1. Tsheo dza Khabinethe kha mafhungo a zwino na mishumo iḓaho
1.1. Khabinethe yo ṱanganedza u bviswa ha Muvhigo wa Tsedzuluso wa Afurika Tshipembe wa Ṅwaha wa vhu 20 wa u bva 1994–2014, nga Muphuresidennde Vho Jacob Zuma, une wa fha vhuṱanzi ha mvelaphanḓa yo itwaho nga muvhuso kha u vhona uri roṱhe ri na vhutshilo ha khwine.
Kha muya wa u kumedzela Tsedzuluso iyi kha Muphuresidennde wa kale Vho Nelson Mandela, Khorotshitumbe i humbela sekithara dzoṱhe dza tshitshavha uri dzi lavhelese muvhigo uyo, dzi dzhenelele kha bembela ḽa u pembelela Miṅwaha ya 20 ya Mbofholowo na u thusa kha u itwa ha nyambedzano dza lushaka dza tswikelelo na khaedu dzashu.
Tsedzuluso i khwaṱhisedza mvelaphanḓa ye ra ita kha u fhaṱa ndayotewa ya demokirasi ina mutsindo isa ṱaluli mirafho na mbeu.kha u ita uri Afurika Tshipembe ḽi vhe fhethu ha khwine ha u dzula hone.
1.2. Khabinethe i humbudza sekithara dzoṱhe dza tshitshavha uri ṅwaha wa 2014 wo kumedzelwa kha Fulo ḽa Miṅwaha ya 20 ya Mbofholowo.
Lambamai u swaya Ṅwedzi wa Mbofholowo. MaAfurika Tshipembe vhoṱhe na vhafarisani vha mashango a nnḓa na vhafaramikovhe vha khou rambiwa u vha hone kha mushumo wau pembelela Ṅwedzi wa Mbofholowo nga u ṱumanya nganea dzavho, uri ro shandukisa hani matshilo a maAfurika Tshipembe uri avhe khwine ngakha u shuma roṱhe.
Musi ri tshi khou ya u khetha nga dzi 7 Shundunthule 2014, kha ri dovhe ri sumbedzise uri ri demokirasi ya mutsindo, yo khwaṱhaho na hone ya mulalo.
Khabinethe i humbela maAfurika Tshipembe uri vhavhe vhadzheneleli vhukuma kha dzikhetho, fhedzi vha ite izwo nga mulalo vha tshi ṱalukanya pfanelo dza vhakhethi vhoṱhe dza u bvisa vhupfiwa tshitshavhani na u khetha lwa tshiphiri fhethu ha u khethela.
Mazhendedzi a mulayo a ḓo vha atshi khou shuma kha u tsireledza pfanelo iyi, u vhona uri vhupo hoṱhe u mona na shango ho dzhenelela kha maitele a demokirasi, ane a vha tshibveledzwa tsha Nndwa yashu ya mbofholowo.
1.3. Sa tshipiḓa tsha puḽane ya ṋetshedzo ya thememveledziso ya lushaka ya Khomishini ya Pfananyo ya Themamveledziso ya Vhuphuresidennde, Khabinethe i sumbedzisa lushaka mvelaphanḓa dzavhuḓi dzi tevhelaho:
1.3.1. Damu ḽa De Hoop ngei Limpopo ḽi ḓo thoma u shumiswa uya mafheloni a Ṱhafamuhwe 2014. Heḽi ndi damu ḽa vhuṋa ḽihulwanesa ḽo fhaṱwaho ubva tshe ra vha na demokirasi. Damu iḽi ḽi ḓo thusa kha u tshimbidza zwa ikonimi, u sika mishumo na u thusa kha ṋetshedzo ya tshumelo kha mavunḓu na u fhira afho.
Vhathu vha fhiraho 800 000 vha vhupo ha Sekhukhune vha ḓo vhuelwa kha ṋetshedzo ya maḓi o tsireleledzeaho na o khwiniswaho au shumisa mahayani ngeno zwa vhulimi na zwa migodi nazwone zwi tshi ḓo vhuelwa kha ṋetshedzo ya maḓi.
Mimasipala kha vhupo uvho, i tikedzwaho nga muvhuso wa lushaka na wa vunḓu, yo bindudza nga nyengedzo ya R3 biḽioni kha themamveledziso ya u kunakisa na u ṋetshedza maḓi kha vhashumisi vha maḓi vha vhupo ha mahayani na ḓoroboni.
