Kgau ya Metswalle ya OR Tambo

Kgau ena e fuwa melata (Dihlooho tsa Dinaha le tsa Mebuso) mmoho le bahlomphehi ba bang ba dinaha tsa bolata. Kgau ena e fuwa ba bontshitseng setswalle ho Aforika Borwa. Kahoo, ke kgau ya kgotso, tshebedisanommoho, momahano le tshehetso. Kgau ena e supa tshiya ya dikamano tsa matjhaba le ditjhabatjhaba.

Tlhophiso

Kgau ena e ka ajwa ka mekgahlelo e meraro:

• Mokgahlelo wa 1 = Kgau e ka Sehloohong ya Bomphato ba Dinaheng tsa Bolata ba OR Tambo (Gauta)
• Mokgahlelo wa 2 = Kgau e Kgolo ya Bomphato ba Dinaheng tsa Bolata ba OR Tambo (Silifera)
• Mokgahlelo wa 3 = Kgau e Kgolwanyane ya Bomphato ba Dinaheng tsa Bolata ba OR Tambo (Lethose).

Dikgau tsohle di na le matshwao a mane: lere la seikokotlelo, betjhe ya molaleng, e nyenyane le e kgweswang molaleng.

Botshwaedi/Dintlha tsa moralo

Mookotaba wa sehlooho

OR Tambo: OR Tambo o bile le seabo se seholo kgolong le ntshetsopeleng ya mokgatlo wa matjhaba wa momahano kgahlanong le semorabe le Kgethollo. Ho tse ding, ke yena ya theileng Meifo ya pele ya mokgatlo wa tokoloho Egepeta, Morocco, Ghana, le London. Ona e bile mohato wa pele wa ho kopanya metswalle ya Aforika Borwa lefatsheng ka bophara, ka ngoko ya dinaha tsa matjhaba e tswelang pele e bile e tsitsitse ho tshehetsa Aforika Borwa e lokolohileng ya demokerasi, kgahlanong le bobe ba semorabe, kgatello le Kgethollo.

Letshwere (mole snake): Noha e etelang masea a sa tswa belehwa a leloko le itseng. Ha e ka ke ya ntsha masea kapa ba leloko leo kotsi mme mokgwa o bobebe wa ho e leleka, ke wa hore mma ngwana a hamele lebese la letswele ho yona. E etela ngwana ho tla mo hlophisetsa katleho le tshireletso bophelong ba ha a se a hodile. E tla jwaloka motswalle le mosireletsi. Setswalle seo e se bontshang ha se a itshetleha ka pontsho ya ho loka feela, empa ka pontsho ya momahano le ho labalabela ho tshehetsa le ho kgothaletsa katleho ya ka nako e telele ya leloko labo motho. Noha ena ke tshomo ya Aforika ho ya ka moo e hlalositsweng ka teng pading ya AC Jordan e bitswang The Wrath of the Ancestors. Padi ena ha e hlalose noha jwaloka sehahabi se kotsi se nang le tjhefo, empa e hlahisa tlhaloso e batsi ya Aforika e utlwisisang noha e le motswalle ebile e le setho se bohlokwa popong ya tlhaho le tikoloho.

Matshwao

1. Lere la seikokotlelo - le betlilwe ka thupa e sootho, ya naha, ke sesupo sa kananelo ya tshehetso le momahano e bontshitsweng, ka ho tshwanang, le boikitlaetso ba tshehetso le ho ema mmoho le moamohedi wa yona.
2. Letshwere – leihlo le ntjhotjho ka dikgokelo tse kahodimo le ka tlase, le bontsha momahano le tshehetso tse fuwang Aforika Borwa.
3. Sebopeho sa tomoye se karolo di nne - se susumeditswe ke kananelo ya lefatshe lohle e buang ka kopano ya matla a meya e fapaneng.