1. Ku humelerisiwa ka tiphurogiremenkulu ta mfumo
1.1. Khabinete yi amukela ku humelela ka Phurojeke Mikondzo, leyi ku nga pfhumba ra vukorhokerhi leri kongomisiweke ku fikelela vukorhokerhi bya vanhu emigangeni leyi sweleke etikweni. Pfhumba leri ri kombisiwile eDe Doorns eKapa Vupeladyambu, laha ku nga ku phakeriweni ka mpfuno eka 4 021 wa mindyangu leyi nhlayo yo tala ya vatundi ku nga vatirhi va le mapurasini vo tirha hi nguva. Mpfuno lowu wu katsa, exikarhi ka swin’wana, mphakelo wa mbewu na swimilana eka swirhapa swa le mindyangwini na mpfuno wa timali wo tumbuluxa minhlangano na tikhopharetivhi swa miganga. Ndzawulo ya Nhluvukiso wa Vanhu na yona yi tirhisa De Doorns ku tumbuluxa pholisi ya vatirhi va nguva.
Ku engetela, Ejensi ya Vusirheleri bya Vanhu ya Afrika-Dzonga yi andlarile phurogireme yo Hunguta Ntshikelelo wa Vanhu hi xikongomelo xo phamela swakudya na swilaveko swin’wana swo fana na tiyunifomo ta swikolo ya vana emindyangwini leyi sweleke. Mali yo ringana R1 083 160 ku suka eka Ejensi ya Nhluvuko wa Rixaka yi seketela 11 wa mintlawa ya Nhluvukiso wa Vana Lavantsongo (ECD) leyi nga ri ki etisenthareni, naswona leyi nga na 975 wa vana lava sweswi va nghenaka eka tisenthara ta ECD endzhawini leyi naswona 789 wa vona va vuyeriwaka hi tisabusidi ta mfumo ta tiECD.
1.2. Khabinete yi hoyozela ku humelela loku ya ka emahlweni ka Operation Fiela, loku ka ha ku humelelaka eKapa N’walungu laha ntirhisano wa Vukorhokerhi bya Maphorisa ya Afrika-Dzonga (SAPS), tindzawulo ta mfumo, na tiejensi ta vuhlayisi bya nawu wa swifundzha na timasipala ti ye ke emahlweni ku endla leswaku vanhu va tshama na ku titwa va hlayisekile. Komiti ya Vaholobye eka Timhaka ta Vahlapfa (IMC) yi ta khoma mbhurisano wa vuhangalasi bya mahungu hi xikongomelo xo nyika vuxokoxoko lebyi faneleke.
1.3. Khabinete yi hoyozela minhlangano ya vatirhi na minhlangano ya migodi ku tirha na mfumo ku pfuxeta xiyenge xa le migodini, tanihi longo ra ikhonomi ya hina naswona yi khutaza mintlawa hinkwayo ku teka vutihlamuleri.
Mfumo, kun’we na van’wamabindzu na vatirhi, va tikarhata ku antswisa tindlu na swiyimo swa vutshamo eswidorobanini swa le migodini. Hi ku angarhela, R18 biliyoni Wa tirhandi yi vekiwile etlhelo ku pfuneta miganga ya le migodini leyi sweleke, laha xiphemu xikulu xa nkwama lowu xi humaka eka mfumo, kasi tikhamphani ta le migodini ti hoxa xandla xa nharhu xa nkwama lowu.
1.4. Khabinete yi pasisile ku katsiwa ka Vaholobye va Ntlawa wa Vuhlayiseki eka Komiti ya Vaholobye eka Timhaka ta Vahlapfa (IMC) leyi tivisiweke hi Phuresidente Zuma.
