Pego ya Kopano ya Kabinete ya la 18 Dibatsela 2015

1. Phethagatšo ya mananeo a bohlokwa a mmušo

1.1 Kabinete e reta Kgoro ya Madulo a Batho ge e abile dintlo ka protšekeng ya Madulo a Batho ao a Kopantšwego ka Savanna City ka Masepaleng wa Selete wa Sedibeng go dihlopha tša batho bao ba hlokago kudu. MaAfrika Borwa ao a tumilego a ile a ba le bakgathatema ba ka intastering go akaretšwa dimeyara le bahlankedi go tšwa ka Masepaleng wa Selete wa Sedibeng, go penta dintlo tše di feditšwego go agwa ge di be di tsebagatšwa semmušo gammogo le go dira dirapana.

Dintlo tše di ka bago tše 18 000 di ile tša agwa, gomme tša hola batšofadi, bagolofadi, le malapa ao a hlokometšwego ke bana le ao a hlokometšwego ke basadi. Kabinete e amogela tsebišo ya gore ngwaga wo o tlago kgoro e tla tsebagatša semmušo protšeke ye, gomme yona e tla dira gore go agwe dintlo tše 60 000.

1.2 Kabinete e amogela kgatelopele ye e dirilwego ke protšeke ya Tshepo 10 000, yeo e thušago go fediša tlhokego ya mešomo go bafsa ka Toropokgolong ya Tshwane. Protšeke ye ya dimilionemilione ye e dirwago ke Toropokgolo, ka tirišano le Yunibesithi ya Pretoria, e lebeletše go hlahla bafsa bao ba sa šomego ba 10 000 ka go ba fa mabokgoni le tsebo ye e hlokagalago go tsenela didiprojeke tša go aba ditirelo.

Ka morago ga go fetša tlhahlo bafsa ba hloma dikgwebo tše di atlegilego le go di sepediša. Go fihla mo lebakeng le, dikgwebo tše 190 di abile dibaka tša mešomo go bafsa ba bantši. Godimo ga fao, dikgoro tša toropokgolo di thwetše ba bangwe ba bafsa bao ba hlahlilwego.

1.3 Kabinete e amogela go kaonafatšwa ga tsela ya R25 (P6-1), e lego tsela ya dikhilometara tše 42 yeo e kgokaganyago Gauteng le Limpopo. Protšeke ye, yeo e tlogago magareng ga Bapsfontein le Bronkhorstspruit, e thwetše batho ba go feta ba 200. E tla hola gape mafapha a temo le a meepo ka lefelong leo ka go tšwetša pele go sepela ka lebelo ga dilori tša merwalo tšeo di sepetšago dithoto le ditirelo.

2. Diphetho tše Bohlokwa tša Kabinete

2.1 Kabinete e sedimošitšwe ka boripana ke Kgoro ya Mahlale le Theknolotši, yeo e tlogo swara beke ya setšhaba ya ditiragalo tše kgolo tša mahlale: e lego Seboka sa tša Mahlale sa Afrika Borwa sa 2015 ka fase ga morero wa: “Re hlohleletša poledišano ka ga mahlale” go tloga ka la 8 go fihla ka la 9 Manthole 2015, ka Pretoria.

Tiragalo ye e fa bakgathatema go tšwa ka Afrika Borwa, ka khontinenteng le badirišani ba boditšhabatšhaba sefala sa go swara dingangišano le go ithuta melawana ka ga kamano magareng ga mahlale le setšhaba.

2.2 Kabinete e dumeletše gore Tiragalo ya Mohlakanelwa ya Letšatši la Diphedi tša ka Meetseng tša Lefase ya Mokgatlo wa Diphedi tša ka Meetseng wa Boditšhabatšhaba (IMO) e swarwe ka Afrika Borwa ka 2020. Kantoro ya Tona ya Kgoro ya Dinamelwa ka fao e tla fa kopano ya Lekgotla la IMO sephetho se sa Kabinete yeo e rulagantšwego gore e tla swarwa go tloga ka la 23 Dibatsela go fihla ka la 4 Manthole 2015.

3. Ditiragalo tše di tlago

3.1 Mopresidente Jacob Zuma o tla amogela molekane wa gagwe wa ka China Xi Jinping mo Ketelong ya Semmušo ya matšatši a mabedi go tloga ka la 1 go fihla ka la 3 Manthole. Ketelo ye e ikemišeditše go feleletša Motheo wa Tirišano wa Mengwaga ye 5 go fihla go ye 10 magareng ga China le Afrika Borwa wo o tlago tiišetša phethagatšo ya ditumelelano tša rena go tloga mola go saenelwago Kwano ya Beijing ka 2010. Se se tla tšwela pele go maatlafatša le go oketša Tirišano ya Togamaano ya Kakaretšo yeo dinaga tše ka bobedi e nago le tšona.

