1. Xiyimo xa Khabinete mayelana na timhaka ta nkoka eka nkarhi wa sweswi
1.1. Khabinete yi joyina rixaka na vaaki va matiko ya misava eka ku khongelela tata wa rixaka, khale ka Phuresidente Nelson Mandela. Eka nkarhi lowu wo tika, hinkwerhu ka hina a hi kombiseni rirhandzu na ntwelavusiwana na ku endla leswaku Madiba a tinyungubyisa.
1.2. Khabinete yi tivisiwile hi siku ra xitsundzuxo ra vu 58 ra ku sayiniwa ka Tsalwa ra Ntshuxeko leri sayiniweke hi siku ra 26 Khotavuxika 1955 leri nga masungulo ya xidemokirasi na Vumbiwa ra hina. Khabinete yi kombela maAfrika-Dzonga hinkwavo ku ‘Tlanga Xiphemu xa Vona’ xa ku teka tiko ku va kusuhi na xivono xa Afrika-Dzonga leri nga xilo xin’we, ro ka ri nga yi hi rixaka, ro ka ri nga yi hi rimbewu, ra xidemokirasi na ku humelela.
1.3. Khabinete yi amukela ku tiyimisela ku sungula hi vuntshwa hi Ndzawulo ya Rihanyo, kun’we na valavisisi ku lawula timhaka leti vangaka mitlhontlho eka matshalatshala man’we eka ku lwisana na HIV. Nakambe Khabinete yi amukela milulamiso hi Ndzawulo ya Rihanyo eka ku tivisa ku nghenela lokuntshwa ko tala eka swiyenge leswi nga kona leswi katsaka ku lemukisa hi HIV na AIDS, na magoza yo hunguta khombo ra ntlulelo wa HIV.
1.4. Khabinete yi rhumela marito yo chavelela mayelana na nhlaselo lowu khomisaka tingana eka Nhlangano wa Matiko (UN) hi Nhlangano lowu Tivekaka eMogadishu, eSomalia hi siku ra 19 Khotavuxika 2013 leswi nga siya 15 wa vanhu lava hundzeke emisaveni ku katsa maAfrika-Dzonga vambirhi. Hi kombela mitlawa hinkwayo ya swa tipolitiki ehandle ka maendlelo ya swa tipolitiki eSomalia ku byela vanhu ku venga madzolonga na ku tivisa swivilelo swa vona eka Mfumo wa Nhlengelo wa Somalia hi ndlela ya kahle na ndzivalelano.
1.5. Khabinete yi kombela maAfrika-Dzonga hinkwavo ku tinyiketela 67 wa timinete ka nkarhi wa vona hi Siku ra Nelson Mandela (18 Mawuwani) ku pfuna ku cinca miganga ya ka vona na Afrika-Dzonga ku va kahle. Nkhuvo wa lembe leri wu ta tlangeriwa ehansi ka nhlokomhaka leyi nge “Teka goza; tlhontlha ku cinca; endla leswaku siku rin’wana na rin’wana ri va Siku ra Mandela” hi ku kongomisa eka nsirhelelo wa swakudya, ndhawu yo tshama na vuswikoti byo hlaya no tsala.
1.6. Khabinete yi tivisiwile leswaku tanihi xiphemu xa Siku ra Nelson Mandela, xiyenge xa phurojeke yo sunguriwa ya makhadi ya vutitivisi ya Smart ID yi ta simekiwa. Ku simeka loku i ku fikelela nkoka wa hina ka swa khale na ku herisiwa ka nkarhi wo karhi wa matimu ya mapasi eAfrika-Dzonga. Smart ID i khadi leri nga na ku hlangana na vuswikoti byo amukela vuxokoxoko ku suka eka vatirhisani va nkarhi wa sweswi na va nkarhi lowu taka. Holobye wa Ndzawulo ya Timhaka ta Xikaya u ta nyika vuxokoxoko byo tala eka xitiviso xo koma lexi kunguhatiweke ku nga ri khale.
