Ungasenza bunjani isibawo somsebenzi emNyangweni womBuso
Iinkhala zemisebenzi eminyangweni yelizwe loke neyeemfunda zizaliswa ngokuqatjha abasebenzi esele basebenzela umbuso namkha ngokukhutjhwa kweenkhala zomsebenzi khona abantu abangasebenzi emiNyangweni yomBuso bazakukghona ukufaka iimbawo. Iinkhala zeenkhundla eziphezulu, isib. imisebenzi yabaphathi abaphezulu, kufanele zikhangiswe ezingeni lelizwe ngaphakathi nangaphandle kwemiNyango yomBuso.
Ukuya ngokomthetho iinkhala zemisebenzi zikhangiswa mNyango wezabaSebenzi bakaRhulumende nokuPhatha (i-DPSA) kuSekhyula yeenKhala zemiSebenzi yomBuso qobe yiveke.
ISekhyula yeenKhala zemiSebenzi yomBuso ibikela abasebenzi ngeenkhala zemisebenzi yemiNyango yomBuso. Abantu abangasi basebenzi emiNyangweni yomBuso kodwana abanekareko eenkhundleni ezikhangisiweko kufanele babuzisise qangi emnyangweni okhangisako kobana bangazithumela iimbawo zomsebenzi na. Imininingwana yokuthintana yomnyango okhangisako iyatholakala kuSekhyula.
Eminye iminyango njengewezokuVikela ungahle ukukhombele bonyana uhlahlutjwe ngokwezamaphilo ngaphambi kobana baqunte ngesibawo sakho.
Okufanele ukwenze
- Khupha kubunzinzolwazi bese ulizalise i-Foromo le-Z83 (lesiBawo somSebenzi). Ungafumana iforomeli kinanyana ngiwuphi umnyango welizwe namkha wesifunda.
- Namathisela imininingwana yeziqu zakho (i-CV). Umnyango ungakukhombela bonyana unamathisele amakhophi weziqu zakho zefundo aqinisekisiweko, umtlolo kamazisi neminye imitlolo ethintene nawe. Sikhombela bona ufundisise umkhangiso uzwisise lokho ekufanele ukunamathisele.
- Thumela iforomo lakho le-Z83 elizalisiweko kunye neminye imitlolo efunekako esiphandeni esitlolwe emkhangisweni.
- Kungenzeka, ngokuya ngekambiso yomnyango othintekako, uthole incwadi ethokoza ukufika kwesibawo sakho.
Kuthatha isikhathi esingangani?
Ikambiso yokuhlunga nokuqatjha iyehluka kuya ngokweminyango, kodwana umnqopho kuqeda umsebenzi lo esikhathini esifitjhani ngokukghonakalako.
