1. Phethagatšo ya Mananeo a Bohlokwa a Mmušo
1.1. Kabinete e amogela kgatelopele ya Project Mikondzo, e lego lesolo la kabo ya ditirelo leo le ikemišeditšego go katološa phihlelelo ya ditirelo tša setšhaba ka ditšhabeng tše di hlokago kudu ka mo nageng. Se se laeditšwe ka De Doorns ka Kapa Bodikela, fao thušo e fiwa malapa a 4 021 ao bahlokomedi ba ona e lego bašomi ba dipolaseng ba lebakanyana ka dihla tše itšego. Thušo ye e akaretša, gareng ga tše dingwe, kabo ya dipeu le dimpšanyana tša mehlašana tše di tlago bjalwa ka dirapaneng tša ka gae le thušo ya mašeleng ya go hloma mekgatlo ya setšhabeng le dikhamphani tša mohlakanelwa. Kgoro ya Tlhabollo ya Leago e šomiša gape De Doorns go hlama molawana wa mabapi le bašomi bao ba šomago lebakanyana ka dihla tše itšego.
Godimo ga fao, Setheo sa Tšhireletšego ya Setšhaba sa Afrika Borwa se tsentše tirišong lenaneo la Kimollo ya Tlala Setšhabeng go aba dijo le ditlabelo tše dingwe tša maleba tša go swana le diyunifomo tša sekolo tša bana bao ba tšwago malapeng ao a hlokago kudu. Thušo ya mašeleng ya R1 083 160 go tšwa go Setheo sa Tlhabollo sa Bosetšhaba e thekga dihlopha tše di kgathago tema tše 11 tšeo di sa šomelego mafelong a itšego tša Kgodišo ya Bana ba Mengwaga ya Fasana (ECD), fao bana ba 975 mo lebakeng le ba tsenelago dithut tša mafelong ao a ECD mo lefelong le gomme ba 789 ba bona ba holega go thušo ya mašeleng a mmušo ya ECD.
1.2. Kabinete e reta katlego ye e tšwelago pele ya Operation Fiela, ya moragorago ya yona e lego ka Kapa Leboa fao lesolo leo le bego le kopanetšwego la go bopša ke Tirelo ya Maphodisa ya Afrika Borwa (SAPS), dikgoro tša mmušo, le ditheo tša phethagatšo ya molao tša ka profenseng le tša mebasepala di ilego tša dira ka fao di ka kgonago ka gona go netefatša gore batho ba bolokegile ebile ba ikwa ba bolokegile. Komiti ye e bopilwego ke Ditona tša Dikgoro (IMC) ya mabapi le Bofaladi e tla swara kopano le bagaši ba ditaba bekeng ye e tlago go fana ka tshedimošo ya moragorago ka botlalo.
1.3. Kabinete e reta mekgatlo ya bašomi le beng ba meepo ge ba šomile le mmušo go tsošološa lefapha la meepo, e lego motheo wa ekonomi ya rena ebile e ipiletša go mekgatlo ka moka go phethagatša ditshephišo.
Mmušo, gammogo le kgwebo le bašomi, di šomile ka thata go kaonafatša dintlo le maemo a go phela a makaone ka mafelong ao go nago le meepo go ona. Ka kakaretšo R18 pilione e beetšwe thoko go šomišwa ka mošomong wo o tšwelago pele ka metseng yeo go nago le meepo fao badudi ba gona ba hlokago kudu, yeo bontši bja yona e tšwago mmušong gomme dikhamphani tša meepo di tsenya letsogo tekano ye e ka bago tee-tharong ya thušo yeo ya mašeleng.
1.4. Kabinete e dumeletše go akaretšwa ga Seboka sa Ditona tša Dikgoro tša Tšhireletšo ka Komiting ye e bopilwego ke Ditona tša Dikgoro (IMC) ya mabapi le Bofaladi yeo e tsebagaditšwego ke Mopresidente Zuma.
IMC, yeo e etilwego pele ke Motlatšamopresidente Cyril Ramaphosa, e tla hlahloba le go rarolla ditlamorago tše di ka kgonagalago le tšeo di sego tša emelwa tša melawana ye meswa ya tša bofaladi ka mafapheng a mehutahuta, go akaretšwa boeti le peeletšo. IMC e tla bopša ke Tona ya Kgoro ya Boeti; ya Merero ya Selegae; ya Kgwebišano le Diintasteri; ya Tlhabollo ya Leago; ya Tlhabollo ya Dikgwebopotlana, le tša Seboka sa Ditona tša Dikgoro tša Tšhireletšo.