IMC leyi, leyi rhangeriweke hi Xandla xa Phuresidente Cyril Ramaphosa, yi ta langutisa ni ku ololoxa mbuyelo lowu nga taka, naswona lowu wo ka wu nga languteriwanga wa milawu leyintshwa ya vahlapfa eka swiyenge swo hambanahambana, ku katsa na vupfhumba na vuvekisi. IMC leyi yi ta katsa Vaholobye va Vupfhumba; Xikaya; Mabindzu na Vumaki; Nhluvukiso wa Vanhu, Nhluvukiso wa Mabindzu Lamantsongo; na Ntlawa wa Vuhlayiseki.
2. Xiyimo xa Khabinete eka timhakankulu embangwini
2.1. Khabinete yi amukela mintlangelo ya Siku ra Vavasati leyi veke kona eSasolburg eFree State ehansi ka nhlokomhaka: “Vavasati va Hlangana ku Yisa Afrika-Dzonga Emahlweni”. Magidigidi ya vavasati va hlengeletanile eRivaleni ra Mintlangu ra Harry Gwala eSasolburg ku tsundzuka xandla xikulu xa tipolitiki lexi hoxiweke hi vavasati hi nkarhi wo lwela ntshuxeko eka mfumo wa vukoloni na xihlawuhlawu.
Khabinete yi kombela swiyenge hinkwaswo swa vanhu ku tiyisisa nhlokomhaka ya Nhweti ya Vavasati na ku ya emahlweni swi tirha ku tiyisisa leswaku vavasati hinkwavo, ngopfungopfu n’wana wa nhwanyana, va nyikiwa matimba ni ku tshuxiwa eka swikholwakholwana swa vutomi leswaku hi ta lulamisa ndzingano wa rimbewu etikweni.
Ku engetela, Phuresidente Zuma u tlhela a humesa xiviko xo sungula eka rixaka ra xona hi Xiyimo xa Vavasati eAfrika-Dzonga. Xiviko lexi xi lemuka magoza lamakulu lama endliweke etikweni ku suka 1994 ku antswisa xiyimo xa vavasati. Xiviko lexi xi endliwile hi Ndzawulo ya Vamanana endzhaku ka minjhekanjhekisano leyi veke kona etikweni hinkwaro exikarhi ka Nyenyankulu na Khotavuxika nan’waka (2015). Xiviko lexi xi langutiwa tanihi tsalwa ra nkoka eku tlakuseni ka matimba ya vavasati eka tlhelo ra vutomi bya vona bya siku rin’wana ni rin’wana na ikhonomi, ndzingano wa rimbewu na timfanelo ta ximunhu.
Mfumo wu ta tirhisa masiku lama nga sala enhwetini leyi ku tlakusa xiyimo xa vavasati lava humelelaka na xandla lexi va xi nghenisaka eka ikhonomi, ngopfungopfu etindzhawini leti vuyimeri bya vona byi nga tsana. Leswi swi katsa Masagwadi ya Vavasati eka Sayense (13 Mhawuri) na Masagwadi ya Vavasati eka Timhaka ta Mati na Mbhasiso (23 Mhawuri).
2.2. Khabinete yi hoyozela xipano xa Proteas ku va xi endlile leswaku Afrika-Dzonga ri tinyungubyisa eka Khapu ya Misava ya Ntlangu wa Netibolo eSydney, Australia. Xipano xa Afrika-Dzonga xi le kusuhi ni ku nghenela xiphemu xo hetelela xa Khapu ya Misava endzhaku ka loko xi tlangile mintlangu yo nonoha ni ku tika ku ta fika sweswi.
Hi ku ya hi Nhlangano wa Misava wa Ntlangu wa Netibolo, Afrika-Dzonga sweswi ri vekiwile eka xiyimo xa vuntlhanu emisaveni hinkwayo. Khabinete yi kombela vaaki va Afrika-Dzonga hinkwavo ku seketela xipano xa Proteas tanihiloko va ri karhi va ya emahlweni ni ku hlula eka ntlangu wa Khapu ya Misava.