1.3.2. Khabinethe yo ṱahisa u fushea hayo kha u rwelwa ṱari ho pulanwaho ha Luṱa lwa vhuvhili lwa Thandela ya Maḓi ya Lesotho Highlands nga dzi 27 Ṱhafamuhwe 2014. Thandela iyi ndi tsumbo khulwane ya zwine zwa nga swikelelwa musi mashango a vhadzulatsini a tshi pfana a shuma a na tshipikwa tshithihi. Mveledziso ya zwishumiswa zwo ṱanganelaho zwa maḓi i khou shela mulenzhe nga huhulu kha mulalo na u bvelela ha dzingu ḽa Tshipembe ha Afurika na vhuvha havhuḓi ha vhathu.
1.3.3. Khabinethe i khou takadzwa nga ḽidzinginywa ḽa u vusulusa sisiṱeme ya zwiporo zwa Afurika Tshipembe, hune Transnet yo pfufha khonṱhiraka ya R50 biḽioni ya u fhaṱwa ha modeni wa 1 064 na ṱhoho dza zwidimela dza thekhinoḽodzhi.
Mushumo wa Inzhiniarini ya Transnet kha mulanga uyo ndi u vhona uri khethekanyo yo shandukiswa kha u vha mubveledzi wa tshishumiswa tsha vhukuma tsha ḽifhasi tshifhinga tshoṱhe. Murengelano uyo wo itelwa u shandukisa nḓowetshumo ya tshiporo tsha Afurika Tshipembe nga u alusa mabindu maṱuku ane a vha hone na u thoma maswa.
1.4. Khabinethe i ṱanganedza u rwelwa ṱari ha MeerKAT antenna ya u thoma nga Muhasho wa Saintsi na Thekhinoḽodzhi kha tshiko tsha saithi ya Square Kilometre Array (SKA) tsini na Carnarvon, ngei Kapa Devhula nga dzi 27 Ṱhafamuhwe 2014.
MeerKAT, ine yo itwa fhano na u vha tshishumiswa tsho tou fhaṱwaho, i dovha ya sumbedzisa uri Afurika Tshipembe ḽi nga ṱaṱisana na vhomakone zwi tshi ḓa kha vhusedzulusi, inzhiniarini, saintsi na thekhinoḽodzhi. I ḓo vha tshipiḓa tsha 25% ya Luṱa lwa u thoma lwa SKA 1.
1.5 Khabinethe i livhisa ndiliso kha miṱa na khonani dza avho vho xelelwaho nga matshilo avho zwo vhangwa nga mvula khulu dza zwenezwino. Khabinethe i fhulufhedzisa maAfurika tshipembe uri Senthara ya Ndango ya Tshinyalelo ya Lushaka – ngakha tshivhumbeo tsha Tshumelo yo Ṱanganelaho ya Lushaka na Vhusevhi (Natjoint) – i ḓo isa phanḓa na tsedzuluso na vhuḓidini ha u phulusa na mbofholowo ya vhuthu. Khabinethe i khoḓa vhudzheneleli ho itwaho nga mmbi dza tsireledzo kha u thusa u phulusa.
MaAfurika Tshipembe vhoṱhe, nga mannḓa zwitshavha zwa kha vhupo vhu na miḓalo, vha tsivhudzwa uri vha ṱhogomele nga tshifhinga tsha nyimelo dza mutsho usi wavhuḓi. Vhabebi na vhalondoti vha tea u dzhia maga kha u vhona uri vhana vho tsireledzea. Vhoramimoḓoro na vhaendangaṋayo vha tea u ṱhogomela musi vha tshi shumisa dzibada musi ho thaba.
1.6 Khabinethe i livhisa ndivhuwo dzayo kha tshitshavha kha u shela havho mulenzhe kha thulo ya mutsiko wa giridi ya muḓagasi wa lushaka ṅwedzi wo fhiraho.
Vharengi na miṱanganelano vha ṱuṱuwedzwa u isa phanḓa na u shumisa muḓagasi nga nḓila yavhuḓi na u vhulunga nga hune vha kona ngaho, nga mannḓa kha nyimelo ya mutsho wa zwino.
1.7 Afurika Tshipembe ḽi ḓo dzhenelela kha Samithi ya Vhuṋa ya Mbumbano ya Yuropa -Afurika (EU) ine ya ḓo farelwa Brussels, ngei Belgium nga dzi 2 na dzi 3 Lambamai 2014. Thero ya Samithi ndi "U bindudza kha vhathu, u Bvelela na Mulalo".
