1. Maemo a Kabinete ka ga merero ye e lego ditabeng ka seemong sa bjale
1.1. Kabinete e ba le setšhaba sa boditšhabatšhaba ge ba rapelela tate wa setšhaba, Mopresidente wa peleng Nelson Mandela. Mo lebakeng le, a re bontšheng lerato le kwelobohloko gomme re dire gore Madiba a ikgantšhe.
1.2. Kabinete e lemogile ka ga go fetša ga mengwaga ye 58 go tloga mola go saenelwa Lengwalo la Tokologo leo le saennwego ka la 26 Phupu 1955 e lego motheo wa temokrasi le Molaotheo. Kabinete e ipiletša go maAfrika Borwa ka moka go ‘Raloka Tema ya Gago’ go iša naga kgauswi le nepo ya Afrika Borwa ye e kopanego, ya go hloka semorafe, ya go hloka kgethologanyo ya bong, ya temokrasi le ye e atlegilego.
1.3. Kabinete e amogela boikgafo bjo bo mpshafaditšwego ka Kgoro ya Maphelo, gotee le banyakišiši go lwantšha dilo tše di tlišago mathata go masolo a mohlakanelwa ka ntweng kgahlanong le HIV. Kabinete e amogela gape ditokišetšo tše di dirilwego ke Kgoro ya Maphelo go tsebagatša ditsenogare tše mpsha ka mananeong ao a lego gona ao a akaretšago temošo ye e oketšegilego ka ga HIV le AIDS, le magato a go fokotša kotsi ya phetetšo ya HIV.
1.4. Kabinete e lebiša mahloko go latela go hlaselwa go gošoro ga Lefelo la Bohle la Mokgatlo wa Dinagakopano (UN) ka Mogadishu, ka Somalia ka la 19 Phupu 2013 yeo e feleditšego ka go hlokofala ga batho ba 15 go akaretšwa maAfrika Borwa a mabedi. Re ipiletša go mekgatlo ka moka ya dipolotiki ka ntle ga tshepedišo ya sepolotiki ka Somalia go emiša dikgaruru gomme di lebiše dingongorego tša tšona go Mmušo wa Bofeterale wa Somali ka mokgwa wo o kwagalago le wo o nago le poelano.
1.5. Kabinete e ipiletša go maAfrika Borwa ka moka go ithaopa metsotso ye 67 ya nako ya bona go Letšatši la Nelson Mandela (ka la 18 Mosegamanye) go thuša go fetoša ditšhaba tša bona le sa Afrika Borwa go ba tše kaone. Tiragalo ya ngwaga wo e tla dirwa ka fase ga morero wa “Dira se sengwe; hlohleletša phetogo; dira gore letšatši le lengwe le le lengwe le be Letšatši la Mandela” go lebeletšwe kudu tšweletšo e sa hlaelego ya dijo, madulo le tsebo ya go bala le go ngwala.
1.6. Kabinete e lemogile gore bjalo ka karolo ya Letšatši la Nelson Mandela, go phethagatšwa ga go tsenya tirišong ga karata ya Boitsebišo go tla tsebagatšwa semmušo. Go tsebagatšwa semmušo fa ke selo se bohlokwa sa go tlogela le go fediša lebaka la nako ya pukwana ya rena ya pasa ka Afrika Borwa. Karata ye ya Boitsebišo ke karata ye kgonago go rwala tshedimošo go hlaga bakgathatemeng bao ba fapafapanego ba mo lebakeng la bjale le la ka moso. Tona ya Kgoro ya Merero ya Selegae o tla fa dintlha ka botlalo ka mananeong a go sedimoša setšhaba ao a rulagantšwego ge nako e dutše e tšwela pele.
1.7. Kabinete e amogela go tsebagatšwa semmušo ga lesolo la Kgoro ya Thuto ya Motheo leo le bitšwago 94+ Projects la Madiba go keteka letšatši la matswalo la Nelson Mandela le bohwa bja gagwe. Lesolo le le ikemišeditše go kaonafatša mananeokgoparara mo dikolong tše di fetago tše 94 gore di be dihlongwa tša thuto tša maemo a godimo tša thuto ya boleng bja godimo. Lesolo le le fa dikolo go ralala le naga kholofelo le seriti. Ka kgwedi ya Mandela go thoma ka Mosegamanye 2013, kgoro e tlo eta pele go aba dikolo tše mpsha tše di feditšwego beke ye nngwe le ye nngwe bjalo ka karolo ya boikgafo bja go kaonafatša thuto ya motheo ya boleng bja godimo.
