaodi yo e sego wa khuduthamaga).

6. Lekgotlataolo la Broadband Infraco:

a. Morena Mandla Ngcobo (o thwetšwe leswa bjalo ka molaodi yo e sego wa khuduthamaga le modulasetulo);
b. Mohumagadi Nokuthula Selamolela (o thwetšwe leswa bjalo ka molaodi yo e sego wa khuduthamaga);
c. Morena Gift Mphefu (molaodi yo e sego wa khuduthamaga);
d. Mohumagadi Zandile Matilda Kabini (molaodi yo e sego wa khuduthamaga); le
e. Mohumagadi Jennifer Schreiner (molaodi yo e sego wa khuduthamaga).

7. Lekgotlataolo la SAPO:

a. Morena Comfort Ngidi (o thwetšwe leswa bjalo ka Modualsetulo);
b. Mohumagadi Nomahlubi Simamane (o thwetšwe leswa bjalo ka Motlatšamodulasetulo);
c. Adv Juliana Galetlane Rasethaba (molaodi yo e sego wa khuduthamaga); le
d. Ngaka Charles Nwaila (molaodi yo e sego wa khuduthamaga).

Dinyakišišo:
Phumla Williams
Seboleledi sa Kabinete sa Motšwaoswere (GCIS)
Sellathekeng: 083 501 0139