1.7. Khabinete yi amukela ku simekiwa ka pfhumba ra Ndzawulo ya Dyondzo ya Masungulo leri vuriwaka 94+ Tiphurojeke ta Madiba eka ku tlangela siku ra yena ro velekiwa na ndzhaka ya Nelson Mandela. Pfhumba ri kongomisa eka ku antswisa miako yo tlula 94 wa swikolo ku va swi hundzuka tindhawu to dyondzela ta xiyimo xa le henhla. Pfhumba ri nyika ku tshemba na ntikelo eka swikolo etikweni hinkwaro. Hi nkarhi wa Nhweti ya Mandela ku suka hi Mawuwani 2013, ndzawulo yi ta rhangela ku nyikeriwa ka swikolo leswintshwa leswi nga hela hi vhiki tanihi xiphemu xa ku tiboha ku endla xo karhi ku antswisa nkoka wa dyondzo ya masungulo.
1.8. Khabinete yi amukela ku hetisiwa na ku nyikeriwa ka Buloho ra Ndzhaka ra Hosi Dalibhunga eka muganga wa Mvezo lowu rhangeriwaka hi Mandla Mandela, ntukulu wa khale ka Phuresidente Nelson Mandela, hi siku ra 18 Mawuwani 2013. Ku nyikela swi ta kotlana na siku ra ku velekiwa ka khale ka Phuresidente Tatana Nelson Mandela, loyi a nga ta va na 95 wa malembe hi vukhale hi siku leri.
1.9. Khabinete yi tivisiwile hi nkhuvo wa xitsundzuxo eAfrika-Dzonga, wa Siku Nhlangano wa Matiko ya Misava ra ku lwisana na Ku tirhisiwa ka Swidzidziharisi hi ndlela yo Biha na ku yirisiwa ka ku Ngungumerisa hi siku ra 26 Khotavuxika 2013, eKimberley. Siku leri a ri tirhisiwa ku tshikilela nkoka wa ku tirhana na mitlhontlho leyi nga hlangana na misava, ku katsa vugevenga, HIV na AIDS, ku tsana ka vumunhu, madzolonga ya le mindyangwini na ku biha emirini ka lavantshwa.
1.10. Khabinete yi amukela ku rhurheriwa ka Nhlengeletano ya Sayense, Thekinoloji na Vutumbuluxi leyi nga ta va kona ku suka hi masiku ya 20 ku fika 21 Mawuwani. Nhlengeletano yi ta vulavula hi swibumabumelo swa xiviko xa Komiti yo Kambela ya swa Vuholobye, ku antswisa vukondleteri na ku hlanganisa exikarhi ka Maendlelo ya Tiko ya Vutumbuluxi na ku ndlandlamuxa mbulavurisano exikarhi ka mfumo, vumaki na xiyenge xa dyondzo.
1.11. Khabinete yi amukela xiviko xa nhluvuko lowu endliweke emugangeni wa ka Muyexe eGiyani, eXifundzeninkulu xa Limpopo eka vuhumelerisi bya ku tiboha ku endla swo karhi leswi endliweke hi mfumo ku antswisa vutomi bya vanhu. Khabinete yi yisa emahlweni yi vuyelela ku vilela ka Phuresidente ka leswaku swiyenge hinkwaswo swa mfumo swi fanele ku hatlisisa vukorhokeri ku ya hilaha hi makungu lama ku twananiweke ha wona.
1.12. Khabinete yi amukela nsimeko wa SIP-18 hi Mugqivela, hi siku ra 29 Khotavuxika 2013 leswi hlamuselaka eka timhaka ta miako hi xikongomelo xa mphakelo wa mati na nkululo. Phurojeke yi ta vona leswaku ku nyikiwa ka mphakelo wa nkarhi wo leha wa mati ku fikelela swilaveko swa vaaki na ku seketela ku kula ka ikhonomi.