2.3. Khabinete yi pfumelelana na Phuresidente Zuma ku hundzisa marito yo chavelela eka mindyangu, vanghana na vatirhikulobye va swirho swa SAPS leswi dlaweke. Vugevenga lebyo ka byi nga twisiseki byi fanele ku soriwa hi vaaki va Afrika-Dzonga hinkwavo.
Maphorisa ya xinuna na ya xisati ya endla xiphemu xa nkoka eku hlayiseni ka miganga ku suka eka swiyenge swa vugevenga evanhwini. Vugevenga lebyo ka byi nga twisiseki a byi phangheli tiko na vanhu ntsena hi vatirhi va vuhlayisi bya nawu, kambe byi tlhela byi tekela mindyangu vanuna, vasati, vamakwavo ni vatswari.
Khabinete yi kombela vanhu lava nga ni mahungundlela ya vugevenga lebyi byo ka byi nga twisiseki ku tshunela va tirha na tiejensi ta vuhlayisi bya nawu ku endla leswaku lava nga ni vutihlamuleri bya timhangu leti va khomiwa no langutana na matimba lamakulu ya nawu hi ku hetisaka.
2.4. Khabinete yi hoyozela Xipano Afrika-Dzonga eka matirhelo ya xona ya xiyimo xa le henhla eka Vunghwazi bya Misava bya FINA ya vu 16 (Nhlangano wa Vuhlamberi bya Misava) eKazan, Russia laha va nga humelela hi timendlele timbirhi ta nsuku na tinharhu ta silivhere.
3. Swibohonkulu swa Khabinete
3.1. Khabinete yi pasisile ku humesiwa leswaku yi ta voniwa hi mani na mani, ka Tsalwa ra Rihlaza ra Pholisi ya Swiporo ya Rixaka, leyi vulavulaka hi vutleketli bya nhundzu na vakhandziyi swa le swiporweni. Pholisi leyi, leyi tirhisanaka na ntirho wa Khomixini ya Ntirhisano wa Switirhisiwa swa Phuresidente, yi fikelerisa ku pfuxetiwa ka switirhisiwa swa le swiporweni hi ku landzelela pholisi ya vupulani bya vuvekisi leyi landzelelaka Kungu ra Nhluvukiso wa Rixaka (NDP).
Xikongomelo i ku tumbuluxa vutleketli lebyi hetisekeke lebyi kotaka ku phikizana kwala kaya ni le misaveni hinkwayo, naswona lebyi hungutaka minxavo ya swa vutleketli. Leswi swi ta khutaza matirhiselo ya thekinoloji leyi faneleke leswaku ku ndlandlamuxiwa vutumbuluxi bya switirhi na mphakelo wa vuswikoti lebyi lavekaka hi xitalo eka ikhonomi. Yi tlhela yi antswisa vufikeleri bya matikoxikaya, vufambi bya vanhu na vutumbuluxi bya mintirho.
3.2. Khabinete yi pasisile ku yisiwa evanhwini ku ya hleriwa hi mani na mani ka tsalwa ra “Kungu ra Nhluvukiso wa Vuswikoti bya Rixaka na Vulawuri bya Xiyenge xa Dyondzo na Vuleteri byo hundza 2016 eka matirhelo ya nhlengelo, vuhambanyisi bya dyondzo na vuleteri bya le henhla”.
Tsalwa leri ri vulavula hi matirhelo lama hetisekeke ni ku humelela ya minhlangano ya nhluvukiso wa vuswikoti ni makatselo ya yona eka ndlandlamuko wa matirhelo ya dyondzo na vuleteri bya le henhla.
Kahlekahle, tsalwa leri ri bumabumela leswaku Kungu ra Nhluvukiso wa Vuswikoti bya Rixaka ri fanele ku endla xirhangana xa mintirho leyi hlawuriweke ku rhangisiwa emahlweni etikweni tanihi leyi faneleke ku humelerisiwa eka tiphurogireme ta swirhangana swa rixaka. Ri tlhela ri vulavula hi vufambisi lebyi hetisekeke bya timhaka ta vulawuri bya xiyenge xa dyondzo na vuleteri eku humeseni ka vupfuni bya timali ta mintirho ya swirhangana.
