1. Ubujamo beKhabinethi ngeendaba eziqakathekileko ezenzeka esikhathini sanje
1.1 Ikhabinethi yamukele ukuhlonywa tjhatjhalazi komgadangiso wesithandathu weenKomba zeTuthuko nguNgqongqotjhe wezokuTjheja ukuSebenza nokuHlunga nge-Ofisini kaMengameli . Njengombana isitjhaba silungiselela ukugidinga imiNyaka ema-20 yeKululeko, amaSewula Afrika kufanele azikhakhazise ngokuthi ipilo seyitjhuguluke yaba ngcono ukusukela ngonyaka we-1994.
Iinkomba zitjengisa ukuba ngcono kwezinto emikhakheni eqakathekileko begodu khonokho zitjengise ifuneko yomsebenzi obudisi okusafanele wenziwe khona kuzakuqalanwa neentjhijilo ezingapheliko. Ngaphezu kwalokho, iinkomba lezi zakhuthaza ikulumopikiswano emayelana neentjhijilo inarha yekhethu eqalene nazo begodu zibe matshwayo azakusetjenziswa ekhambeni lethu letuthuko kezehlalakuhle nezomnotho.
1.2 IKhabinethi ibuke abomasipala abama-41% abali-(115) abafumene iintatimende zeemali ezinganamatshwayo wokumbi ekuhlolweni kweencwadi zaka-2011/12. Ikhabinethi ibuye yemukela netuthuko eyenziwe bomasipala abama-21 abagade bafumene imibiko yeemali engakarisiko enyakeni ogadungileko.
Ikhabinethi ithabela umsebenzi womHloliincwadi Zombelele wokusiza abomasipala ukobana bathuthuke ngelwazi lokuphatha. Ithabele nokuzibophelela koburholi babomasipala ukuthi buzokusebenza ngcono emikhakheni etshwaywe mHloliincwadi Zombelele.
1.3 IKhabinethi ithokoze woke amaSewula Afrika ngokusekela kwawo iLanga likaNelson Mandela lezemiDlalo namaSiko elasingathwa ngomnqopho wokusiza iphrojekthi yesiBhedlela sabeNtwana i-Nelson Mandela. AmaSewula Afrika ayakhuthazwa bona aragele phambili nokusebenza emiphakathini begodu abambisane norhulumende ekuthuthukisweni kwamaphilo wezakhamuzi ngomnqopho wokufezekisa iimfiso zikaMandela ezenza bona anikele ngipilwakhe.
1.4 IKhabinethi itjheje isaziso ngekhambo elizako likaMengameli uJacob Zuma lokuya eRiphabhliki ye-Russia. Lapha azabe akhambele khona umHlangangano wamaZwe ama-20 (G20) e-St. Petersburg mhlana ama-5 ukuya nakasi-6 kuKhukhulamungu 2013 njengencenye yokwenza ngcono ikareko yezepolitiki nomnotho weSewula Afrika.
ISewula Afrika iragela phambili nokusekela i-ajenda yetuthuko yamazwe we-G20 ethuthukisa ukunzinza komnotho wephasi okukhulisa ukuvulwa kwamathuba wemisebenzi.
1.5 IKhabinethi ibuke umhlangano wokuthoma womKhandlu wamaBhizinisi we-Brazil, Russia, India, China neSewula Afrika (i-BRICS), owenze abarholi bamabhizinisi bamazwe la bahlangane eSewula Afrika. Umhlangano lo gade ukhanjelwe barholi bamabhizinisi abaziwako bamazwe ali-19 we-Afrika.
1.6 IKhabinethi yamukele isiqiniseko esinikelwe kuForamu yaqobe ngunyaka ye-12 yomThetho wokuHluma kwamaThuba we-Afrika (i-AGOA) skuvuselela i-AGOA ngaphambi kokuphelelwa sikhathi ngonyaka wee-2015. I-AGOA isize i-Amerikha neNarhakazi ye-Afrika okube sisekelo sokukhula kwetjhebiswano lemikhulumiswano yamazwe amabili ekuyiSewula Afrika ne-Amerikha.
ISewula Afrika ikholwa ukobana i-AGOA inikela itlhatlha elifaneleko lokwakha ukurhwebelana okuqinileko nokunenzuzo mahlangothi womabili kuqinise netjhebiswano lokutjalwa kweemali nokusebenzisana phakathi kwe-Amerikha neNarhakazi ye-Afrika ngokunabileko.
1.7 Njengencenye yokugidinga kwelizwe loke iNyanga yabaFazi, uSekela Mengameli uKgalema Motlanthe uzakuvakatjhela isabelo seGombani, esingaphasi koMasipala we-Mutale, eLimpopo ngelesiHlanu nakama-23 kuRhoboyi 2013, lapha ayokunikela khona umphakathini iinkumba. Abomma be-Gombani bazibandakanya ngokuzeleko ekwakhiweni kweenkumbezi.
1.8 UNgqongqotjhe wezokuVakatjha uzakuhloma iNyanga yezokuVakatjha nakama-28 kuRhoboyi 2013 e-Amanzingwe Lodge, e-Hartebeespoort, ngaphasi kommongo othi: “Amanzi ayaThabisa.”
Njengencenye yehlelo lenyanga yabafazi kuzakubanjwa umKhangiso weliZweloke wamaBizelo kezokuVakatjha e-International Convention Centre eseMonti phakathi kwangomhla ali- 19 ukuya nakama-21 kuKhukhulamungu 2013 lapha kuzabe kukhangiswa ngamathuba wemisebenzi ebubulweni lezamavakatjho elikhulako esele liqatjhe amaSewula Afrika angaphezu kwesiquntu sesigidi.
1.9 IKhabinethi itjhejile ukobana uNgqongqotjhe wezokuThuthukiswa kweeNdawo zemaKhaya nokuBuyekezwa kweNarha uzakunikele ngokomthetho iinkumba ezima-70 kubazuzi be-District Six, ngoMgqibelo nakama-24 kuRhoboyi 2013. Lokhu kwenzeka njengengcenye yomzamo wokulungisa umthelela omumbi womThetho weeNarha zabaNzima wonyaka we-1913 owenza bona iinkulungwana zabantu abanzima basale banganamakhaya nenarha.
1.10 IKhabinethi ibuye godu yakhulumisana ngeendaba ezivele kuNtumba yeKhabinethi eyaziwa nge-Lekgotla ebegade ibanjwe nakali-13 ukuya nakali-15 kuRhoboyi 2013. UNgqongqotjhe u-Rob Davies ukhona ukobana azokwazisa iKhabinethi ngeenqunto ezathathwako.
Imibuzo inganqotjhiswa ku: Phumla Williams (umJaphethe womKhulumeli weKhabinethi)
Inomboro yokuthintana: 083 501 0139