2. Maemo a Kabinete ka ga ditaba tša bjale tše bohlokwa
2.1. Kabinete e amogetše meketeko ya Letšatši la Basadi yeo e swerwego ka Sasolburg ka Foreisetata ka fase ga Morero wa: “Basadi ka Kopane go Iša Afrika Borwa Pele”. Diketekete tša basadi di ile tša kgobokana ka Lepatlelong la Harry Gwala ka Sasolburg go lemoga tema ye bohlokwa yeo basadi go e ralokilego ka go lwa ga sepolotiki ka nakong ya go lwela tokologo kgahlanong le bokoloniale le kgethologanyo.
Kabinete e ipiletša go mafapha ka moka a setšhaba go tšwetša pele go ya go ile morero wa Kgwedi ya Basadi le go šoma go netefatša gore basadi ka moka, kudukudu ngwana wa mosetsana, ba a maatlafatšwa le go lokollwa go dikgatelelo tša setšhabeng gore re kgone go rarolla taba ya tekatekano ya bong ka nageng.
Godimo ga fao, Mopresidente Zuma o lokollotše gape pego ya mathomo ya go swana e nnoši ka ga Maemo a Basadi ka Afrika Borwa. Pego ye e lemoga diphihlelelo tše kgolo tše di dirilwego ka nageng go tloga ka 1994 go kaonafatša maemo a basadi. Pego ye e ngwadilwe ke Kgoro ya Basadi ka morago ga go swara dingangišano go ralala le naga magareng ga Hlakola le Phupu mo ngwageng wo (wa 2015). Pego ye e šoma bjalo ka sengwalwa sa motheo sa go tšwetša pele maatlafatšo ya basadi ka setšhabeng le ka ekonoming, tekatekano ya bong le ditokelo tša botho.
Mmušo o tla šomiša matšatši ao a šetšego a kgwedi ye go bolela ka ga basadi bao ba atlegilego le go kgatha tema ga bona ka ekonoming, kudukudu ka mafapheng ao basadi ba sego ba bantši. Ona a akaretša Difoka tše di abelwago Basadi bao ba lego ka Lefapheng la tša Mahlale (ka la 13 Phato) le Difoka tše di abelwago Basadi bao ba lego ka Lefapheng la Meetse le Kelelatšhila (ka la 23 Phato).
2.2. Kabinete e reta sehlopha sa Di-Proteas ge se dirile gore Afrika Borwa e ikgantšhe ka phadišanong ya Sebjana sa Lefase sa Kgwele ya Diatla ka Sydney, ka Australia. Sehlopha sa Afrika Borwa se kgauswi le go fihlelela sekamakgaolakgang a Sebjana sa Lefase ka morago ga go raloka dipapadi tše boima le tše thata go fihla mo lebakeng le.
Go ya ka Mokgatlo wa Boditšhabatšhaba wa Kgwele ya Diatla, Afrika Borwa bjale e beilwe maemong a bohlano lefaseng. Kabinete e ipiletša go MaAfrika Borwa ka moka go thekga Di-Proteas ge di tšwela pele go fenya ka phadišanong ya Sebjana sa Lefase.
2.3. Kabinete e bile le Mopresidente Zuma ge a fetišetša mahloko go ba lapa, go bagwera le go bašomimmogo ba maloko ao a bolailwego a SAPS. Dipolao tšeo tša go hloka kwelobohloko di swanetše go kgalengwa ke MaAfrika Borwa ka moka.
Banna ba maphodisa le basadi ba maphodisa ba bohlokwa go šireletšeng ga ditšhaba go disenyi ka setšhabeng sa rena. Dipolao tše tša go hloka kwelobohloko ga di tšeele fela naga le setšhaba bahlankedi ba phethagatšo ya molao, eupša di hlokiša malapa banna ba basadi, basadi ba banna, barwarre, dikgaetšedi le batswadi.
Kabinete e ipiletša go bao ba nago le tshedimošo ka ga dipolao tše di hlokago kwelobohloko go itšweletša le go šoma le ditheo tša phethagatšo ya molao go netefatša gore bao ba rwelego maikarabelo ba a golegwa le go lebana le maatla a molao ka botlalo.