1.8. Kabinete e amogela le go aba ga Leporogo la bohwa la Nkosi Dalibhunga Mandela go setšhaba sa Mvezo seo se etilwego pele ke Kgoši Mandla Mandela, e lego setlogolo sa Mopresidente wa peleng Nelson Mandela, ka la 18 Mosegamanye 2013. Go aba ga leporogo le go tla sepelelana le letšatši la matswalo la Mopresidente wa Peleng Morena Nelson Mandela, yo a tlago fetša mengwaga ye 95 ka letšatši le.
1.9. Kabinete e tsebišitšwe ka ga go keteka ga Afrika Borwa ga Letšatši la Boditšhabatšhaba la Mokgatlo wa Dinagakopano la kgahlanong le Tšhomišobošaedi ya Diokobatši le Go Gweba ka Tšona mo go Sego Molaong ka la 26 Phupu 2013, ka Kimberley. Letšatši le le šomišitšwe go gatelela bohlokwa bja go rarolla mathata ao lefase le lebanego le ona, go akaretšwa bosenyi, HIV le AIDS, go phuhlama ga maitshwaro a batho, dikgaruru tša ka malapeng le boimana bja basetsana ba mahlalagading.
1.10. Kabinete e amogelwa go swarwa ga Samiti ya Mahlale, Theknolotši le Boithomelo ye e tlogo swarwa go thoma ka la 20 go fihla ka la 21 Mosegamanye. Samiti ye e tla ahlaahla ditšhišinyo tše di dirilwego ke pego ya Komiti ya Tekodišišo ya Ditona, kgokagano ye e kaonafaditšwego le kopanyo ka gare ga Lenaneo la Bosetšhaba la Boithomelo le poledišano ye e maatlafaditšwego magareng ga mmušo, diintasteri le dihlongwa tša thuto ya godingwana.
1.11. Kabinete e amogela pego ka ga kgatelopele ye e dirilwego ka motseng wa Muyexe ka Giyani, ka Profenseng ya Limpopo ka phethagatšong ya boikgafo bjo bo dirilwego ke mmušo bja go kaonafatša maphelo a batho. Kabinete e tšwela pele go goeletša dipelaelo tša Mopresidente tša gore dikgato ka moka tša mmušo di swanetše go akgofiša kabo ya ditirelo go ya ka maano ao go dumelelwanego ka ona.
1.12. Kabinete e amogelwa go tsebagatšwa semmušo ga Protšeke ya Mananeokgoparara a Togamaano-18 ka Mokibelo, wa la 29 Phupu 2013 ye e amanago le merero ya mananeokgoparara lebakeng la go aba meetse le kelelatšhila. Protšeke ye e tla netefatša gore go abja kabo ya meetse ya go ya go ile go fihlelela dinyakwa tša setšhaba le go thekga kgolo ya ekonomi.
1.13. Kabinete e amogela tshedimošo ye e e amogetšego ka ga ditiro tša manyofonyofo ka lekaleng la kago. Kabinete e amogela dipoelo ka ga dinyakišišo tše di tlilego ka bohlatse bja go beakanya ditheko mo go sego molaong, go kwana ka ditheko le bomenetša ka intastering ya kago ya phraebete. Ka fao go kwana ka ditheko go lego godimo ka gona go nyaka gore go tšewe magato a boima ke makgotla a taolo ya phenkgišano. Kabinete e emetše dipoelo tša tshepedišo ya Lekgotlatsheko la Phadišano gomme e lemoga gore bohlatse bo laetša tshenyo e kgolo go kgahlego ya setšhaba ka ditheko tše di hlatlošitšwego kudu tšeo Mmušo o di lefilego ka lebaka la go kwana ka ditheko."
2. Dipoledišano le diphetho tše bohlokwa tša Kabinete
2.1. Kabinete e dumeletše Leanokgolo la Bosetšhaba la Diokobatši (2013-2017) le phethagatšo ya lona mo mengwageng ye e fetilego ye mehlano. Leano le le šoma bjalo ka selo se bohlokwa sa go thibela le go fokotša bjala le tšhomišobošaedi ya diokobatši le ditlamorago tše di amanago le yona ka setšhabeng le ka ekonoming ka setšhabeng sa Afrika Borwa.