3.3. Khabinete yi pasisile ku humesiwa ka layisese yo tirha hi yona ya nkarhi hinkwayo eka Xitichi xa Swikepe xa Transnet ku tirhisa xitichi xa manganisi eXitichini xa Ngqura, lexi kumekaka evuxeni bya buwa ra Afrika-Dzonga 20 wa tikhilomitara en’walungwini wa Port Elizabeth, exikarhi ka Durban na Kapa. Leswi swi landzelela swirhangana swa mfumo swa Operation Phakisa yo ndlandlamuxa Ikhonomi ya Malwandle. Leswi swi ta vuyerisa hi ku cinca ndzhawu ya ntirho wa manganisi ku suka ePort Elizabeth na Saldanha ku ya eXitichini xa Swikepe xa Ngqura.
3.4. Khabinete yi pasisile leswaku Afrika-Dzonga ri pfumela eka Ntwanano wa Misava wa Vutihlamuleri na Ndziho wa ku Onhaka ka Nhundzu loku Vangiwaka hi Vutleketli bya Switirhisiwa swa Khombo na Chefu eLwandle, 2010.
Ntwanano lowu wu tiyisisa ndziho endzhaku ka ku vaviseka ka vanhu na nhundzu, nxavo wa mbhasiso na tindlela to vuyelerisa ku lahlekeriwa evutshan’wini, na ku lahlekeriwa ka ikhonomi leswi vangiwaka hi vutleketli bya le matini bya switirhisiwa swa khombo na chefu, naswona leswi nga tisaka thyaka elwandle. Afrika-Dzonga ri ta swi kota ku fikelela timali to pfuneta timhangu ta switirhisiwao swa khombo na chefu endzhaku ka loko matirhelo ya palamende hinkwawo yo pasisa ntwanano lowu ya hetisiwile.
4. Milawumbisi
4.1. Khabinete yi pasisile ku yisiwa ka Nawumbisi Ndzhundzhuluko wa Tifilimi na Vuhangalasi, 2015 ePalamende. Nawumbisi lowu wu hundzuluxa Nawu wa Tifilimi na Vuhangalasi, 1996 (Nawu wa vu 65 wa 1996). Miantswiso leyi yi vulavula hi ku andza ka thekinoloji, ngopfungopfu ya le moyeni na vuhangalasi bya mbulavurisano wa vanhu hi xikongomelo xo hlayisa vana leswaku va nga fikeleriwi hi vundzeni bya swihangalasamahungu (swo voniwa hi mahlo na swa le ka inthanete) leswi onhaka miehleketo.
Nawumbisi wu tiyisa vutihlamuleri lebyi nyikiweke tinetiweke ta tiqingho na vaphakeri va vukorhokerhi bya inthanete ku hlayisa vanhu hinkwavo na vana enkarhini wa ku tirhisiwa ka vukorhokerhi lebyi. Nhlangano wa Vuhlanganisi wo Tiyimela hi Woxe wa Afrika-Dzonga a wu nge humesi tilayisense kumbe mimpfuxeto handle ko kuma pfumelelo wo huma eka Bodo ya Tifilimi na Vuhangalasi wa ku landzelela milawu ya yona hi ntalo.
5. Mintlangu leyi taka
5.1. Phuresidente Zuma u ta nghenela Samiti ya vu 35 ya Ntolovelo ya Tinhloko ta Matiko ya Nhlangano wa Nhluvukiso wa le Dzongeni wa Afrika (SADC) ku sukela hi ti 17 ku fikela ti 18 Mhawuri 2015 eGaborone, Botswana. Eka samiti leyi, Phuresidente u ta hundzisa vutshamaxitulu bya Xiphemu xa Tipolitiki, Vusirheleri na Ntirhisano wa Vuhlayiseki bya SADC. Eka xiyimo lexi, Afrika-Dzonga ri fambisile Vurhumiwa bya Vuhoxatihlo bya Nhlawulo, lebyi tiyisiseke leswaku minhlawulo hinkwayo yi vile kona hi ku rhula na ntiyiso.