2.4. Kabinete e lebogiša Team South Africa ka ga papdi ya bona ye e kgahlišago kudu ka go Diphadišano tša Lefase tša bo 16 tša FINA (Mokgatlo wa Boditšhabatšhaba wa Dipapadi tša go Rutha) ka Kazan, Russia fao ba thopilego dimetale tše pedi tša gauta le dimetale tše tharo tša silibera.
3. Diphetho tše bohlokwa tša Kabinete
3.1. Kabinete e dumeletše go lokollwa ga Pampiri ye Talamorogo ka ga Melawana ya Ditimela gore e tle e rerišanwe le setšhaba, yeo e bolelago ka ga go sepetšwa ga diphahlo le banamedi ka ditimela. Melawana ye, yeo e amantšhitšwego le mošomo wa Khomišene ya Kgokaganyo ya Manananeokgoparara a Mopresidente, e kgontšha go tsošološwa leswa ga intasteri ya ditsela tša ditimela ka ditsenogare tša melawana tšeo di etilwego pele ke peeletšo ya togamaano tšeo di amantšhitšwego le Leanotlhabollo la Bosetšhaba (NDP).
Maikemišetšo a se ke go hlama tshepedišo ya dinamelwa ye e šomago gabotse ye e kgonago go phadišana ka nageng le maemong a boditšhabatšhaba, le go fokotša ditshenyegelo tša dinamelwa. Se se tla hlohleletša tšhomišo ya ditheknolotši tša maleba go oketša tšweletšo le khwetšo ya mabokgoni ao a nyakegago kudu ka ekonoming. Se se kaonafatša gape phihlelelo ya dinagamagaeng, go sepela fao go oketšegilego le tlhomo ya mešomo.
3.2. Kabinete e dumeletše go phatlalatšwa ga sengwalwa sa “Leanotlhabollo la Bosetšhaba la Mabokgoni le Bolaodi bja Thuto le Tlhahlo tša ka Mafapheng go feta ngwaga wa 2016 ka kwešišong ya tshepedišo ya thuto le tlhahlo tša ka morago ga dithuto tša sekolong tše di kopantšwego, tša go farologanywa” gore se tle se rerišanwe le setšhaba.
Sengwalwa se se bolela ka ga bokgoni le go šoma ntle mathata ga dihlongwa tša tlhabollo ya mabokgoni le kopantšho ya tšona ka go tshepedišo ya thuto le tlhahlo ka kakaretšo tša ka morago ga dithuto tša sekolong.
Kudukudu, se šišinya gore Leanotlhabollo la Mabokgoni la Bosetšhaba le le latelago le beye pele mešomo yeo e bonwego bjalo ka yeo e nyakegago kudu go phethagatša mananeo ao a tlago pele a bosetšhaba. Se bolela gape ka ga bokgonmi le go šoma ka ntle le mathata ga merero ya pušo go bolaodi bja thuto le tlhahlo tša ka mafapheng ge go abja dithušo tša mašeleng ao a tlago šomišwa ka go mešomo ye e beilwego pele.
3.3. Kabinete e dumeletše go abja ga laesentshe ya sa ruri ya go šoma go Lefelo la Boemakepe la Transnet gore le sepediše lefelo la dikhontheina tšeo di nago le mankanese ka Boemakepeng bja Port of Ngqura, bjo lego ka lebopong la Bohlabela bja Afrika Borwa, e lego dikhilometara tše 20 ka leboa Bohlabela bja Port Elizabeth e lego gare ga Durban le Cape Town. Se se latela dilo tšeo mmušo o di beilego pele tša mabapi le Operation Phakisa ka ga go godiša Ekonomi ya Lewatleng. Se se tla feletša ka go huduša mešomo ya mankanese go tloga ka maemakepeng a Port Elizabeth le Saldanha go ya ka boemakepeng bja Port of Ngqura.
3.4. Kabinete e dumeletše gore Afrika Borwa e obamele Kwano ya Boditšhabatšhaba ka ga Boikarabelo le Tefelo go Tshenyo ya Mabapi le go Rwala Dilo tša Mpholo le tše Kotsi ka Lewatle ka 2010.