2.2. Kabinete e dumeletše go Swarwa ga Samiti ya Maatlafatšo ya Bathobaso Ekonoming ye e Akaretšago Mang le Mang ka Diphalane 2013. Samiti ye ya Bosetšhaba e tla laetša dikanegelo tša katlego le go laetša ditsenogare tša Mmušo go thekga go kgatha tema ka ekonoming fao go atlegilego le fao go tšwelago pele go ya go ile le gore bathobaso ba kgone go kgatha tema ka ekonoming ya bohle, ka tsela ye e tlago ba le seabe ka kgolong ya mang le mang.
2.3. Kabinete e dumeletše gore Afrika Borwa e sware mmogo Khonferentshe ya “Re eta pele Phetogo ka Toropongkgolo” le lenaneo la Madulo a Batho la Mokgatlo wa Dinagakopano (UN-HABITAT) ka la 5 le la 6 Lewedi 2013. Kgatelelo ya khonferentshe ye e go go kgatha tema ga basadi ka bophelong bja metseseteropo ka Afrika. Khonferentshe ye e tla fa Afrika sefala sa go rarolla gabotse mathata a go hudugela ga batho ditoropong le go nyalelanya go hudugela ga batho ditoropong le tlhabollo ya batho.
2.4. Kabinete e dumeletše Pampiri e Tšhweu ye e Thadilwego ka ga Malapa le Leano la Phethagatšo. Pampiri e Tšhweu ye e Thadilwego ka ga Malapa e tla kgontšha Mmušo le bakgathatema ba bangwe go šomiša lapa bjalo ka motheo wa go fihlelela go phela gabotse ga setšhaba. Pampiri ye ye Tšhweu e šišinya dilo tše bohlokwa tše di tlago pele tša togamaano, e lego, Tšwetšopele ya bophelo bjo bokaone bja ka lapeng, go maatlafatša Malapa le go lota Malapa.
2.5. Kabinete e dumeletše go phethwa le go phatlhalatšeng semmušo ga Togamaano ya bobedi ya Bosetšhaba ya Mothopo wa Meetse. Togamaano ye e agwa godimo ga Togamaano ya Bosetšhaba ya Mothopo wa Meetse ya 2004. Togamaano ya bo 2 ya Bosetšhaba ya Mothopo wa Meetse e fa tshekatsheko ya mošomo wa meetse ka ekonoming ebile e šupa mathata a itšego, dibaka tša tlhabollo le ditiro tše di laetšago motheo wo go dumelelwanego ka ona wa makala ao a tlago pele a ka nageng. Togamaano ya bo 2 gape e nyaka go netefatša gore go ba le meetse a go ya go ile, ao a lekanago bohle le ao a bolokegilego go tliša bophelo bjo bokaone le tikologo go bohle le gore meetse a laolwe gabotse le bokaone go tliša kgolo le tlhabollo tše di lekalekanego le tše di tšwelago pele go ya go ile.
2.6. Kabinete e dumeletše pego ka ga Dipoelo tša kopano ya bo 16 ya Khonferentshe ya Mekgatlo ya Kwano ka ga Kgwebišano ya Boditšhabatšhaba ka Mehuteng ye e lego Kotsing ya Diphoofolo le Dimela tša Lešoka (CITES CoP 16), ye e swerwego ka Bangkok, Thailand go thoma ka la 3 – 14 Hlakola 2013. Kabinete e tšwetše pele go dumelela gore Afrika Borwa e lokiše le go romela tšhišinyo ya kgwebišano go yo amogelwa ka CITES CoP 17 ka 2016 ka Afrika Borwa.
2.7. Kabinete e dumetše taletšo ye e tšwago go Pankatlhabollo ya Afrika Borwa go ba leloko Khamphanikgolong ya Mananeokgoparara ya Afrika (ICA) ye e tsebagaditšwego semmušo ka Samiting ya G8 Gleneagles ka 2005. Peeletšo e kgolo ya Afrika Borwa ka go mananeokgoparara mo lebakeng la nako ya magareng e tla maatlafatšwa ka bolelokong bja yona ka go ICA kudukudu ka tšweletšong ya tshedimošokgolo le ka ditšweletšweng tša tsebo le kgokaganyo ya melaotshepetšo ya tlhabollo magareng ga G20 le dinaga tša Afrika.