Di dula di le bohlokwa gore re fihlelele lenaneo la tlhabollo ka melawana ya yona ya dinaga tša ka ntle ka ge e oketša maitekelo a go tsenya tirišong Leanotlhabolo la Bosetšhaba (NDP), go dirišana ka tša temo, merero ya tikologo, kwebišano le diintasteri le ditšhelete ge naga e tšwela pele go phethagatša lenaneo la go iša pele Afrika Borwa. E fa gape sebaka sa go lekodišiša kgatelopele go mafapha ao a lego gona a kgwebišano le tirišano magareng ga dinaga tše tše pedi, le go akgofiša le go feleletša mafapha a maswa a tirišano.

3.2 Mopresidente Zuma o tla eta pele baromiwa bao ba lebago kopanong ya bo 21 ya Khonferentshe ya Maloko a Seboka sa Tlhako ya Mokgatlo wa Dinagakopano ka ga Phetogo ya Klaemete (UNFCCC) le Kopano ya bo 11 ya Khonferentshe ya Maloko ao a šomago bjalo ka Kopano ya Maloko go Phrothokhole ya Kyoto (CMP11) yeo e tlogo swarwa go tloga ka la 30 Dibatsela go fihla ka la 11 Manthole 2015 ka Paris, France.

Ditherišano tša boditšhabatšhaba tša tumelelano ye mpsha ya tša molao e tla rulaganya phetolo go phetogo ya klaemete, yeo e tlago thoma go šoma go tloga ka  2020 go ya pele. Go latela kgahlego ya bosetšhaba ya Afrika Borwa bjalo ka naga ya Afrika yeo e hlabologago yeo e tlago nyaka thekgo ya ka morago ga ngwaga wa 2020, Afrika Borwa e tla tšwela pele go šireletša melawana ya motheo ya tekatekano le pharologanyo ya UNFCCC.

Ka kopanong ya Sehlopha sa ba 77 gammogo le China, Afrika Borwa e tla nyaka go tšwetša pele le go maatlafatša selekane sa dinaga tše di hlabologago go hwetša Tumelelano ya Paris yeo e lekalekanyago, yeo e nago le phišegelo, ye e theilwego go tša mahlale le yeo e tšweletšago sekgoba sa tlhabollo go dinaga tše di hlabologago.

3.3 Mopresidente Zuma o tla tsebagatša semmušo Lesolo la Matšatši a 16 la Tiro ya Mafolofolo ya Twantšho ya Dikgaruru kgahlanong le Basadi le Bana ka la 25 Dibatsela 2015 ka Naauwpoort, Mahikeng ka fase ga morero wa: “Mpale: Mmogo re Iša Pele Afrika Borwa ye e Hlokago Dikgaruru.” Lesolo le le ketekwa bjalo ka karolo ya Lesolo la Matšatši a 365 la Tiro ya Mafolofolo, e lego lesolo leo le tšwelago pele leo le tlišago temošo ka ga dikgaruru kgahlanong le basadi le bana, gomme le hlohleletša batho go balwa ka gare ga lesolo la ngwaga ka moka la tiro ya mafolofolo kgahlanong le dikgaruru go basadi le bana. Kabinete e ipiletša go maAfrika Borwa ka moka go thekga lesolo le le go šomiša lebaka le go hlohleletša ditšhaba le go dirišana le mmušo go fediša dikgaruru kgahlanong le basadi le bana – ka go #Count me In.

3.4 Motlatšamopresidente Cyril Ramaphosa o tla eta pele baromiwa ba mmušo ka ditherišanong tša bona ka kgafetšakgafetša le Seboka sa Bosetšhaba sa Bagaši ba Ditaba sa Afrika Borwa ka la 21 Dibatsela 2015 bjalo ka karolo ya boikgafo bja mmušo le lenaneo leo le tšwelago pele la go maatlafatša dikamano le ba kgašo. Mmušo o tla sedimoša bagaši ba ditaba ka ga merero ye bohlokwa le ka ga dithulaganyo tše di tlago mola ka go le lengwe o efa bagaši ba ditaba sebaka sa go hlagiša mafapha a kgahlego ya bona le mmušo.