1.13. Khabinete yi amukela xitiviso lexi yi xi kumeke xa migingiriko ya mihlangano eka xiyenge xa ku aka. Khabinete yi amukela mbuyelo wa vulavisisi lebyi nyikaka vumbhoni lebyi kumekaka hinkwako eku swekiweni ka mixavo, mitwanano ya le xihundleni na vukungundzwana eka tikhampani ta ku aka ta phurayivhete. Khabinete yi yimerile mbuyelo wa maendlelo ya Huvo yo Lawula Miphikizano ya Mabindzu kambe yi tivisiwile leswaku vumbhoni byi kombisa ku onhiwa lokukulu eka ku tsakela ka vanhu hi ku tlakusiwa ka mixavo ku tlula mpimo leswaku mfumo wu hakela hikokwalaho ka ntwanano wa le xihundleni.
2. Mikanerisano na swiboho swa Nkoka swa Khabinete
2.1. Khabinete yi pasisile National Drug Master Plan (2013-2017) na matirhiselo ya rona eka ku tlula ntlhanu wa malembe lama landzelaka. Kungu ri tirha tanihi mpfampfarhuto wa maendlelo ya tiko eka ku sivela na ku hunguta matirhiselo ya byalwa na swidzidziharisi hi ndlela yo biha na leswi vanhu va titolovetaka na swona na switandzhaku swa ikhonomi eka vanhu va Afrika-Dzonga.
2.2. Khabinete yi pasisile ku Rhurhela Nhlengeletano ya Varhangeri va Matiko ya ku Nyika Vantima Matimba eka Ikhonomi ya Tiko hi ku Angarhela hi Nhlangula 2013. Nhlengeletano ya Tiko yi ta kombisa vuhumelerisi bya switori na ku humesela erivaleni ku nghenelela ka mfumo eka ku seketela na ku hoxa xandla eka ikhonomi leyi nga ta heta nkarhi wo leha na ku va vantima va fikelela eka ntolovelo lowu amukeriwaka hi mani na mani eka ikhonomi, hi ndlela leyi swi nga ta hoxa xandla eka ku kula hi ku angarhela.
2.3. Khabinete yi pasisile leswaku Afrika-Dzonga ri rhurhela kun’we Khonferense ya “Ku rhangela ku cinca edorobeni” na phurogireme ya Vutshamiso bya Vanhu ya Nhlangano wa Matiko (UN-HABITAT) hi masiku ya 5 na 6 Ndzhati 2013. Ntiyisiso wa hungu ra Khonferense ri le ka henhla ka ku hoxa xandla ka vamanana eka vutomi bya le madorobeni eAfrika. Khonferense yi ta nyika phurogireme ya Afrika ku lulamisa ku ringana mitlhontlho ya ku letela mahanyelo ya le madorobeni na ku lawula nhluvukiso wa vanhu emadorobeni.
2.4. Khabinete yi pasisile Mpfampfarhuto wa Mpfampfarhuto wa Maendlelo eka Mindyangu na Kungu ra Matirhelo. Mpfampfarhuto wa Mpfampfarhuto wa Maendlelo eka mindyangu wu ta pfuna Mfumo na vatirhisani van’wana ku tirhisa ndyangu tanihi xipfunetavuhumelerisi bya ku kota ku twisisa xin’wana hi ku hetiseka xa xiyimo xo va vanhu va titwa va tshamisekile. Mpfampfarhuto wa Maendlelo wu bumabumela swirhangana swa switirateji swinharhu swa nkoka, ku tlakusiwa ka rihanyo ra vutomi bya ndyangu, ku ndlandlamuxiwa ka Ndyangu na ku hlayisa Ndyangu.
