Ukuzalwa kwentando yeningi engacwasi ngokobuhlanga nangokobulili eNingizimu Afrika kwenze isidingo sokuthi kubuyekezwe kabanzi uhlelo lweziMpawu zeZwe. Uhlelo olwedlule lwalumbandakanya ukuHlonishwa okukodwa kanye neziNdondo ezine ubuhle bazo zazimele isikhathi esedlule.
Sifuna ukwehlukana nesikhathi esedlule, ngo may 1998, uMkhandlu wokuLuleka uMongameli ngeziMpawu zeZwe osanda kwakhiwa wanikezwa umsebenzi kanye nomthwalo wokubuyekeza iziMpawu zeZwe kanye nemiKlomelo. Ukuqalisa umsebenzi, ikomidi elikhethekile lasungulwa elaqala uhlelo lophenyo olunzulu, elwalubandakanya ukuxhumana nomphakathi, izingxoxo zikazwelonke nalabo abathintekayo, izingxoxo namaqembu ngohlelo olungamela oludala, ukwenziwa kophenyo lomlando nokutholakala kobucwebe kanye nabadwebi bezimendlela abazodweba izimendlela ezintsha ngokunikezwa kolwazi lwemidwebo
Njengengxenye yohlelo, uMnyango wezobuCiko, amaSiko, iSayensi nobuChwepheshe ngokubambisana nezokuXhumana koMbuso neNqubo yezoLwazi baphenya kabanzi ngezimpawu nokuthi zimeleni emzameni wokuthola umongo wobuhle obusha oyoveza umoya wezwe Elisha. Iphaneli yosolwazi bezemfundo (academics) kanye nocwepheshe abanolwazi olunzulu ngezimpawu zesintu nokuthi zimeleni lacelwa ukuba zibheke izinto ezimele ubunye kanye nomlando wonkana nesipiliyoni seAfrika kugxilwe kakhulukazi kwiNingizimu Afrika. Umphumela wonke walolu hlelo waholela ekwakhiweni nasekudwetshweni kweziMpawu ezintsha zeZwe.
Ingqikithi yendaba
INingizimu Afrika isihambe uhambo olude lokwehlukana nomlando wobandlululo ngokobulili, umbala, nenkolelo. Izwe lethu liqhubekela phambili ngokuzinzile endleleni eqonde ekwamukeleni ubuntu nesithunzi sabo bonke abantu. Kulolu hambo lokuhlonipha ubuntu babo bonke abantu, kunosiko olusha lwamalungelo esintu labo bonke abantu, kanye nokuhlonishwa kwesithunzi somoya wobuntu okuyiyonanto ebonisa ubuthina njengeNingizimu Afrika.
Esinye sezikhathi esingeke sikhohlakale sokwehlukana nesikhathi sayizolo, kwaba wukwenyuswa kweflegi elisha ngo-1994. Leso sikhathi saqinisa ukuziqhenya kwethu kanye nesithunzi sezwe elisimamayo neligubha umkhosi wesithunzi sabo bonke abantu. Kanti okunye kwaba wukusungulwa nokuphothulwa kweziNdondo ezintsha zezwe, ezongamele umlando wabo bonke abantu bezwe, mhlaka 27 kuMbasa ngo-2000. Ngokwenza lokho, lokhu kubonelela bonke ubuhle be-Afrika, kanti futhi nezimpawu zayo ziba yingxenye yosiko olusha oluyisikhokhelo ekuzalweni nasemvuselelweni kabusha kweNingizimu Afrika.
IziNdondo ezintsha zeZwe zesekelwe ngomoya waleyo mvuselelo yezwe.
