Kgau ya Baobab

Kgau ena e fuwa baahi ba Aforika Borwa bakeng sa tshebetso e tswileng matsoho molemong wa setjhaba. Tshebeletso e tlotlwang ke e tsotehang ho feta tsohle tse tlwaelehileng. Ke kgau bakeng sa dinyehelo tse babatsehang mekgahlelong ena a latelang:

• Kgwebo le moruo
• Saense, meriana le bosibolli thekenolojing
• Tshebeletso ya setjhaba.

Tlhophiso

Kgau ena e ka ajwa ka mekgahlelo e meraro:

• Mokgahlelo wa 1 = Kgau e ka Sehloohong ya Sefate sa Baobab (Gauta)
• Mokgahlelo wa 2 = Kgau e Kgolo ya Sefate sa Baobab (Silifera)
• Mokgahlelo wa 3 = Kgau e Kgolwanyane ya Baobab (Lethose).

Botshwaedi/Dintlha tsa moralo

Mookotaba wa sehlooho

Kgau ena e susumeditswe ke Baobab, e leng sefate se melang tikolohong e futhumetseng ka nako tsohle ya Aforika. Hore na lebitso lena Baobab le tswa hokae ke e meng ya mehlolo le meeka ya Aforika. Sefate sena se hlalositswe hangata ho feta difate tsohle tsa Aforika, ka lebaka la mahlahahlaha a sona, le mokgwa oo e leng sa bohlokwa ka teng ho baahi ba sethatho ba naha. Matla le botsitso tse bontshwang ke sefate sena ka ho phela nako e telele, ke sesupo sa tsitlallelo le tshebeletso e ikgethang ho Aforika Borwa e tlotlwang ka Kgau ena. Ka ho tshwanang, tshebeletso eo ho fanwang ka yona e ntse e netefatsa botsitso le maemo a holang a Aforika Borwa.

Sefate sa Baobab ke karolo ya bohlokwa kahara meru e mengata ya Aforika. Se fana ka dihlahiswa tse etsang masela le mabofe, ditholwana bakeng sa dijo le mafura a makoloi ekasitana le dihlahiswa tse ding tse ngata tsa bohlokwa. Methapo ya sona e tlwaelehileng, e sephara ebile e le matla e tshehetsa sefate sena se seholohadi se tlwaelehileng e le kgotla moo ho tshwarelwang dikopano tsa bohlokwa teng ebile e le tshireletsong ya ditjhaba tsa Aforika.

Matswao

1. Baobab (Baobab kapa Adonsonia Digitata) – se tsebisahala ka methapo ya sona le ho phela nako e telele. Ha se fane ka moriti feela le sebaka sa ho tshwara dikopano, empa se boetse ke sa bohlokwa ho tshehetseng dibaka tseo se fumanehang ho tsona.
2. Sebopeho se ntlha di robong – setshwantsho se ntlha di robong se supa makala a mangata a fapaneng ao ka ona ho ka neelanwang ka tshebeletso kahong ya setjhaba se tswetseng pele. Setshwantsho sena se boetse se emetse diprofense tse robong tsa naha ya rona.
3. Bokantle ba sebopeho sena – kutu ya sefate sa Baobab, bokantle bona ba sefate bo atisa ho sebedisetswa ho etsa dimmata le dikatiba.