2.5. Khabinete yi pasisile magoza ya ku hetisa na ku gazetiwa ka Xitirateji xa vumbirhi xa Matirhiselo ya Mati ya Tiko. Xitirateji lexi xi aka ehenhla ka Xitirateji xa Matirhiselo ya Mati ya Tiko xa 2004. Xitirateji xa vumbirhi xa Matirhiselo ya Mati ya Tiko xi nyika ndzavisiso eka ntirho wa mati eka ikhonomi na ku kuma mitlhontlho yo karhi, swiyenge swa nhluvukiso na magoza lama lemukisaka rimba leri ku nga twananiwa ha rona eka tindhawu ta swirhangana ta tiko. Xitirateji xa vumbirhi na xona xi lava ku tiyisisa mati lama nga ta heta nkarhi wo leha, yo ringana na ku hlayisa mati ku va na vutomi byo antswa na mbangu ka hinkwavo na leswaku mati ya lawuriwa ku enerisa na ku vuyerisa ku ringana na ku kula loku hetaka nkarhi wo leha na nhluvukiso.
2.6. Khabinete yi pasisile xiviko xa Mimbuyelo ya nhlengeletano ya vu 16 ya Khonferense ya Mihlangano eka Nhlengeletano ya Mabindzu ya Matiko hi ku Vangela khombo eka swa Ntlawa wa muxaka wun’we wa swiharhi na swimilana (CITES CoP 16), leyi khomeriweke eBangkok, eThailand ku sukela hi 3 – 14 Nyenyankulu 2013. Khabinete yi yile emahlweni yi pasisa leswaku Afrika-Dzonga ri lulamisa na ku yisa Swibumabumelo swa mabindzu ku va swi tekeriwa enhlokweni eka CITES CoP 17 hi 2016 eAfrika-Dzonga.
2.7. Khabinete yi amukerile xirhambo ku suka eka Bangi ra Nhluvukiso wa Afrika ra Afrika-Dzonga ku va xirho xa Infrastructure Consortium for Africa (ICA) leyi nga simekiwa eka Nhlengeletano ya G8 ya varhangeri va matiko ya Gleneagles hi 2005. Vuvekisi lebyikulu bya Afrika-Dzonga eka miako hi theme ya le xikarhi yi ta va yi ndlandlamuxiwile hi ku tirhisa vuxirho bya rona eka ICA ngopfungopfu eka ku tumbuluxiwa ka data na switirhisiwa swa vutivi na ku kondleteriwa ka tipholisi ta nhluvukiso exikarhi ka G20 na matiko ya Afrika.
2.8. Khabinete yi pasisile ku rhumeriwa ka Xinawana xa Nhluvukiso wa Matiko ya le Dzongeni wa Afrika (SADC) eka mitirho ya swa Mabindzu ePalamende ka ntwanano wa ximfumo wo tsariwa, hi mayelana na xiyenge xa 231 xa Vumbiwa. Swikongomelo swa Milawu ya Ximfumo swi ta olovisa milawu exikarhi ka mabindzu ya xifundza eka vukorhokeri hi mayelana na ndzingano wa makhomelo ya vanhu, ku ringanisa na ku vuyeriwa ka hi ku tirhisana. Milawu leyi ya Ximfumo na yona yi hlamusela rimba ra ku olovisa mabindzu eka vukorhokeri exikarhi ka swirho swa Mifumo swa SADC na ku tirha tanihi masungulo ya mikanerisano.
2.9. Khabinete yi tivisiwile hi ku simekiwa ka Digiri ya Bachula ya Nhluvukiso wa Vutshamiso bya Vanhu (BHSD) eka vutirhisani exikarhi ka Ndzawulo ya Dyondzo ya le Henhla na Vuleteri na le ka Yunivhesiti ya Nelson Mandela Metro. BHSD yi kongomisiwa eka ku ndlandlamuxa vuswikoti bya vafambisi na vatirhi va ntokoto va Vutshamo bya Vanhu loyi a nga ta va na vutivi byo yelana na vuswikoti byo fanela ku tumbuluxa, ku antswisa na ku hatlisisa nhluvukiso wa vutshamo bya ku heta nkarhi wo leha eAfrika-Dzonga.