3.5 Afrika Borwa e tla keteka Letšatši la Lefase la AIDS ka fase ga morero wa - “Re lebile go Motswalo wo o Hlokago HIV: EMELELA. DIRA SE SENGWE. ŠIRELETŠA. LEFEELA – e lego boipiletšo bja go dira se sengwe ka setšhaba. Morero wa ngwaga wo o hlohleletšwa ke morero wa Letšatši la Lefase la AIDS la Mokgatlo wa Dinagakopano la 2011 go fihla ka 2015 ke: “Go hwetša Lefela”. Letšatši la Lefase la AIDS la 2015 le tla tšwela pele go maatlafatša poledišano mabapi le bogoboga le kgethologanyo, le go hlohleletša ditšhaba go arabela le go oketša phihlelelo go ditirelo tša thibelo, tša kalafo le tša thekgo.

Tiragalo ye kgolo ya go keteka Letšatši la Lefase la AIDS le tla swarwa ka KwaZulu-Natal. Yona e tla kwalakwatša morethetho wa go swara ga Afrika Borwa ga Khonferentshe ya bo 21 ya Boditšhabatšhaba ya AIDS ka Inkosi Albert Luthuli International Convention Centre ka Durban go tloga ka la 17 go fihla ka la 22 Mosegamanye 2016. Afrika Borwa e tšwela pele go ba le kgatelopele ka twantšhong kgahlanong le HIV le AIDS, ka ge e katološitšwe lenaneo la yona la kalafo ya HIV, gomme le batho ba bangwe ba dimilione tše tharo bao ba alafšago ka dianthiretherobaerale, go realo e tšwela pele go fokotša phetetšo ya mme go ya go ngwana le go bega dilaetši tša bolwetši bja mafahla tšeo di kaonafetšego.

3.6 Kabinete e hlohleletša maAfrika Borwa go kgatha tema ka ditiragalong tša Izimbizo tšeo di rulagantšwego nageng ka bophara nakong ya Beke ya Bosetšhaba ya Nepišo ya Imbizo go tloga ka la 30 Dibatsela go fihla ka la 6 Manthole 2015. Sefala se se kgontšha badudi go rerišana le maloko a Khuduthamaga.

Beke ya Bosetšhaba ya Nepišo ya Imbizo e tla swarwa ka fase ga morero wa: “Mmogo re iša pele Afrika Borwa” gomme e tla sedimoša ditšhaba ka ga phethagatšo ya mmušo ya Leano la Dintlha tše Senyane ka nepo ya go hlohleletša kgolo ya ekonomi le go hloma mešomo, ka ge go hlalošitšwe ke Mopresidente Zuma ka Polelong ya Maemo a Naga ya 2015. Maloko a Kabinete le ona a tla šomiša sebaka go hlohleletša go kgatha tema ga setšhaba go rarolla mekgwa ye e sego ya loka ye e fapafapanego ya setšhaba, go akaretšwa merero ye e amanago le dikgaruru kgahlanong le basadi le bana. 

3,7 Manthole ke Kgwedi ya Poelano gomme Afrika Borwa e tla keteka Letšatši la Poelano ka la 16 Manthole ka Port Elizabeth, ka Kapa Bohlabela ka fase ga morero wa: “Re fediša karoganyo: Re aga setšhaba se se swanago sa Afrika Borwa re lebile mmušong wa tlhabollo ya bosetšhaba”. Kgwedi ye e na le bohlokwa bjo bo kgethegilego go setšhaba ka ge e tšwetša pele poelano, khutšo le tirišano ya setšhaba tšeo ka go tšona mmušo wa temokrasi o theilwego go tšona.

Kabinete e hlohleletša maAfrika Borwa ka moka go šomiša kgwedi ye go kopana ge setšhaba se tšwela pele go šoma mmogo go aga setšhaba se se kopanego le seo se humilego.

3.8 Kabinete e gopotša balefametšhelo bao ba sego ba hlwa ba romela dipampiri tša bona tša metšhelo tša ngwaga wa ditšhelete wa 2014/15 gore letšatši la mafelelo la go di romela ke la 27 Dibatsela 2015. Kabinete e leboga balefametšhelo ka moka ge ba dirišane le mmušo go aba ditirelo tše di hlokegago kudu tšeo di thušago go kaonafatša maphelo a dikete tša ditšhaba nageng ka bophara.

