Ukuthoma kwentando yenengi etja engabandlululi ngokobutjhaba nangokobulili eSewula Afrika kwenza kwaqakatheka ukubuyekezwa ngokuhlolisiswa kwaboNongorwana besiTjhaba. Irherho elidlulileko lalibunjwa mhlobo munye wokwEmbeswa (i-Decoration) kanye noNongorwana munye ubuhle bakhe bobukghwari ebebujamele isikhathi esidlulileko.
Ngokufuna ukusuka esikhathini esadlulako, ngoMeyi ka-1998, umKhandlu omutjha oYelelisa uMongameli ngaboNongorwana besiTjhaba wanikelwa umsebenzi nesibopho sokubuyekeza irherho laboNongorwana besiTjhaba naboNongorwana. Ukufezakalisa umsebenzi, ikomiti yesiqhema sezazi yabunjwa neyathoma ikambiso yerhubhululo engeneleleko nefaka woke umuntu eyafaka ukubonisana nomphakathi, ukukhulumisana nabadlalindima inarha yoke, iinkulumiswano neenqhema ngokuqala khulu amanye amarherho angatjhejwa, ukuvunyelwa kwerhubhululo lezomlando kanye nokubuthelelwa kwejewelari kanye nabatlami bamamedali ukwenza amamedali amatjha ngokuya kwemilayo yokutlama.
Njengehlangothi lekambiso le, loyo ebekumNyango wezobuKghwari, amaSiko, iSayensi neTheknoloji ngokubambisana neRherho lezokuThintanisa nokwAzisa lomBuso (i-Government Communication and Information System) waphenya ukuya phambili amatshwayo nokunikelwa kwehlathululo yamatshwayo ukulinga ukufumana ukuqakatheka kobuhle obutjha obuzakuveza ummoya omutjha wenarha etja. Isiqhema somsebenzi seemfundiswa nezazi esazi khulu ngamatshwayo wendabuko nokunikelwa kwehlathululo yamatshwayo sabawiwa ukufanisa izinto eziqakathekileko kanye nezinto ezijamele ibumbano nomlando ofaka woke umuntu kanye nelemuko le-Afrika ngeSewula Afrika njengehlangothi elikhulu elizakuqalwa. Umphumela webumbano yalekambiso wagcina ngokuvunyelwa nokutlanywa okungikho kwaboNongorwana besiTjhaba.
Ubujamo
ISewula Afrika ithethe igadango elikhulu lokusuka esikhathini esadlulako lokukhuphela ngaphandle nokubandlulula ngokuya kobulili, umbala kanye nekolelo. Inarha besele iragela phambili ngetjhubeni eligandelela butjha ubuntu bethu. Ngalelikhambo elitjhinga ebuntwini bethu, isiko elitjha lamalungelo wobuntu kanye nokuhlonitjhwa kommoya wesithunzi somuntu kube ziimbumbi zeSewula Afrika.
Enye yeenkhathi zamatshwayowzokuphuma esikhathini esidlulileko kwaba kuphakanyiswa kweflarha etja ngo-1994. Lesi sikhathi ngokufaneleko saqinisa ukuzikhakhazisa nesithunzi senarha evelako kanye nokurhatjiswa kobuntu. Okhunye kwaba kuvezwa kwe-Coat of Arms etja ngomhlaka 27 Apreli 2000 okwamukela ukuqakatheka kwebumbano lezomlando labantu benarha. Ngokwenza njalo, ubuhle obutjha obutjheja i-Afrika namatshwayo wayo baba lihlangothi lesiko elitjha elibumba ukubelethwa butjha kweSewula Afrika.
AboNongorwana besiTjhaba abatjha bathoma ngommoya wokubelethwa butjha lokho.