2.10. Khabinete yi kombela tindzawulo hinkwato ta mfumo, timasipala na leswi lawuriwaka hi mfumo ku nga ri hi ku kongoma eGauteng ku rhijisitara hinkwayo mimovha ya mfumo ka ti-e-tag.
2.11. Khabinete yi pasisile magoza ya matirhiselo lama bumabumeriweke eka ku tumbuluxiwa ka Xiyenge xa Malawulelo ya Mindzelekano (BMA). BMA yi ta lawula mafambelo ya vanhu ku suka eka matiko man’wana, tihakelo na mitirho ya ku lawula endzilakaneni etikweni ka tindzawulo hinkwato emihlalukweni ya swikepe yo nghena. Ndzawulo ya Timhaka ta Xikaya yi ta va Ndzawulo leyi nga ta komba ndlela eka ku tumbuluxiwa ka BMA.
3. Khabinete yi pasisile Milawumbisi leyi landzelaka ku rhumeriwa ePalamende:
3.1. Nawumbisi wa Malawulelo ya Mindzelekano, Nawumbisi wa Tihakelo ta le Mindzilekanini, 2013 na Nawu wa Maantswiselo ya Malawulelo ya Mindzelekano na ku Susiwa ka Xibalo, wa 2013 – Milawumbisi yi nyika masungulo ya ku fambisa mabindzu ya matiko na ku sirhelela ikhonomi na vanhu, hi ku tumbuluxa ku ringana exikarhi ka ku lawula vaxavi na ku fambisa mabindzu.
3.2. Nawumbisi wa Maantswiselo ya Ndzavisiso wa Matirhiselo ya Mati – Maantswiselo ya kongomisa eka ku ringanisa na ku cinca lokukulu eka miako, pholisi, sayense ya mati na milawu ya swa mbangu nakambe na ku engetela ku hoxa xandla eka Khomixini ya Ndzavisiso eka swilaveko swa ndzavisiso wa mati eAfrika-Dzonga na ku tiyisisa leswaku tiko ri le ku tirhiseni ka marhengu lama vekiweke eka swilaveko na mitlhontlho ya ku oma ngopfu ka tiko ku fana na Afrika-Dzonga.
3.3. Nawumbisi wa Maantswiselo ya Milawu ya Malawulelo ya swa Mbangu swa Tiko, wa 2013 – Nawumbisi wu bumabumela ku antswisiwa ka swipfuno swin’wana swo phalala ehansi ka Nawu wa Malawulelo ya swa Mbangu, wa 1998 (Nawu wa Nomboro ya 107 wa 1998) na ku yisa emahlweni ku tiyisisa leswaku switirhisiwa swa ntumbuluko swa tiko swi sirheleriwile ka vanhu lava hanyaka sweswi na rixaka ra mundzuku tanihilaha swi kombisiweke hi Kungu ra Nhluvukiso ra Rixaka.
3.4. Mpfampfarhuto wa Mafambiselo ya swa Mbangu: Nawumbisi wa Maantswiselo ya Moya wa Nkoka, 2013 – Nawumbisi lowu wu antswisa swipfuno swo phalala ehansi ka Mafambiselo ya swa Mbangu swa Tiko: Nawu wa Nkoka wa Moya, wa 2004 lowu lawulaka hi ku veka swinawana swa moya wa nkoka etikweni ku sirhelela mbangu hi ku nyika swipimelo swo twala swa ku sivela nthyakiso na ku vanga khombo eka swa ntumbuluko loko hi tlhelo ku tlakusiwa ikhonomi leyi nga endliwa hi mfanelo na nhluvukiso wa vanhu.
3.5. Malawulelo ya swa Mbangu wa Tiko: Nawumbisi wa Maantswiselo ya Malakatsa, wa 2013 – Nawumbisi wu antswisa Mafambiselo: Nawu wa Malakatsa: Nawu wa Malawulelo, wa 2008 (Nawu wa Nomboro ya 59 wa 2008) lowu lawulaka malawulelo ya malakatsa ku endlela ku sirhelela rihanyo na mbangu.