Samithi i ḓo sedza kha pfunzo na vhugudisi, vhafumakadzi na vhaswa, khathihi na tsudzuluwo ya vhapfuluwi vha re mulayoni na vha siho mulayoni vhukati ha madzhango mavhili.
1.8 Nga dzi 24 Ṱhafamuhwe 2014, hu ḓo vha huna bembela ḽa khumbudzo ya ṅwaha ya Ḓuvha ḽa Ḽifhasi ḽa TB. Khabinethe i tama u ṱuṱuwedza maAfurika Tshipembe kha u shumisana na muvhuso kha u lwa na izwo.
Samba ḽa TB aḽi ngo engedzea Afurika tshipembe fhedzi, na kha u mona na Dzingu ḽa Sub-Saharan. Zwo itwaho nga muvhuso kha u thomiwa ha nyalafho ya HIV na AIDS na mbekanyamushumo ya thivhelo kha Ḽifhasi zwo fhungudza TB.
Mbekanyamushumo dza muvhuso dza u lwa na TB dzi katela ngwanuluso ya tsedzuluso ya vhukwamani, u shumiswa ha thekhinoḽodzhi ya GeneXpert kha u ṱavhanyisa u wanwa ha TB. Ri ḓihudza nga uri Afurika Tshipembe ndi murangaphanḓa wa Ḽifhasi kha nyangarelo ya zwiimiswa zwa mutakalo nga thekhinoḽodzhi ya GeneXpert.
Khabinethe i ṱanganedza Muṱangano wa Minisiṱiri kha Thendelano ya Phindulo ya Dzingu kha TB ine ya khou ḓa kha Sekithara ya Migodi ya Tshipembe ha Afurika. Muṱangano une ya ḓo farelwa Sandton Convention Centre nga dzi 25 Ṱhafamuhwe 2014 u ḓo ṱanganya vhadzheneleli vha bvaho mivhusoni ya Madzingu, Sekithara ya Migodi ya Afurika Tshipembe, madzangano a zwa vhashumi o dzudzanaho, Vhafarani vha Mveledziso na Tshitshavha.
1.9 Khabinethe yo fhululedza vhoṱhe vho swikelelaho magumoni na vhaṱanganedzi vha Pfufho dza Vhuvhili dza Ṅwaha nga Ṅwaha dza Mabindu Mahulwane Afurika Tshipembe.
Pfufho idzo dzi sedza kushumele kwa mabindu kha zwiteṅwa zwo fhambanaho na uri dzo ṋetshedzwa kha vhuṱambo ho dzhenelelwaho na nga Muphureisdennde Vho Jacob Zuma.
Muṅwe wa vho pfufhiwaho vho fhululedzwaho nga Khabinethe ndi Vho Sam Motsuenyane vho wanaho Pfufho ya Tswikelelo Khulwane nahone zwo tea.
1.10 Khabinethe yo sedza muvhigo wa vhusedzulusi wo khwaṱhisedzwaho nga Muhasho wa zwa Gwama kha Khomishini ya Vhukethi yo Ḓiimisaho. Izwi zwi tevhela themendelo yo itwaho kha muvhigo wa Mutsireledzo wa Tshitshavha. Yo ta Minisiṱa wa zwa Muno uri vha sale murahu fhungo iḽo na u ḽi swikisa kha Khabinethe.
1.11 Khabinethe i lwa na vhugevhenga vhune ha khou ya phanḓa ngei Kapa Vhukovhela, vhune ha vha na u tshoṱelwa ha tshiṱuhu kha tshitshavha nga mannḓa na kha vhana. Hezwi a zwi nga ḓo konḓelelwa vhunga zwi khombo kha mbuyelo dza demokirasi yashu. Khabinethe i takadzwa nga mushumo wo itwaho nga Tshumelo ya Mapholisa a Afurika Tshipembe kha u lwa na vhugevhenga na u ita khuwelelo kha zwitshavha zwi kwameaho nga izwo uri zwi shumisane na mapholisa u tsireledza tshitshavha tshashu kha samba iḽi.
1.12 Khabinethe i livhisa maipfi a ndiliso kha muṱa na khonani dza Vho Martha Mahlangu mme a MK wa kale cadre Solomon Mahlangu. Vho Mme Mahlangu vha ḓo vhulungwa nga Mugivhela wa dzi 22 Ṱhangule 2014. Vho Mme Mhlangu vha ḓo vhulungwa nga Ḓorobo ya Tshwane na uri fuḽaga dzi ḓo tsitselwa fhasi hu tsi itelwa u vha hulisa.