5.2. Xandla xa Phuresidente Ramaphosa u ta teka rendzontirho ro ya eJapani ku sukela hi ti 24 ku fikela ti 25 Mhawuri 2015. Rendzo leri ri katsa ku pfuxela Holobyenkulu Shinzo Abe na ku nghenelela Seminara ya Mabindzu ya Nhlangano wa Vuxavisi bya le Handle wa Afrika-Dzonga-Japani.
Khabinete yi amukela rendzontirho ra le Japani, leri nga ta tiyisisa xinakulobye na ntirhisanovun’we lowu nga kona exikarhi ka matiko lamambirhi. Afrika-Dzonga na Japani ya tlhela ya avelana miehleketo yo fana hi nkoka wa ntirhisano wa matikonyingi na mfanelo yo hundzuluxa Huvo ya Vuhlayiseki ya Nhlangano wa Misava (UN) na matirhelo ya UN eka Nhlengeletano yo Angarhela ya vu 70 ya UN Nhweti leyi taka.
5.3. Phuresidente Zuma u ta endla Imbizo ya Vuphuresidente eEersterust, Pretoria hi ti 21 Mhawuri 2015 ku ya vulavula hi timhaka leti yelanaka na matirhiselo yo biha ya swidzidziharisi. Pulani ya le Henhla ya Swidzidziharisi ya Rixaka yi hlanganisa magoza ya mfumo ku lwa ni swipyopyi na ku tirhisa swidzidziharisi hi ndlela yo biha.
Khabinete yi kombela miganga ku tirha na mfumo na tiejensi ta vuhlayisi bya nawu ku herisa matirhiselo yo biha ya swidzidziharisi, leswi ku nga swivangelo swa swiphiqo swo tala evuton’wini bya vanhu, ku katsa na madzolonga eka vavasati na matirhiselo yo biha ya swidzidziharisi eka vana. Vatswari na vahlayisi va vana va hoxa xandla xikulu ku tiyisisa leswaku vana va hlayisiwa na ku languteriwa.
5.4. Khabinete yi amukela ku pfuriwa ka Xikolo xa le Hansi xa Makhatho Lewanika Mandela lexi ha ku akiwaka hi vuntshwa eMvezo eKapa Vuhumadyambu hi ti 25 Mhawuri 2015 hi Phuresidente Zuma.
Xikolo lexi i xiphemu xa mfumo lexi yaka emahlweni xo vuyisela nhlonipho eka vadyondzi ni ku nyika swikolo swa le ematikoxikaya switirhisiwa swa manguvalawa. Hi ku tirhisa Pfhumba ro Hatlisisa Vuphakeri bya Switirhisiwa Eswikolweni (ASIDI) ra Ndzawulo ya Dyondzo ya le Hansi, mfumo wu herisile swikolo swo hlaya swa miako ya xiyimo xa le hansi kutani ku tumbuluxiwa ndzhawu leyinene yo dyondza eka yona. Ku ta fika laha, ASIDI yi hetile ku aka 116 wa swikolo ni ku phakela mati eka 499 wa swikolo, mbhasiso eka 425 na gezi eka 298.
5.5. Xandla xa Phuresidente Ramaphosa u ta nghenela Nhlengeletano ya Mahungu na Tilayiburari ya Misava, ya Minhlangano ya Federexeni ya Tilayiburari ta Misava leyi nga ta va kona eSenthareni ya Tinhlengeletano ya Kapa ku sukela hi ti 15 ku fikela ti 21 Mhawuri 2015 ehansi ka nhlokomhaka: “Tilayiburari leti Pfulekeke: Vufikeleri, Nhluvukiso na ku Hundzuka”.