3.6. Malawulelo ya swa Mbangu ya Tiko: Nawumbisi wa Maantswiselo ya Swiyenge leswi Sirheleriweke, wa 2013 – Nawumbisi wu antswisa Malawulelo ya swa Mbangu wa Tiko: Nawu wa Swiyenge leswi Sirheleriweke, wa 2003 (Nawu wa Nomboro ya 57 wa 2003). Maantswiselo ya hlanganisa malawulelo ya Swiyenge swin’wana leswi Sirheleriweke eka maendlelo ya malawulelo ya Swiyenge swin’wana leswi Sirheleriweke nakambe na ku nyika xivangeriwa eka Switiviso swa Muphuresidente ku hambanyisa mitirho exikarhi ka vuphasi bya tinhlampfi na malawulelo ya swa mbangu.
3.7. Nawumbisi wa Maantswiselo ya Bangi ya le Posweni eAfrika-Dzonga – Xikongomelonkulu xa Nawu wa Khampani ya Bangi ya le Posweni eAfrika-Dzonga, wa 2010 (Nawu wa Nomboro ya 9 wa 2010) i ku lava ku tumbuluxa xiyenge xa swa timali ku hlanganisa vanhu va ku hlayisa na ku vekisa na ku tumbuluxa bangi leyi va yi tsakelaka ya ntlawa lowu kumaka muholo wa le hansi.
3.8. Khabinete yi pasisile Nawumbisi wa Maantswiselo ya Ndzindzakhombo wa Mpfumaleko wa Mitirho wa 2012 leswaku vaaki va nyika mavonelo na ku tihlanganisa na Vatirhisani va vuxaka na NEDLAC. Nawumbisi lowu wu antswisa Nawu wa Ndzindzakhombo wa Mpfumaleko wa Ntirho, wa Nomboro ya 63 wa 2001. Ku antswisiwa loku ku lulamisa timhaka ta vatirhi lava eka nkarhi wa sweswi va siyiweke ehandle eka Nawu na ku antswisa tihakelo ta mimbuyelo eka lava humesaka ntsengo wa mali ku sukela eka nhungu ku fika eka khumembirhi wa tinhweti na ku nyika ku hlawuriwa ka vavuyeriwa eka timhaka ta mimbuyelo ya rifu.
3.9. Khabinete yi pasisile ku nghenisiwa ka Nawumbisi wa Maantswiselo wa Nhlawulo, 2013 ePalamende. Nawumbisi wa Maantswiselo wu lava ku lulamisela tivhoti to hlawuleka hi nkarhi wa nhlawulo wa Huvo ya Rixaka, na ku lulamisela ku titsarisa ka vavhoti lava sweswi va tshamaka ehandle ka Riphabulikiku endlela leswaku va swi kota ku nghenela tivhoti to hlawuleka.
4. Ku thoriwa ka vanhu
4.1. Khabinete yi pfumelelana na ku thoriwa ka Tatana Romeo Adams eka xiyimo xa Xandla xa Mulawuri-Angarhelo: Xiyenge xa Vatirhi eka Ndzawulo ya Vululami na Nhluvukiso wa Vumbiwa.
4.2. Khabinete yi pfumelelana na ku thoriwa ka Manana Irene Rofhiwa Singo eka xiyimo xa N’watikontankulu eka Ndzawulo ya Swicelwa.
4.3. Khabinete yi pfumelelana na ku thoriwa ka Manana Kalayvani Pillay eka xiyimo xa Xandla xa Mulawuri-Angarhelo eka Ndzawulo ya Vululami na Nhluvukiso wa Vumbiwa.
4.4. Khabinete yi pfumelelana na ku thoriwa ka Dok. Bismark Tyobeka eka xiyimo xa Mufambisinkulu eka Xiyenge xo Lawula Gezi xa Tiko eAfrika-Dzonga.
