Diyunione tša bašomi le mekgatlo ya bengmešomo e ka dira dikgopelo go hlama dikhansele tša ditherišano mešomong.
Dikhansele tša ditherišano mešomong di swaragana le dikwanelo tša batho ka moka mešomong, ebile di šogašogana le dikgogakgogano tša bašomi le go hloma ditlamo tša go fapafapana mešomong le gape go ntšha sa mafahleng godimo ga dipholisi le melao ya bašomi.
Romela kgopelo ya gago ya boingwadišo bja khansele ya ditherišano mešomong (Application for Registration of Bargaining Council, Form LRA3.3) go The Registrar of Labour Relations, Department of Employment and Labour, Private Bag X117, Pretoria, 0001.
Khansele efe goba efe ya ditherišano tša bašomi e ka tšea sephetho sa go gahlana goba go bopa ngatana ye tee le khansele goba dikhansele tše dingwe tša ditherišano tša bašomi. Morago ga ge dikhansele tšeo di gahlanego go bopa ngatana ye tee di ngwadišitšwe, Morulaganyimogolo yo a emetšego Kgoro ya Mešomo le Bašomi o tla phumola boingwadišo bja mathomo bja ka thoko go tšwa ka mahlakoreng ka moka a dikhansele tšeo bjalo ka ge di be di sa ikeme ka noši nakong ye fetilego.
Romela kgopelo ya gago ya go gahlana goba go bopa ngatana ye tee ga dikhansele tša ditherišano tša mešomong (Application for Registration of Amalgamated Bargaining Council, LRA3.11) go The Registrar of Labour Relations, Department of Employment and Labour, Private Bag X117, Pretoria, 0001.
Go hwetša tshedimošo ka botlalo ikgokaganye le Kgoro ya Mešomo le Bašomi.