Kwano ye e netefatša gore go ba le tefelo go tshenyo ye e amanago le batho le go thoto, go tshenyegelo ya go magato a go hlwekiša le go bušetša seemo sekeng, ya tahlegelo go ekonomi ye e bakilwego ke go sepetša dilo tša mpholo le tše kotsi ka lewatle tšeo di ka šilafatšago lewatle. Afrika Borwa e tla kgona go fihlelela sekhwama se go thuša ka ditiragalong tša dilo tša mpholo le tše kotsi ka morago ga ge ditshepedišo ka moka tša palamente tša go dira gore kwano ye e phethagatšwe ka nageng di šetše di phethilwe.
4. Melaokakanywa
4.1. Kabinete e dumeletše go romelwa ga Molaokakanywaphetošwa wa Difilimi le Diphatlalatšo wa 2015 ka Palamenteng. Molaokakanywa wo o fetoša Molao wa Difilimi le Diphatlalatšo wa 1996 (Molao wa 65 wa 1996). Diphetošo tše di hlagiša dikgatelopele tša theknolotši, kudukudu tša inthaneteng le tša difala tša kgašo ya setšhaba, ka nepo ya go šireletša bana gore ba se ke ba bona digatišwa tše di tshwenyago le tše kotsi go bona ka mafapheng ka moka a kgašo (tša sebele le tša inthaneteng).
Molaokakanywa wo o maatlafatša maikarabelo ao a filwego dinetweke tša kgašo le go baabi ba ditirelo tša netweke go šireletša setšhaba le bana ka nakong ya ge ba šomiša ditirelo tša bona. Tirelotaolo ye e Ikemego ya Dikgokagano ya Afrika Borwa e ka se abe dilaesentshe goba ya di mpshafatša ka ntle le tiišetšo go tšwa go Lekgotla la Difilimi le Diphatlalatšo ye e bolelago gore go obamelwa melao ya yona ka botlalo.
5. Ditiragalo tše di tlago
5.1. Mopresidente Zuma o tla tsenela Samiti ya Mehleng ya bo 35 ya Dihlogo tša Dinaga tša Dinagatlhabologo tša Borwa bja Afrika (SADC) go tloga ka la 17 go fihla ka la 18 Phato 2015 ka Gaborone, Botswana. Ka samiting ye, Mopresidente o tla neelana ka maemo a bodulasetulo bja Setheo sa Tirišano ka ga Dipolotiki, Tšhireletšo le Polokego sa SADC. Ka mošomong wa yona, Afrika Borwa e ile ya eta pele Masolo a tshela a go Lekodišiša Dikgetho ka dinageng tša SADC, e lego seo se tiišeditšego gore dikgetho ka moka di be di lokologile e bile di na le seriti.
5.2. Motlatšamopresidente Ramaphosa o tla tšea Leeto la Ketelo ya Mošomo go leba Japan go tloga ka la 24 go fihla ka la 25 Phato 2015. Ketelo ye e tla akaretša ketelo go Tonakgolo Shinzo Abe le go kgatha tema ka go Seminara ya Dikgwebo ya Mokgatlo wa Kgwebišano ya ka Ntle magareng ga Afrika Borwa le Japan.
Kabinete e amogela ketelo ya mošomo ya go leba Japan, yeo e tlago maatlafatša segwera le kwešišanommogo ye e lego gona magareng ga dinaga tše tše pedi. Afrika Borwa le Japan le tšona di abelana maikutlo ao a swanago ka ga bohlokwa bja kamano ya dinaga ka bontši le tlhokego ya go beakanyaleswa Lekgotlatšhireletšo la Mokgatlo wa Dinagakopano (UN) le tshepedišo ya UN ka go Kopanokgothekgothe ya bo 70 ya UN kgweding ye e tlago.
5.3. Mopresidente Zuma o tla tšea leeto la Pitšo ya Mopresidente ka Eersterust, Pretoria ka la 21 Phato 2015 go rarolla mathata ao a amanago le tšhomišobošaedi ya diokobatši. Leano la Bosetšhaba la Taolo ya Diokobatši, la 2013-2017, le kgokaganya maitekelo a mmušo ka twantšhong ya tšhomišobošaedi ya bjala le diokobatši.
Kabinete e ipiletša go ditšhaba go šoma le mmušo le ditheo tša phethagatšo ya molao go fediša tšhomišobošaedi ya diokobatši ka setšhabeng sa rena, e lego selo seo se bakago mathata a mmalwa a setšhabeng, go akaretšwa dikgaruru kgahlanong le basadi le tshotlo ya bana. Batswadi le bahlokomedi ba ban aba na le tema ye bohlokwa ye ba swanetšego go e kgatha go netefatša gore bana ba a šireletšwa le go godišwa.