3.9 Kabinete e lebogiša Kgoro Lefelo la Taelo ya Dikgaruru tše di Lebišitšwego go Bong la Kgoro ya Tlhabollo ya Leago (GBVCC) ge le thopile Sefoka sa Lefaseng ka Bophara sa Lefelo le Lekaone la Kamano le Batho ka Las Vegas, USA, ka Labone la 5 Dibatsela 2015. GBVCC ke senthara ya megala ya go šoma bošego le mosegare leo leo le diretšwego fela go aba thekgo le keletšo go batšwasehlabelo ba dikgaruru tše di lebišitšwego go bong. Ye ke kanegelo ye nngwe ya katlego ye e laetšago mmušo wo o kgathalago wo o sa šikinegego ge o le ntweng ya go thibela dikgaruru tše di lebišitšwego go Bong.

3.10 Kabinete e lebogiša Eskom ge e šomile matšatši a 100 ka ntle le go tima kabo ya mohlagase (go phuhlamiša kabo ya mohlagase). Eskom e fihleletše motheo wo ka Labobedi la, 17 Dibatsela 2015. Kabo ya mohlagase ye e sa kgaotšwego ya matšatši a 100 ga e šišinye gore re swanetše go ba le boitshepo re itebale. Sebakeng seo, Kabinete e ipiletša go ditšhaba go tšwela pele go obamela ditsenogare tša poloko ya mohlagase.

3.11 Kabinete e lebogiša batho ba maina a bona a šišintšwego ka go Difoka tša Dipapadi tša Afrika Borwa tša 2015 tšeo di tlago swarwa ka la 22 Dibatsela 2015 ka Sand du Plessis Theatre ka Mangaung, Foreisetata. Difoka tše, tšeo di swarwago ka fase ga morero wa: “Bokgoni ga se go ba yo mokaone kudu; ke go dira ka fao o ka kgonago ka gona”, di keteka mengwaga ye 10 ya go reta le go hlompha batho le dihlopha tšeo di šomilego gabotse ka go bobedi ka ntle ga lebala le ka gare ga lebala. MaAfrika Borwa a hlohleletšwa go thekga tiragalo ye ka go bouta Naledi ya Dipapadi ya Ngwaga ya 2015.

4. Maemo a Kabinete go Merero ye Bohlokwa Seemong sa Bjale

4.1 Kabinete e bile le Mopresidente Zuma le setšhaba sa boditšhabatšhaba ge a kgalema gabogale ditlhaselo tša botšhošetši tšeo di sa tšwago go hlaga tšeo di diragetšego ka Beirut (Lebanon), Baghdad (Iraq), Yola  (Nigeria) le Paris  (France), tšeo di feleleditšego ka go lahlega ga maphelo ao batho bao ba se nago molato le go senya ga thoto. Afrika Borwa e tiišitše ge e kgalema ditlhaselo ka moka tšeo di lebišitšwego go badudi bao ba hlokago molato gomme e bušeletša maemo a yona a gore botšhošetši, bo ka be bo le ka mokgwa ofe goba ofe go tšwa khutlong efe goba efe, bo ka se hlohleletšwe.

4.2 Kabinete e thekga ditiro tša Komiti ya Mmušo ya Ditona  ka ga Tlhaelelo ya Meetse le Komelelo go fokotša diabe tša komelelo le go ipiletša go ditšhaba go šomiša meetse ka go a seketša ka nepo ya go šireletša kabo ya meetse. 

Mmušo a tlaleleditše ka R96,6 milione go tšhelete ya mathomong ya R352,6 milione yeo e bego e beetšwe thoko go thekga masolo a kimollo ya komelelo a ka nageng. Se se akaretša go reka ga dilori tše 45 tša ditanka tša meetse tšeo di tlago aba meets mafelong ao a amegilego, ya go šomišetšwa go epa dipetse tša meetse le go di tsošološa, go boloka meetse le Taolo ya nyakego ya meetse, le kaonafatšo ya methopo ya meetse.

Kgoro ya Tlhabollo ya Dinagamagae le Peakanyoleswa ya Naga e tla re ka dileteng tšeo di amegilego gampe ya dumelela go hudušwa ga diruiwa go ya nageng ye e lego ya mmušo fao go sa nago le mafulo a makaone. Godimo ga fao Kgoro ya Pušo ya Tirišano le Merero ya Setšo e kgokagane le Dimeyara go phethagatša magato a mehutahuta a go boloka meetse ka fase ga tlhahlo ya Kgoro ya Meetse le Kelelatšhila.