Nhlengeletano leyi yi hlangana ni ku andlariwa ka 1 000 wa tilayiburari ta swikolo etikweni hinkwaro exikarhi ka 18 Mawuwani 1015 na 18 Mawuwani 2015 ku khutaza vana vo tala ku hlaya. Ndzawulo ya Dyondzo ya le Hansi yi tlhela yi kondletela minhlangano ya mabindzu hi ku hambanahambana ka yona na minhlangano leyi nga ri ki ya mfumo ku seketela Pfhumba leri hi ku nyikela tibuku ni ku simeka tilayiburari na swin’wana na swin’wana.
Khabinete yi kombela vatswari na vadyondzisi ku tirha hi matimba ku endla leswaku tibuku ti fikelela vanhu lavantsongo, na ku kombela miganga ku nyikela tibuku ni ku tumbuluxa mintlawa yo hlaya tibuku, hikuva rixaka leri hlayaka i rixaka leri humelelaka.
5.6. Holobye wa Vupfhumba Derek Hanekom u ta simeka Nhweti ya Vupfhumba hi ti 16 Mhawuri 2015 eEuphoria Golf Estate, Mookgophong eLimpopo ehansi ka nhlokomhaka: “Miliyoni ya minkarhi yintshwa yi mi Yimerile”, leyi humaka eka nhlokomhaka ya Siku ra Vupfhumba ra Misava (27 Ndzhati): “1 Biliyoni ya Vapfhumba – 1 Biliyoni wa Minkarhi”.
Tinhlokomhaka ta misava na ta laha kaya ti kongomisiwile ku lemukisa vapfhumba hi nkoka wa vupfhumba bya vutihlamuleri. Tanihi xiphemu xa vupfhumba va khutaziwa ku hlonipha mindzhavuko, ku hlayisa ndzhaka, ku hlayisa eneji na mati, kasi mhaka ya nkoka i ku xava swimakiwa swa xifundzha hi xikongomelo xo seketela mintirho ya laha kaya.
Khabinete yi khutaza vaaki va Afrika-Dzonga ku valanga tiko ra hina ro tsakisa ni ku saseka, hikuva hi ku endla tano va pfuna ku hlayisa mintirho na ku seketela swimakiwa swa laha kaya.
5.7. Tindzawulo ta Mintlangu na Vuhungasi na vamanana ti endlile xinakulobye na G-Sport hi xikongomelo xo hlonipha vavasati va Afrika-Dzonga lava nghenelaka mintlangu.
Ndzawulo ya Mintlangu na Vuhungasi na G-Sport swi ta nyika nhlonipho eka van’wamatsambu va vavasati lava faneleke, na vafambisi lava lweke hi matimba na swivumbeko hinkwaswo swa ntshikelelo ku tlakusa mujeko wa tiko leri.
Ndzawulo ya swi tiva leswaku ka ha ri ni ntirho wo tala lowa ha faneleke ku endliwa ku yisa nongonoko wo tisa ndzinganelo wa vavasati hinkwavo lava khumbhekaka eka timhaka ta mintlangu, eka vufambisi na le ku tlangeni ka ntlangu. Loko ndzawulo yi ri karhi yi lemuka leswaku ka ha ri ni ntirho wo tala lowu faneleke ku endliwa eka mhaka leyi, yi tiyimiserile ku hlanganisa tinhloko na vanhu lava tinyiketeke ku tisa ku lulamisa ku khirhiwa ka vavasati.
5.8. Khabinete yi khutaza vaaki va Afrika-Dzonga hinkwavo ku hlawula vanyikiwa va Masagwadi ya Nhlonipho ya Rixaka ya 2016, lama ku nga masagwadi ya xiyimo xa le henhla lama Afrika-Dzonga ri nyikaka vaakatiko va rona na vahlonipheki va vahlapfa lava hoxeke xandla eku ndlandlamuxeni ka xidimokirasi naswona lava endleke nkucetelo wukulu eku antswisiweni ka vutomi bya maAfrika-Dzonga.
