Sefoka sa Companions of OR Tambo

Sefoka se se abelwa badudi ba dinaga di šele (Dihlogo tša Mebušo Dinaga le Mebušo) le bahlomphegi ba bangwe. Ba e abelwa ka lebaka la segwera seo ba se bontšhitšego go Afrika Borwa. Ka go realo ke tlhompho ya khutšo, tšhomišano le seka sa botee le thekgo. Tlhompho ke kokwane e bohlokwa ya dikamano tša boditšhabatšhaba le mahlakore a mantši.

Thulaganyo

Tlhompho ye e ka abja ka maemo a mararo:

• Maemo 1 = Supreme Companion of OR Tambo (Gauta)
• Maemo 2 = Grand Companion of OR Tambo (Silifera)
• Maemo 3 = Companion of OR Tambo (Bronze).

Difoka ka moka di akaretša dikarolo tše nne: lehlotlo, petše ya molala, e nnyane le petše ya sehuba. Sefoka sa mafelelo se na le dikarolo tše tharo: petše ya molala, e nnyane le petše ya sehuba.

Seswantšho/dikarolo tša tlhamo

Seswantšho sa bogareng/seswantšho

OR Tambo: OR Tambo o kgathile tema e kgolo kgolong le tlhabollong ya mokgatlo wa boditšhabatšhaba wa go lwantšha kgethollo le apartheid. Gareng ga tše dingwe, o theile di-mišene tša mathomo tša mekgatlo ya Egepeta, Morocco, Ghana le London. Se ebile mathomo a go kgobokanya felo go tee bagwera ba Afrika Borwa lefaseng ka bophara matsapeng a tswelago pele a dinaga tsa boditshatshaba go thekga Afrika Borwa ye e lokologilego ya demokrasi yeo gape elego kgahlanong le bobe bja kgathollo, kgatelelo le Apartheid.

Majola (mole snake): Noga yeo e etelago bana ge ba belegwa. Ga e ke gobatša bana goba maloko a lapa gomme tsela e nnoši ya segwera ya go e raka ke gore mmago ngwana a e gaše ka mekgato go tšwa letsweleng la gagwe. E etela ngwana go mo lokišetša gore e tle be motho yo a atlegilego ge a godile. E tla bjalo ka mogwera le mošireletši.  Segwera seo e se bontšhago ga sa ithekga ka ponagalo ya yona ya botho eupša go bontšha botee le go phegelela thekgo le go hlohleletša katlego ya nako e telele ya moloko o moswa wa batho ba sa golago. Noga e dula e le gona dinonwaneng tša Se-Afrika ka lebaka la kanegelo ye e bitšwago The wrath of the ancestors ka AC Jordan. Kanegelo e kgafela ka thomo kgopolo ye e tlwaelegilego ya gore noga e no ba selo sa mpholo gomme yona e tšweletša tlhaloso ye e nabilego ya Se-Afrika yeo e kwešišago noga bjalo ka mogwera le leloko la phedišano (ecology) ye e fetofetogago.

Dikarolo

1. Lehlotlo – le betlilwe ka kota ye e fifetšego ya mohlare wa setšo gomme ke seka tebogo ya thekgo le botee bjo bontšhitšwego, agomme go lebeletšwe gore moamogedi le yena a bontšhe boitlamo bja thekgo.
2. Majola – leihlo la ntshotsho le go ba le dihuku ka godimo le ka fase ke seka sa temogo ya botee le thekgo go Afrika Borwa.
3. Tomoye ya dikarolo tše nne – e hlohleleditšwe ke ‘ying and yang’ ya boditšhabatšhaba yeo e bolelago ka ntlha yeo maatla a meoya ya go fapafapana e kopanago.