Se se akaretša go tsebagatša mellwane ya meetse; go hlokomela go obamela mellwane ya meetse; go diriša dikotlo fao go hlokagalago; go bea pele tokišo ya diphaephe tše di dutlago meetse; go tšwetša pele ditheknolotši tša tšhomišo ye kaone ya meetse tša go swana le disistene tša go folaša meetse ka bonnyane; go gelela meetse a pula le go šomiša meetse a ditšhila go nošetša.

4.3 Mopresidente Jacob Zuma o etile pele baromiwa ba Afrika Borwa go leba Samiting ya Baetapele ba G20 ka Antalya, Turkey go tloga ka la 15 go fihla ka la 16 Dibatsela 2015. Morero wa samiti ye e bile go akaretša bohle, peeletšo le phethagatšo. Afrika Borwa ke ye nngwe ya dinaga tše 51 tšeo di saennego Tumelelano ka ga Neelano ya Maitirišo ya Tshedimošo ya Metšhelo ka Berlin, Jeremane ka Diphalane 2015. Dinaga tše di tla thoma go neelano ka tshedimošo ka 2017, yeo e tlago thekgwa ke melao yeo mo lebakeng le e lego pele ga Palamente. Mopresidente Zuma o amogetše go phethwa ga dikokwane tše 15 tša tiro tša G20/protšeke ya Mokgatlo wa Tirišano ya tša Eonomi le Kgogolego ye e Theilwego go Tlhabollo le Tšhutišo ya Letseno, tšeo di bego di le tše bohlokwa go netefatša gore go ba le toka le go šireletša motheo wa letseno la ka Seleteng sa ka Borwa bja Afrika.

4.4 Maloko a Lekgotla la Ditona tša Mokgatlo wa Metšhelo ya Dithoto wa Borwa bja Afrika (SACU) a kopane ka la 11 Dibatsela 2015 ka Windhoek, Namibia ka letšatšing la pele ga leo go tsebagatšwago semmušo dikantorokgolo tša SACU le dipoledišano tše di bego di se tša semmušo ka Dihlogo tša Mebušo le Mmušo tša SACU. Lekgotla le le šomišitše sebaka sa go nagana ka ga kgatelopele ye e dirilwego ka ga Leano la Dintlha tše Senyane go tloga ka kopano ye e fetilego gomme la gatelela boikgafo bja lona gape go SACU. Lekgotla le dumelelane gore SACU e swanetše go dira go feta go abelana ka tša letseno go ya go lesolo la tlhabollo leo le tlago thekga kopanyo ka seleteng. Maloko a amogetše gape leano le thulaganyo ya mošomo go lebilwe samiting yeo e tlago swarwa ka Phupu 2016.

4.5 Kabinete e amogela Dipoelo tša Tekodišišo ya ditšhelete 2014-15 tša mmušo wa bosetšhaba le wa profense. Pego e laetša kaonafalo ye e swanago go makala ao a nyakilego go ba ka moka ga ona a dipoelo tša tekodišišo ya ditšhelete tša mmušo wa bosetšhaba le wa profense. Se se laetša phetogo ye e nanyago ye e lebilego go pušo ye kaone le taolo ya ditšhelete ye e kwagalago le go maatlafatša leswa pušo ye kaone ka ge dikgoro tše ntši di hweditše tekodišišo ya dipuku tša tšhelete yeo e hlokago bosodi. Kaonafalo ye e tšwela pele go laetša gore mmušo o šoma gaboima go netefatša gore go ba le boikarabelo ka mafapheng ka moka a mošomo wa ona.

Ka ntle le kaonafalo ye, mmušo o tšere sephetho sa go tšwela pele go thekga dikgoro tšeo di hweditšego dikutollo tšeo di sa kgahlišego le go netefatša gore tshepedišo ya mmušo ka moka e šoma kudu.

4.6 Kabinete e amogela go thwalwa ga Moahlodi Mandisa Muriel Maya bjalo ka Motlatšamopresidente wa Kgorotsheko ya Godimo ya Boipelaetšo go latela karolo ya 174(4) ya Molaotheo wa Rephabliki ya Afrika Borwa wa 1996 le Moahlodi Nonkosi Zoliswa Mhlantla bjalo ka moahlodi wa Kgorotsheko ya Molaotheo go latela Karolo ya 174(3) ya Molaotheo wa Rephabliki ya Afrika Borwa wa 1996 ka go latelana.