2. Nyambedzano na tsheo dza ndeme dza khabinethe
2.1. Khabinethe yo ṱanganedza muvhigo wa Nomboro ya shishi ya Phuresidennde wa miṅwaha miṋa ubva tshe ya thoma u shuma. U tandululwa ha milandu, u khwinifhala ha kushumele ha ṅwaha nga ṅwaha ndi hu tevhelaho; 64,03% ya ṅwaha ya u thoma; 77,79% ya ṅwaha wa vhuvhili; 87,46% ya ṅwaha wa vhurau na uri zwazwino i kha 94,7%. Kha miṅwaha miṋa iyo, tshivhalo tsha mbilaelo na dzimbudziso dzo dzhenaho tsho engedzea ubva kha 75 873 kha ṅwaha wa u thoma uya kha 183 445 ya ṅwaha wa vhuṋa.
Khabinethe i ita khuwelelo kha mihasho na mavunḓu uri i ise phanḓa na u khwinisa ndeme na tshipidi kha u sedzulusa mbilaelo vhunga u fushea ha vhadzulapo hu ha ndeme kha tshiimo tsha Nomboro ya shishi ya Phuresidennde.
2.2. Khabinethe yo tendela Puḽane ya Maga a Mbekanyamaitele ya Nḓowetshumo ya Ndovhololo ya Ṅwaha nga Ṅwaha (IPAP) ya Vhurathi ya 2014/15-2016/17 itshi thoma u shuma.
Tshipikwa tshihulwanre tsha IPAP ndi u thivhela khanedzo ya nḓowetshumo na u tikedza nyaluwo na phambano kha sekithara ya vhubveledzi ha Afurka Tshipembe. Minisiṱa wa Mbambadzo na Nḓowetshumo vha ḓo amba na vhoramafhungo musi IPAP i tshi rwelwa ṱari ṅwedzi u ḓaho.
2.3. Khabinethe yo tendela u fhelelwa ha tshifhinga ha phemithi dzo bviswaho fhasi ha Thendelo yo Khetheaho ya thandela ya vhadzulapo vha Zimbabwe (DZP). Avho vha na phemithi vha lavhelelwa uri vha ite khumbelo hafhu dza phemithi shangoni ḽa havho hune vha bva hone. Minisiṱa wa zwa Muno musi tshifhinga tsho swika vha ḓo ri bvisela khagala kha maitele ane a tea u tevhedzelwa na ḓuvha ḽine ha ḓo thomiwa ngaḽo.
2.4. Khabinethe yo tendela uri Tshiteṅwa 100 (1) (b) vhudzheneleil ha ngei Limpopo vhu iswe phanḓa, uri hu vhe na tsedzuluso nga Fulwi 2014 nga murahu ha musi muvhuso muswa u tshi dzhena. Izwi zwi ḓo ita uri hu vhe na mvelaphanḓa kha vhudzheneleli kha u tandulula khaedu dzo salaho. Zwi ḓo ḓisa khwiniso kha tshiimo tsha gwama ḽa vundu na nḓisedzo ya tshumelo kha tshumelo dza tshitshavha na dziṅwe sekithara dzine dza tikedzwa.
2.5. Khabinethe yo tendela Tsedzuluso ya Vhupileli ha Afurika Tshipembe ya 2014, ya laela uri i iswe Phalamenndeni. Tsedzuluso iyi i ṋetshedza mbekanyamushumo ya Vhupileli ya tshifhinga tshilapfu na tshiṱirathedzhi tsha vhupileli uri i shumiswe nga shango uya phanḓa kha themo nṋa dza Muhanga wa Tshiṱirathedzhi wa Themo ya Vhukati. Ḽiṅwalo iḽo ḽi ḓo sumbedzwa tshitshavha, vhunga vho dzhenelela kha u ṱanganelana ha tshitshavha ho vhaho hone u mona na shango kha ṅwaha wo fhiraho.
2.6. Khabinethe yo tendela uri Muvhigo wa Komiti ya dziMinisiṱa kha Mbekanyamaitele ya Maambiwa u anḓadzwe kha Gazethe ya Muvhuso uri tshitshavha tshi bvise vhupfiwa.