2.8. Kabinete e dumeletše go tlišwa ga Tshepetšo ka ga Kgwebišano ya Ditirelo ya Dinaga tše di Hlabologago tša Borwa bja Afrika ka Palamenteng go yo dumelelwa, go latela karolo ya 231 ya Molaotheo. Maikemišetšo a Tshepetšo ye ke go lokolla kgwebišano ya magareng ga dilete ka ditirelo go lebeletšwe tekano, tekanelo le kholego ya bohle. Tshepetšo ye e bea gape motheo wa tokollo ya kgwebišano ya ditirelo magareng ga dinagamaloko tša Dinaga tše di Hlabologago tša Borwa bja Afrika ebile e šoma bjalo ka motheo wa ditherišano.
2.9. Kabinete e tsebišitšwe ka ga go tsebagatšwa semmušo ga Kgrata ya Tlhabollo ya Madulo a Batho (BHSD) ka tirišano le Kgoro ya Thuto le Tlhahlo ya Godimo le Yunibesithi ya Nelson Mandela Metro. Kgrata ye ya BHSD e ikemišeditše go hlabolla balaodi le bašomi ba ka lefapheng la Madulo a Batho bao ba tlago ba le tsebo le mabokgoni tša maleba go hlama, go kaonafatša le go akgofiša tlhabollo ya madulo a batho a go ya go ile ka Afrika Borwa.
2.10. Kabinete e ipiletša go dikgoro tša Mmušo ka moka, go mebasepala le dikhamphani tša mmušo tše di šomago ka Gauteng go ngwadiša difatanaga tša mmušo ka moka go e-tags.
2.11. Kabinete e dumeletše dikgato tša phethagatšo tše di šišintšwego go hloma ga Setheo sa Taolo ya Mellwane (BMA). BMA e tla laola go huduga ga batho, metšhelo ya dikhamphani le ditirelo tša taolo ya mellwane ya naga le go kgokaganya gabotse ditirelo tša dikgoro ka moka tše di lego ka mafelong a botseno. Kgoro ya Merero ya Selegae e tla ba Kgoro ye e etilego pele go hloma ga BMA.
3. Kabinete e dumeletše Melaokakanywa ye e latelago go yo romelwa ka Palamenteng:
3.1. Molaokakanywa wa Taolo ya Metšhelo ya Dikhamphani, Molaokakanywa wa Makgetho a Dikhamphani, wa 2013 le Molaophetošo wa Metšhelo le Makgetho a Dikhamphani, wa 2013 – Melaokakanywa ye e fa motheo wa go nolofatša kgwebišano ya boditšhabatšhaba le tšhireletšo ya ekonomi le setšhaba, go realo e le go hlama tekatekano magareng ga taolo ya metšhelo le go nolofatša kgwebišano
3.2. Molaokakanywaphetošo wa Dinyakišišo tša Meetse – Phetošo ye e ikemišeditše gore e sepelelane le diphetogo tše kgolo ka dihlongweng, ka melaotshepetšong, ka mahlaleng a tša meetse le ka tikologong ya semolao le gape go oketša seabe sa Khomišene ya Dinyakišišo tša Meetse ka go dinyakwa tša dinyakišišo tša meetse tša Afrika Borwa le go netefatša gore naga e beilwe gabotse ka maano go arabela dinyakwa le mathata a naga ya go hloka meetse ya go swana le Afrika Borwa.
3.3. Molaokakanywaphetošo wa Bosetšhaba wa Melao ya Taolo ya Tikologo, wa 2013 – Molaokakanywa wo o šišinya diphetošo go ditlhagišo tše itšego ka fase ga Molao wa Bosetšhaba wa Taolo ya Tikologo, wa 1998 (Molao wa Nomoro ya 107 wa 1998) ebile o tšwela pele go netefatša gore methopo ya tlhago ya naga e šireleditšwe go šomišwa ke moloko wa mo lebakeng le le wa mo lebakeng la ka moso go ya ka fao go beilwego ke Leanotlhabollo la Bosetšhaba.
3.4. Molaokakanywaphetošo wa Bosetšhaba wo o Thadilwego wa Taolo ya Tikologo: wa Boleng bja Moya, wa 2013 – Molaokakanywa wo o fetoša ditlhagišo tše dingwe ka fase ga Molao wa Bosetšhaba wa Taolo ya Tikologo: wa Boleng bja Moya, wa 2004 wo o laolago boleng bja moya ka nageng go šireletša tikologo ka go fa magato ao a kwagalago a go thibela tšhilafatšo le go phuhlama ga phedišano ya diphedi mola ka go le lengwe o tšwetša pele tlhabollo ye e kwagalago ya ekonomi le ya setšhaba.