4.5. Khabinete yi pfumelelana na ku thoriwa ka Tatana Tsietsi Mokhele tanihi Mufambisinkulu wa South African Maritime Safety Authority ku ringana ntlhanu wa malembe ku suka hi 1 Dzivamisoko 2013.
4.6. Khabinete yi pfumelelana na ku thoriwa hi vuntshwa ka swirho swo hava vuxirhoxidzi eka huvo ya South African National Accreditation System, leyi theme ya vona ehofisini ku nga ta hela hi 30 Hukuri 2013, ku tirha eka theme ya vumbirhi ku suka hi 1 N’wendzamhala 2013 ku fika 30 Hukuri 2018.
• Vernon Roderick Seymour
• Phakamisa Zonke
4.7. Khabinete yi tivisiwile hi ku thoriwa ravumbirhi ka khumenharhu wa swirho eka South African Council for Space Affairs ku suka hi 24 Khotavuxika 2013 ku fika 24 Khotavuxika 2015. Nakambe Khabinete yi tivisiwile hi ku thoriwa ka vayimeri ku suka eka Ndzawulo ya Vusirheleri, Huvo ya swa Sayense na Ndzavisiso wa swa Vumaki (CSIR) na Ndzawulo ya Vuxaka bya Matiko ya Misava na Ntirhisano ku suka hi 24 Khotavuxika 2013 ku fika 24 Khotavuxika 2015.
a. Dok. Peter Martinez
b. Man. Nomfuneko Majaja
c. Tat. Kim Victor Gorringe
d. Dok. Sandile Bethuel Malinga
e. Man. Pontsho Maruping
f. Man. Andiswa Mlisa
g. Dok. Valanathan Munsami
h. Tat. Tenza Themba
i. Tat. Ron Olivier
j. Tat. Linden Petzer
k. Tat. Hendrik Rheeder
l. Qgwetankulu Phetole Patrick Sekhule
m. Dok. Jo-Ansie Karina van Wyk
n. Ku hlawuriwa ku suka eka Ndzawulo ya Vusirheleri
o. Ku hlawuriwa ku suka eka CSIR
p. Ku hlawuriwa ku suka eka Ndzawulo ya Vuxaka bya Matiko ya Misava na Ntirhisano.
4.8. Khabinete yi tivisiwile hi ku thoriwa ka Tat. Kutoane Obed Kutoane tanihi Mufambisinkulu wa Export Credit Insurance Corporation of South Africa ku ringana malembe manharhu ku sukela hi 1 Mhawuri 2013 ku fika 31 Mawuwani 2016.
4.9. Khabinete yi tivisiwile hi ku thoriwa ra vumbirhi ka Phurofesa Linda De Vries tanihi Mutshamaxitulu wo hava vuxirhoxidzi wa Huvo yo Gembula ya Tiko ka theme ya vumbirhi ehofisini ku suka hi 1 N’wendzamhala 2013 ku fika 30 Hukuri 2018.
4.10. Khabinete yi tivisiwile hi ku thoriwa ka Tat. Ndwakhulu Samuel Mukhufhi tanihi Mufambisinkulu wa National Metrology Institute of South Africa ku ringana ntlhanu wa malembe ku suka hi 1 Mhawuri 2013 ku fika 31 Mawuwani 2018.
4.11. Khabinete yi tivisiwile hi ku thoriwa ka Man. Tsele-Maseloanyane tanihi xirho xa Huvonkulu xa nkarhi hinkwawo eka Tikhampani ta Huvonkulu ku ringana ntlhanu wa malembe ku sukela hi 1 Mawuwani 2013 ku fika 30 Khotavuxika 2018.
Swivutiso:
Phumla Williams (Mukhomelamuvulavuleri wa Khabinete)
Nomboro ya vutihlanganisi: 083 501 0139