Muvhigo u fhenḓulusa pfunzo ya phanḓa ya tshikolo na sisiṱeme ya vhugudisi kha zwo dodombedzwaho kha ikonomi ya matshilisano. U ṋetshedza themendelo kha Minisiṱa wa Pfunzo ya Nṱha na Vhugudisi kha uri vha bvise hani zwi khukhulisi zwi songo teaho na zwi itaho uri vha salele murahu zwi thivhelaho uri matshudeni vha bvele phanḓa.
Mbekanyamaitele ya maambiwa i sumbedzisa pfananyo ya sisiṱeme ya zwiimiswa zwa pfunzo, mbekanyamushumo na dzindalukanyo uri matshudeni vha kone u isa phanḓa na mabuḓo e vha khetha nga nḓila yavhuḓi.
2.7. Khabinethe yo tendela Muvhigo u bvaho kha Thimu ya dziMinisiṱa i Shumanaho na Mbekanyamushumo dza Mutheo wa Mbalo na Saintsi, uri u anḓadzwe kha Gazethe ya Muvhuso uri tshitshavha tshi bvise vhupfiwa.
Thimu ya u Shuma ya dziMinisiṱa yo nangwa uri i bveledzise Mbekanyamushumo ya Mutheo wa Pfunzo ya Vokheshinaḽa na Magudedzini a Vhugudisi o tewaho kha Mbalo na Saintsi.
Izwi zwi ḓo thusa kha u engedza nomboro ya u dzhenwa yunivesithi dza Saintsi na Mbalo na u khwinisa tshikhala tsha mveledziso vhunga zwo sumbedziswa kha Puḽane ya Mveledziso ya Lushaka.
Mbekanyamushumo yo sedzesa kha avho vhane vha tama u dzhena kha sekithara ya Pfunzo ya Vokheshinaḽa ya Thekhiniki na Vhugudisi, avho vhane vho no vhaho kha magudedzi a Pfunzo ya Vokheshinaḽa ya Thekhiniki vhane vha tama u isa phanḓa na u ḓiṅwalisa dziyunivesithi, khathihi na matshudeni a Gireidi 12 vhane vha tama u ḓiṅwalisa dziyunivesithi vhane a vha swikeleli ṱhoḓea ya Mbalo na Fisikhaḽa Saintsi.
2.8. Khabinethe yo tendela mawanwa a tsedzuluso ya 2012/13 kha u lambedzwa ha tshitshavha kha zwa saitsi na thekhinoḽodzhi uri a anḓadzwe.
Mihasho ya Lushaka yo bindudza masheleni a anganyelwaho kha R29, 4 biḽioni kha zwiitwa zwa saitsi na thekhinoḽodzhi nga 2012/13, ine ya sumbedza 3% ya mugaganyagwama wo fhelelaho wa muvhuso wa lushaka. Izwi zwo vha khwine kha tshikati tsha 2.9% ya miṅwaha miṋa vhukati ha 2008/09 uya kha 2011/12.
Zwi do vha zwa khwaṱhisa vhuṱanzi ha uri muvhuso u lambedza vhunzhi ha tsedzuluso dza saintsi dzine dza itwa Afurika Tshipembe, na uri vhunzhi ha zwi no itwa zwi wanala nga nnḓa ha mihasho ya lushaka, tsumbo. kha khantsele dza saintsi na zwiimiswa zwa pfunzo ya nṱha.
2.9. Khabinethe yo ṱalutshedzwa ngaha tsedzuluso ya Muhasho wa u Monithara Kushumele na Tsedzuluso kha ‘Mawanwa a Vhugudi ngakha u thomiwa ha Gireidi R’.
U ṱavhanyedzela vhana vha tshe vhaṱuku kha nyaluwo na mveledziso zwi fhungudza tshayandinganyo na mveledzso ya nyaluso, nga mannḓa kha vhana vhaṱuku vha kundelwaho.
Khabinethe i ṱanganedza tswikelelo khulwane kha u aluwa huhulu ha Gireidi R ine ya khou tea u alusa ndivho yayo uri huvhe na kushumele kubvelelaho kha pfunzo.
2.10. Khabinethe yo nyeṱulelwa ngaha mawanwa a Mbekanyamushumo ya u Monithara ya Nḓisedzo ya Tshumelo ya 2013.
Khabinethe yo khoḓa na uri yo ṱuṱuwedzwa nga khwiniso yo itwaho nga mihasho ya lushaka, kha vhulanguli hayo ha tshiṱirathedzhi kha kushumele kwa tshiimo tsha zwishumiswa.