3.5. Molaokakanywaphetošo wa Bosetšhaba wa Taolo ya Tikologo: wa Ditlakala, wa 2013 – Molaokakanywa wo o fetoša Molao wa Bosetšhaba wa Taolo ya Tikologo: wa Ditlakala, wa 2008 (Molao wa Nomoro ya 59 wa 2008) wo o laolago taolo ya ditlakala ka nepo ya go šireletša maphelo le tikologo.
3.6. Molaokakanywaphetošo wa Bosetšhaba wa Taolo ya Tikologo: wa Mafelo ao a Šireleditšwego, wa 2013 – Molaokakanywa wo o fetoša Molao wa Bosetšhaba wa Taolo ya Tikologo: wa Mafelo ao a Šireleditšwego, wa 2003 (Molao wa Nomoro ya 57 wa 2003). Diphetošo di akaretša taolo ya Mafelo a Mawatleng ao a Šireleditšwego ka lenaneong la taolo ya Mafelo a mangwe ao a Šireleditšwego gammogo le go phethagatša Dikgoeletšo tša Mopresidente tša go aroganya mešomo magareng ga borei bja dihlapi le taolo ya tikologo.
3.7. Molaokakanywaphetošo wa Pankaposo ya Afrika Borwa – Maikemišetšomagolo a Molao wa Pankaposo ya Afrika Borwa, wa 2010 (Molao wa Nomoro ya 9 wa 2010) ke go hloma sehlongwa sa ditšhelete seo se tlogo hlohleletša batho ka bontši go boloka ditšhelete le go beeletša ditšhelete le go hloma panka ye e tlago kgethwa ke batho bjalo ka ya mathomo go bona go bao ba hwetšago letseno la fase.
3.8. Kabinete e dumeletše Molaokakanywaphetošo wa Inšorentshe ya bao ba Tšwelego Mešomong wa 2012 go yo swayaswaya ke setšhaba le go rerišanwa le Badirišani ba Setšhabeng ba Lekgotla la Bosetšhaba la Tlhabollo ya Ekonomi la Bašomi. Molaokakanywa wo o fetoša Molao wa Inšorentshe ya bao ba Tšwelego Mošomong, wa Nomoro ya 63 wa 2001. Phetošo ye e rarolla taba ya bašomi bao mo lebakeng le ba sego ba akaretšwa ka Molaong wo le go kaonafatša go lefša ga dikholego tša bao ba lefilego ditšhelete mo inšorentsheng ye, go oketša nako ya tefo ya dikholego go yo a lefilego inšorentshe go tloga go dikgwedi tše seswai go ya go tše lesomepedi ebile o hlagiša gore go kgethwe baholegi sebakeng sa ge go ka ba le dikholego ge mong wa inšorentshe a hlokofetše.
3.9. Kabinete e dumeletše go romelwa ga Molaokakanywaphetošo wa Dikgetho, wa 2013 ka Palamenteng. Molaokakanywaphetošo wo o nyaka go hlagiša gore go be le dikgetho tše di kgethegilego ka dikgethong tša Kopanokgothekgothe ya Maloko a Palamente, gammogo le go hlagiša go ngwadiša ga bakgethi bao e lego badudi bao ba tlwaelegilego ka ntle ga Rephabliki ya Afrika Borwa go ba kgontšha go kgatha tema ka dikgethong tše di kgethegilego.
4. Bao ba thwetšwego mešomong
4.1. Kabinete e kwana le go thwalwa ga Morena Romeo Adams mošomong wa Motlatšamolaodipharephare: Ditirelo tša Sehlongwa ka Kgorong ya Toka le Tlhabollo ya Molaotheo.
4.2. Kabinete e kwana le go thwalwa ga Mohumagadi Irene Rofhiwa Singo mošomong wa Mohlankedimogolo wa Ditšhelete ka Kgorong ya Methopo ya Diminerale.
4.3. Kabinete e kwana le go thwalwa ga Mohumagadi Kalayvani Pillay mošomong wa Motlatšamolaodipharephare: Tlhabollo ya Melao ka Kgorong ya Toka le Tlhabollo ya Molaotheo.