5.4. Kabinete e amogela go bulwa ga Sekolo sa Phoraemari sa Makgatho Lewanika Mandela seo se sa tšwago go mpshafatšwa leswa ka Mvezo ka Kapa Bohlabela ka la 25 Phato 2015 ke Mopresidente Zuma.
Sekolo se ke karolo ya mošomo wa mmušo wo o tšwelago pele go bušetša seriti go baithuti le go abela dikolo tša ka dinagamagaeng didirišwa tša sebjalebjale kudu. Ka Lesolo leo le Akgofišwago la Kabo ya Mananeokgoparara a Dikolo la Kgoro ya Thuto ya Motheo (ASIDI), mmušo o fedišitše dikolo tše mmalwa tšeo di agilwego ka bošaedi gomme wa hloma tikologo ye kaone kudu fao baithuti ba ithutelago gona. Go fihla mo lebakeng le, ASIDI e feditše go aga dikolo tše 116 gomme ya aba meetse go dikolo tše 499, kelelatšhila go tše 425 le mohlagase go tše 298.
5.5. Motlatšamopresidente Ramaphosa o tla tsenela Khonkrese ya Lefase ya Bokgobapuku le Tshedimošo ya Mokgatlo wa Boditšhabatšhaba wa Mekgatlo ya Bokgobapuku ye e tlago swarwa ka Cape Town International Convention Centre go tloga ka la 15 go fihla ka la 21 Phato 2015 ka fase ga morero wa: “Makgobapuku ao a Tšwelago pele: Phihlelelo, Tlhabollo le Phetogo”.
Khonkrese ye e sepedišana le makgobapuku a dikolo a 1 000 ao mmušo o tlago fana ka ona nageng ka bophara magareng ga la 18 Mosegamanye 2015 le la 18 Mosegamanye 2016 go hlohleletša baithuti ba bantši go bala. Kgoro ya Thuto ya Motheo gape e kgopela mekgatlo ya dikgwebo tša phraebete ya mehutahuta le mekgatlo ye e sego ya mmušo go thekga lesolo le ka go fana ka dipuku le go hloma makgobapuku gareng ga tše dingwe.
Kabinete e ipiletša go batswadi le go barutiši go dira ka fao ba kgonago ka gona go dira gore dipuku tše hwetšagale go bafsa, ebile e ipiletša go ditšhaba go fana ka dipuku le go hloma dihlopha tša go bala ka gobane setšhaba seo se balago ke setšhaba seo se fenyago.
5.6. Tona ya Kgoro ya tša Boeti Derek Hanekom o tla tsebagatša semmušo Kgwedi ya Boeti ka la 16 Phato 2015 ka Euphoria Golf Estate, Mookgophong ka Limpopo ka fase ga morero wa: “Dibaka tše mpsha tše Milione di Letile”, wo o tšwago go morero wa Letšatši la Boeti la Lefase (ka la 27 Lewedi) wo o rego: “Baeti ba Pilione e Tee – Dibaka tše Pilione e Tee”.
Morero wo wa boditšhabatšhaba le wa ka nageng e ikemišeditše go dira gore baeti ba lemoge bohlokwa bja boeti bjo bo nago le maikarabelo. Bjalo ka karolo ya se, baeti ba hlohleletšwa go hlompha ditšo, go šireletša bohwa, go boloka mohlagase le meetse, gomme se bohlokwa kudu, go reka ditšweletšwa tša ka seleteng go thekga mešomo ya ka nageng.
Kabinete e hlohleletša MaAfrika Borwa go utolla naga ye e kgahlišago le ye botse, gomme ka go dira seo ba tla thuša go boloka mešomo le go thekga ditšweletšwa tša ka nageng.
5.7. Kgoro ya Dipapadi le Boitapološo le Kgoro ya Basadi di dirišana mmogo le G-Sport go hlompha basadi ba Afrika Borwa bao ba kgathago tema ka dipapading.
Kgoro ya Dipapadi le Boitapološo le G-Sport di tla fana ka difoka tša tlhompho go basadi bao ba ralokago diatleletiki bao ba nago le maswanedi a go di hwetša le go balaodi bao ba šomilego ka maatla kgahlanong le mekgwa ka moka ya kgatelelo go tšwetša pele naga ye.