Mawanwa a zwiimiswa zwa 186 (zwo monithariwaho lwa u tou thoma) u mona na mavunḓu oṱhe nga 2013 o sumbedzisa uri tshikati tsha phimo ya nyalafho ya khuliso, vhupo na tswikelelo na zwifhinga zwa u vula na u vala zwo elwa zwavhuḓi nga vhadzulapo na vhasedzulusi.
Fhethu hune ha khou ṱoḓa vhudzheneleli ndi kha; vhulanguli ha mbilo, mbonalo na tswayo, ndangulo ya miduba na zwifhinga zwa u lindela na tsireledzo.
Mawanwa kha zwiimiswa zwa 77 zwe zwa sedzuluswa hafhu hu tshi khou ṱolwa vhukhwine na zwone zwo wana tshikati tsha phimo tsho khwinifhadzwaho, kha u dzhielwa nṱha ha vhulanguli ha tshiṱirathedzhi kha kushumele kwa tshiimo tsha zwishumiswa.
2.11. Khabinethe yo tendela u farwa ha Muṱangano Muhulwane wa dziMinisiṱa wa Tshitshavha tsha Mveledziso ya Tshipembe ha Afurika (SADC) vha na vhuḓifhinduleli ha ICT, Vhudavhidzani na Tshumelo dza Poswo ubva nga dzi 23 u swika dzi 25 Ṱhafamuhwe 2014, ngei Johannesburg.
3. U thola
Khabinethe yo tendela u tholwa hu tevhelaho:
3.1. Vho Elaine Alexander kha poso ya Mufarisa Mulanguli Muhulwane: Mveledziso ya Ikonomi, Mbambadzo na Thengiso kha Muhasho wa Vhulimi, Vhusimamiri na Vhureakhovhe.
3.2. Vho Nkidi Dinah Mohoboko kha poso ya Mufarisa Mulanguli Muhulwane: Akhademi ya Vhugudi kha Muhasho wa zwa Muno.
3.3. Vho Sam Themba Mtshisa kha poso ya Mufarisa Mulanguli Muhulwane: Tshumelo dza Muṱanganelano kha Muhasho wa Mishumo ya Tshitshavha.
3.4. Vho Malijeng Theresa Ngqaleni kha poso ya Mufarisa Mulanguli Muhulwane: Vhushaka ha Mivhuso ya Ngangomu kha Muhasho wa zwa Gwama.
3.5. Vho Michael Sass kha poso ya Akhauthanthe Muhulwane kha Muhasho wa zwa Gwama.
3.6. Vho Mlungisi Justice Mathonsi sa Muofisiri Muhulwane wa Kushumele kha Ofisi ya Poswo ya Afurika Tshipembe.
3.7. Miraḓo ya Vhulanguli vhu sab vi ngomu kha Zhendedzi ḽa Vhuendedzi ha u Pfuka Mukano wa Bada:
a) Vho Pam Edith Pokane (Mudzulatshidulo);
b) Vho. Reuben Abel Dlamini;
c) Vho. Gordon Noah;
d) Vho. Moses Cyril Tiel Scott;
e) Vho. Wayne Smith;
f) Vho Maleho Margaret Nkomo (vho tholwa-hafhu sa Mufarisa Mudzulatshidulo); na
g) Vho Nala Mhlongo (vho tholwa-hafhu).
3.8. Vho. Mahesh Fakir sa Muofisiri Mulanguli Muhulwane kha Ndangulo ya Vhuimazwikepe.
3.9. Miraḓo ya Vhulanguli ha nga nnḓa kha Bodo ya Vhalanguli ha Muṱanganelano wa Vhupileli ha Afurika Tshipembe (Armscor):
a) Admiral (ret) Refiloe Johannes Mudimu (Mudzulatshidulo);
b) Vho Thuthukile Skweyiya (Mufarisa Mudzulatshidulo);
c) Vho Dokotela Moses Khanyile;
d) Vho Bethuel Motshwariseng Fantas Mobu;
e) Vho Advokheithi Sesi Baloyi;
f) Vho Mpumi Zikalala;
g) Vho Ndumiso M Tyibilika;
h) Vho Raymond Mlungwana Vokwana; na
i) Vho Advokheithi Virginia Lee Anne De La Hunt.
Mbudziso: Phumla Williams (Muambeli wa Khabinethe o tou Farelaho)
Vhukwamani: 083 501 0139