Minhlonipho ya Rixaka leya ntsevu yi katsa Nhlonipho wa Mendi wa ku va ni Xivindzi, Nhlonipho wa Ikhamanga, Nhlonipho wa Baobab, Nhlonipho wa Luthuli, Nhlonipho wa Mapungubwe, na Nhlonipho wa Vanakulobye va OR Tambo.
Siku ro hetelela ra minhlawulo i ti 31 Mhawuri 2015. Tifomo to hlawula hi tona ti nga kumeka eka www.presidency.gov.za naswona ti fanele ku yisiwa na swibumabumelo swa pheji rin’we swa munhu loyi a hlawuriweke.
6. Ku thoriwa
Vuthori hinkwabyo byi ta landzelela ku kamberiwa ka ntiyiso wa tidyondzo ta vathoriwa na mbhasiso lowu nga fanela
6.1. Swirho swa le handle swa Bodo ya Poso ya Afrika-Dzonga
a. Dokodela Simosezwe Dugmore Lushaba – (Mutshamaxitulu);
b. Manana Bulelwa Patricia Soc– (Xandla xa Mutshamaxitulu);
c. Tatana Robert Nkuna;
d. Tatana Mduduzi Eric Zakwe;
e. Tatana Zibuse Comfort Ngidi;
f. Manana Nomahlubi Victoria Simamane;
g. Dokodela Lynette Moretlo Molefi;
h. Manana Marion Lesego Dawn Marole;
i. Tatana Joel Sihle Ngubane; na
j. Tatana Phetole Elvis Rabohale.
6.2. Valawuri va le handle eka Swihlala swa Afrika-Dzonga SOC Ltd
a. Tatana Lungile Rudolph Mabece – (Mutshamaxitulu);
b. Tatana Stanley Mandla Mnguni;
c. Tatana Gabriel Christiaan Theron;
d. Dokodela Petros Mbiji Mahlangu;
e. Tatana Maroale Jacob Rachidi;
f. Manana Sakekile Baduza;
g. Manana Caroline Phumzile Mavasana Ngwenya;
h. Manana Nazia Carrim; na
i. Dokodela Pulane Elsie Molokwane.
6.3. Valawuri va le handle eka Bodo ya Alexkor:
a. Manana Hantsi Bhetilda Mayeza – (Mutshamaxitulu);
b. Manana Mamoroke Lehobye;
c. Tatana Vimal Bansi;
d. Tatana Tshediso John Matona;
e. Tatana Trevern Marais Haasbroek;
f. Tatana John Sembie Danana;
g. Dokodela Roger Paul (reappointment); and
h. Manana Zukiswa Zandile Ntlangula (u thoriwa ra vumbirhi).6.4. Tatana Mathanzima Hubert Mweli – Mulawuri-Angarhelo (DG) eka Ndzawulo ya Dyondzo ya le Hansi.
6.5. Tatana Petrus Mduduzi Shabane – Ku ngeteleriwa ka ntwanano wa vuthori bya DG eka Ndzawulo ya Nhluvukiso wa Matikoxikaya na Antswiso wa Misava.
6.6. Dokodela Nontsikelelo Tshayingca-Mashiya – Xandla xa DG wa Matirhelo ya Ndzawulo, Nkambisiso no Hlela eka Ndzawulo ya Nkunguhato, Nkambisiso no Hlela.
6.7. Tatana Nkhumeleni Victor Tharage – DG eka Ndzawulo ya Vupfhumba.
Swivutiso: Man.
Phumla Williams (Muvulavuleri wa Khabinete wo Khomela)
Nomboro ya riqingho: 083 501 0139