4.4. Kabinete e kwana le go thwalwa ga Ngaka Bismark Tyobeka mošomong wa Mohlankedimogolophethiši wa Kantoro ya Bolaodi bja Bosetšhaba bja Nyutleleara ya Afrika Borwa.
4.5. Kabinete e kwana le go thwalwa ga Morena Tsietsi Mokhele bjalo ka Mohlankedimogolophethiši wa Tirelotaolo ya Polokego ya Mawatle ya Afrika Borwa mo lebakeng la mengwaga ye mehlano go thoma ka la 1 Moranang 2013.
4.6. Kabinete e kwana le go thwalwa gape ga Malokotaolo ao a latelago ao a sa šomelego ka kantorong a Lekgotla la Lenaneo la Tumelelo la Bosetšhaba la Afrika Borwa, bao nako ya bona ya go šoma e tlago fela ka la 30 Dibatsela 2013, go šoma nako ya bobedi go thoma ka la 1 Manthole 2013 go fihla ka la 30 Dibatsela 2018.
• Morena Vernon Roderick Seymour
• Morena Phakamisa Zonke
4.7. Kabinete e tsebišitšwe ka ga go thwalwa gape ga maloko a lesometharo ka Khanseleng ya Merero ya Lefaufaung ya Afrika Borwa go tloga ka la 24 Phupu 2013 go fihla ka la 24 Phupu 2015. Kabinete e tsebišitšwe gape ka ga go thwalwa ga baemedi go tšwa ka Kgorong ya Tšhireletšo, ka Lekgotleng la Dinyakišišo tša Mahlale le tša Diintasteri (CSIR) le ka Kgorong ya Dikamano le Tirišano ya Boditšhabatšhaba go tloga ka la 24 Phupu 2013 go fihla ka la 24 Phupu 2015.
a. Ngaka Peter Martinez
b. Mohumagadi Nomfuneko Majaja
c. Morena Kim Victor Gorringe
d. Ngaka Sandile Bethuel Malinga
e. Mohumagadi Pontsho Maruping
f. Mohumagadi Andiswa Mlisa
g. Ngaka Valanathan Munsami
h. Morena Tenza Themba
i. Mohumagadi Ron Olivier
j. Morena Linden Petzer
k. Mohumagadi Hendrik Rheeder
l. Moatbokheiti Phetole Patrick Sekhule
m. Ngaka Jo-Ansie Karina van Wyk
n. Tšhišinyo ya leina go tša ka Kgorong ya Tšhireletšo
o. Tšhišinyo ya leina go tšwa ka CSIR
p. Tšhišinyo ya leina go tšwa ka Kgorong ya Dikamano le Tirišano ya Boditšhabatšhaba.
4.8. Kabinete e tsebišitšwe ka ga go thwalwa ga Morena. Kutoane Obed Kutoane bjalo ka Mohlankedimogolophethiši wa Koporase ya Inšorentshe ya Dikoloto tša Diromelwantle ya Afrika Borwa mo lebakeng la mengwaga ye meraro go tloga ka la 1 Phato 2013 go fihla ka la 31 Mosegamanye 2016.
4.9. Kabinete e tsebišitšwe ka ga go thwalwa gape ga Mophrofesara Linda De Vries bjalo ka Modulasetulo wa Khuduthamaga wa go se šomele ka kantorong wa Lekgotla la merero ya go Betša la Bosetšhaba mo nakong ya bobedi ya go šoma go tloga ka la 1 Manthole 2013 go fihla ka la 30 Dibatsela 2018.
4.10. Kabinete e tsebišitšwe ka ga go thwalwa ga Morena. Ndwakhulu Samuel Mukhufhi bjalo ka Mohlankedimogolophethiši wa Sehlongwa sa Bosetšhaba sa Dikelo sa Afrika Borwa mo lebakeng la mengwaga ye mehlano go tloga ka la 1 Phato 2013 go fihla ka la 31 Mosegamanye 2018.
4.11. Kabinete e tsebišitšwe ka ga go thwalwa ga Mohumagadi Agnes Tsele-Maseloanyane bjalo ka leloko la go šoma dinako ka moka la Lekgotlatsheko la Dikhamphani mo lebakeng la mengwaga ye mehlano go tloga ka la 1 Mosegamanye 2013 go fihla ka la 30 Phupu 2018.
Dipotšišo di lebišwe go:
Phumla Williams (Seboleledi sa Kabinete sa Motšwaoswere)
Mogala wa boikgokaganyo: 083 501 0139