Kgoro ye e dula e lemoga mošomo wo o hlokegago go tšwetša pele lenaneo la tekatekano ya basadi ka moka bao ba kgathago tema ka dipapading, ka taolong le ka go kgatheng tema ga bona. Le ge kgoro e lemoga gore go sa na le tše ntši tšeo di swanetšego go dirwa mabapi le se, e ikgafile go dirišana mmogo le bao ba ikemišeditšego go dira phapano ka maemong a basadi.
5.8. Kabinete e hlohleletša MaAfrika Borwa ka moka go šišinya maina a baamogedi ba Difoka tša Tlhompho tša Bosetšhaba tša 2016, e lego difoka tša godimodimo tšeo Afrika Borwa e di abelago badudi ba yona le badudi ba dinaga tša ka ntle bao ba dirilego mošomo o mokaone wa go tšwetša pele temokrasi bao ba bilego le seabe se bohlokwa kudu go kaonafatša maphelo a MaAfrika Borwa.
Difoka tša Tlhompho tše tshela ke Sefoka sa Tlhompho sa Mendi sa Bogale, Sefoka sa Tlhompho sa Ikhamanga, Sefoka sa Tlhompho sa Baobab, Sefoka sa Tlhompho sa Luthuli, Sefoka sa Tlhompho sa Mapungubwe, le Sefoka sa Tlhompho sa Balwelatokologommogo ba OR Tambo.
Letšatšikgwedi la go tswalelela ditšhišinyo tša maina ke la 31 Phato 2015. Diforomo tše di swanetšego go šomišwa go šišinya maina di ka taoneloutwa go www.presidency.gov.za gomme di swanetše go sepela mmogo le letlakala le tee leo le fago mabaka a gore motho yo a šišinywago a fiwe sefoka seo.
6. Bao ba thwetšwego mošomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
6.1. Maloko ao a sego a khuduthamaga a Lekgotla la Tirelo ya Diposo ya Afrika Borwa.
a. Ngaka Simosezwe Dugmore Lushaba – (Modulasetulo);
b. Mohumagadi Bulelwa Patricia Soci – (Motlatšamodulasetulo);
c. Morena Robert Nkuna;
d. Morena Mduduzi Eric Zakwe;
e. Morena Zibuse Comfort Ngidi;
f. Mohumagadi Nomahlubi Victoria Simamane;
g. Ngaka Lynette Moretlo Molefi;
h. Mohumagadi Marion Lesego Dawn Marole;
i. Morena Joel Sihle Ngubane; le
j.Morena Phetole Elvis Rabohale.
6.2. Balaodi bao ba sego ba khuduthamaga ba South African Forestry SOC Ltd
a. Morena Lungile Rudolph Mabece – (Modulasetulo);
b. Morena Stanley Mandla Mnguni;
c. Morena Gabriel Christiaan Theron;
d. Ngaka Petros Mbiji Mahlangu;
e. Morena Maroale Jacob Rachidi;
f. Morena Sakekile Baduza;
g. Mohumagadi Caroline Phumzile Mavasana Ngwenya;
h. Mohumagadi Nazia Carrim; le
i. Ngaka Pulane Elsie Molokwane.
6.3. Balaodi bao ba sego ba khudumathaga ba Lekgotla la Alexkor:
a. Mohumagadi Hantsi Bhetilda Mayeza – (Modulasetulo);
b. Mohumagadi Mamoroke Lehobye;
c. Morena Vimal Bansi;
d. Morena Tshediso John Matona;
e. Morena Trevern Marais Haasbroek;
f. Morena John Sembie Danana;
g. Ngaka Roger Paul (o thwetšwe gape); and
h. Mohumagadi Zukiswa Zandile Ntlangula (o thwetšwe gape).
6.4. Morena Mathanzima Hubert Mweli – Molaodipharephare (DG) ka Kgorong ya Thuto ya Motheo.
6.5. Morena Petrus Mduduzi Shabane – katološo ya konteraka ya mošomo ya Molaodipharephare ka Kgorong ya Tlhabollo ya Dinagamagae le Peakanyoleswa ya Naga.
6.6. Ngaka Nontsikelelo Tshayingca-Mashiya – Motlatšamolaodipharephare wa Phethagatšo ya Mošomo ya Dihlongwa, Tlhokomedišišo le Tshekatsheko ka Kgorong ya Peakanyo, Tlhokomedišišo le Tshekatsheko.
6.7. Morena Nkhumeleni Victor Tharage – Molaodipharephare ka Kgorong ya Boeti.
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