Go thwalwa ga baahlodi ba go maatlafatša boikgafo bja Afrika Borwa go tekatekano ya bong maemong a godimodimo ebile go tšwetša pele phetošo ya tirelo ya molao. Kabinete e lebogiša baahlodi ba ka bobedi le go ba lakaletša mahlatse le mahlogonolo ge ba phethagatša maikarabelo a bona a bohlokwa ka go Tirelo ya molao ya Afrika Borwa.

4.7 Kabinete e lebogiša Ngaka S’thembile Ngidi yo a dirilego histori ge a alogile dithutong ka Kholetšheng ya Bongaka ya Afrika Borwa bjalo ka mosadi wa mathomo wa mothomoso wa go a ngaka ya go alafa dikutu ka KwaZulu-Natal gomme ebile ke yena wa bobedi ka nageng.

4.8 Kabinete e reta Modiradifilimi wa Afrika Borwa Reina-Marie Loader yoo filimi ya gagwe ya kanegelo ya ditiragalo tša makgonthe ye e bitšwago ‘Horn’ e hweditšego difoka tše ntši, go akaretšwa go kgethwa ka go Difoka tša Pabalelo ya Ditšhukudu tša 2015 ka Mosegamanye ka go Legoro la Temošo ye Kaone, Thuto le Thušo ya Mašeleng, le ge e thopile sefoka sa Filimi ye Koanekaone ya Pabalelo ka Moketeng wa Difilimi tša Boditšhabatšhaba tša 2015 ka New York City, USA.

4.9 Kabinete e lebiša mahloko a yona go ba lapa le bagwera ba Motlatšatona ya Kgoro ya Meetse le Kelelatšhila, Mohumagadi Pamela Tshwete, ge a lahlegetšwe ke mmagwe, Mme Ruth Nomzi Zondeki.

4.10 Kabinete e lebiša mahloko a yona go mmušo wa New Zealand, ba lapa, bagwera le Yunione ya Rakbi ya New Zealand ka ga tahlegelo ya naledi ye e bego e na le bokgoni kudu, Jonah Tali Lomu, yo a dirilego seabe se segolo go papadi ye.

5. Bao ba thwetšwego mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

5.1 Katološo ya Konteraka ya Morena Maswahle Diphofa ka mengwaga ye mehlano – bjalo ka Molaodipharephare (DG): Kgoro ya Tirelo le Taolo ya setšhaba.

5.2 Katološo ya Konteraka ya Mohumagadi Nonkululeko Sindane ka dikgwedi tše lesomepedi – bjalo ka DG: Kgoro ya Toka le Tlhabollo ya Molaotheo.

5.3 Morena Livhuwani Tommy Makhode bjalo ka Motlatšamolaodipharephare (DDG): Peakanyo ya Dihlongwa le Thekgo ka go Kgoro ya Mahlale le Theknolotši.

5.4 Morena Rory Gallocher bjalo ka Mohlankedimogolophethiši (CEO) wa Tirelotaolo ya Kago ya Dintlo tša Setšhaba.

5.5 Ngaka Pradish Rampersadh bjalo ka Molaodiphethiši wa Lekgotla la Afrika Borwa la Diphrofešenale tša Mahlale a tša Tlhago.

5.6 Morena Mark Barnes bjalo ka CEO wa Tirelo ya Diposo ya Afrika Borwa.

5.7 Lekgotla la Pankatlhabollo ya Borwa bja Afrika:

1. Morena Jabulani Philip Moleketi – (o thwetšwe gape ebile ke Modulasetulo);
2. Morena Msokoli Frans Baleni – (o thwetšwe gape ebile ke Motlatšamodulasetulo);
3. Mohumagadi Martie Janse van Rensburg – (Molaodi yo e sego wa Khuthamaga);
4. Mohumagadi Malijeng Theresa Ngqaleni – (Molaodi yo e sego wa Khuthamaga); le
5. Mohumagadi Kameshni Naidoo – (o thwetšwe gape bjalo ka Molaodiphethiši).

5.8 Lekgotla la Mokgatlo wa Inšorentshe ya Dikotsi tše di Kgethegilego:

1. Mohumagadi Margaret Octavia Ndlovu – (o thetšwe gape ebile ke Molaodi yo e sego wa Khuduthamaga); le
2. Mohumagadi Bulelwa Mnkangisa – (o thetšwe gape ebile ke Molaodi yo e sego wa Khuduthamaga).

Dipotšišo:
Mohumagadi Phumla Williams (Seboleledi sa Kabinete sa Motšwaoswere)

Mogala: 083 501 0139